1. Iyo notene nina efunelo gani na amudhihu?

“OVENYANA mudhidhi oromilemi onsunza ebaribari, ddahifuna wi ddikale vamodha na amudhaga Mparaizu,” mazu aba ologile ddi murogora oniliwa Pauline. * Owenjedhedha, “makamaka ddafunetxa wi mamunaga Wayne, vamodha na mwanehu notene nimulabelege Yehova.” Weyo ohikana anamudhi ahinimuziwa vina ahinimukwela Yehova? Akala ohikana, txino onowubuwela ninga Pauline.

2. Mavuzo gani anfunihu osekeserha mwari mwa mutoma obu?

² Iyo kaninawodhe wadidela amudhihu orumela miselu dhapama, mbwenye enowodheya walibiha awene wiwelela miselu dha mBibiliani. (2 Tim. 3:14, 15) Sabwaya jani enfanyeelelihu walaleya amudhihu? Ekalele nni yapama watonyihedha ntanaalelo? Ninawodhe dhavi wakamihedha amudhihu omukwela Yehova ninga munikwelihu? Nanda abali a mmulogoni anawodhe onikamihedha dhavi?

3. Mowiwanana na 2 Pedro 3:9, sabwaya jani enfanyeelelihu walaleya amudhihu?

³ Mohigonela, Yehova onele ogomiha elabo eji yabure. Mbwenye otene “abale athomeliwe egumi yamukalakala” anele oviluwa. (Mer. 13:48) Iyo ninononga mudhidhi na guru ya walaleya attu ahinaziwihu, nona, ninofwanyela-vina walaleya amudhihu wi awodhe amulabela Yehova vamodha na iyo. Babihu wokweleya, Yehova, “kanfuna orimela wa muthu nne mmodha; onfuna wi etene afwanye mudhidhi worugunutxa murima.”—Kengesa 2 Pedro 3:9.

4. Elobo gani yohifanyeelela egadhile iyo wawirela amudhihu nigalaleyaga?

 ⁴ Ninofwanyela wubuwela wi dhihikalawo mikalelo dhaderetu na dhohifwanyelela nigalogaga miselu dhapama. Nigaalaleyaga attu-attuvi ninolabihedha mazu a deretu, mbwenye nigaalaleyaga amudhihu txino ninloga mazu osuva.

5. Txini enfanyeelelihu wubuwela nihinatti walaleya amudhihu?

⁵ Enjiya wa iyo ninowubuwela mukalelo wohifwanyela walaleyilihu amudhihu, txino nigahifuna olabihedha marhe mena ottiyana. Murumiwi Paulo wahavaha malago Akristu: “Makani enyu akalege ofwasa, ozivela zelu, muziwaga omwakula muthu-muthu munfwanyeleliye.” (Kol. 4:5, 6) Ninofwanyela wubuwela malago aba apama nigafuna ologa na amudhihu. Dhawene, kaninawodhe wakamihedha amudhihu oziwa ebaribari.

6-7. Kavaha yotagiha enoniha mukalelo wa omutonyihedha ntanaalo muteli obe muteliwi ohili Mukristu.

⁶ Otonyihedhe ntanaalo. Pauline, ologiwe mundduni, ohiloga: “Vamaromo, yafunimi yali ya omwaddela mamunaga miselu dha mBibiliani bahi. Vowi masiku mena, iyo kanaana ‘makani mena’ ologa.” Mbwenye, mamunaye, kaziwa elobwene sabwa ya Bibilia vina kanonelamo dhaloga Pauline. Nona, Wayne wobuwela wi mwadhiye onloga makani a relijiau yaye bahi. Iyene wahova obuwelaga wi mwadhiye wahivolowa kapela yawopiha vina yamunyengetta.

⁷ Pauline ohiloga wi mudhidhi mwinjene na mattiyu wakala na abali—omatugumanoni, omalaleyoni na waredha mmatakulu  mwa abali. Iyene ohiloga: “Dila dhina Wayne agafiya vatakulu kaddifwanyavo, wakalavo yeka.” Joziweya wi Wayne wanfuna okala na mwadhiye vamodha na mwanaye. Wayne kaaziwa amarho aswa a mwadhiye vina yakala ninga Pauline waziveliwetxa okala na akwaye opitta na mamunaye. Nona, Wayne wahifiyedha okumbirha omwalana na Pauline. Onowodha wona na mukalelo gani wafanyeela Pauline otonyihedha ntanaalo?

