1. Txini elogile namavuhulela Izaiya mwaha wa Yezu, elogiliye ennilibiha dhavi?

MAVUHULO alogile Izaiya sabwa ya Yezu Kristu anonilibiha vina anonivaha njedhelo. Iyene walogile wi Yezu “kanthonga miladdu na dhinoneya, kangwadda na dhawiwavi.” Ottiya ejo, iyene “onowasoriha ayelegi na murima woligana.” (Izaiya 11:3, 4) Ekalele ni elobo yolibiha? Sabwani attu mwilaboni ahinjiveliwa nsakulano, anomaguvela wattonga akwawa na dhilobo dhinonani otakuluvi. Joziweya wi iyo txibarene ninonfuna namattonga woligana, Yezu Kristu, odduwene onattongege noligana ottiya na wang’anavi!

2. Yezu onnikokomeza okosa nni, kito txini enasekeserhihu mwari mwa mutoma obu?

² Malabo otene, ninogumanana dhubuwelo dha wattonga attu ena. Mbwenye iyo nihittiyana na Yezu sabwani iyene wali muttu woligana. Etanalelo yehu ja wattonga akwehu na esile dhinona iyo. Sabwaya ejuwene Yezu ohiloga wi: “Muhimusorihe muthu mfwaraga dhinimonenyuna bahi, mmusorihe mutamelaga ebaribariyá.” (Joau 7:24) Yezu onfuna wi nimutagihe, nittiye wattonga attu na dhilobo dhowoneya. Mwari mwa mutoma obu ninele osekeserha dhilobo ttaru dhinvaha nipakelo mubuwelo wehu: omuttonga muttu nang’anaga nlogo naye obe ondiye, akala mureli obe muyelegi vina yunuwelo ya muttuya. Dhetedhene esi ninele osekeserha nifwaraga nikokomezo na Yezu.

3, 4. (a) Pedro osaddulele nni monelo waye na amalabo? (Koona foto eli omaromo.) (b) Ebaribari gani esunzihiwe Pedro na Yehova?

³ Kobuwela mukalelo wewilemo murumiwi Pedro mwakumbirheliwiye wi adhowe wa Kornélio, mmalabo wahali Muyuda! (Merelo 10:17-29) Pedro wahunuwana elemelo ya wawidda attu ahali Ayuda, iyene wawona ninga attu okwarula. Mbwenye iyene wahigumanana nipadduwo nadhile osaddula mubuwelo waye. Motagiha, iyene wahivahiwa monelo wadhela mpaddi wa Yehova. (Merelo 10:9-16) Onihiwaga nipadduwo ntti, Pedro wahawona anenama enjene okwaruliha ottiyana-ttiyana amottaga odhulu. Wahiwa lizu noliba niraga: ‘Pedro wé, venya ope oje!’ Pedro wahikodda dila ttaru. Dila dhetene dhakoddiye eraga wi kaddinfuna, nzu nttile nanloga: ‘Dhikoddelihile Mulugu kuwile sokwaruliha.’ Muvireli wonihiwa okule, Pedro wahizuzuma kawodha ononelamo esile dhamwaddela Mulugu. Mudhidhi wakokene ahittanyuwa anamukatti arumiwe na Kornélio. Venevo muya wokoddela wahimukamihedha Pedro ononelamo makaniya, musogorhomwa wahirumela odhowa na anamukatti abale vatakulu va Kornélio.

⁴ Pedro kolibelavi mubuwelo waye wa ʼwattongaʼ attu, iyene kagarumeli odhowa vatakulu va Kornélio na alobwana abale. Ayuda karumela ofiya vatakulu va amalabo ohitxetteliwa ahali Ayuda. Ki Pedro wadhoweli nni? Masiki mwakoddeliye dila dhoroma, na nikamihedho na muya wokoddela wahidha ononelamo basaddula mobuwelo waye. Mwamaleliye wiwa dhamwaddeli Kornélio Pedro ohiloga: “Ddimala wona wi txibarene Mulugu kanimuthiyaniha muthu. Iyene onomukwela muthu ddi muthu onimurumela.” (Merelo 10:34, 35) Dhotene dhimpadduweli Pedro, ehikala tagiha ya Akristu otene. Na mukalelo gani?

5. (a) Yehova onjedha wi Akristu otene anonelemo nni? (b) Masiki niziwaga ebaribari, txini endaga okala mmirimani mwehu?

