MMULOGONI mwawo mukala mabasa agaziveliwiwe ottomeliwa? Txino ettomoya onna ddi mbali mwina. Ali mabasa attomeliwiwe obe gari yaniwena mundduni. Wahiroma ottiya mwaha wa vyaka, eredda, makattamiho a muhaku obe wasapela anamudhi. Obe sabwa ya matxinjo apadduwile munikuruni mwehu wahittiya ettomo yaniwena mwari mwa vyaka dhinjene. Masiki akala kahiyo, txino weyo onubuwela wi kunkosa dhotene dhigaziveliwiwe okosa mmabasani a Mulugu. Na mazuzumo ninga aba, jononeleyamo wila weyo onokukumuwa. Egali dhawene, txini enawukamihedhe opemberha etanalelo yohikala—ninga okumuwa, wobana obe okubanya? Onawodhe dhavi okalavi woziveliwene?

Enowodheya okalavi woziveliwene nigasunza na yotagiha ya Joau Baptista. Joau wahiziveliwa na gari enddimuwa yaniye amulabelaga Yehova, mbwenye kajeedhela dhigampadduweli mwigumini mwaye. Iyene kajeedhela wila agahivira mudhidhi mwinjene mukambura opitta mmabasani mwaye olaleya. Masiki neji, Joau walivi woziveliwene, iyene wahilagihavi mukalelo obu mwigumini mwaye. Txini yamukamihedhile? Ninawodhe dhavi okalavi woziveliwene masiki na magudulano okubanyiha?

Mweri wa Abril yaka ya 29  E.C., Joau ohiroma mabasa attomeliwiye asasanyedhaga odha wa Mesiya, wanloga: “Rugunutxani murima, vowi omwene wa Mulugu oli vakuvi.” (Mt. 3:2; Lk. 1:12-17) Attu enjene anrumeela. Attuya ena andha wego wolapela wila ewe miselu dhaye ofiyedha otxinuwa mpaka obatiziwa. Joau vina wahiliba murima, vapambihiye anddimuwa a makapela avyona ninga attu a wogowa, valogiye wi, kohitxinja agahittongiwa. (Mt. 3:5-12) Joau wakosile mabasa aye a makamakaya mweri wa Outuburu wa yaka 29  E.C. mubatiziliye Yezu. Oromana mudhidhene obo, Joau wahapanga attu wi anfwarege Yezu, wali Mesiya wapikirheliwe.—Jo. 1:32-37.

 Mabasa a Joau ali a vawoka, ofiyedha Yezu ologa: “Mwa athu etene kanabaliwemo mwina onimpitha Joau Baptista.” (Mt. 11:11) Kavali waganyedha wi Joau wahiziveliwa na mareliho aakeliliye. Ninga Joau, attu enjene anottambirha mareliho menjene andela wa Mulugu. Koona yotagiha ya mbali Terry. Iyene na mwadhiye Sandra, ahilaba vyaka 50 mmabasani a mudhidhi wotene. Terry ologa: “Miyo ddakaana gari dhinjene dhotikiniha. Ddali pionero, Betelita, pionero wavawoka, nameddelela milogo, nameddelela mirudda vina ovano ddinlaba wili ninga pionero wavawoka.” Japama okana ettomo munikuruni mwa Yehova, mbwenye ninele osunza na yotagiha ya Joau wila okale woziveliwene onofuneya ovilibihedha masiki na matxinjo.

Emukamihedhile Joau Baptista okalavi woziveliwene yali sabwa yotamaalela gari yaniye. Koona yotagiha. Vamalile Yezu obatiziwa, mabasa a Joau ahiroma oyeva oku a Yezu ahiroma wunuwa. Ozuzumene arumiwi a Joau amwaddela: “Namasunziha, muth’ule wali na nyuwo okobela wa Jordau, onitonihedhilenyu mmusibaga, onobatiza vina; ddabuno etene anonfwara.” (Jo. 3:26) Joau ohakula: “Muteliwi ddwa ole omutelile. Mukwaye wa muteli ononvelela bahi, onoziveliwa ewaga mazu aye. Ddabuno vina oziveliwa waga ohakwana.” (Jo. 3:29) Joau kakosile mavurhano na Yezu; vina kobuwela wi gari yattambirhiliye kina ttima vowi mabasa a Yezu aali a makamaka. Ottiya ejo, Joau wali woziveliwene, sabwani wanvaha ttima gari yokala “mukwaye wa muteli.”

Monelo wapama wa Joau ohimukamihedha oziveliwa masiki na magudulano otene anna mabasa attomeliwiye. Motagiha, Joau wali mu Nazireu, nona, kafwanyela omwa vinyu. (Lk. 1:15) Yezu aaddagana egumi ya Joau, ohiloga dhahi “odha Joau, ohinja, ohimmwa.” Mwa mpaddi mwina, Yezu na anamafwara aye ahikaana egumi yoligana na ya attu ena. (Mt. 11:18, 19) Joau kakosile matikiniho, iyene wanziwa wi Yezu na anamafwara aye, vamodha nabale anfara Joau agahikaana ewodhelo yokosa matikiniho. (Mt. 10:1; Jo. 10:41) Ottiya ozuzumela ottiyana oku, Joau wazuzumeli mabasa attomeliwiye na Yehova.

