1-2. Txini enfwanyela iyo okosa oku nijedhega elabo eswa?

 JAPAMA oziwa wi mohigonela elabo eji enele otolotxiwa vina ninele okala mwilaboni eswa. (2 Ped. 3:13) Ebaribari wila iyo kaninziwa mukalelo onadhe elabo eswa. Mbwenyi nihikana ebaribari wila kaninajedhele mudhidhi mwinjene.—Mt. 24:32-34, 36; Mer. 1:7.

² Nijedhelaga dhilobo esi dhotene opadduwa, iyo notene ninofwanyela olibiha ororomela wehu njedhelo na wakela elabo eswa, kintanala mudhidhi olihu mwibaribarini. Sabwaya? Sabwani masiki akala nroromelo nehu nihiliba, ninodhaga wobana. Nona murumiwi Paulo ohiloga wi otowa nroromelo yottega ennigwiha momaguva. (Aheb. 12:1) Wila nroromelo nehu nihobane, ninofwanyela otanalela mudhidhi wotene dhilobo dhinoniha wi mohigonela elabo eswa enele odha.—Aheb. 11:1.

3. Txini enasunze iyo mwari mwa nsunzo ntti?

³ Mwari mwa nsunzo ntti ninele osunza dhilobo ttaru dhinanikamihedhe olibiha ororomela wehu mapikirhelo akosile Yehova: (1) otanalela yobolo, (2) otanalela ewodhelo ya Yehova, vina (3) ozuzumela dhilobo dhomuyani. Omamalelowa ninele woona muselu ologile Yehova na Habakuk mukalelo onlibiha nroromelo nehu ddabuno. Voroma-vene ninele woona wi ninofwanyela olibiha njedhelo nehu na elabo eswa wi niwodhe owanana makattamiho angumanana iyo masaka abano.

 DHILOBO DHINFUNEYA WI NIKANE NROROMELO NOLIBA

4. Dhosakula gani dhiganikoddihile okana nroromelo noliba?

⁴ Malabo otene iyo ninokosa dhosakula dhing’ono obe dhinddimuwa, elobo enanikamihedhe okosa dhosakula dhapama okana nroromelo noliba. Malabo otene iyo ninokosa dhosakula ninga esi: mandano, mavego, masunzo, matelo, okana aima vina mabasa. Egahikala yapama ovivuza: ‘Koddi dhosakula dhaga dhinowoniha wi ddihikana ebaribari wila omagomo oli vakukuvi vina elabo eswa mohigonela enele odha? Obe miyo ddinosakula okosa dhilobo dhahene ninga munkosela attu anloga wi kinwodheya okalawo namukalakala?’ (Mt. 6:19, 20; Lk. 12:16-21) Nigalibiha nroromelo nehu wi elabo eswa eli vakukuvi ninele okosa dhosakula dhapama.

5-6. Ninfwanyelela nni okana nroromelo noliba nigagumanana makattamiho? Kavaha yotagiha.

⁵ Ninofwanyela vina okana nroromelo noliba wi niwodhe okwaranya makattamiho. Txino ninodhaga ofwara-fwariwa, opattiwa eredda ehina murobwe, obe elobo yina ennikumula. Omaromo, ninodhaga wubuwela wi ninele owodha okwaranya makattamihoya. Mbwenyi akala makattamihoya anogonela—paveneva—vanfwanyela iyo okana nroromelo noliba wi niwodhe ovilela vina nidhowegevi nimulabelaga Yehova n’owagalala.—Rom. 12:12; 1 Ped. 1:6, 7.

