1. Ninvahelani dhowakula mmatugumanoni?

 IYO nindowela nni omatugumanoni? Vamaromo, ninodhowa mmatugumanoni wila nimuttittimihe Yehova. (Masal. 26:12; 111:1) Mwaha mwina bwa olibihana muttu na mukwaye makamaka malabo aba ankalihu. (1 Tes. 5:11) Nigavenyiha nlada vina nivaha yowakula, ninokosa dhilobo esi.

2. Gari gani dhina iyo dha ovaha dhowakula mmatugumanoni?

² Sumana dhotene, iyo ninokana gari ya ovaha dhowakula dhehu mmatugumanoni. Motagiha, omagomo wa sumana, enowodheya iyo ovaha dhowakula epaddi ya Nsumo na Mwang’aneli. Mmatugumanoni a vari va sumana, enowodheya iyo ovaha dhowakula epaddi ya Mafumo Omuyani, ya Nsunzo na Bibilia na Mulogo vina, dhipaddi dhina.

3. Makattamiho gani agadhile onipatta, vina mazu anfwanyeya va Ahebreu 10:24, 25 annikamihedha dhavi?

³ Iyo notene ninofuna vaddiddi omuttittimiha Yehova vina walibiha abali ehu. Mbwenyi nigafunaga ovaha dhowakula, txino ninodhaga okana makattamiho. Ninodhaga wova ovaha dhowakula. Obe nigaziveliwa ovaha dhowakula dhinjidhene mbwenyi kanintonyiwa. Ninawodhe dhavi owanana makattamiho aba? Yowakula ya nivuzo ntti ninofwanya mukartani yalebelile Paulo akadda Ahebreu. Alogaga mwaha wa ttima ya otugumana, Paulo ologa wila awene ela ozuzumela “olibihana muttu na mukwaye.” (Kengesa Ahebreu 10:24, 25.) Nona niganonelamo wi  abali ena anodhaga olibiheya na yowakula eng’onovi envaha iyo, kaninove ovaha dhowakula dhehu. Vina masiki akala kaninatonyiwe dila dhotene dhinfunihu wi nakule, ninela wagalala sabwa ya oziwa wila abali ehu avaha dhowakula dhawa.—1 Ped. 3:8.

4. Dhilobo gani ttaru dhinonihu mwari mwa nsunzo ntti?

⁴ Mwari mwa nsunzo ntti, ninele wona voroma mukalelo onawodhihu olibihana muttu na mukwaye mmulogoni mung’ono mwenemo muli attu ang’onovi anvenyiha nladda wi akule. Vasogorhova, ninele wona mukalelo onawodhihu olibihana muttu na mukwaye mmulogoni munddimuwa mwenemo muli attu enjene anvenyiha nlada wi avahe dhowakula dhawa. Omamalelowa, ninele wona mukalelo onawodhihu walibiha abali na arogora na dhowakula dhehu.

5. Ninawodhe dhavi olibihana muttu na mukwaye nigakala mmulogoni mung’ono?

⁵ Mmulogoni mung’ono obe nikuru, kamuli abali enjene anvenyiha nlada, masaka meena nameddiha wa epaddiya onojedhela mudhidhi mung’onovi wi muttu avenyihe nlada. Sabwa ya ejuwene matugumanoya anodhaga okala ninga anogonela vaddiddi eji enodhaga onikumula. Mwa dhawene txini enfwanyeliwe okosa? Kavilibihedhe ovenyiha nlada dila dhinjene. Ogakosa dhawene, onele wakamihedha ena okana efunelo yowakula.

6-7. Dhilobo gani dhinfwanyeliwe okosa wi onagurumele ogavahaga yowakula?

⁶ Kito akala weyo onogurumela ogavahaga yowakula? Enjene anoviwamo dhahene. Kito onawodhe dhavi ohigurumela ogavahaga dhowakula wi walibihe abalawo?

⁷ Enowodheya weyo olabihedha marhe abudduwile Mmwag’anelini. b Motagiha marhe nimodhana naloga dhahi, ovisasanyedhe deretu. (Gano 21:5) Ogaziwa dhilobodha dhinasunziwe, enele okala yovevuwa ovaha yowakula yawo. Yina ja ovaha dhowakula dhohigonela. (Gano 15:23; 17:27) Ovaha yowakula yohigonela enele wukamihedha ohigurumela ogakulaga. Ottiya ejo, abali anononelamo yowakula yohigonela ottiya yowakula yolapa ena makani owinjiva. Ovaha yowakula yohigonela vina na mazu awo, enele olagiha wi weyo ovisasanyedha deretu vina ohinonelamo makaniya.

