NROROMELO ninovaha guru. Motagiha, masiki Satana atamelege ogwadda mandano ehu na Yehova, nroromelo ninonivaha ewodhelo yovibarelana ‘mirega dhotene dha Satana.’ (Ef. 6:16) Na nroromelo, ninowodha okwaranya makattamiho ali ninga mwango. Yezu wahiloga: “Nroromelo nenyu nigaligana ngafuna-wene na murubi, munowodha olamula mwango obu mwiraga: ‘Susela oko’, mwango onosuselawo.” (Mt. 17:20) Vowi nroromelo mukalelo onlibiha mandano ehu na Yehova, japama iyo osekeserha mavuzo aba: Nroromelo txini? Nroromelo ninpatta dhavi esile dhili mmirimani mwehu? Ninawodhe dhavi olibiha nroromelo nehu? Bani onfwanyelihu omuroromela?—Rom. 4:3.

Nroromelo ninokwaranya orumela dhinloga Bibilia, sabwani ‘adomonyo vina anororomela, agurumelaga.’ (Tia. 2:19) Bahito, nroromelo txini?

Bibilia onotapulela nroromelo na mikalelo minli. Woroma, “omuroromela Mulugu thi nikoma n’owakela dhinjyedhihu.” (Aheb. 11:1a) Akala weyo okana nroromelo, onorumeela wi dhotene dhinloga Yehova sebaribari vina dhinele wakwanihedheya. Motagiha, Yehova wahawaddela ana Izrayel: “Dhithongele miyo omattiyu na mutana, dheddegevi ninga mutaddelimi; kawo onwodha obarela. Na mukalelo wakene ddinoweddiha dhimpikirhelimi mwimeleli waga David.” (Jer. 33:20, 21) Weyo onowova wi nzuwa ninattiye opattuwa nanda ohikalewo vina omutana nne omattiyu? Nne! Akala weyo onokuluvela malamulo a dhottanddiwa anttukulela ozugunuwa wa elabo attiyanihaga omattiyu na omutana, onaganyedhelani wi Muttanddi wa malamuloya onele wakwanihedha dhipikirheliye?—Iza. 55:10, 11; Mt. 5:18.

Wanawili, nroromelo “thi nikoma ninniziwiha dhiliwo dhihinoneya.” Enologiwa wi Nroromelo, “thi nikoma” na dhilobo dhihinoneya na mento ehu mbwenye dhiliwo txibarene. (Aheb. 11:1b) Na mukalelo gani? Kamutanaalele mwana ahuvuzaga dhahi: ‘Onziwa dhavi wi muya okalawo?’ Masiki akala kononaga muya, weyo ogahiziveliwa omulagiha mwanaya vizinddiyelo dha dhilobo dhiliwo dhina muya—ovuma, ovapeya wa pevo, na dhilobo dhina. Mwanaya agakuluvela n’ovikoma mwaha wa vizinddiyelo esi, iyene ononelamo wi txibarene dhilobo esi dhihinoneya dhikalawo. Yakakene, nroromelo endela modhela okuluvela vizinddiyelo n’ovikoma.—Rom. 1:20.

Vowi nroromelo nikuluvelo nina vizinddiyelo, wi muttu akaane nroromelo vamaromo onofwanyela “oziwa ebaribari.” (1 Tim. 2:4) Mbwenye okana eziwelovi kinakwana. Murumiwi Paulo ohileba: “Ole onroromela na murima waye, Mulugu onomukwela.” (Rom. 10:10) Muttu onrumeela ebaribari onofwanyela ovaha ttima ebaribariya. Dhahene, iyene onele ottukuleleya oshagiha  nroromelo, kuloga okalawo mowiwanana na ebaribari. (Tia. 2:20) Muttu ohina murima wotamaalela ebaribari, txino kankuluvela vizinddiyelo n’ovikoma sabwa yottukuleleya na dhubuwelo dhohikala obe ojeya na dhifunelo dhomaningoni. (2 Ped. 3:3, 4; Juda 18) Nona, masaka alebiwe Bibilia, kahiyo attu otene oonile matikiniho aaroromelile. (Oleb. 14:11; Jo. 12:37) Muya wa Mulugu onowunuwiha nroromelo mmirimani mwa attu ankwela ebaribari.—Gal. 5:22; 2 Tes. 2:10, 11.

Mwa abale anna nroromelo noliba mmodhaya wali Mwene David. (Aheb. 11:32, 33) Mbwenye, kahiyo anamudhi otene a David anna nroromelo ninga naye. Motagiha, mudhidhi dhahi Eliab, mbali munddimuwaya wa David, wahitoweliwa nroromelo ofiyedha omunyanyuwela David valiye ozuzumene na opuja wa Goliya. (1 Sam. 17:26-28) Kawo onbaliwa na nroromelo; vina kavo onttiyedhiwa nroromelo na amambali aye, nona nroromelo na David nidheeli sabwa ya omarho waye na Mulugu.

