1. Yehova onjedhela wi nikose eni?

 MWA atelani, siku ninkanani mwana mudhidhi wowagalaliha vaddiddi. Masiki awene amukwelaga mwaniwa oli nyenye, awene kanjedhela wi iyene adhowegevi dhahene se wunuwa. Vina, ejo kopadduwa awene agahizuzuma venjene. Na mukalelo wakakene, Yehova onowagalala iyo nigavilibihedha wi nikale anamafara a Yezu, mbwenyi Iyene kanfuna wi nikalevi ninga ayima mpaddi womuyani. (1 Kor. 3:1) Ottiya ejo, iyene onjedhela wi iyo nikale Akristu owarala.—1 Kor. 14:20.

2. Txini dhinasekeserhe iyo mu nsunzoni ntti?

² Txini entapulela okala Mukristu wowarala? Txini enfwanyelihu okosa wi nikale Akristu owarala? Oja womuyani okalele nni wamakamaka wi nikale Akristu owarala? Ninfanyelela nni orabela ovikuluveletxa? Nsunzo ntti ninele wakula mavuzo aba.

TXINI ENTAPULELA OKALA MUKRISTU WOWARALA?

3. Txini entapulela okala Mukristu wowarala?

³ Mbibiliani, nzu ntti na Egregu nitapuleliwe ninga “owarala” ninodhaga otapulela “wunuwa” obe “wakwana.” a (1 Kor. 2:6) Dhahene ninga mununuwa mwana ofiyedha okala munddimuwa, iyo vina ninofanyela odhowavi nunuwihaga mandano ehu na Yehova. Nigakosa dhahene, pankalehu Akristu owarala. Masiki vankalihu Akristu owarala mpaddi womuyani, ninofanyela odhowavi nunuwaga. (1 Tim. 4:15) Iyo notene, masiki na azombweya, enowodheya owarala mpaddi womuyani.  Kito txini enlagiha wi Mukristu owarala mpaddi womuyani?

4. Ninawodhe dhavi omuzinddiyela Mukristu wowarala?

⁴ Mukristu wowarala ddule onkalawo mowiwanana na magano a Mulugu, ottiya osakula dhinfuniye okosa obe ofwara. Ebaribari wi sabwa ya okala attu ohakwana, ninele okosa dhovonya. Masiki dhawene, malabo otene Mukristu wowarala onowubuwela vina onokosa dhilobo mowiwanana na efunelo ya Mulugu. Iyene ohabala omuttu oswa vina onovilibihedha mudhidhi wotene wubuwela ninga Yehova. (Ef. 4:​22-24) Iyene ohisunza okosa dhosakula dha malago sabwani onofwara magano vina malamulo a mBibiliani, nona iyene kanjedhela okana lista na malamulo wi aziwe enfanyeliye okosa. Agakosa yosakula, iyene onovilibihedha okosa dhilobo mowiwanana na eganiliye.—1 Kor. 9:​26, 27.

5. Elobo gani egadhile ompadduwela Mukristu wowobana? (Éfeso 4:​14, 15)

⁵ Mwa mpaddi mwina, Mukristu wowobana mpaddi womuyani onodha okwekwetteleya na masunziho a attu opela malago vina opupurutxiwa na oshaga wa attu anvuwiha miselu dhottambi. Onodhaga vina onyengettiwa na asadduweli. b (Kengesa Éfeso 4:​14, 15.) Mukristu wobanile mpaddi womuyani, onodhaga wakanela nrima attu ena, otota owana-wana mmulogoni, onyimuleya momaguva na dhologa dha attu ena obe okwekwetteleya okosa yottega enddimuwa.—1 Kor. 3:3.