8. Yehova onona dhavi ovilibihedha wawo?

⁸ Kito akala masiki buvirihilemo marhe aba onilihu onogurumela ogavahaga yowakula? Kakuluvela wi Yehova onovaha ttima guru enkosiwe ya ovilibihedha okosa mpaka vanwodheliwe. (Lk. 21:1-4) Ovilibihedha kintapulela okosa ejile ehinwodhiwe. (Fil. 4:5) Nona, kakosa yogana enawodhiwe wakwanihedha, vina kamukumbirhe Yehova wila ovahe murima wofwasa. Txino vamaromo yogana enakose weyo ja ovaha dhowakula dhohigonela.

9. Yorutxa gani empadduwa mmulogoni munddimuwa?

⁹ Dhilobodha dhinodhaga okala dhottiyana nigakala mmulogoni mudhalile anamalaleya. Txino abali enjene anovenyiha nlada, sabwa ya ejuwene nameddihaya  kanutonya. Motagiha, murogora dhahi onkuweliwa Danielle, onoziveliwa vaddiddi ovaha dhowakula mmulogoni. c Mwa iyene ovaha dhowakula onokosa mpaddi wa omwebedha Yehova, walibiha abali na arogora, vina enomukamihedha olibiha ororomela waye ensunziha Bibilia. Mbwenyi vamwaleliye mulogo mwina, iyene katonyiwa dila dhotene dhavenyihiye nlada—vina mudhidhi mwina kawodha ovaha yowakula nne modha mmatugumanoni. Iyene ohiloga: “Masaka meena ddakala wosilidhiwene ddubuwelaga ninga ddayelela gari. Movira wa mudhidhi onodhaga wubuwela wi nameddihaya onkosela ofuna.”

10. Ninawodhe dhavi wunuwiha gari ya ovaha dhowakula mmatugumanoni?

¹⁰ Weyo wahiromaga oviwamo dhahene ninga Danielle? Akala pumwenemo, txino weyo onodhaga ohikana efunelo ya ovaha yowakula bugakala ovuruwanavi bahi. Mbwenyi kuttiye otamela ovaha dhowakula. Txini enokamihedhe? Kasasanyedha dhowakula dhawinjiva, ogahitonyiwe omaromo wa matugumano enowodheya ovaha dhowakula dhina vowi ohimala osasanyedha. Ogasasanyedhaga Nsunzo na Mwang’aneli katamela oziwa mukalelo oniwanana ddima modha-modha na mutoma wa nsunzona, dhahene onele owodha ovaha dhowakula dholibiha. Ottiya ejo kavisasanyedhe wi ovahe dhowakula ddima esile dhinloga makani anrutxa otapulelawa. (1 Kor. 2:10) Sabwaya? Sabwani attu enjene kanvenyiha nlada wi akule ddima ninga esi. Kito masiki akala buvirihilemo marhe aba otene, kunwodha ovaha dhowakula? Enowodheya ologa na nameddiha wa matugumanoya ahinatti oroma, wi omwaddele nivuzo nigaziveliwiwe ovaha yowakula.

11. Nlebo na Filipi 2:4 ninnikokomeza okosa eni?

¹¹ Kengesa Filipi 2:4. Murumiwi Paulo ohakokomeza, abali wi eke dhifunelo dha attu ena osogorho wa dhawa. Ninavirihemo  dhavi nikokomezo ntti mmatugumanoni? Mwa ohidduwala wila attu ena anofuna ovaha dhowakula dhahene ninga iyo.

12. Mukalelo gani mwina onalibihe iyo abali mmatugumanoni? (Koona vina foto.)

¹² Weyo ogalogaga makani na akwawo onologa mudhidhi wotene ohattiyaga awene ologa? Nne! Weyo onofuna wila awene vina aloge. Na mukalelo wakakene, mmatugumanoni iyo ninofuna wi abali enjene avahege dhowakula dhawa. Mukalelo mmodha wo walibiha abali ehu bwa wavaha gari yovaha yowakula mmatugumanoni wi onihe nroromelo ninna awene. (1 Kor. 10:24) Ninele woona mukalelo onakose iyo ejuwene.

13. Txini enfwanyela iyo okosa wi attu enjene akane gari yovaha dhowakula mmatugumanoni?

¹³ Elobo modha enfwanyela iyo okosa, ovaha dhowakula dhohigonela, dhahene attu ena anele okana gari yovaha dhowakula. Anddimuwa a mmulogoni na anamalaleya adhile vawale anofwanyela okala yotagiha. Masiki akala dhowakula dhawo kadhingonela, kuloge makani otene ali vaddimani. Ogakula dhotene dhili vaddimani attu ena kanakane yowakula. Motagiha, ddima eji vahivahiwa monelo minli—ovaha dhowakula dhohigonela vina ohiloga dhotene dhili vaddimani. Nona, akala ddi weyo onattonyiwe ninga woromaya wi ovahe yowakula ononamo dhavi ovaha yowakula na monelo mmodha mwa monelo esi minli dhivahiwe?

