Enkoddihedhiwa nni ohela manivuru vina mavidiyu a Anamoona a Yehova mu website dhina?

Vowi manivuru ehu kangulihiwa, attu ena anubuwela wi jowodheya ottukula mu website mwehu badhowa bahela mwawa. Mbwenye antamela okosa ejuwene anogumanana makattamiho menjene sabwa ya Nibarelo na Nlamolo (Termo de uso) * (koona yowenjedhedha) website wehu. Nibarelo ntti nintapulela wi kinwodheya ohelamo obe omwalihedha “website dhina mavidiyu, mafilmi, mizika, obe miselu dhina na dhipano dhinlabana internet, dhomagana mandano obe sites dhina.” Ekalele nni elobo yofuneya okana nibarelo na nlamulo?

Miselu dhetene dhili mu websitini mwehu dhili dhobareleya na copyright wa nlamulo. Eji ekosiwani elobo yofwanyela sabwani enowabarela abale antamela oputtula. Asadduweli na attu ena antamela otakaliha mabasa ehu attukulelaga miselu dhehu mu website dhina wi akwekwette anamoona a Yehova na attu ena. Mwari mwa website wawa anohelamo miselu dhawaganyedheya dhinzuzumiha dhubuwelo dha attu ena. (Masalmo 26:4; Gano 22:5) Attu ena anotomola miselu dhehu, anovuwiha vina anovaviha na dhipano dhawa ninga mittitto na marhe mena. Sabwa yawi miselu dhehu dhihibareliwa na nlamo, jowodheya odhowa wa anddimuwa a Malamulo wi atamele attu aba ampigidha miselu dhehu. (Gano 27:12) Anddimuwa aba a malamulo kananibarele akala iyo nanya ninowarumeliha attu ena obe akala abali ena anokosa esile dhinkosa abale antamela oniputtula.

Akala iyo ninokosa download manivuru obe miselu dha jw.org nivolowaga mu website dhina, ninotota ngovi. Yehova ononivaha poso nomuyani mbwenye onimulabihedha bahi “mwimeleli wororomeleya wamalago.” (Mateu 24:45) “Mwimeleli” oddu onlabihedha website worumeliwa wi avahe yoja yomuyani​—www.pr418.com, tv.pr418.com, na wol.pr418.com. Iyo nina mpaddi miraru bahi dhorumeliwa dhimlabihedhiwa na dhipano dhinlabana internet​—JW Language^®, JW Library^®, na JW Library Sign Language^®. Site esi, kaninfwanyamo miselu dhopupurutxa dha Satana. Mbwenye otamela manivuru obe mavidiyu ehu mu website dhina elobo yowopiha vaddiddi vina miseludha dhinafwanyihu enodha osaddula mubuwelo wehu.​—Masalmo 18:26; 19:8.

Mowenjedhedhavo, akala iyo ninoweka miselu dhehu mu website munvolowiwa na attu anwodha otxinja dhinfwanyani, attuya abo anopura dila eji wila ekemo miselu dhowamagedhana anamoona a Yehova. Abali ena anologa na attu aba ali asadduweli, mbwenye enlagiha wi anonveyiha Yehova. Dhilobo dhina ninfwanyeya mu internetini kahiyo dhofwanyela, vina kadhinkamihedha. (1 Timóteo 6:3-5; 2 Timóteo 2:23-25) Attu ena anowita website obe dhipaddi dhina dhomagana mandano akalaga ninga anvaha miselu dha Nikuru Nolamulela. Mbwenye esodha kahiye dhebaribari. Sabwani kawo muttu wa Nikuru Nolamulela ona website waye.

Nigatonyihedha attu ena site jw.org, ninokamihedha ovuwiha “muttaka wapama.” (Mateu 24:14) Malabihedho a website wehu andowa baganuwavi. Ninfuna wi attu otene apurelemo. Iyo ninowavuruwana attu na efunelo yokamihedha ovolowa mu website mwehu. Vanira iyo dhawene ninowakamihedha attu ofiya vatxelani vali masunziho a Yehova, navahaga yoja yomuyani ensasanyiwa na ‘mwimeleli wororomeleya wa malago.’