1. Txini enlagiha wi Yehova namavaha?

MWA VYAKA dhinjidhene Yehova wakala yeka. Musogorhomwa iyene wahaperhekela nvaho obu wa egumi anju a wirimu vina attu a vati apano. Yehova, ‘Mulugu wohagalala,’ onoziveliwa ogawelana dhilobo dhotene. (1 Timóteo 1:11; Tiago 1:17) Yehova onfuna vina iyo notene nifwanye wagalala nanda ohinisunziha okala attu ovaha.​—Roma 1:20.

2, 3. (a) Ninagalela nni sabwa yokala anamavaha? (b) Txini enasunze iyo?

² Mulugu onittanddile oladdana na iyene. (Wita 1:27) Eji entapulela wi iyene ohinivaha ewodhelo yokana mikalelo dhaye. Akala ninofuna ottambirha maruriho a Yehova vina wagalala enofuneya osaza yotagiha yaye. Noona natamalelege attu ena, nikale anamavaha. (Filipi 2:3, 4; Tiago 1:5) Sabwaya? Sabwani jijene enittomele Yehova. Masiki valihu attu ohiligana, ninofwanyela omusaza Yehova nikalaga anamavaha.

³ Munsunzoni ntti ninele osekeserha dhilobo dhinsunziha Bibilia mwaha wokala namavaha. Ninele osunza oziveliwa onkana Yehova nigavahaga. Ninele wona ekalelani yapama olabihedha gari evahiwehu na Mulugu, yokala anamavaha. Ninele otanalela sabwa enfwanyelela iyo odhowanavi merelo a ovaha.

4, 5. Yehova na Yezu attu anvaha, iyo ninasanze dhavi?

⁴ Yehova onjedhela wi nimusaze, noona iyene onohagalala iyo nigakala anamavaha. (Éfeso 5:1) Yehova vina onfuna wi nagalale. Ninziwa ejoya, sabwa ya mukalelo ottanddiliye maningo ehu, na elaboya yokoddela munkalihu. (Masalmo 104:24; 139:13-16) Nigakoselaga attu ena dhilobo dhinawagalaliha, ninomuttittimiha Mulugu.

⁵ Nimutagihe Yezu sabwani ohinittiyedha yotagiha yowakwana vina okala attu anziwa ovaha. Iyene ohiloga: “Mwana muthu kadheli wimeleliwa, odheli okala mwimeleli, vina ovilevela woboleliwa wa enjene.” (Mateu 20:28) Murumiwi Paulo wahalibiha vina Akristu eraga: “Kalanina mobuwela akene, àna Yezu Kristu . . . Órula yaliye, othukula yeddelo ya mwimeleli.” (Filipi 2:5, 7) Ninofwanyela ovivuza, ‘Ddinamutagihe dhavi Yezu mwawakwana-mwene?’​—Kengesa 1 Pedro 2:21.

6. Na nipadduwo ntti na Musamariya wapama Yezu onisunzihile nni? (Koona foto eli omaromo.)

⁶ Akala iyo ninfuna wi Yehova ahagalale, ninofwanyela ofwara yotagiha enittiyedhi Yezu. Natanalele attu ena vina nakamihedhe anunlela nikamihedho. Yezu wahilagiha ofuneya wa okala namavaha mulogeliye musibo obule wa Musamariya wapama. (Kengesa Luka 10:29-37.) Iyene wahapanga anamafwara aye wi azuzumele wakamihedha attu ena, ahimwang’anaga muttuya obe ahang’anaga elabo endeyi. Onoziwa elogele Yezu nipadduwo ntti? Iyene ologile nipadduwo ntti sabwa ya mulobwana wa Muyuda wanvuzile dhahi: “Ki mukwagaya bani?” Yowakula ya Yezu ehinisunziha wi akala ninfuna Yehova aziveliwe na iyo, japama okala anamavaha dhahene ninga Musamariya oddule wapama.

7. Nilagihe dhavi wila weddihiwa na Yehova elobo yapama? Katapulela.

⁷ Elobo yina ennikamihedha okala anamavaha ja wubuwela epadduwile mmunddani mwa Edeni. Satana wahawaddela Adamu na Eva wi awene agahagalala kokodda omwiwelela Mulugu nanda avitanalelaga anyene. Eva wali mukumbela vaye vina wanfuna okala ninga Mulugu. Adamu wahimutagiha mwadhiye, vina wafuna amuzivelihe mwadhiyeya opitta omwiwelela Mulugu. (Wita 3:4-6) Sabwa ya ejuwene ahigweliwa makattamiho menjene. Mwebaribari, muttu onkumbela vaye kankana wagalala. Nigarabela omukumbela vehu nikala anamavaha ninoziwa wi weddihiwa na Yehova elobo yapama.

