1. Txini enfwanyela Akristu okosa wila akwanihedhe muttamango?

AKRISTU anottamagela egumi. Masiki akala niromile ottamaga nawalene obe ovanene, ninofwanyela opuliha muttamango wehu. Malago a murumiwi Paulo avahiliye a Akristu o Filipi anonilibiha owodha wakwanihedha muttamango. Akristu abale  attambirhile karta ya Paulo enaya annimulabela Yehova nawale. Awene elottamaga deretu, mbwenye Paulo wela wawubutxedha wi adhowegevi bagattamaga n’ovilela. Amutagihe iyene ologile, “ddinovikoma ddithamagelaga osogorho, wi ddifiyedhe mperhe.”—Fil. 3:14.

2. Malago a Paulo aavahiliye Akristu o Filipi akalele nni ofanyelela?

² Malago a Paulo aavahiliye Akristu o Filipi aali ofanyelela. Sabwani vetiwe mulogo obule wahiroma ofwara-fwariwa. Makaniya aromile yaka 50 E.C. vafiyile Paulo na Sila o Filipi, mmalelani wakela niwobo na Mulugu naloga wi ‘kabuwela o Masedónia.’ (Mer. 16:9) Awene ahimuziwa muyana weettaniwa Lídia, iyene “wanfwaseyela ovuruwana. Nabuya omutomolela murima” wa wiwelela miselu dhapama. (Mer. 16:14) Mohigoneela iyene na amudhaye ahibatiziwa. Mbwenye, Ddiabo kaziveliwe. Alobwana a sidadi ejile ahimuttukula Paulo na Sila baadhowana wa anamattonga, baroma wamagedha wila awene anamavutiha. Nona, Paulo na Sila aahisottottiwa, ahifugeliwa vina osogorhowa aahipangiwa wi abudduwemo musidadi mpule. (Mer. 16:16-40) Awene ahikukumuwa? Nne! Ki abali a mulogo obule muswa akosile eni? Awene-vina ahivilela! Abali abale ahilibiheya na yotagiha ya Paulo na Sila.

3. Paulo wakosile eni, nanda mavuzo gani anfunihu osekeserha?

 ³ Paulo wahigana ohikukumuwa. (2 Kor. 4:16) Iyene wahiziwa wi, wila akwanihedhe muthamango waye, wanfwanyela ozuzumela wang’ana mperheya. Ninsunzavo eni na yotagiha ya Paulo? Dhotagiha dha abali a nroromelo a masaka abano dhinlagiha dhavi wi enowodheya okwaranya makattamiho? Njedhelo nehu na musogorho ninawodhe dhavi olibiha efunelo yehu yohikukumuwa?

4. Paulo wakalile dhavi womala nawale masiki na dhotene dhimpadduweli?

⁴ Kobuwela dhotene dhikosile Paulo valebeliye Akristu o Filipi. Iyene wahifugeliwa numba dhahi o Roma. Kaana ofuru wodhowa olaleya. Nona, iyene wazuzumeli walaleya abale adha omoona vina olebela makarta milogo dhali wolapela. Masaka abano enopadduwa yakakene, Akristu enjene ahina gari yodhowa mmalaleyoni anowalaleya miselu dhapama abale anda wawaredhela. Awene vina anowalibihaga anamurala ahinfwanyiwa mmawani mwawa na walebela makarta.

5. Mowiwanana na Filipi 3:12-14, Txini emukamihedhile Paulo ozuzumela mperhe waye?

⁵ Paulo kaattiyile wi dhokosa obe dhotega dhaye dha mundduni dhimuzuzumihe. Iyene ohiloga wi “ddinodduwala dhamundduni” yali ttarho yapama yaniye ‘yovikoma attamagelaga osogorho,’ wila akwanihedhe muthamango. (Kengesa Filipi 3:12-14.) Dhilobo gani dhigawodhile omuzuzumiha Paulo? Voroma, iyene wahikosa dhilobo dhotikiniha ahinatti okala Mukristu. Mbwenye, iyene wona ninga dhilobo “dhinguddeliwa vazúnguni.” (Fil. 3:3-8) Yanawili jawi, iyene kaattiyile wi muladdu wa wafwara-fwara Akristu wimetxe mabasaye. Yaneraru, iyene kobuwela wila wahakwanihedha dhilobo dhotene mmabasani a Yehova. Paulo wahivilibihedha mmalaleyoni masiki na ofugeliwa, ososottottiwa, ovadiwa, obwina mbara na ohikana yoja na dhowabala. (2 Kor. 11:23-27) Masiki na dhakwanihiliye vina dhitabuwiliye, Paulo wahiziwa wi onofwanyela ovilibihedha mmabasani a Yehova. Ninofwanyela okosa yakene.