6. Sabwaya jani wunuwa wa Mukristu onoladdanihiwa na wunuwa wa mwana? (Koona vina foto.)

⁶ Ninga moonelihu, Bibilia onoladdaniha wunuwa mpaddi womuyani na wunuwa mpaddi womaningoni. Mwana onofanyela osogorheliwa na muttu wowunuwelavo, sabwani iyene kana zelu dhowakwana. Motagiha, kamubuwele mambali onimuttiddela mwanaye nlada wi alupe rampa. Mwa ovira wa mudhidhi mwanaya onowunuwa, venevo mambalaye onomuttiya iyene olupa rampa yeka mbwenyi onomubutxedha wi ahinalupa rampa, ang’anege oku-noku vina akalelege pasope na karo. Nona mwanaye agonuwa onele oziwa yokosa agafunaga olupa rampa. Dhahene ninga munfunela mwana nikamihedho  na muttu wowunuwelavo wi awodhe orabela ngovi, Mukristu wobanile mpaddi womuyani onofuna vina nikamihedho na Akristu owarala wi awodhe orabela okosa dhilobo dhigadhile onyonga mandano aye na Yehova vina okosa dhosakula dha malago. Mbwenyi, Mukristu agawarala mpaddi womuyani onele owodha okosa dhosakula dha malago mowiwanana na magano a mBibiliani vina ninga munubuwela Yehova, venevo onele owodha ovirihamo dhisunziliye.

7. Mukristu wowarala onofuna nikamihedho na attu ena?

⁷ Kito eji entapulela wi Mukristu wowarala txipo kanafune wakela nikamihedho? Nne. Akristu owarala dila dhina anofuna nikamihedho. Mbwenyi muttu wobanile mpaddi womuyani dila dhina onodhaga ofuna waddeliwa na muttu mwina enfanyeliye okosa. Mwa mpaddi mwina Mukristu wowarala, onokumbirha nikamihedho na attu ena anna ttotto vina eziwelo, mbwenyi onoziwa wi Yehova onjedhela wi muttu-muttu apwattele muttorho waye.—Gal. 6:5.

8. Akristu eli owarala anttiyana dhavi?

⁸ Iyo notene nihittiyana mpaddi womaningoni, na mukalelo wakakene Akristu owarala mpaddi womuyani ahikana mikalelo dhottiyana. Motagiha, ena ahikana eziwelo yinjene, oku ena attu oliba murima, abali ena attu otapuwa mada, oku ena anolagiha ntanalo. Nona Akristu eli owarala mpaddi womuyani angumanana makattamiho oladdana, anodhaga okosa dhogana dhottiyana mbwenyi dhiniwanana na magano a mBibiliani. Eji empadduwa makamaka akala Mukristu onokosa yogana na mukalelo ononiye dhilobodha. Nona kawo mbali onamuttonge mwina sabwa ya okosa dhosakula dhottiyana, ottiya ejo awene anele ozuzumela olibiha wiwanana.—Rom. 14:10; 1 Kor. 1:10.

TXINI ENFANYELIHU OKOSA WI NIKALE AKRISTU OWARALA?

9. Koddi wunuwa mpaddi womuyani ompadduwa woka? Katapulela.

⁹ Ayima otene movira wa mudhidhi anowunuwa, mbwenyi wila muttu onuwe mpaddi womuyani onofanyela ovilibihedha. Ninga motagiha, abali o Korinto ahisunza ebaribari, ahibatiziwa, ahakela muya wokoddela, vina ahisunza dhilobo dhinji na murumiwi Paulo. (Mer. 18:​8-11) Mbwenyi, enji mwa awene masiki nvirelani vyaka dhinji babatiziwe, ali ahinawarala mpaddi womuyani. (1 Kor. 3:2) Txini enfwanyelihu okosa wila ninapadduweliwe yakene?

10. Nikose eni wila nikale Akristu owarala? (Juda 20)

¹⁰ Enele orutxa iyo okala Akristu owarala mpaddi womuyani akala kanina efunelo ya okosa ejuwene. Abale otowa malago vina ahinivilibihedha wunuwa txipo kanawarale mpaddi womuyani. (Gano 1:22) Iyo kaninfuna okala ninga abale onuwile, masiki dhawene anajedhela amambali awa wakosela dhogana. Iyo ninofanyela ovilibihedha wunuwa mpaddi womuyani, vina olibiha mandano ehu na Yehova. (Kengesa Juda 20.) Akala onovilibihedha wi okale Mukristu wowarala, kamulobelele Yehova wi awuvahe efunelo vina ewodhelo ya okosa efunelo yaye.—Fil. 2:13.

