1. Dhilobo gana dhinfwanyelihu okosa wila nilabege mumodhavi na Mulugu?

YEHOVA wapaddutxile attu nefunelo yolaba vamodha na attuya. Masiki notene banili ohakwana, jowodheya attu ororomeleya olaba mumodhani na Mulugu. Ninga motagiha iyo ‘ninlaba mumodhani na Mulugu’ nigalaleyaga muttaka wapama wa Omwene vina nigakosaga anamasunza. (1 Korinto 3:5-9) Mabasa aba a olaleya anomuttittimiha Muttanddi wehu onittomele! Olaba na Yehova kahiyo olaleyavi muttaka. Mwari mwa mutoma obu ninele osunza dhilobo dhinanikamihedhe olaba mumodhani na Yehova nigakamihedhaga amudhihu, abale antugumana mumodhani na iyo, nigawakelaga aleddo, nigakamihedhaga mabasa a omaga mimburo dh’omwene dhimmagiwa elabo yotene, vina nigadhowaganavi vasogoro mabasa a Yehova.​—Kolosi 3:23.

2. Sabwaya jani kaninfwanyela oladdaniha dhinwodha attu ena omukosela Yehova, na dhinwodhihu omukosela?

² Mwari mwa mutoma obu, ninele wubutxedhiwa wila notene nittiyana. Ottiyanawa oku kwa vyaka, egumi, ewodhelo na dhilobo dhina. Mwari mwa dhilobo dhinwodha weyo omukosela Yehova, kutamele oladdaniha na dhinkosa attu ena. Murumiwi Paula ohiloga: “Muthu-muthu onfwanyela ovipimana merelo aye agafwanyamo dhinimuthabiha, agayena ahang’anaga merelo a athu ena.”​—Galásia 6:4.

3. Osapela murala wehu onkosa dhavi mpaddi wa omwebedha wehu Yehova?

³ Yehova onfuna wi nikoyege murala wehu. Motagiha, jofuneya weyo olaba wi wakwanihedhe dhojombeliwa dha amudhawo. Amambali enjene a ayana mudhidhi mwinjene ankala vatakulu akoyaga anawa. Akala amambali ehu anakalaba kanwodha ovisapela, enofuneya wi iyo natanalege. Esi dhilobo dhofwanyelela. Bibilia onologa: “Ole ohinatanala amudhaye, makamaka a tákulu modhene, orimeliwa nroromelo, otakala murima opitha ole ohineddana magano a Mulugu.” (1 Timóteo 5:8) Akala weyo ohikana muttorho wowakamihedha anamudhi, txino onofiyedha wubuwela wi kunwodha omulabela Yehova ninga mwafuneliwe. Mbwenye kuwobane sabwa ya ejuwene! Yehova onovaha ttima guru enkosiwe yowasapela amudhawo.​—1 Korinto 10:31.

4. Amambali anawodhe dhavi weka dhofuna dhomuyani vamburoni voroma, nanda txini enapadduwe agakosa dhawene?

⁴ Jowodheya amambali ali Akristu olaba mumodhani na Yehova mwa wakamihedha anawa ogana okosa mabasa a Yehova. Amambali enjene ahikosa ejuwene. Ninga yopurelamoya, anawaya ahisakula omulabela Yehova mwari mwa mabasa a mudhidhi wotene, wego wolapela na vatakulu vawa. Amisionario na apionero ena anlaba wego oli ojombeliwa wa anamalaleya, enaya anlaba Obetel. Noona, akala ayima anosakula odhowa okamihedha wego wina, amambali awa kakoddihe, namudhidhiya anodha oziveliwa na dhokosa dhawa. Mbwenyi enofuneya wi alibihege anawa odhowanavi vasogorhomabasa awa wego-kuwego olani. Sabwaya? Awene anohagalala vaddiddi sabwa ya wakamihedha anawa weka dhofuna dha Yehova vamburhoni voroma mwigumini mwawa. (3 Joau 4) Amambali enjene aniwamo ninga Ana, walogile wi ddinomulevela mwanaga Samuwel ninga ‘nvaho’ wa Yehova. Eji gari enddimuwa vaddiddi ya amambali.​—1 Samuwel 1:28.