14. Txini eganikamihedhile woona dila ngasi dhinfwanyela iyo ovenyiha nlada? (Koona vina foto.)

¹⁴ Okale muttu wovipimelela wubuwelaga dila dhinfwanyela weyo wakula. Weyo ogavenyiha nlada dila dhinjidhene, nameddiha wa epaddiya onele oddiddela wutonya weyo bahi masiki akala attu ena kanavaha yowakula. Eji egahattukulela awene okumuwa, battiya ovenyiha nlada.—Koh. 3:7.

15. (a) Txini enfwanyela iyo okosa akala kanintonyiwa wi nivahe yowakula? (b) Nameddiha epaddi onalagihe dhavi wi onowatanala attu otene? (Kang’ana kasha “ Akala Weyo Oli Nameddiha wa Epaddiya.”)

 ¹⁵ Abali enjene agavenyiha nlada mmatugumanoni, enodha opadduwa ohivaha dhowakula ninga mwafunela iyo. Txino nameddiha epaddiya kananitonye nne dila modha. Eji enodhaga onikubanyiha, mbwenyi kaninfwanyela oviwamo dhahene sabwa yohitonyiwa.—Koh. 7:9.

16. Ninalibihe dhavi abale anvaha dhowakula dhawa?

¹⁶ Ogahiwodhe ovaha dhowakula dila dhinjidhene ninga mwafunela weyo ononamo dhavi ofwaseyela ovuruwana dhowakula dha abali ena, omamalelo wa matugumano watamalela sabwa ya dhowakula dhawa? Txino abali anodha olibiheya dhahene ninga egadhilani olibiheya na dhowakula dhigavahile weyo. (Gano 10:21) Watamalela attu ena, mukalelo mwina wolibihana muttu na mukwaye.

17. (a) Amambali anakamihedhe dhavi anawa osasanyedha dhowakula mowiwanana na vyaka dhawa? (b) Dhilobo gani nayi dhinfwanyela muttu okosa agasasanyedhaga yowakula? (Koona vina nota.)

¹⁷ Na mikalelo gani dhina dhinawodhe iyo olibihana mmatugumanoni? Akala weyo ohikana aima, wakamihedhe osasanyedha dhowakula mowiwanana na vyaka dhawa.  (Mt. 21:16) Dila dhina makani orutxa aniwanana na makattamiho a vamateloni na meena anoniwa ninga otota manyazo, anologiwa vamatugumanoni, masiki dhawene txino enele okalawo ddima modha obe bili dhigawodhile anawo ovaha dhowakula. Ottiya ejo omukamihedhe mwanawo ononelamo wi kanatonyiwe dila dhotedhene dhinavenyihiye nlada, dhawene attu ena agatonyiwa ottiya iyene wi avahe dhowakula kanasilidhiwe.—1 Tim. 6:18. d

18. Ninawodhe dhavi ohilogetxa nigavahaga dhowakula? (Gano 27:2)

¹⁸ Notene nihikana ewodhelo ya osasanyedha dhowakula dholibiha dhinimuttittimiha Yehova vina dhinalibiha abali ehu. (Gano 25:11) Dila dhina ninodhaga ovaha yowakula mowiwanana na ejile enipadduweli, mbwenyi ninofwanyela okala pasope wila ninalogetxe vopitta dhinipadduweli. (Kengesa Gano 27:2; 2 Kor. 10:18) Ottiya ejo, dhowakula dhehu dhinofwanyela wiwanana na Yehova, Nzu naye vina, nlogo naye orugunuwa elabo yotene. (Ovuh. 4:11) Akala nivuzo na ddima ninonikumbirha ovaha yowakula mowiwanan na ejile enipadduweli, kavali makani okosa ejuwene. Ddima enfwarela enele ologa makanene aba.

19. (a) Ninapurelemo eni nigatanalaga etene mmulogoni? (Roma 1:11, 12) (b) Weyo onziveleliwa nni ovaha dhowakula mmatugumanoni?

¹⁹ Ebaribari wi kawo magano, a mukalelo wa ovaha dhowakula, mbwenyi iyo notene ninofwanyela ovilibihedha walibiha abali ehu na dhowakula dhehu. Mukalelo mmodha wokosa ejuwene bwa ovilibihedha wakula dila dhinjidhene. Masaka meena iyo ninofwanyela wagalala na gari envahiwihu yowakula vina oziveliwa attu ena agawodha ovaha dhowakula. Nigeka dhifunelo dha attu ena osogorho wa dhehu mmatugumanoni ninowodha olibihana muttu na mukwaye.—Kengesa Roma 1:11, 12.