⁵ Yehova wahimulabihedha Pedro wi akamihedhe Akristu ena ononelamo wi iyene kana nsakulano. Yehova onowakwela attu a malogo-malogovi, elogelo-elogevi, ttebe-ttebevi. Akala muttuya onomuriha vina onomuttittimiha, Iyene onomwakela. (Galásia 3:26-28; Ovuhulela 7:9, 10) Dhologa esi txino weyo kunaganyedha. Kito akala elabo obe ziza nunuwile weyo nihikana yeddelo ya nsakulano? Koddi mmirimani mwawo nsakulano nihifudheyamo kakamwe obe nihalamo? Mwakelile Paulo nikamihedho na Mulugu, iyene ohikuputta kakamwe nsakulano. (Galásia 2:11-14) Ninakose nni wila nimusanze Yezu wi nihikale attu anattonga ena modhela dhinonani?

6. (a) Elobo gani enanikamihedhe ogomiha nsakulano? (b) Elobo gani yovirigana emurutxile mbali wa ettomo ozinddiyela alebaga miselu dhaye?

⁶ Wila none akala nihikana nsakulano, ninofwanyela ovipepesa nanya. Enofuneya nipime dhokosa dhehu na esile dhinloga Nzu na Mulugu, wi none akala dhinowiwanana. (Masalmo 119:105) Navuze amarho ehu anaroromelihu akala anowoona elobo-txilobo mwa iyo entonyihedha wila nihikana nsakulano, sabwani masaka mena iyo nanya kaninwodha ovipima. (Galásia 2:11, 14) Masaka mena ninomageya na elemelelo yehu nihiziwaga wi nihikana nsakulano! Jijuwene yapadduwile na mbali dhahi wali musogorheli. Iyene wahileba miselu alogaga oderetu wa atelani avilibihedha okosa mabasa a mudhidhi wotene. Mulobwanaya wali wa elabo yotowa ttima mowinana na monelo wa attu a dhilabo dhina. Mbaliya oddu wahiloga dhilobo dhaderetu mwaha wa mulobwanaya mbwenye wahenjedhedhavo: “Masiki akalaga [wa elabo yotowa ttima], mukalelo waye wahakamihedha attu ena ononelamo wi muttu ondana [elabo yohirihiwa] kintapulela wi iyene onoligana na attu a [elabo endiye] ali ayelegi.” Eji ennisunziha eni? Masiki akala nihittomeliwa mabasa gwé mmulogoni, ninofwanyela ofwaseyela ovipima akala nihikana nsakulano, wila nikose guru yonyanyala. Kito ninanyanyale dhavi?

7. Ninatonyihedhe dhavi wi ʼnifugula murima wehu’?

⁷ ‘Nigatapula murima wehu,’ ninele owodha opemberha nsakulano na okwela. (2 Korinto 6:11-13) Koddi weyo onziveliwetxa okala na attu a nlogo, a elabo vina a elogelo yawo bahi? Akala eli dhawene, kakosa guru yowandana na attu a dhipaddi dhottiyana-ttiyana. Wawobege abali obe arogora a dhilabo dhina wi mulabege vamodha mmabasani a olaleya. Ogafuna wawobe wi muje elobo-txilobo obe muvege vamodha. (Merelo 16:14, 15) Nigavilibihedha wakwela attu ena na murima wotene, ejo enele onikamihedha ogomiha nsakulano nilivi mmurimani mwehu. Ovano ninfuna noone mukalelo mwina wa nsakulano, ‘wattonga attu na esile dhinoonihu.’

8. Nlebo na Onamakutha 19:15 ninnisunziha nni nigamuttongaga mureli obe muyelegi?

⁸ Mubuwelo wehu onofiyedha onittukulela otamela oziwa akala muttuya muyelegi obe mureli. Nivuru na Onamakutha 19:15 ninloga: “Mugathongaga miladdu, fwaragani mudilanimwá: kammululuvihedhe muyelege muladdo waye, kamupibe muladdo wa fumu. Mwamuthongaga muthu, kamwañgane mukalelo waye.” Oyelega obe  orela wa muttu onopatta mubuwelo wehu, ejo enpadduwa dhavi?