5. Onawodhe dhavi wakamihedha abali na arogora mmulogoni mwawo? (Koona foto eli omaromo.)

⁵ Akala kunna anamudhi anfuna nikamihedho nawo, kakamihedhe abali na arogora ali aredda vina oluvalile. Obe kakamihedhe abale anakoya anakalabaya obe aredda. Ogamona muttu ontamela nikamihedho mmulogoni kamukamihedhe. Ninga motagiha, akala onomona murogora onakamihedha amambali aye ali anakalaba, onamukamihedhe dhavi? Katamela mudhidhi wowaredha na amambaliya, dhawene murogoraya onele okana mudhidhi wokosa mabasa mena. Ogamona muttu ohinwodha odhowa omatugumanoni, omusika, osipitale sabwa ya oredda obe wuluvala kamukamihedhe. Ogakosa dhawene onele olagiha wila onolaba mumodhani na Yehova oku omukamihedhaga wakula malobelo ankosa attu.​—Kengesa 1 Korinto 10:24.

6. Ninawodhe dhavi okala anamakela aleddo?

⁶ Olaba mumodhani na Yehova oniwanana na wawakela aleddo. Mbibiliani nzu ntti ‘wawakela aleddo’ na elogelo ya Egregu entapulela ‘omutanala oddule ohinimuziwewi.’ (Ahebreu 13:2) Mmaleboni ninosunzamo dhotagiha dha attu alagihile yeddelo ya wawakela aleddo. (Wita 18:1-5) Noona nakamihedhe attu anfuna nikamihedho masiki attuya akala onotamalela obe kantamalela vowi ‘enowunuwiha nroromelo nehu.’​—Galásia 6:10.

7. Dhopurelamo gani dhinkaniwe ogamwakela muleddo onlaba mmabasani a mudhidhi wotene?

⁷ Mukalelo mwina w’olaba mumodhani na Mulugu ja wawakela attu, anlaba mabasa a mudhidhi wotene. (Kengesa 3 Joau 5, 8.) Nigakosa ejuwene, notene ninele olibiheya. Bibilia ononaddela wi ‘ninele olibihana.’ (Roma 1:11, 12) Koona yotagiha ya Olaf. Bali muzombwe, nameddelela milogo wa muziye, waheddelela mulogo wawa mbwenye kana vokala, vina kavo mbali wanvahile mburo. Olaf wahakumbirha amambali aye ahali Anamoona a Yehova wila amwakele nameddelela milogo vani vawa. Amambaliya amwakula wi kavali makani, mbwenye weyo onagone vasikansoni. Olaf wahirumela. Iyene wahiziveliwa okala sumana yotene na nameddelela milogo! Iyene wanvenya membesi vina wannita makani ottiyana-ttiyana mudhidhi wajani elobo-txilobo. Nameddelelaya milego wannimulibiha vaddiddi Olaf venevo muzombweya wahigana omulabela Yehova mmabasani a mudhidhi wotene. Olaf olaba ninga misionario vilabo dhottiyana-ttiyana mwari mwa vyaka 40.

8. Ninfwanyelela nni okala apama masiki na abale ahintamalela? Kavaha yotagiha.

⁸ Nikale apama na attu ahinaziwehu nilabihedhaga marhe ottiyana-ttiyana. Motagiha murogora wa elabo ya Espanhã wannimusunziha Bibilia muyana wakuweli Yesica wa elabo ya Ecuador. Siku dhahi Yesica bagasunza wakala mintorivi. Murogora wamusunziha wahinvuza yonleliye. Yesica wahiloga wi ahinamwalela o Espanhã, wahiyelega vaddidi bagafuna ohileya. Siku dhahi iyene wahiloga wi wahipiwa dala kana elo yonvaha mwanaye. Yesica wahilobela akumbirhaga nikamihedho mmalelani wolemene bamuttukula mwanaye bamuginantiha. Vasogorhova Anamoona a Yehova eli ahifiya vatakulu vaye bamvaha marevista. Yesica wahanyanyuwela bafiyedha otaya marevistaya vina wahiloga: “Jijene enfunemi onvaha mwanaga wila aje?” Arogoraya atamela ompangarhaza mbwenye Yesicaya kafunile wavuruwana. Mmalelani arogoraya ahidhowela arhingofa mwali dhoja banvaha. Wubuwela ejene jimukosihile Yesica wunla, iyene wahinonelamo wi wahipwaza wakuliwa wa nlobelo naye. Ovano iyene omala olibela wi onfuna amulabele Yehova, opama wa arogora abale ohibaala misapo.​—Kohelét 11:1, 6.