11. Nikamihedho gani ninnivaha Yehova wi nikale Akristu owarala? (Éfeso 4:​11-13)

¹¹ Yehova kanjedhela wi ninele owarala se nikamihedho. Abali ali akumbuzi mmulogoni ali womala-nawale wi anikamihedhe wunuwa mpaddi womuyani ofiyedha “wunuwa wawakwana wa Kristu.” (Kengesa Éfeso 4:​11-13.) Yehova ononivaha vina muya waye wokoddela wila onikamihedhe okana “zelu ya Kristu.” (1 Kor. 2:​14-16) Ottiya ejo, Yehova ovudhelela mittaka minai dhinlagiha mukalelo waloga,  wawubuwela Yezu vina dhilobo dhakosiye mmabasani mwaye a olaleya. Enowodheya okala Akristu owarala modhela otagiha dhubuwelo dha Yezu vina dhilobo dhakosiye.

TTIMA ENNA YOJA YOMUYANI YOVADDA

12. Masunziho oroma a Kristu entapulela eni?

¹² Wila nikale Akristu owarala, ninofanyela ottiya masunziho oroma a Kristu, kuloga, dhibaribari dhoroma dhisunzilihu mwaha wa Yezu. Otxinuwa, nroromelo, obatiziwa, vina ovenyihiwa mukwani, dhotagiha dhing’onovi dha masunziho oroma. (Aheb. 6:​1, 2) Aba masunziho mang’onovi oroma anfwanyela Mukristu oziwa vina ororomela. Ji sabwaya emuttukulele Pedro ologa mwaha wa masunziho aba mudhidhi walaleya iyene muttitti labo na Pentekoste. (Mer. 2:​32-35, 38) Wila nikale anamafara a Kristu ninofanyela orumela masunziho aba. Ninga motagiha, murumiwi Paulo ohiloga, wi muttu akale namafara wa Kristu, yanfuneya iyene orumela njedhelo na ovenyihiwa mukwani. (1 Kor. 15:​12-14) Mbwenyi, wila nikale Akristu owarala ninofanyela okosa elobo yina ottiya owalana masunziho oroma bahi.

13. Txini enfwanyelihu okosa wila nipurelemo oja womuyani wovadda onlogiwa va Ahebreu 5:14? (Koona vina foto.)

¹³ Ottiyana olivo wa masunziho oroma na oja womuyani wovadda jawi, yoja yomuyani yovadda kiniwanana na malamulo a Yehova bahi, mbwenyi vina na magano aye annikamihedha ononelamo mukalelo onubuwela iyene. Wila nipurelemo oja oku, ninofanyela osunza, otanalela, vina ovirihamo Mazu a Mulugu. Nigakosa ejuwene, ninele osunza okosa dhogana dhinimwagalaliha Yehova. c—Kengesa Ahebreu 5:14.

14. Paulo wakamihedhile dhavi akadda Korinto okala Akristu owarala?

¹⁴ Mwa Akristu owobana mpaddi womuyani dila dhina enowarutxa otanalela vina ovirihamo magano a Yehova agafunaga okosa dhosakula. Ena anubuwela wi sabwa ya ohikalawo nlamulo na mBibiliani, anofwanyela okosa enfunani. Ena anofuna ofwanya  nlamulo mBibiliani oku ehili yofuneya. Ninga motagiha, enkala ninga Akristu o Korinto ahimukumbirha Paulo wi ete nlamulo naloga akala awene anfwanyela oja dhoja dhikutteliwe amilugu ena. Ottiya wawaddela yafwanyelani okosa, Paulo ohilagiha ttima ena mubuwelo vina wahiloga wi muttu-muttu ohikana ofuru wosakula. Paulo wahitanalela na akadda Korinto alabihedhaga magano a mBibiliani, dhahene muttu-muttu wanwodha okosa dhosakula na mubuwelo wotxena se wakwakwattutxa attu ena. (1 Kor. 8:​4, 7-9) Modhela okosa ejuwene Paulo wela wakamihedha Akristu o Korinto wunuwa mpaddi womuyani, dhahene awene aganwodha olabihedha zelu yawa ottiya okuluvela mubuwelo wa muttu mwina obe odidela otamela malamulo.