⁶ Nigagumana makattamiho orutxa ninodhaga oroma wubuwela wi elabo eswa kinafiye. Koddi eji entapulela wi nroromelo nehu nihobana? Kahiye mwenemo. Wi niladdanihe. Nsaka na oridha vaddiddi, iyo ninodhaga wubuwela wi elimwe kinafiye. Mbwenyi masiki dhawene elimwe enele ofiya. Na mukalelo wakakene, nigakala okumuwene ninodhaga wubuwela wi elabo eswa kinafiye. Akala nroromelo nehu ttoliba ninele okana ebaribari wi mapikirelo a Mulugu anele wakwanihedheya. (Masal. 94:3, 14, 15; Aheb. 6:17-19) Nigakana nikuluvelo ntti omulabela wehu Yehova enele ekala elobo yamakamaka mwigumini mwehu.

7. Mubuwelo gani wa bure onfwanyelihu orabela?

⁷ Iyo vina ninofwanyela okana nroromelo noliba wi niwodhe olaleya. Attu enji analaleyihu “miselu dha pama” wi elabo eswa enele odha anubuwela wi muselu obu kahiyo webaribari. (Mt. 24:14; Ezek. 33:32) Mbwenyi iyo txipo kaninfwanyela ottiya wi monelo wa attu aba onipatte. Wi ejo ehipadduwe enofunya olibiha nroromelo nehu. Ninele woona mikalelo miraru dhinanikamihedhe okosa ejuwene.

OTANALELA YOBOLO

8-9. Otanalela yobolo enlibiha dhavi nroromelo nehu?

⁸ Elobo yoroma enanikamihedhe olibiha nroromelo nehu otanalela yobolo. Yobolo nikuluvelo noniha wi Yehova onele wakwanihedha dhipikireliye. Otanalela sabwaya enivahile Yehova yobolo na dhetene dhikosiliye wi mwanaye adhe anikwele, enele olibiha nroromelo nehu wi nipikirelo na okala namukalakala mwilaboni eswa ninele wakwanihedheya. Ninlogelani ejuwene?

⁹ Wi anobole, Yehova ohimuruma mwanaye wokweleya wi adhe velaboni ya vati abaliwe ninga muttu se yottega. Vali Yezu velaboni ya vati, iyene ohipattiwa makattamiho owinjiva. Vasogorhova iyene ohitabutxiwa vaddiddi mpaka okwa. Se waganyedha muttengo opitxile Yehova munddimuwa vaddiddi! Mulugu wehu wokwela  txipo kagattiyile wi Mwanaye adhe velaboni ya vati apiwe wi nikane egumi yaderetu malabo mang’onovi. (Jo. 3:16; 1 Ped. 1:18, 19) Vowila Yehova ohipitxa muttengo munddimuwa vaddiddi iyene onele okosa muli mwetemwene wi nipikirelo na egumi yapama mwilaboni eswa nakwanihedheye.

OTANALELA EWODHELO YA YEHOVA

10. Mowiwanana na Éfeso 3:20, Yehova ona ewodhelo ya okosa eni?

¹⁰ Elobo yanawili enanikamihedhe olibiha nroromelo nehu, otanalela ewodhelo ya Yehova. Iyene ohikana ewodhelo y’ovirihamo dhimpikireliye. Ebaribari wi mwa attu ena njedhelo nokala namukalakala velaboni yavati enkala ninga elobo yohiwodheya. Mbwenyi Yehova ddi Namawodha-wodha. Sabwa ya ejuwene iyene onopikirela dhilobo dhihinwodha attu wakwanihedha. (Job 42:2; Mk. 10:27) Egahikala yohijedheleya wubuwela wi Yehova onopikirela dhilobo dhigawodhile muttu-muttuvi wakwanihedha?—Kengesa Éfeso 3:20.

11. Kavaha yotagiha modha ya nivuhulo noneya ninga kaninakwanihedheye. (Koona kasha “ Mapikirelo Otikiniha Akwanihedheyile.”)