9. Salomau ologile nni, nanda ejoya ennisunziha nni?

⁹ Salomau wahivudheleliwa wi aloge mazu aba ebaribari: “Muyelegi kanna mukwe, nne mmudhe; areli, akwawa anotepuwa.” (Gano 14:20) Nlebo ntti ninnisunziha nni? Nikale pasope, ninadhe oguleya na mubuwelo wa watxatxama abali ali ayelegi. Ekalele nni yawopiha wattonga attu nang’anaga dhokana dhawa?

10. Makattamiho gani agumanilena Akristu ofiyedha osaddeyiwa na murumiwi Tiago?

¹⁰ Nigattongaga abali sabwa ya oyelega obe orela, ninotota ogawana mmulogoni. Ejo yahipadduwa na Akristu a vyaka zana dhoroma, ofiyedha osaddeyiwa na murumiwi Tiago. (Kengesa Tiago 2:1-4.) Kanittiye yakene opadduwa mmulogoni mwehu. Elobo gani enanikamihedhe orabela oziveliwa na attu nang’anaga dhokana dhawa?

11. Ninziwa dhavi wi orumeliwa wa muttu na Yehova kuniwanana na dhokana dhaye? Katapulelamo.

¹¹ Nawonege abalihu ninga munawonela Yehova. Vamentoni va Mulugu oderetu wa muttu kundela sabwa ya okala mureli obe muyelegi. Wandana wehu na Yehova kunguliwa na kobiri obe dhorela dhina muttu. Mowiwanana na monelo obu webaribari Yezu ohiloga: “Enorutxa vaddiddi mureli ovolowa mumweneni w’odhulu.” (Mateu 19:23) Yezu owenjedhedha: ‘Agari ddi nyuwo ahawi vowi omwene wa Mulugu bwenyu.’ (Luka 6:20) Eji kintapulela wi ayelegi otene agahinvuruwana Yezu ofiyedha wakela mareliho. Ovano ahikalawo ayelegi gwé ahinfuna okala anamafwara a Yezu. Noona kanubuwele wila attu anorumeliwa na Yehova sabwa ya dhokana dhawa.

12. Malebo annisunziha nni sabwa ya areli na ayelegi?

¹² Eli yofuneya okana mmulogoni abali na arogora animulabela Yehova na murima wotene. Masiki akala ayelegi obe areli. Malebo anloga wi areli “ahiroromele nifumo nihinkuluveleya; amuroromele Mulugu.” (Kengesa 1 Timóteo 6:17-19.) Mazu a Mulugu anowasaddeya Akristu otene, ayelegi na areli wi kobiri murega wa Satana. (1 Timóteo 6:9, 10) Nigawonaga abali ninga munawonela Yehova, ninele orabela yubuwelo yawattonga abali na dhokana dhawa obe dhojombeliwa dhawa. Kito niloge dhavi na yunuwelo obe saizi ya muttuya? Jofuneya omuttonga muttu modhela yunuwelo yaye?

13. Bibilia onnisunziha nni ttangwi ya waweddiha anddimuwa?

¹³ Bibilia onologa dila dhinjene wi narihege anddimuwa. Nivuru na Onamakutha 19:32 ninloga: “Aworameleni anna dhibwi, ariheni anddimuwa, mukurumuweleni Mulugu.” Nivuro na Gano 16:31 ninonaddela vina wi “dhibwi dhintonya thima ya wunuwa ejoyá enfwanyiwa mudila yomyala.” Murumiwi Paulo wamwaddela Timóteo wi afwaseyelege vina avahege nriho anddimuwa awonaga ninga amambali aye. (1 Timóteo 5:1, 2) Masiki Timóteo vavahiwiye ettomo yokala musogoreli wa anddimuwa, dila dhotene iyene wanaweddiha na supaje vina nriho.

14. Enofuneya oliba murima wi nimusisigule muttu munddimuwa agattega?

¹⁴ Kobuwela wi mbali wowunuwelavo onokosa dhovirigana obe onowakokela ena okosa dhinimusilidha Yehova, koddi onowang’aniwa bahi sabwa yokala munddimuwa? Koona enloga Bibilia va Izaiya 65:20: ‘Muttegi onele ogwihedhiwa ntowa masiki akane vyaka zana.’ Dhologa dhakene dhinofwanyeya va Ezekiyel. (Ezekiyel 9:5-7) Yogana yehu ekale omuriha Yehova. (Daniyel 7:9, 10, 13, 14) Nigakana monelo obu kaninawove omusisigula muttu, masiki akala munddimuwa.​—Galásia 6:1.