15. Paulo wakamihedhile dhavi Ahebreu wunuwavi mpaddi womuyani?

¹⁵ Iyo ninosunza elobo yattima na ejile yalebele Paulo Ahebreu. Ena ahittiya wunuwa mpaddi womuyani, beyelela wamwa nibele ottiya oja dhoja dhomuyani dhovadda. (Aheb. 5:12) Awene kafuna orumela masunziho maswa asunzihiwani na Yehova. (Gano 4:18) Motagiha, mukwele Yezu, nlamulo na Mizé nahittiyiwa olabihedhiwa mbwenyi Akristu ena ali Ayuda andidelavi ofwara nlamulo ntti. Kito vyaka 30 kadhakwana wi Ayuda asisigule mubuwelo wawa? (Rom. 10:4; Tito 1:10) Muttu-muttuvi wengesa karta yalebele Paulo Ahebreu wanwodha ozinddiyela wila munivuruni ntti munofanyeya yoja yomuyani yovadda. Karta eji ehakamihedha wona mukalelo muswa wapama wa omwebedha Yehova ogavahile oliba murima wi adhowegevi alaleyaga miselu dhapama masiki na ofwarafwariwa na Ayuda.—Aheb. 10:​19-23.

KUVIKULUVELETXE

16. Ottiya owaralavi elobo gani yina enfwanyelihu okosa?

¹⁶ Iyo kaninfuna ovilibihedha bahi mpaka owarala mbwenyi ninfuna nidhowegenavi owaralawa. Eji entapulela wi ninofwanyela orabela ovikuluveletxa. (1 Kor. 10:12) Ninofanyela ovipimaga wila nizinddiyele akala txibarene ninowunuwa mpaddi womuyani.—2 Kor. 13:5.

17. Karta yalebeli Paulo akadda Kolosi ninoniha dhavi ofuneya wa wunuwagavi?

¹⁷ Mukartani yalebeli Paulo akadda Kolosi,  wahiloga wili ttima ya odhowavi niwaralaga. Akadda Kolosi ali Akristu owarala, mbwenyi Paulo wahawaddela ngovi ya wubuwela ninga attu a mwilaboni. (Kol. 2:​6-10) Vina Epafra, wàziwa pama abali a mulogo obule, wanalobelela dila dhotene wila awene awodhe okala owakwana obe owarala. (Kol. 4:12) Ninsunzavo eni? Paulo na Epafra anziwa wila enofuneya guru enddimuwa vaddiddi vina nikamihedho na Mulugu wila nidhowegevi nikalaga owaralene. Awene afuna wi akadda Kolosi awunuwe, obe adhowegevi akalaga Akristu owarala masiki na makattamiho-makattamihovi agadhile wapatta.

18. Elobo gani egadhile ompadduwela Mukristu wowarala? (Koona vina foto.)

¹⁸ Paulo wahawaddela Ahebreu wi masiki Mukristu wowarala onodhaga oyelela kakamwe mandano aye na Yehova. Murima wa Mukristu ogahidha ovadda vaddiddi mpaka ohifuna otxinuwa ejuwene egamuttukulele ohileveleliwa na Yehova. Mohagalaliha-mwene, eji kiyapadduweli Ahebreu. (Aheb. 6:​4-9) Kito ninaloge eni mwaha wa Akristu a masaka abano abuwene akumuwile obe aburutxiwe mmulogoni mbwenyi vasogorhova batxinuwa vina beyelela mmulogoni? Sabwa ya oviyeviha vina otxinuwa ahilagiha wi ahittiyana na attu abale àlebela Paulo abuwene agadhile oyelela kakamwe mandano awa na Yehova. (Ezek. 34:​15, 16) Ebaribari wi agamala wiyelela mmulogoni txino anddimuwa a mulogo anele omuttoma mbali obe murogora wowarala wila àkamihedhe wiyelela oliba mpaddi womuyani.

19. Txini enfwanyelihu ogana?

¹⁹ Akala weyo onovilibihedha okala Mukristu wowarala, enowodheya wakwanihedha yogana yawo! Kadhowavi osunzaga masunziho ovadda a mBibiliani vina otamelege okana mubuwelo wa Yehova. Akala weyo omala okala Mukristu wowarala kakosa muli-mwetemwene wila odhowegevi bugakala Mukristu wowarala okala-nokala wene.