Akala iyo ninovaha ttima mabasa animukoselihu Yehova ovanene ninele owodha obarela wagalala wehu. Terry ologiwe mundduni, ohiloga, “miyo ddanvaha ttima mabasa attomeliwemi.” Obuwelaga mabasa okosiliye a mudhidhi wotene ohiloga, “miyo kaddintxinyuwa na elobwene, mbwenye dhina wagalala bahi.”

Enowodheya wagalala mmabasani a Mulugu nigatanaalelaga sabwa ya gari yanihu yottomeliwa mabasa obe ettomo. Gari enddimuwa ja oziwa wi “ninlaba vamodha mabasa a Mulugu.” (1 Kor. 3:9) Otanalela ttima enihuna ya omulabela Mulugu enobarela dhubuwelo dhabure dhigobanihile wagalala wehu. Kaninfwanyela oladdaniha guru dhinkosihu na esile dhinkosa attu ena. Kaninfwanyela vina wubuwela wi ettomo yehu ehiyeva moligana na ya attu ena.—Gal. 6:4.

Txino Joau wahiziwa wi mabasa aye ali a mudhidhi mung’onovi, masiki dhawene kajeedhela wila mabasaya agahigoma mohigoneela. (Jo. 3:30) Mvireli myeri 6, mmalile obatiziwa Yezu yaka ya 30 E.C., Joau wahifugeliwa na Mwene Herodi. Masiki valiye mukambura, Joau wanlaleyavi. (Mk. 6:17-20) Txini emukamihedhile Joau okala woziveliwene masiki na matxinjo? Iyene wazuzumeli dhilobo dhomuyani.

Valiye mukambura, Joau wahittambirha miselu dhaloga mwaha wa mabasa a Yezu. (Mt. 11:2; Lk. 7:18) Joau wahikuluvela wi Yezu wali Mesiya, mbwenye iyene txino wanvivuza mukalelo ogawodhile Yezu wakwanihedha dhotene dhaloga Malebo mwaha wa iyene. Vowi Mesiya agahittambirha omwene, koddi omweneya  ogaromile olamulela nsakanene nttile? Koddi Yezu agahimburutxa Joau mukambura? Wozuzumene wila anonelemo pama egakosile Yezu, Joau waharuma anamafwara aye eli odhowa onvuza Yezu: “Akala ddi iyene onfuna odha obe nimujikirhegevi mwina?” (Lk. 7:19) Vayelelilani, Joau wali wofwaseyene avuruwanaga esile dhalogani mwaha wa matikiniho akosa Yezu vina mpaganyo wavahiwani: “Aliba ohona onowona, aliba otopinya anowedda, aliba maranya anovulumutxiwa, aliba ohiwa anowiwa, attu akwile anovenya, ahawi anolaleyiwa muthaka wapama.”—Lk. 7:20-22.

Joau wahilibiheya na miselu dhiwaliye. Iyene wahirumela wi Yezu wela wakwaniha mavuhulo aloga mwaha wa Mesiya. Joau wahiziwa wi mabasa aye olaleya ali a ttima, masiki akala Yezu kagamburutxile mukambura. Masiki na makattamiho aye iyene wali w’oohagalalene.

Ninga Joau, nigazuzumela dhilobo dhomuyani, ninele owodha ovilela na ntidi vina noziveliwa. (Kol. 1:9-11) Ninavilele nigamwengesaga Bibilia vina otanalela, nubuwelaga wi ovilibihedha wehu mmabasani a Mulugu kaninttiddana vati. (1 Kor. 15:58) Sandra ohiloga: “Wengesa kapitulu ya Bibilia siku na siku enoddikamihedha onfiyedha Yehova. Eji eddikamihedha omuzuzumela iyene ottiya ddamwinya.” Enowodheya vina ofwaseyela mabasa ankosiwa munikuruni mwa Yehova, esi dhinela onikamihedha ozuzumela wona mabasa anakwanihedha Yehova, ottiya mazuzumo ehu. Sandra ohiloga: “Wona mavidiyu a vamwerini a JW Broadcasting^® anonikosiha okala ofiyedheya na nikuru na Yehova vina anonikamihedha okalavi mmabasani attomeliwehu.”

Na mudhidhi mung’onovi, Joau Baptista olaleyile na “muya na guru dhana Eliya,” ninga Eliya, iyene ‘wali muthu wa dhubuwelo ninga iyo.’ (Lk. 1:17; Tia. 5:17) Nigafwara yotagiha yaye modhela otamaalela vina ozuzumela dhilobo dhomuyani, ninela okalavi woziveliwene mmabasani mwehu a Omwene, masiki na makattamiho.