YAKA evirile mwilaboni mwetemwene muhittomiwa attu owinjiva wi akale anddimuwa a mmulogoni ena adhari orumeliwa. Akala weyo onokosa epaddi ya nikuru ntti, txibarene weyo onowagalala sabwani weyo onomulabela Yehova vina onowalabela abali awo na mukalelo wottiyana-ttiyana.

Enopadduwa masaka mena muttu wova vang’onovi. Jason munddimuwa wa mulogo oli muzombwe, ohiloga: “Vasakuliwemi wila ddikale munddimuwa wa mulogo, ddahova sabwani wali muttorho munddimuwa.” Jeremiya, Mizé oheli aba vattomeliwani mabasa na Yehova ahivyona ninga attu ahina ewodhelo yowakwaniha. (Obudduwa 4:10; Jeremiya 1:6) Akala weyo vina onivyona dhawene, onawodhe dhavi wunuwiha nikuluvelo nawo vina wunuwagavi munroromeloni? Kasunza yotagiha ya muzombwe Timóteo.​—Merelo 16:1-3.

Timóteo txino oromile mabasa a weddelela milogo na murumiwi Paulo bana vyaka 20. Temóteo vakeliye niwobona, kavyona ninga muttu ona ewodhelo y’osunziha vina yovaha malago sabwani wali muzombwe. (1 Timóteo 4:11, 12; 2 Timóteo 1:1, 2, 7) Ottiya okumuwa, iyene wahunuwiha nroromelo naye, muvireli vyaka kumi, murumiwi Paulo wahalebela dhahi akadda Tessalonika: “Nabuya Yezu agafuna ddinourumelani Timóteo vowaguva.” Paulo walogeli nni mazu aba? Iyene ohitapulelamo: “Kaddinna mwina oniwanana na miyo ninga iyene.”​—Filipi 2:19, 20.

Ekosile Timóteo ekalile dhavi yotagiha mwa abale anlaba ninga anddimuwa a mulogo? Ndoweni nisekeserhe dhilobo tanu na modha.

1. Iyene wannazuzumela attu ena. Paulo wahalebela abali o Filipi alogaga wi Timóteo ‘wannazuzumela’ awene. (Filipi 2:20) Timóteo wanfuna na murima wotene wakamihedha abali aye okala ofiyedheya na Yehova, noona iyene wahilabihedha mudhidhi vina guru dhaye wila akamihedhe.

William onlaba ninga munddimuwa wa mulogo mwari mwa vyaka 20 onowalibiha abale anttomiwa ninga anddimuwa a mulogo na mazu aba: “Mwakwelege abali. Muzuzumelege wakamihedha, dhahene ninga enira muttu onsogorhela mabasa.” Kamukale ninga nameddiha mukukutta onttamagiha mukukutta nefunelo yofiya momaguva, mbwenye mwazuzumelege attu ali mmukukuttanimwa.

2. Iyene wannika mabasa a Yehova vamburoni voroma. Paulo vina wahiloga wi Timóteo wali wottiyana na ena sabwani ‘etene atamela dhopurelamo dhawa, kavaha ttima dha Yezu Kristu.’ (Filipi 2:21) Paulo wanona wila abali enjene azuzumela dhamwigumini mwawa. Ottiya ozuzumela mabasa a Yehova, eka vamburoni voroma dhofuna dhawa. Mbwenye Timóteo wali wottiyana! Iyene wahika vamburoni voroma mabasa a Mulugu, dhahene ninga Izaiya walebile dhahi: “Ddili veneva ddirumení.”​—Izaiya 6:8.

Weyo onawodhe dhavi opima vina otanala dhufuna dhawo na dhofuna dha mulogo? Yoroma, kavuruwana malago aba avahile murumiwi Paulo: ‘Zuzumela dhili dhamakamaka.’ (Filipi 1:10) Weke dhofuna dha Omwene vamburoni voroma. Yanawili, orabele mabasa annonga guru na mudhidhi. Paulo wahimwaddela Timóteo wi: “Weyo thawa dhabure dhinakwekwetha azombwe. Tamelá omyala murima, ororomela, okwela, murenddele.”​—2 Timóteo 2:22.

