Egapadduwa dhawene, mulogo onofwanyela wona wi matelo a wale ahigoma, aba maswa anolaba. Wi ninonelemo deretu sabwa ya makani aba ndoweni none elogile Yezu sabwa ya omwalana vina otela wili.

Va Mateu 19:9, Yezu ohiloga mwaha mmodha onattukulela atelani omwalana. Iyene ologile dhahi: “Ddinouwaddelani wi ommwalana na mwadhiye, ehili mwaha wa oraruwa, amutela muyana mwina onolupa matelo.” Mwa ejuwene, ninosunzamo dhilobo bili (1) Bibilia onloga wi mwaha mmodha onattukulela atelani omwalana mararuwo (2) mulobwana ommwalana na mwadhiye se muladdu onrumeliha Bibilia nanda amutela muyana mwina onoraruwana. *

Koddi mazu a Yezu afuna atapulele wi mulobwana onkosa mararuwo vina ommwalana na mwadhiye ohifuruleya mowiwanana na magano a Bibilia wi atele wili? Kaiye mwenemo. Mulobwana onlupa matelo, mwadhiye ohina muladdu ohikana ofuru womulevelela obe nne. Akala iyene onosakula ohimulevelela badhowa o registo ofudhiya matelo awene anomwalana, mwa venevo ahikana ofuru wotela obe oteliwa wili.

Enodhaga opadduwa, muyanaya ohina muladdu ogana omulevelela mamune wi akalevi vamodha. Ki akala mamune kanrumela, onodidelavi wi amwalane? Vowi mwadhiye oli womala-nawale wi amulevelele vina onofunavi okala na iyene, mamune kana ofuru wotela wili mowiwanana na Bibilia. Akala onodidelavi omutela muyana mwina oku ahina ofuru wa okosa ejuwene onolupa wili matelo, egapadduwa elobo ninga ejuwene anddimuwa a mmulogoni anele omugilatiha wi attonge makaniya.—1 Kor. 5:1, 2; 6:9, 10.

Ki akala mulobwana onotela wili oku ahifuruleyile mowiwanana na magano a Bibilia? Mulogo onfwanyela wona dhavi matelo awale vina matelo maswa? Matelo awale anolabavi mowiwanana na Bibilia? Mwadhiye ohina muladdu ohikana ofuru womulevelela obe omuttiya? Koddi mulogo onofwanyela wona matelo aba maswa ninga olupa matelo?

Wale, iyo nanonelamo wi matelo maswa oniwa ninga olupa matelo akala mwiyana woroma wattiyiwe kana muladdu woraruwa, wahikalawovi vina kateliwe. Mbwenye, Yezu kalogile sabwa ya muyana wahana muladdu, mulogiliye sabwa ya omwalana vina otela wili. Ottiya ejo iyene ologile wi mulobwana onimmwala mwadhiye vahili muladdu mowiwanana na Bibilia agamutela muyana mwina onolupa matelo. Bili dhawene, omwalana vina omutela mwiyana mwina, onogomiha matelo a wale.

Mulobwana agammwala mwadhiye amutela muyana mwina, mwiyana wawale kanfwanyela omulevelela obe ohimulevelela. Sabwani iyene kanazuzumele vina omulevelela obe ohimulevelela. Ottiya ejo, mukalelo onfunaga wona mulogo  matelo maswa kuniwanana akala mwiyanaya omwaliwe, ohiteliwa wili olokwa obe akala okosile mararuwo *

Yotagiha etanalelihu ovanenevi, mulobwanaya wile olupa matelo nomala bamwalana na mwadhiye. Ki akala mulobwana kalupile matelo ahinatti ommwala mwadhiye? Mbwenye okosile ejuwene mmaleliye ommwala mwadhiye nomala bamutela muyana mwina masiki mwadhiyeya bamalile omulevelela? Esi dhetedhene dhinoniha wi, ommwala mwadhiye vina omutela muyana mwina, olupa matelo. Matelo maswa anolaba mowiwanana na ponto de vista jurídico. A Sentinela 1 de Fevereiro de 1980, nikuku 32, ohitapulela makani aba dhahi: “Iyene ovano ohita matelo mena kaneyelele matelo abale a wale sabwani matelo a wale ahigoma na muladdu woraruwa vina matelo maswa akosiliye.”

Ononihedhiwamo oku oswa, kintapulela wi ovano Mukristu onofwanyela ottiya wona matelo ninga elobo yohirihiwa obe onege wi olupa matelo kaiye yoddawa enddimuwa. Akala mulobwana onommwala mwadhiye vahili muladdu ononiha Bibilia wi amwalane vina onomutela muyana mwina se ofuruleya mowiwanana na Malamulo, anddimuwa a mmulogoni anofwanyela omugilatiya wi alogele makaniya. (Vina akala muyanaya omuteliliye murogora, iyene vina onofwanyela ogilatihiwa na anddimuwa a mmulogoni wi alogele makaniya.) Masiki matelo maswa ahifiyedhaga woniwa ninga olupa matelo, mulobwanaya okosile ejuwene kanfwanyela ovahiwa ettomo mmulogoni mwa vyaka dhinjene mpaka abali a mmulogoni oroma omuriha wili. Ahinatti ovahiwa ettomo mmulogoni anddimuwa a mulogo anoroma otanalela mukalelo onfwanyeya muyana omuttiyiliye vina akala onodhowavi asapelaga anaye.—Mal. 2:14-16.

Nihidduwalaga esile dhiniteya sabwa ya omwalana vina matelo maswa ahiniwanana na magano a Bibilia, Akristu anofwanyela okala a malago vina omutagiha Yehova modhela wonaga matelo ninga elobo yoriheya.—Koh. 5:4, 5; Aheb. 13:4.