8. Sabwaya jani Adamu na Eva anfuniwana wawubuwela ena?

⁸ Adamu na Eva mmunddani mpule mwakalani, anfwanyela wawubuwela ena. Sabwaya? Sabwani Mulugu wahawaddela wi akane guru dhobala enjivane adhale mwilaboni mpaka elabo yotene okala paraizu. (Wita 1:28) Adamu na Eva anfuniwana wakamihedha anawa okana wagalala, vowi Yehova wafuna wila attu otene velaboni yavati ahagalale. Otene aganlaba mumodhani wi esaddule elabo ekale paraizu. Aba ali mabasa manddimuwa!

9. Enlogeliwa nni wi attu agahijavo ohagalala kosaddula elabo jikala paraizu?

⁹ Masiki valani attu owakwana anfwanyela olaba mumodhani na Yehova mpaka elabo yotene okala paraizu ninga mwafunela Mulugu. Dhawene awene agahiwodha ovolowa muwittuwani. (Ahebreu 4:11) Egakala yohagalaliha wona omagomelo wa mabasaya! Awene kokala anamavaha, aziwaga watanalela akwawa, agahakela mareliho menjene a Yehova.

10, 11. Elobo gani enanikamihedhe olaleya vina wakosa anamasunza?

¹⁰ Masaka abano, Yehova onittomela mabasa attima o’kosa. Iyene onfuna wila nalaleye vina nakose anamasunza. Wila niwodhe okosa mabasa aba, enofuneya watanala-wene attuya. Wi niwodhe olaba mabasa aba na murima wotene, japama: Omukwela Yehova vina wakwela attu akwihu.

¹¹ Paulo wahiloga wi iyene na Akristu ena a vyaka zana mundduni ‘alaba vamodha mabasa a Mulugu’ anlaleya vina annasunziha attu ebaribari. (1 Korinto 3:6, 9) Masaka abano vina, enowodheya ‘olaba mumodhani na Mulugu’ nilabihedhaga mudhidhi wehu, guru dhehu vina dhokaana dhehu wi nikamihedhena mabasa a olaleye attomeliwehu na Mulugu. Eji gari enddimuwa vaddiddi!

12, 13. Wakosa anamasunza onttabiha dhavi?

¹² Nigalabihedha mudhidhi na guru dhehu mmabasani a olaleya vina osunziha ninokana murenddele. Jijene ekosile abali na arogora ena aneddiha masunziho a Bibilia. Awene anohagalala vaddiddi vanawonani anamasunza awa anonelagamo mowakwana, nivuru txini ennisunzia Bibilia, vina olibiha nroromelo nawa, akosaga masadduwo mwigumini mwawa, vina awaddelaga akwawa esile dhinsunzani. Yezu wahagalala vaddiddi na ‘dhotagiha dhinjene dhadhilena’ anamasunza aye 70 arumileye mmabasani a olaleya.​—Luka 10:17-21.

¹³ Abalihu vamodha na arogoraya orugunuwa elabo yotene anohagalala venjene vanonani wi miselu dha Bibilia dhinosaddula mirima dha attu. Motagiha, murogora dhahi wa muzombwe onkuweliwa Anna wahikana efunelo enddimuwa yokosa mabasa a Yehova. * (Koona yowenjedhedha.) Iyene wahimwalela epaddi yina wali ojombeliwa wa anamalaleya. Iyene ohileba: “Enziveliwetxa miyo okuno, jawi ddihikana masunziho menjene. Mabasa aga anoddivaha ohagalala. Ddigeyelela vatakulu, kaddina elobo yina ya wubuwela mwigumini mwaga. Ddinawubuwela anamasunza​—aga na makattamiho angumanani. Miyo ddinotamela wona mukalelo onakamihedhimi. Txibarene ddifiyedha ononelamo kakamwe wi ‘ovaha onottabiha opitta ovahiwa.’”​—Merelo 20:35.

14. Ninwodha dhavi ofwanya ohagalala na mabasa a olaleya masiki akala attu a mmuruddani mwehu kannivuruwana?

¹⁴ Masiki akala attuya kannivuruwana nigalaleyaga, jowodheya ohagalala sabwa ya gari ena iyo yowavaha miselu dhapama. Yehova onjedhela wi nikose elobo-txilobo, noona wahimwaddela namavuhulela Ezekiyel eraga: “Auvuruwane, ahuvuruwane, weyo wawaddelevi mazu aga.” (Ezekiyel 2:7; Izaiya 43:10) Masiki akala attuya anovuruwana obe kanuvuruwana, Yehova onovaha ttima guru dhehu. (Kengesa Ahebreu 6:10.) Mbali dhahi ohiloga esile dhimpadduwa mmuruddani mwaye: “Iyo ninowala, ninowazela manje, ninolobelela nijedhaga wi Yehova onuwihe efunelo yawa.”​—1 Korinto 3:6.