¹¹ Ninele wona matikiniho mang’onovi akoseli Yehova adhari aye masaka a mundduni oneya ninga kagawodhehile wakwanihedheya. Iyene ohimpikirela Abrahamu vina Sara wi agahikana mwana masiki valani anakalaba. (Wita 17:15-17) Iyene vina wahimwaddela Abrahamu wi ziza naye nigahikala elabo y’o Kanaá. Nipikirelo ntti noneya ninga kanigakwanihedheyile sabwa ana Izrayel ali ziza na Abrahamu ahikalawo vyaka dhinjene ninga adhari mw’Ejipitu, mbwenyi nipikirelo ntti nahidha wakwanihedheya. Vasogorhova, Yehova wahiloga wi muyana wowunuwelavo wakuweliwa Elizabeti agahikana mwana. Iyene vina wahiloga wi Maria muyana wahamuziwile mulobwana agahimbala Mwana wa Mulugu—akwanihedhaga nipikirelo nakosile Yehova vyaka dhinji mundduni mmunddani mwa Edeni!—Wita 3:15.

12. Mazu anfwanyeya va Josuwé 23:14 na Izaiya 55:10, 11 anlagiha dhavi ewodhelo ya Yehova?

¹² Nigatanalela mukalelo yakwanihedhile Yehova mapikirelo akosiliye, nroromelo nehu nawi iyene onele odhana elabo eswa ninele oliba. (Kengesa Josuwé 23:14; Izaiya 55:10, 11.) Eji enele onittukulela wakamihedha attu ena ononelamo wi njedhelo na elabo eswa kahiye elobo y’oroha. Addagana erimu eswa na elabo eswa, Yehova ohiloga dhahi: “Dhinlogimi sebaribari, dhinofwanyela orumeliwa.”—Ovuh. 21:1, 5.

OZUZUMELA DHILOBO DHOMUYANI

13. Matugumano anlibiha dhavi nroromelo nehu? Katapulela.

¹³ Elobo yanoraru enanikamihedhe olibiha nroromelo nehu, ozuzumela dhilobo dhomuyani. Motagiha, iyo ninopurelamo venjene nigadhowa omatugumanoni. Anna odhile mwa wale akamihedhaga mabasa a mudhidhi wotene ohiloga: “Matugumano anolibiha nroromelo naga. Masiki akala namakosa diskursu kana ttotto ya okosa diskursuya obe akala makaniya kahiye maswa, dila dhotene enokalawo elobo enddikamihedha omunonelamo deretu Bibilia, eji enolibiha nroromelo naga.” b Ottiya ejo, nroromelo nehu ninoliba na dhowakula dhinvaha abalihu mmatugumanoni.—Rom. 1:11, 12; 10:17.

14. Mabasa a olaleya anlibiha dhavi nroromelo nehu?

 ¹⁴ Odhowa mmabasani a olaleya onolibiha nroromelo nehu. (Aheb. 10:23) Barbara, onimulabela Yehova okwaranya vyaka 70 ohiloga dhahi: “Odhowa mmabasani a olaleya onolibiha nroromelo naga. Venevo vandhowa miyo ddilogaga na attu ena mwaha wa njedhelo na musogorho, nroromelo naga ninoliba.”

15. Nsunzo n’omunya ninlibiha dhavi nroromelo nehu? (Koona vina foto.)

¹⁵ Elobo yina enlibiha nroromelo nehu okosa nsunzo n’omwinya. Susan onoziveliwa otadela mudhidhi onfuniye osunza. Iyene ohiloga dhahi: “Na Ddimingu, ddinosasanyedha Nsunzo na Mwang’aneli na sumana endawo. Txiposi na Txipirhi, ddinosasanyedha matugumano a vari va sumana. Malabo mena a sumana ddinokosa nsunzo naga n’omwinya.” Sabwa ya okosa matadelo a omusunza Bibilia, nroromelo na Susan ninokala noliba-nene. Irene, murogora onlaba mwari mwa vyaka dhinji o kwatti enddimuwa, ohiloga wi osunza mavuhulo a mBibiliani onolibiha nroromelo naye. Irene ohiloga dhahi: “Miyo ddinotikina venjene oziwa wi mapikirhelo akosile Yehova anowakwanihedheya se ohalavo nne nzu nimodha.” c