8. Mowiwanana na nivuru na 1 Pedro 3:1, 2, amudhihu anang’anetxa eni makamaka?

⁸ Kattiya mweddelo wawo wapama ologe. Amudhihu anang’anetxa makamaka dhinkosihu ottiya dhinlogihu. (Kengesa 1 Pedro 3:1, 2.) Jijuwene edhile ononelamo Pauline. Ohiloga: “Ddahiziwa wi Wayne ononikwela, omwalana walogiye wali sabwa ya mweddelo waga. Varomiliye ologa dhomwalana, ddahiroma ovirihamo magano a Yehova mwaha wa matelo. Ottiya ologavi, miyo ddanfwanyela ovilibihedha olagiha mweddelo waga wapama.” Ottiya ologavi miselu dha mBibiliani, Pauline ohiroma olaga na mamunaye makani a siku-siku. Venevo Wayne wahoona wi Pauline muttu wa murenddele vina mwanaye wanawiwelela. (Gano 31:18, 27, 28) Wayne wawona wi Bibilia wela wakamihedha amudhaye, nona iyene wahiroma orumela miselu dha Mazu a Mulugu.—1 Kor. 7:12-14, 16.

9. Ninfwanyelela nni wakaanela ntidi?

⁹ Okanele ntidi na wakamihedha amudhawo. Yehova ononivaha yotagiha. Bibilia onologa wi “dila dhinjidhene” iyene onowavaha attu gari yorumeela miselu dha  mBibiliani wila akaane egumi yamukalakala. (Jer. 44:4) Paulo wahimwaddela Timóteo wila okanele ntidi na wakamihedha attu ena. Sabwaya? Sabwani kokosa dhawene, iyene agahivivuna vina agahavuna abale anvuruwana. (1 Tim. 4:16) Iyo ninowakwela amudhihu, nona ninfuna wila awene aziwe ebaribari enfanyeya mu Nzu na Mulugu. Pauline ohilagiha mazu vina merelo apama dhawene ohakamihedha amudhaye. Ovano onkala oohagalalene amulabelaga Yehova vamodha na mamunaye. Oheeli apionero vina Wayne munddimuwa wa mulogo.

10. Ninfunela nni okala ovilela?

¹⁰ Okale ovilela. Sabwa ya ovirihamo magano a Mulugu mwigumini mwehu, mweddelo wehu onotxinja, amudhihu txino anele orutxiwa orumela matxinjo ankosihu. Motagiha, elobo yoroma enazinddiyelani jawi iyo kaninja mattanga ankosiwa na makapela vina kaninkosa mpaddi wa politika. Sabwa ya esuwene anamudhi ena anosilidhiwa. (Mt. 10:35, 36) Mbwenye iyo kaninfuna okumuwa sabwa ya awene. Nigattiya wakamihedha amudhihu ononelamo dhinrumeelihu, mwebaribari enkala ninga ninowattonga wila kanakele egumi yohimala. Yehova kanivahile mabasa a wattonga attu ena—mabasa abo ottomeliwe ddi Yezu. (Jo. 5:22) Nigakala attu ovilela, amudhihu txino anele ofuna wiwa miselu dhapama.—Koona kasha “ Kalabihedha Website Wehu wila Osunzihena.”

11-13. Osunzavo nni na mukalelo waweeddihile Alice amambali aye?

¹¹ Okale ovikomene, mbwenye noderetu. (Gano 15:2) Koona yotagiha ya Alice. Iyene osunzile ebaribari valiye olapelana na amambali aye, abuwene ahamurumela okalawo wa Mulugu vina avolowelane na politika. Masiki dhawene, iyene ohona wi enofuneya wawaddela amambali aye miselu dhisunziliye. Iyene ohiloga: “Ogagonela wawaddela amudhawo dhinrumeeliwe na dhilemelelo dhawo dhiswa, awene anele osadduwela dhinrumeeliwe.” Iyene waziveliwa walebela makarta amambali aye, wantamela makani a mBibiliani agawodhile oddiginya efunelo yawa, ninga okwela. (1 Kor. 13:1-13) Alice wannatamalela amambali aye sabwa ya dhilobo dhotene dhamukoselani vina wannavaha mivaho. Agadhowa wawaredhela, iyene wanimukamihedha mamayaye na mabasa otene a vatakulu. Vamaromo, amambali aye kaaziveliwe valogile Alice dhinrumeliye.

¹² Valiye vatakulu na amambali aye, wanengesa Bibilia masiku otene. Alice ohiloga: “Eji ehimukamihedha mmani ononelamo wi Bibilia nivuru namakamaka.” Mudhidhene obule, babe ohigana osunza dhilobo dhina mwaha wa Bibilia, afuna anonelamo yamuttukulele mwanaye otxinja dhubuwelo dhaye vina wanfuna ofwanya ovirigana wa Bibilia. Alice ohiloga: “Miyo ddahinvaha babani Bibilia vina ddahilebamo mazu otamalela.” Yopurelamoya jivi? Ottiya ofwanyamo yovirigana mBibiliani, babe Alice ofanyile dhilobo dhiddiginyile murima waye.