9, 10. (a) Ana Izrayel anna dhavi gari yinjene yolaba mmabasa ovilevela? (b) Abali ankamihedha dhavi mmulogoni masaka abano?

⁹ Masaka a mundduni ana Izrayel ahikana gari yinjene yolaba mmabasa ovilevela. (Obudduwa 36:2; 1 Mapadduwo 29:5; Nehemiya 11:2) Masaka abano weyo vina ohikana gari ya olabihedha mudhidhi vina dhina weyo wila wakamihedhe abali na arogora. Ogakosa ejuwene onele okana murenddele vina onele wakela mareliho menjene.

¹⁰ Mazu a Mulugu anowalibiha alobwana wi alabe mumodhani na Yehova mmulogoni aviperhekelaga ninga adhari okamihedha vina anddimuwa a mulogo. (1 Timóteo 3:1, 8, 9; 1 Pedro 5:2, 3) Abale ankosa ejuwene anolagiha wi anofuna wakamihedha ena sabwani mabasaya bofuneya. (Merelo 6:1-4) Anddimuwa a mulogo ahiromaga wukumbirha wila okamihedhe mpaddi wogawa manivuru, osogorhela mabasa olaleya mmuruddani, ovenyihedha numba ya omwene obe okosa elobo yina? Abali anfuna okamihedha mabasa aba onorumela vina anolaba na murima wotene.

11. Murogora dhahi opurelimo dhavi mmabasa a omaga?

¹¹ Abali anivivelela okamihedha mabasa a omaga anowodha okana amarho aswa. Murogora dhahi onkuweliwa Margie ohakwaniha vyaka 18 akamihedhaga mabasa a omaga Numba dha Omwene. Mwari mwa mabasa aba, wahakamihedha azombwe enjene a arogora. Iyene ohiloga wi mwari mwa mabasa aba a ovilevela yali gari enddimuwa yokamihedhana muttu na mukwaye. (Roma 1:12) Mohaganyedha, mudhidhi wagumanana iyene makattamiho, akwaye aba aziwiliye mudhidhi wa mabasa bamukamihedha. Weyo wahiromaga okamihedha mabasa a omaga? Masiki akala onovyona ninga kuna ewodhelo, onakumuwe, enowodheya okamihedha mabasaya omaga.

12. Onavahe dhavi nikamidho nawo egapadduwa ngovi?

¹² Jowodheya iyo olaba na Yehova nakamihedhaga abali na arogora afwanyiwe ngovi. Motagiha, ninofwanyela operheka kobiri dhehu mukashani. (Joau 13:34, 35; Merelo 11:27-30) Mpaddi mwina wa okamihedha bwa okuputta obe ovenyihedha dhilobo dhonyongeya mudhidhi wa ngovi enddimuwa ninga mpulo obe pevo. Gabriela, murogora wafwanyiwe mpulo ogwihile numba yaye wahikamihedhiwa na abali a dhilabo dhowaddamela. Mwatanaleliye nipadduwo nttile, wahiloga wi dhotene esile dhayeleliye kayali elobo, mbwenye nikamihedho navahiwiye kawodha odduwala, wanfiyedha oziwa wi txibarene onotanaliwa na abali ena. Ohenjedhavo: “Nipadduwo ntti niddivaha ebaribari yawi okosa epaddi ya mulogo Wokristu gari enddimuwa, ddinowagalala vaddiddi na esi dhipadduwile.” Attu enjene agumanilena makattamiho oligana anloga dhilobo dhakadhene. Abale ankosa mabasa a Yehova akamihedhaga attu ena anofwanya ohagalala onddimuwa.​—Kengesa Merelo 20:35; 2 Korinto 9:6, 7.

