Oddubela nipikirelo “nohivegana ninkosa muttu, ninonihiye wi onele wakwaniha dhologa dhaye, amukosaga Mulugu . . . ninga munamoona wa mazu aye.” Oddubela oku dila dhina onkosiwa na ologa obe oleba.

Attu ena anona ninga wi kili yofuneya oddubela sabwani Yezu ohiloga dhahi: “Kamuddubelele elobwene . . . Wakula wenyu okalege ‘Ndde’ akala pumwenemo, ‘Nne’ akala munokodda; empitta ejuwene, jamwiddani.” (Mt. 5:33-37) Yezu wanziwa wi Nlamulo na Mizé nanloga wi ana Izrayel anfwanyela oddubela mowiwanana na makaniya vina emeleli ororomeleya a Mulugu ahikosa ejuwene. (Wita 14:22, 23; Obud. 22:10, 11) Iyene wanziwa wi Yehova wanddubela. (Aheb. 6:13-17) Nona Yezu kafuna ologa wi muttu kanfwanyela oddubela. Ottiya ejo, iyene wafuna aloge wi kiyali yapama muttu oddubelelaga elobo-elobovi. Iyo nakwanihedhege esile dhiddubelilihu sabwani jijuwene ennifunana Yehova.

Ovano, onakose dhavi ogakumbirhiwa wi oddubele? Vamaromo, onofwanyela otanalela akala onele wakwaniha ejileya eddubeleliwe. Ogahikane ebaribari, egahikala ya malago ohiddubela. Sabwani Nzu na Mulugu ninloga dhahi: “Enokala ohipikirela elo, opitha opikirela, ohivirihagamo.” (Koh. 5:4) [Koh. 5:5 Tradução do Novo Mundo] Ogamala, otanalele malago a mBibiliani aniwanana na yoddubelaya mwavenevo ofwareyogana yawo eniwanana na mubuwelo wawo woswagihiwa. Magano gani a mBibiliani anawodhe wukamihedha?

Dhoddubela dhina dhinowiwanana na ofuna wa Mulugu. Motagiha, Anamoona a Yehova agalebihaga matelo anopikirelana. Opikirelana oku mukalelo mwina wa oddubela. Mwa abale antelana, anopikirhelana vamentoni va Mulugu na abale anona mateloya wi anele okwelana vina orihana venjene “okalawo wawa wetene.” (Atelani ena txino kanloga mazu ninga abene masiki dhawene anotelana apikirelagana vamentoni va Mulugu.) Vina anokala atelani mpaka okwa wawa. (Wita 2:24; 1 Kor. 7:39) Dhopikirhelana dhinkosiwa vamateloni dhinowiwanana na efunelo ya Mulugu.

Dhoddubela dhina kadhiniwanana na ofuna wa Mulugu. Mukristu webaribari kagarumelile oddubela wi abarele elabo yaye obe okodda okala Munamoona wa Yehova. Okosa eji enogudulana na malamulo a Yehova. Akristu “kankosa mpaddi wa elabo,” nona kankamihedha owanawana wawa vina kandowa okoddoni.—Jo. 15:19; Iza. 2:4; Tia. 1:27.

Dhoddubela dhina dhiniwanana na mubuwelo wa muttu-muttu. Dila dhina nihinatti oddubela, ninofwanyela otanalela ejile elogile Yezu  “mvahegeni Sézari eli ya Sézari, Mulugu eli yaye.”—Lk. 20:25.

Motagiha, akala Mukristu onsasanyiha madukumento anrumeliha wi iyene akalege elabo yina obe pasaporti venevo ozinddiyela wi awodhe okosa ejuwene enofuneya iyene okala oweddeyana. Akala Mukristu onokumbiriwa oddubelela okosa elobo engudulana na malamulo a Yehova, mubuwelo waye oswagihiwe na magano a Bibilia kugamurumelihile okosa ejuwene. Txino alamuleliya anomurumeliha otxinja mazu mang’onovi a dhoddubela dhaye wila ewanane na mubuwelo waye oswagihiwe na Bibilia.

Oddubela mazu atxinjiwe wi ewanane na mubuwelo wawo anowiwanana na gano enfwanyeya va Roma 13:1, enloga dhahi: “Muthu-muthu àkurumuwele abale athomeliwe othonga elabo.” Na mukalelo obo txino Mukristu onowona wi kahiyo elobo yabure oddubelela elobo erumelihile Yehova wi iyo nikose.

Jamakamaka otanalela mubuwelo wawo oswagihiwe na Bibilia akala mudhidhi onddubeliwe alamuleli anowukumbirha ottiddele elobo-elobovi obe ovenyihe mada. Akadda Roma akala masaka a wale otaganyiha na akadda Citas anddubelela masupadda awa ettanaga guru ya mulugu wa koddo wi oniye wila yalogani yali ebaribari. Agregu agaddubelaga annvenyiha mada. Dhawene awene annonelamo wi ehikalawo guru enddimuwa wirimu enona dhotene dhinkosiwa, dhinlogiwa vina anele wakulela vamentoni vaye dhowira dhawa.

Ebaribari wi Mukristu agaddubelaga kigali yofuneya ottiddela elobo-txilobo obe ottiddela ezinddiyelo eniwanana na relijiau yonyengetta. Ki ogakala otribunali nanda okumbirhiwa wi oddubele wikaga nlada nawo vadhulu va Bibilia? Egapadduwa dhawene weyo podi oddubela, sabwani mBibiliani munologiwa emeleli a Yehova ororomeleya addubelile avenyihedhaga mada odhulu. (Wita 24:2, 3, 9; 47:29-31) Mbwenye kudduwale wi ogaddubela weyo onddubela vamentoni va Mugulu, nona dhinalogiwe dhinofwanyela okala dhebaribari. Okale womala-nawale wi wakule na ororomeleya mavuzo anakosiwiwe.

Mandano ehu na Yehova bamakamaka vaddiddi, nona ninofwanyelela otanalela na ofwasa nihinatti oddubelela elobo-txilobo. Nona nikale txenjewa wi ninavoreye mubuwelo wehu. Akala onogana oddubelela elobo okane ebaribari wi onele wakwaniha.—1 Ped. 2:12.