Masalmo 27, David ohoniha elobo emukamihedhile okana nroromelo noliba. (Versu 1) David watanalela dhilobo dhapadduwile mundduni na mukalelo wakosana Yehova amwiddani aye. (Versu 2, 3) Iyene wanvaha ttima numba ya Yehova. (Versu 4) David waziveliwa odhowa omwebedha Mulugu vamodha na attu ena mmusanani. (Versu 6) Iyene animukumbirha Yehova modhela malobelo. (Versu 7, 8) David wahifuna osunzihiwa dila dha Mulugu. (Versu 11) Nroromelo nali mukalelo wamakamaka vamentoni va David ofiyedha ologa: “Apa ddinororomela wona opama wa Nabuya.”—Versu 13.

Enowodheya okana nroromelo ninga na David, modhela otagiha mubuwelo na monelo onlogiwa va Masalmo 27. Vowi nroromelo nindela oziwa ebaribari, osunza Mazu a Mulugu na manivuru andela Bibilia, anele wukamihedha wunuwiha mikalelo esi dha muya wokoddela wa Mulugu. (Masal. 1:2, 3) Mwari mwa nsunzona onofwanyela okana mudhidhi wotanalela. Otanalela ononikamihedha omutamaalela Yehova. Omutamaalela wawo Yehova ogonuwa, onelege olibiha nroromelo nawo omwebedhaga iyene omatugumanoni vina walaleyaga attu miselu dha njeedhelo. (Aheb. 10:23-25) Iyo ninotonyihedha wila nikana nroromelo mwa “olobela na ntidi.” (Lk. 18:1-8) Nona, “lobelagani muhilemágana” wa Yehova, mukuluvelaga wi “ddi iyene onukoyani.” (1 Tes. 5:17; 1 Ped. 5:7) Nroromelo ninonikosiha wira merelo apama, nigakosaga mereloya nroromelo nehu ninoliba.—Tia. 2:22.

Mattiyu abale Yezu ahinakwa, wahawaddela anamafwara aye: “M’muroromele Mulugu, muddiroromele miyo vina.” (Jo. 14:1) Apa vanloga ottiya omuroromela Yehova bahi ninofwanyela omuroromela Yezu vina. Ninawodhe dhavi omuroromela Yezu? Ndoweni none mikalelo miraru.

Woroma, wona yobolo ninga nvaho womwinya wa Mulugu. Murumiwi Paulo ohiloga: “Ddineddana n’omuroromela Mwana-Muttu onddikwela ovilevela miyo.” (Gal. 2:20) Ogamuroromela Yezu, onorumeela wi yobolo enowodha wukamihedha, ninolaba ninga mukutto wa Mulugu wokuputtana yottega, ninovaha njedhelo na mukalakala vina ezinddiyelo enddimuwa ya okwela wa Mulugu. (Rom. 8:32, 38, 39; Ef. 1:7) Nona ogakuluvela yobolo, onele owodha orabela dhubuwelo dhohifwanyelela. —2 Tes. 2:16, 17.

Wanawili, mukutto wa Yezu ononiwodhiha omususela Yehova modhela nlobelo. Sabwa ya yobolo, iyo ninowodha omulobelela Yehova na nikuluvelo “dhahene ninowireliwa thagaraga, ninofwanya mahala, ninokamyedhiwa mudhidhi wa segedho.” (Aheb. 4:15, 16; 10:19-22) Nlobelo ninolibiha yogana yehu yorabela wira yothega.—Lk. 22:40.

Waneraru, omwiwelela Yezu. Murumiwi Joau oleba: “Ole onimurumela Mwana, ofwanya egumi yohimala; ohinimurumela, oyelela okalawo oku, sabwa owali Mulugu kunamuthiye.” (Jo. 3:36) Koona Joau ologile ororomela kunvahana na ohiwelela. Nona, akala onofuna omuroromela Yezu onofwanyela omwiwelela. Onamwiwelele Yezu ogafara “magano a Kristu,” ali nikokomezo vina masunziho otene avahiliye. (Gal. 6:2) Mukalelo mwina wa omwiwelela Yezu, bwa ofwara malago annivahiye modhela “mwimeleli wororomeleya wamalago.” (Mt. 24:45) Ogamwiwelela Yezu, onele owodha okana guru dhovilelana makatamiho ali ninga maneebe.—Lk. 6:47, 48.

Mulobwana dhahi wahimuloba Yezu eraga: “Miyo ddinororomela, enjedhedhaní ororomela waga ohinakwanela!” (Mk. 9:24) Iyene wakaana nroromelo nowobana, mbwenye noviyeviha wahoona wi wanfwanyela okana nroromelo nowakwana. Ninga mulobwana ole, iyo notene na mudhidhiya ninofwanyela wenjedhedha nroromelo nehu. Enowodheya iyo notene olibiha nroromelo nehu ovanene. Ninga moonelihu, ninalibihe nroromelo nehu modhela osunza Mazu a Mulugu vina otanalela, dhahene omutamaalela wehu Yehova onele okana matibelo. Nroromelo-vina ninela wunuwa noliba akala iyo—vamodha na abalihu—ninomwebedha Yehova, ninowalaleya attu ena miselu dha njedhelo vina ninolobela na ntidi. Ottiya ejo, nigalibiha nroromelo nehu, ninottambirha mareeliho maddimuwana opitta dhotene. Mazu a Mulugu anologa: “Amudhaga okweleya, libihaní otibela elinyu muroromelani mwenyu . . . Kalaniví mukwelani mwa Mulugu.”—Juda 20, 21.