15. Enowodheya okala anamavaha masiki attuya ahitamalelaga? Katapulela.

¹⁵ Yezu onfuna wi nikale anamavaha sabwani ejo enonagalaliha. Nigakala anamavaha attu enjene anele okala anamavaha vina. Iyene onilibiha: “Vahaní, munovahiwa: Mulugu onouvahani mpimo wawakwana, wokurukuseliwa, wotxithiwa, ontepuwa. Na mpimo wokokene onapimenyuna akwinyu, nyuwo vina munopimiwana.” (Luka 6:38) Joziweya wi masiki nikalaga anamavaha, kahiyo attu otene anatamalelege. Mbwenye akala awene kankosavo elobo, odhowevi otonyihedhaga ovaha. Weyo oganvaha muttu elobo txino kunwodha ononelamo eniwamo muttuya onakela.

16. Bani onfuniwana iyo onvaha nanda sabwaya jani?

¹⁶ Onvaha na murima wotene kanjedhela wiyihedhiwa elobo yina. Yezu ohiloga: ‘Weyo ogasasanyedha mattanga awo, wawobelevo ahawi, aragali, aliba otopinya, aliba ohona, dhahene onowona gari, vowi abo kanna mattangawa.’ (Luka 14:13, 14) Bibilia onloga: ‘Muttu wotapuwa mada onorelihiwa.’ Vina enologiwa: “Wagari ddule onimutanala musegedheyi.” (Gano 22:9; Masalmo 41:1) Ninovilibihedha okala anamavaha sabwani ninfuna nakamihedhe attu ena.

17. Mikalelo dhina dha okala anamavaha sivi?

¹⁷ Mwalogeli murumiwi Paulo wi “ovaha onothabiha opitha ovahiwa,” iyena kalogana ovaha wa dhilobo dhomaningoni bahi. Ninofuniwana wavaha attu nipangarhazo, malago ali mBibiliani vina nikamihedho. (Merelo 20:31-35) Paulo ohinittiyedha yotagiha yamakamaka ya okala anamavaha nilabihedhaga mudhidhi, guru, vina okwela wehu.

18. Anamapepesa enjene alogile nni sabwa yokala namavaha?

¹⁸ Dhopepesiwa dhikosiwe na aziwitxi dhihoniha wi ovaha onottabiha. Mowiwanana na mutoma dhahi ovuwihiwe, attu ahiloga wi ankana wagalala agamukamihedha muttu. Anamapepesaya ahiloga wi nigakamihedha attu ena, ninovaha ttima okalawo wehu. Noona anamapepesaya ahenjedhedha wi nigaviperhekela mabasa ovilevela ninokana ohagalala vina egumi yottugarheya. Epepesilani kahiyo elobo eswa, sabwani muttanddi wehu Yehova mudhidhi wotene ononubutxedha wi ovaha onottabiha.​—2 Timóteo 3:16, 17.

19, 20. Ninfunela nni okala anamavaha?

¹⁹ Vowi attu enjene mmuruddani mwehu anivizuzumela anya, enorutxa okala anamavaha. Yezu ohinubutxedha malamulo meli manddimuwa, omukwela Yehova na murima wehu wotene, na ttontto yehu yotene, na guru dhehu dhotene vina nimukwele muttu mukwehu nekalelo envikwelihu nanya. (Marko 12:28-31) Mwari mwa mutoma obu nihisunzamo wi abale animukwela Yehova anotamela omutagiha. Yehova na mwanaye Yezu anamavaha. Awene anonilibiha wi nifware yotagiha yawa, sabwani anoziwa wi enele oniva ohagalala webaribari. Nigakala anamavaha, nikosaga ejile ennifunana Yehova, ninele omuttitimiha iyene, enele onipurelamo nanya vina wapurelamo attu ena.

²⁰ Mohaganyedha, nivilibihedhe okala anamavaha, nakamihedhaga attu ena, makamaka abalihu na arogora. (Galásia 6:10) Nigalagihagavi ejuwene attu anele otamalela okwela wehu nanda ninele ofwanya ohagalala. Bibilia onloga wi: “Muthu onvaha, onofuma; iyene vina onovahiwa.” (Gano 11:25) Mwigumini mwehu vina mmabasani mwehu, ninofwanyamo gari dha okala anamavaha. Mutoma ondawo onele ologa mikalelo dhina dha okala anamavaha.