3. Iyene wanlaba na guru dhotedhene mmabasani a Yehova. Paulo wahiloga dhahi mwaha wa Timóteo: “Ekalelo enedda mwana na babe, jeddiyena na miyo mulaleyani muthaka.” (Filipi 2:22) Timóteo wali muliba mabasa, kali muwara. Iyene wanlaba-wene na Murumiwi Paulo, jijene yalibihile omarho wawa.

Masaka abano ahikalawo mabasa menjene a okosa munikuruni na Yehova. Okosa mabasa aba onodhana wagalala webaribari anele oukamihedha omaga mandano ofiyedhana na abali vina arogora. Kakana ebaribari yawi onele owodha ‘ottangarhamela mabasa a Nabuya.’​—1 Korinto 15:58.

4. Iyene wanttiddihedha mabasa dhasunziye. Paulo wahimulebela Timóteo wi: ‘Fwara masunziho aga, mweddelo waga, mutadelo waga mabasa, nroromelo naga, ofuguwa waga murima, wakwela waga attu, ovilela waga.’ (2 Timóteo 3:10) Timóteo wahittiddihedha mabasa mashagiho otene avahiwiye, noona attomeliwa osogorhela mabasa menjene.​—1 Korinto 4:17.

Otamelege ofwara dhotagiha dha anddimuwa mudhidhi onona weyo merelo awa. Tom, olabile vyaka dhinjene ninga munddimuwa wa mulogo onowubuwela dhotagiha dha munddimuwa wa mulogo esiwene dhamuswagihile iyene. Owenjedhedha: “Dila dhinjene ddanvuza wi ddiziwe mulabihedho wa malagoya. Ejo yahiddilibiha okala muttu wokoya makani.”

5. Iyene wanniviswagiha. Paulo wahimwaddela Timóteo wi: ‘Ovishagihe wi dhogana dhawo dhikale dhomulabela Mulugu.’ (1 Timóteo 4:7) Wila musogorheli wa anamattamaga awodhe washagiha anamattamagaya, iyene onofwanyela oviswagiha. Paulo wahimwaddela Timóteo: ‘Odhowevi bugalabihedha dhinengesiwe, masunziho aba na dhokokomeziwadha. . . . Kunyanyale masunziho aba, otanalelege wi wunuwa wawo woneye na attu enete.’​—1 Timóteo 4:13-15.

Enofuneya vina wunuwiha mikalelo dhawo. Opepesege dhinsunziwe mBibiliani, oziwege otamela miselu dhiswa dha nikuru nehu. Orabele yimelelo ya ovikuveletxa wamwinya. Elobo yohifwanyela, wubuwelaga wi ohikana ewodhelo enddimuwa yolabihedha malago mwa nipadduwo tti nipadduwo. Moligana na Timóteo, “Vyañgane wamwinya vina dhinsunzihewe.”​—1 Timóteo 4:16.

6. Iyene wankuluvela muya wa Yehova. Alogaga na Timóteo sabwa ya mabasa a olaleya, Paulo wahimubutxa: “Na guru dha Muya Wokoddela, onkala mwa iyo, koyá masunziho ebaribari avahiwewe.” (2 Timóteo 1:14) Timóteo wanfuna-wene muya wa Mulugu.

Donald, olabile vyaka dhinjene ninga munddimuwa wa mulogo ohiloga: “Alobwana ottomiwa anofwanyela oriha mandano awa na Yehova. Abale ankosa ejuwene ‘anodhowavi bagaliba.’ Awene anokumbirha muya wa Mulugu wi wakamihedhe wunuwiha dhinbala muya, nejuwene anokala mareliho a abali ena.”​—Masalmo 84:7; 1 Pedro 4:11.

Elobo yohagalaliha okana adhari orumeliwa na anddimuwa a mulogo aswa, noona nidhowenivi banigonuwa mpaddi womuyani. Jason ologiwe omaromo ohiloga: “Mudhidhi wotene okalile miyo munddimuwa wa mulogo, ddihisunza mukalelo wa okoya makani. Ovano miyo ddili wohagalala na gari eji evahiwe miyo!”

Enowodheya wunuwagavi mpaddi womuyani? Ndde. Ogafara yotagiha ya Timóteo weyo onele owodha wakamihedhe abali na arogora awo.