“KAVALI WAGANYEDHA DHINELE WAKWANIHEDHEYA”

16. Ninlogela nni wi mazu alogile Yehova na Habakuk anonipatta? (Ahebreu 10:36, 37)

¹⁶ Alabeli enjene a Yehova anojedhela mwari mwa vyaka dhinji omagomo wa elabo eji yabure. Mubuwelo wa attu onodhaga onittukulela wubuwela wi mapikirelo a Yehova anogonela wakwanihedheya. Mbwenyi Yehova onononelamo mukalelo oniviwamo alabeli aye, iyene ohimwaddela  Habakuk: “Nsaka nowireya mpaganyo ologilemi, kaninathi ofiya; osogorhowa dhetedhene dhinowireya ninga mulogelimi. Weyo ojyedhegevi n’ororomela; masiki dhigonele dhinopadduwa!” (Hab. 2:3) Mulugu ologile mazu aba wi ampangarhazena Habakuk bahi? Obe anonipatta iyo vina? Na nikamihedho na muya wokoddela, murumiwi Paulo ohiloga mazu akene awaddagana Akristu anjedhela elabo eswa. (Kengesa Ahebreu 10:36, 37.) Nona masiki iyo nubuwelaga wi nipikirelo ntti ninogonela wakwanihedheya, masiki nigonele ninele wakwanihedheya.

17. Murogora Louise onvirihamo dhavi nlago ninvahile Yehova Habakuk?

¹⁷ Mwa vyaka dhinji alabeli a Yehova anovirihamo nlago na Yehova na odhowagavi nijedhelaga. Motagiha, Louise oromile omulabela Yehova yaka ya 1939. Iyene ohiloga: “Nsaka nttile miyo ddobuwela wi Armagedon agahidha miyo ddihinatti ogomiha masunzo aga. Mbwenyi ejo kipadduwile. Elobo enddikamihedha, wengesa mapadduwo a mBibiliani anloga wi Nowé, Abrahamu, José na ena ahijedhela mwa mudhidhi winjene wi attuviwe na Yehova. Odhowagavi nijedhelaga enoddikamihedha miyo na ena okuluvela wi elabo eswa eli vakukuvi.” Mohaganyedha, abali adhile vawale amulabelaga Yehova anorumela mazu aba!

18. Wang’ana dhottanddiwa enokamihedha olibiha nroromelo nehu wi elabo eswa enele odha?

¹⁸ Ebaribari wi elabo eswa kinatti odha. Mbwenyi katanalela motagiha dhilobo dhiliwo—vineneri, miri, dhinama, na attu. Kawo muttu onaganyedha wi dhilobo esi dhihikalawo, mbwenyi nihikalawo nsaka wahaliwo dhilobo esi. Dhilobo esi dhihikalawo sabwani Yehova ddittanddile. (Wita 1:1, 26, 27) Mulugu wehu ohipikirela odhana elabo eswa. Iyene onele ovirihamo nipikirelo ntti. Nipikirelo ntti nigakwanihedheya ninele okana egumi yoligana okala nokalawene. Nsaka na Yehova nigafiya dhetene dhitadeliye mwilaboni eswa dhinele wakwanihedheya.—Iza. 65:17; Ovuh. 21:3, 4.

19. Onawodhe dhavi olibiha nroromelo nawo?

¹⁹ Oku nijedhelaga elabo eswa ninofwanyela opura gari dhotene dhinihu wi nilibihe nroromelo nehu. Dila dhotene katamalela yobolo, katanalela mwaha wa ewodhelo ya Yehova. Vina kazuzumela dhilobo dhomuyani. Ogakosa dhawene onele okala na “abale anakela dhápikirhele Mulugu, aneddavi na ntidi, anroromela.”—Aheb. 6:11, 12; Rom. 5:5.