¹³ Ninofwanyela okala ovikomene mbwenye noderetu, masiki na dhorutxa. (1 Kor. 4:12) Motagiha, maye wahinfwara-fwariwa mbwenye Alice wahivilela. Iyene ohiloga: “Mbatiziwemi, Mmani oddikuwelile ‘mwana wohiwelela.’” Alice wakulile dhavi? Owenjedhedha: “Ottiya orabela makaniya, miyo ddahimwaddela na mukalelo woderetu wila ddihigana okala Munamoona wa Yehova. Ddahimpanga mamayaga wila miyo  ddinomukwela vaddiddi. Nihunla vamodha vina miyo ddahinpiyela oja wamuzivela. Ovenyana venevo, mamayaga oroma orumela wi Bibilia onoddisaddula vina ddinokala muttu wapama.”

14. Ninfwanyelela nni okala ovikomene masiki nikooddihiwe omulabela Yehova?

¹⁴ Vanovira mudhidhi wi amudhihu anonelemo mwawakwana wila omulabela Yehova, elobo yamakamaka mwigumini mwehu. Motagiha, ottiya ofwara ganyo yafuna amambali aye, Alice waganile okala pionera, mamayaye wahifiyedha wunla wili. Mbwenye Alice wali wovikomene. Iyene ohiloga: “Ogattiya elobo modha osaddula yogana yawo, amudhawo anele wusaddula mwaha wa dhilobo dhina. Ogakala wovikomene mbwenye noderetu, ena mwa amudhawo anele ofuna ovuruwana dhinlogiwe.” Jijuwene empadduweli Alice. Ovanene amambali aye apionero vina babe munddimuwa wa mulogo.

15. Mowiwanana na Mateu 5:14-16 vina 1 Pedro 2:12, ‘merelo apama’ a abalihu anawodhe dhavi wakamihedha amudhihu?

¹⁵ Yehova onowawoba attu modhela olabihedha ‘merelo apama’ a emeleli aye. (Kengesa Mateu 5:14-16; 1 Pedro 2:12.) Akala mamunawo obe mwadhiyo kahiyo Munamoona wa Yehova, wahiromaga omuziwiha abali a mmulogoni mwawo? Pauline ologiwe mundduni, wanziveliwa wakumbirha abali ofiya vatakulu vaye wila aziwane na mamunaye Wayne. Wayne onowubuwela mukalelo omukamihedhile mbali dhahi ononelamo dhobuweliye, Wayne ohiloga: “Iyene wahikumbirha  omabasani waye siku novuma wila oone mpirha vamodha na miyo. Ddahubuwela, ‘Iyene muttu wapama!’”

16. Ninfwanyelela nni wawobela amudhihu wona matugumano?

¹⁶ Mukalelo mwina wa wakamihedha amudhihu bwa wawobela wona matugumano vamodha na iyo. (1 Kor. 14:24, 25) Matugumano oroma adhowile wona Wayne ali—Muttupo wa wubuwela okwa wa Yezu—wadhowile vaworuwiliye omabasani vina matugumanoya kagoneeli. Iyene ohiloga “miyo kaddinonelimo dhaloga diskursuya mbwenye anawubuwelimi ba attuya. Awene ahiloga makani na miyo, ahidha oddimoyela vina addivahedha mada. Ahilagiha wi ali attu anna murima wofiyedheya.” Atelani dhahi ahimukamihedha Pauline na mwanaye omatugumanoni vina omabasani olaleya. Neji, Wayne wahitamela ononelamo dhinrumeela Pauline vina iyene w’ahakumbirha atelani abale wila mulobwanaya amusunzihege Bibilia.

17. Ninkoddela nni ovipwatteliha muladdu? Mbwenye sabwaya jani ehinfanyeelihu ottiya wakamihedha amudhihu?

¹⁷ Ninfuna wi amudhihu otene amulabele Yehova vamodha na iyo. Masiki na ovilibihedha wehu wa wakamihedha amudhihu, otene kanarumeele ebaribari. Akala makaniya babuwene kaninfwanyela okaana muladdu. Iyo kaninawodhe wadidela awene okalawo mowiwanana na dhinrumeelihu. Masiki dhawene, amudhawo anele wona wi weyo onowagalala sabwa ya omulabela Yehova. Kaalobelelege. Ologege nawene na mukalelo woderetu. Kuttiye wakamihedha! (Mer. 20:20) Kakuluvela wi Yehova onele oreliha guru dhawo. Akala amudhawo anosakula wuvuruwana awene anele oviluwa!