VELANI okalawo masaka abano ‘omariha’ k’orutxa vaddiddi opitta nsaka na wale, enofuneya ovilela-wene. (2 Timóteo 3:1-5) Attu enjene masaka abano kanwodha ovilela. Awene amukumbela vawa, anamavittukulela, vina kanwodha ovyang’anela. Noona ninofwanyela ovivuza: ‘Miyo kaddinwodha ovilela ninga enira attu enjene? Ovilela w’ebaribari ontapulela nni? Ddinfunela nni okala muttu wovilela?’

Nzu ntti “ovilela” ninga munlogela Bibilia enpitta nni? Enopitta olibavi ogagumana na makattamiho. Muttu wovilela onokalavi woliba ajedhaga elobo enfuna opadduwa, kuloga onokuluvela wila magudulanoya anele ovira. Iyene kanvitanala mbwenye oniketxa vamburoni voroma monele wa attu ena masiki enaya asilidhiwaga na iyene. Onojedhela wila dhotedhene dhinele okala deretu. Bibilia onloga wi ovilela onda mukwelani. * (Koona yowenjedhedha.) (1 Korinto 13:4) Ovilela onokosa epaddi ya ‘dhimbala muya.’ (Galásia 5:22, 23) Ninakose nni wila nikane ovilela webaribari?

Wila niwodhe okala attu ovilela enofuneya olobela nikumbirhaga muya wotxena wa Yehova, sabwani iyene onowavaha otene animuroromela. (Luka 11:13) Masiki niziwaga wila muya wokoddela bwaguru, enofuneya okalawo mowiwanana na malobelo ehu. (Masalmo 86:10, 11) Eji entapulela wi nikose epaddi yehu, nilagihege ovilela masiku otene. Masaka mena enonirutxaga olagiha ovilela. Kito txini enanikamihedhe?

Ninofwanyela osunza vina ofwara yotagiha ya Yezu. Murumiwi Paulo mulogeliye sabwa ya ‘omuttu oswa,’ ohenjedhedhavo alogaga wi ovilela onokosa epaddi. Iyene ohinilibiha dhahi: ‘Murenddele oli mvaho wa Kristu, okalevi mmirimani mwenyu.’ (Kolosi 3:10, 12, 15) Wila niwodhe ojavo, ninofuniwana ofwara ttarho dha Yezu vina nikuluvele wila mweddihedho wa Mulugu bwa pama. Iyo nigamukuluvela Yehova, kaninalemena ovilela, masiki akala dhilobodha dhimpadduwa kaninnonelamo.​—Joau 14:27; 16:33.

Iyo notene ninowunlela ninga elabo eswa efiye momaguva. Ninsunza okanavi ovilela nigobuwela ovilela onnivilela Yehova. Bibilia ononubutxedha: ‘Nabuya kangonela wira dhipikireliye, ninga munubuwela attu ena. Iyene onowuvilelani vowi kanfuna orimela wa muttu nne mmodha onfuna wi etene afwanye mudhidhi worugunutxa murima.’ (2 Pedro 3:9) Nigobuwelaga mukalelo onnivilela Yehova, ononikamihedha wavilelavi attu ena. (Roma 2:4) Dhilobo gani dhimpadduwa dhinfuneya ovilela?

Labo na labo dhinopadduwa dhilobo dhinji mwigumini mwehu dhinfwanyela iyo ovilela. Motagiha, ninofwanyela okala ovilela wi nihimugwadde muttu agalogaga masiki akala nihikana elobo yamakamaka yologa. (Tiago 1:19) Iyo vina nikale attu ovilela niganyimuliwa. Ottiya okala attu ahinvilela, ninofwanyela wubuwela mukalelo onvilela Yehova na Yezu dhovirigana dhehu. Awene kanzuzumela elobo-txilobo enkosa iyo yabure. Anona mikalelo dhaderetu dhina iyo vina anonivaha mudhidhi wi nitxinje mikalelo dhabure wi nikale attu aderetu.​—1 Timóteo 1:16; 1 Pedro 3:12.

Vina ninofwanyela wavilela attu ena agaloga wi iyo nikosa obe niloga elobo ehikalile. Egapadduwa dhawene elobo yoroma egafunile iyo okosa, onyimuleya. Mbwenye Nzu na Mulugu ninonaddela yokosa. Ninloga dhahi: “Kuhaguvelege onyanyuwa, vowi owali onkaletxa mmirimani mwa athu otowa malago.” (Kohelét 7:8, 9) Akala ninomagedhiwa wila nihikosa elobo yabure ninofanyela ovilela vina nubuwele mofwaseya-mwene enakose iyo. Jijuwene yakosele Yezu mwapwattelihiwiye muladdu wahakosiliye.​—Mateu 11:19.