15. Yotagiya ya Paulo ennisunziha nni sabwa ya wavaha ttima azombwe?

¹⁵ Kito azombwe? Ninofwanyela wariha? Ndde ninofwanyela. Paulo wahimulebela Timóteo: “Ahikálewo onupwazela okala muzombwe. Vano wakalele akristu tagiha na mulogelo wawo, na mweddelo, na mukwelelo, na muroromelelo, na winanela wawo.” (1 Timóteo 4:12) Mwalebeli Paulo mazu aba enkala ninga Timóteo wana vyaka 30, Masiki dhawene ddiyene osakuliwe wi akose mabasa gwé. Ninsunzavo nni? Kanimuttonge mbali wamuzombwe sabwa ya vyaka dhaye. Kudduwale wila Yezu okosile mabasaye velaboni ya vati vaniye vyaka 33!

16, 17. (a) Elobo gani epadduwile na anddimuwa dhahi a mulogo, mudhidhi wagilatile awene makani a omuttoma muzombwe wali mudhari worumeliwa wi akale munddimuwa wa mulogo? (b) Dhilemelelo dha vamuruddani otaganyiha na monelo wa omutto, dhinowiwanana na esile dhinloga Bibilia?

¹⁶ Dhilabo dhina, attu enjene akana elemelelo yokoddaga wariha analobwana. Motagiha, anddimuwa ena a mmulogoni kanattoma azombwe wi akale adhari orumeliwa obe anddimuwa a mulogo, masiki abaliya abo ali azombwe akanaga mweddelo worumeliwa. Mbwenye anddimuwa a mmulogoni anofwanyela oziwa wi Bibilia kanloga vyaka dhinfwanyela muttu okana wila attomiwe ninga mudhari wokamihedha obe munddimuwa wa mmulogoni. (1 Timóteo 3:1-10, 12, 13; Tito 1:5-9) Akala anddimuwa a mulogo anofwara dhilemelo ninga esuwene, kuloga kanvirihamo esile dhinloga Nzu na Mulugu. Anddimuwa a mulogo anofwanyela orabela mubuwelo wa ofwara yeddelo mbwenye afwarege gano dha Mazu a Mulugu.​—2 Timóteo 3:16, 17.

¹⁷ Akala anddimuwa a mulogo kanfwara magano a Bibilia, kanawodhege wattoma azombwe wi akale adhari orumeliwa obe anddimuwa a mulogo. Elabo dhahi, mudhari worumeliwa wahikaana mikalelo dha ottomiwa ninga munddimuwa wa mulogo, waneddiha deretu dhilobo dhomuyani mwa mpaddi oli wotene, anddimuwa a mulogo waye anziwa esuwene. Mbwenye munddimuwa mmodha wa mulogo wahivaha monelo wawi iyene mwana-bure kanatti wunuwa wi akale munddimuwa wa mulogo. Mokubanyiha-mwene muzombwe oddule karumeliwe, ejo epadduwile sabwa yawi anddimuwa abale a mulogo ang’anile yunuwelo yaye bahi. Monelo wakene onopadduwa dhilabo dhinjene. Elobo yamakamaka, ofwara gano dha Bibilia ottiya dhilemelelo obe mweddelo wa mmuruddani mwehu. Iyo ninofuniwana wiwelela elogile Yezu, munamuttonge muttu omwag’anavi.

18, 19. Txini enanikamihedhe wawona abalihu ninga munawonela Yehova?

¹⁸ Iyo nili attu ohakwana, masiki dhawene ninofwanyela wawonaga attu ninga munawonela Yehova. (Merelo 10:34, 35) Ninofwanyela ofwaseyelaga wubuwela Mazu a Mulugu. Nigakosa dhawene, ninele wiwelela nlamulo na Yezu ninloga ‘muhimuttonge muttu mufwaraga dhinimonenyuna bahi.’​—Joau 7:24.

¹⁹ Mohigonela, Mwene wehu Yezu onele wattonga attu otene. Yaderetuya jawi iyene kanattoge modhela dhinoniye, mbweyi noligana. (Izaiya 11:3, 4) Ninojedhela labona ntto nifiye!