13. Ninwodha dhavi olibiha omukwela wehu Yehova nigavivelela wi nikamihedhe? Kavaha yotagiha.

¹³ Murogora onkuweliwa Stephanie na anamalaleya ena ahifwanya ohagalala na mabasa a Mulugu, sabwa ya wakamihedha Anamoona enjene attawile koddo amwalelaga elabo yawa ya Estados Unidos. Iyene wahakamihedha anamattawa aba ofwanya numba na dhobo. Ohiloga: “Abaliya ahagalala vina atamaalela vaddiddi. Awene anona ninga iyo n’akamihedhi awene, mbwenye mwebaribari bawene anikamihedhile. Okwela, wiwanana, nroromelo nihilibiha omukwela wehu Yehova, vina dhetene dhivahiwe iyo dhihenjedhedha matamalo ehu wa Yehova na nikuru naye.”

14, 15. (a) Namavuhulela Izaiya wana efunelo gani? (b) Akristu anatagihe dhavi mubuwelo waye?

¹⁴ Jowodheya weyo vina wunuwiha mabasa a Yehova? Ogahifuna okosa masasanyedho wi odhowe wakamihedhe wego oli ojombeliwa wa anamalaleya a Omwene? Txino kinwodheya omwala notene wi nakose mabasa a Yehova. Mbwenye ahikalawo abali anwodha. Awene ana monelo woligana na wa namavuhulela Izaiya. Mwavuzele Yehova: ‘Ddinamurume ani? Munamukwathi wehu onakale ani?’ Iyene ohakula: ‘Ddili veneva ddirumení.’ (Izaiya 6:8) Weyo ohikana efunelo yokamihedha nikuru na Yehova? Mpaddi gani onfuniwe okamihedha?

¹⁵ Yezu wahiloga dhahi addagana mabasa olaleya: ‘Mmuddani muli dhawima gwe; anamalabaya barameyile. Mmulobe mwinya wa munddaya, arumemo anamasinanga.’ (Mateu 9:37, 38) Jowodheya okosa masasanyedho a olaba ninga pionero odhowaga okamihedha wego oli ojombeliwa wa anamalaleya? Obe onowodha omukamihedha muttu mwina okosa ejuwene? Abali na arogora enjene alogile wi mukalelo wa omukwela Mulugu na mukwawo bwa olaba ninga pionero odhowaga okamihedha wego oli ojombeliwa wa anamalaleya. Dhikalawo dhipaddi dhina dhigawodhiliwe wunuwiha mabasa awo? Ogatagiha onele oziveliwa.

16, 17. Mpaddi mwina wa wunuwiha mabasa a Yehova buvi?

¹⁶ Wahiromaga wubuwela odhowa olaba o Betel obe okamihedha mabasa a omaga malabo meli obe mararu vasumanani? Nikuru na Yehova ninowafuna attu anvilevela wi alabege oli ojombeliwa noona anokosiwa mavuzo akala ahikalawo attu aziwile olaba mabasa ottiyana-ttiyana. Yehova onowavaha ttima abale anvilevela olaba wego oli ojombeliwa wa anamalaba.​—Masalmo 110:3.

¹⁷ Ogahiziveliwa oswagihiwa wi omulabele Yehova mwari mwa mudhidhi mwinjene? Txino ogahiziveliwa okosa Eskola ya Anamalaleya a Omwene. Eskola eji enowaswagiha abali na arogora ansakula omulabela Yehova mudhidhi wotene mwari mwa nikuru naye. Abale ankosa eskola eji anorumela wego ku wego onrumiwa awene. Eji kahiyo gari ya weyo vina osakula omulabela Yehova?​—1 Korinto 9:23.

18. Yopurelamo gani enfwanya muttu onivilibihedha olaba na Yehova masiku otene?

¹⁸ Sabwa yokala nlogo na Yehova, nivilibihedhege okala anamavaha, attu aneddana oderetu, ofwaseya vina okwela. Masiku otene nivilibihedhege wakosela oderetu akwehu. Eji enodhana murenddele na ohagalala. (Galásia 5:22, 23) Mudhidhi wotene jowodheya ofwanya ohagalala akala onomutagiha Yehova oli namavaha munddimuwa, ovilibihedhegevi okala muttu wa ttima oniwananeyana na iyene!​—Gano 3:9, 10.