Amambali anofwanyela oziwa ovilela agafunaga omukamihedha mwanawa wi arabele mweddelo wonyakuwa ogatotele ngovi. Kafwara yotagiha ya Mattias, onlaba o Betel ya Scandinavia. Mattias valiye mwana, akwaye a oskola animbedda sabwa ya dhorumela dhaye. Vamaromo amambali aye kaziwa dhampadduwela. Mbwenye aweneya movira wa mudhidhi ahiziwa. Gills babi wa Mattias vamodha na mwadhiye ahiloga na mwanaye wi wanfwanyela ovilela. Mattias wahikosa nivuzo ninga: “Mulugu bani? Bibilia kahiyo nivuru na Mulugu? Ninziwa dhavi efunelo ya Mulugu na iyo?” Wahinvuza vina babe: “Miyo ddinttongeliwa eni akala kaddinkosa dhilobo ninga mukosela nyuwo?”

Gillis ohitapulela: “Dila dhina mavuzo akosa mwanaga wakosa na rahiva, kahiyo sabwa ya mamayaye obe miyo, mbwenye sabwa yebaribari, yamurutxiha okalawo na mureddele.” Gillis omukamihedhile dhavi mwanaye? “Miyo na mwanaga nahigilati mudhidhi mung’onovi wi niloge.” Gillis wahimwiwa nofwaseya mwanaye akosaga mavuzo oniye. Gillis wahimutapulela dhilobo dhina mwanaye vina wahimpaga wi obuwelege labo nantero obe ahinatti ologa. Masaka mena Gillis waloga yeka wila wanfwanyela wubuwela mavuzo akosile mwanaye. Modhela ologa na babe dhilobo gwe Mattias wahidha ononelamo wila Yehova onomukwela vina ddina ewodhelo yonittonga. Babe wahiloga wila: “Enoja mudhidhi, vina kahiyo yovevuwa mbwenye vang’ono-vang’ono ohunuwiha mmirimani mwaye omukwela Yehova. Mwadhaga na miyo nihagalala vaddiddi sabwani ovilela wehu onittukulela omukamihedha mwanehu bali muzombwe wi ebaribari oddiginya murima waye.”

Ovilela wa Gillis na mwadhiye ohakamihedha omuswagiya mwanawa, awene anroromela wi Yehova onowakamihedha. Gillis ohiloga: “Miyo ddanimpaga Mattias wila omukwela wehu wannittukulela ompigirihela Yehova wi amukamihedhe ononelamo.” Amambaliya ahagalala sabwa yovilele vina ohiyelela mundduni!

Iyo vina ninofwanyela ovilela akala mwanamudhi wehu obe marho ohifanyiwa eredda ehina murobwe, onoveda nikamihedho nehu. Kamutagihe Ellen * (koona yowenjedhedha), onkala elabo yo Scandinavia.

Vyaka tanu na ttaru musogorhomwa, mamuni wa Ellen wahigwa bavoreheya ogogo. Iyene kana yokosa sabwa ya wubuwela epadduwile. Nipadduwo ntti yali elobo yorutxa vaddiddi. Ohiloga: “Ddivilibihedha wi ddiwodhe ovilela, ddankosa malobelo menjene.” Ohenjedhedhavo: “Nlebo naga naddikamihedhetxa nali na Filipi 4:13, ninloga: ‘Ddinowodha dhotedhene na guru dha Kristu onddilibiha.’” Na nikamihedho na guru dha Yehova Elln ohiwodha ovilela makattamiho eye.​—Masalmo 62:5, 6.

Txibarene, Yehova ddi tagiha ya ovilela. (2 Pedro 3:15) Mbibliani munologa wi Yehova ddi munddimuwa wa ovilela. (Nehemiya 9:30; Izaiya 30:18) Weyo onowubuwela yakosele Yehova mudhidhi wadidela Abrahamu onvuza mwaha wotolotxiwa wa Sodoma? Yehova kamugwaddile, mbwenye wahinvuruwana na mavuzo aye otene vina wahinvilela. Yehova wahinvilela Abrahamu dila dhinjene vina wahinvaha ebaribari yawila kanatolotxe elabo ya Sodoma masiki afwanyemo attu kumi nahi oligana murima. (Wita 18:22-33) Yehova dila dhinjene onovuruwana n’ovilela, kammaguvela osilidhiwa!

Ovilela elobo yamakamaka vaddiddi enkosa epaddi ya omuttu oswa, Akristu otene anofwanyela okosa guru wila akane. Nigavilibihedha ninele owodha ofwanya ovilelawa, dhawene ninele omuttittimiha Babihu Yehova, nanda ninele okala vamodha ‘nabale anajevo dholibeliwa dhawa sabwa ya nroromelo na ovilela.’​—Ahebreu 6:10-12.