6. Dhilobo gani “dhamundduni” dhittiyile iyo dhinfwanyeelihu odduwala?

⁶ Ninamutagihe dhavi Paulo modhela odduwala dhilobo “dhamundduni”? Abalihu ena anowanana dhubuwelo dha muladdu mwaha wa dhotega dha mundduni. Akala ninopattiwa, nirome okosa nsunzo nomwinya nubuwelaga mukutto wa yobolo ya Kristu. Nigasunza, nigatanaalela vina nigalobela mwaha wa makaniya, enele onikamihedha odduwala dhubuwelo dhohifwanyelela. Ninele ottiya ovipwatteliha muladdu sabwa ya dhotega dhimalilihu oleveleliwa na Yehova. Ninosunzamo elobo yina na yotagiha ya Paulo. Ena mwa iyo txino nihittiya ganyo ya kobiri yinjene wila nivilibihedhe mmabasani a Omwene. Mukalelo modha wodduwala dhilobo dha mundduni, bwa ohubuwela dhilobo dhomaningoni dhana iyo wale. (Oleb. 11:4-6; Koh. 7:10) Dhilobo “dhamundduni” vina dhinowiwanana na dhilobo dhapama dhakwanihile iyo obe dhoweha dhiwodhilihu ovilela wale. Kahiyo yabure wubuwela  mukalelo ovahiwihu nikamihedho na Yehova mundduni mpaka wandana na iyene. Mbwenye, kanifwase nubuwelaga wi nihakwaniha mabasa ehu.—1 Kor. 15:58.

7. Mowiwanana na 1 Korinto 9:24-27, txini enfuneya wi nipemberhe muttamango wa egumi? Kaladdaniha.

⁷ Paulo wahinonelamo nikokomezo na Yezu naloga wi: ‘Vilibihedheni na guru.’ (Lk. 13:23, 24) Paulo wahiziwa wi, ninga Mukristu, wanfwanyela ovilibihedha mpaka omagomo. Iyene oladdaniha egumi ya Mukristu na aliba mavurhano ottamaga. (Kengesa 1 Korinto 9:24-27.) Namattamaga onzuzumela ofiya vina onorabela wang’ana dhilobo dhina. Motagiha, aliba mavurhano ottamaga a musidadi anottamaga mudila munkosiwa marhondda vina muli dhilobo dhina dhinzuzumiha. Wahiromaga omubuwela namattamaga bemelile mudila ang’anaga numba yokoddela? Nne, akala onofuna opemberha kanemele! Iyo ninttamagela egumi, nona ninofwanyela orabela dhilobo dhinnizuzumiha. Nizuzumele mperhe wehu, nivilibihedhe ninga Paulo, dhahene ninele wakela mperhe wehu!

8. Dhilobo gani ttaru dhili dhoweha dhinasekeserhihu?

⁸ Ovano ninfuna nisekeserhe dhilobo ttaru dhigawodhile onikumula. Ororomela dhihinapadduwa, wobana wa maningo na magudulano angoneela mudhidhi mwinjene. Ninele opurelamo na mukalelo owodhile abali ena ovilela dhilobo esi.—Fil. 3:17.

9. Ororomela dhihinapadduwa onnipatta dhavi?

⁹ Ororomela dhihinapadduwa. Notene ninjeedhela wakwanihedheya wa dhilobo dhapama dhipikireli Yehova. Namavuhulela Habakuk valogiliye wi wafuna wila Yehova agomihe dhilobo dhabure dhapadduwa o Judá, Yehova wahimwaddela wi “ojyedhegevi nororomela.” (Hab. 2:3) Dila dhina, enkala ninga dhilobo dhinroromelihu dhinogonela, nona efunelo yehu na  ebaribari enokumuwa. Murima wehu onowobana. (Gano 13:12) Eji yahapadduwela abali ena waddamela yaka ya 1914. Akristu enjene ottikitteliwa obuwela wi agadhowile odhulu nsakanene nttile. Masiki vahipadduwilani, awene awodhile dhavi ovilela ororomela dhihinapadduwa?

10. Txini yakamihedhile atelani dhahi ovilela ororomela dhihinapadduwa?

¹⁰ Koona yotagiha ya atelani dhahi aweddeyana anna magudulano ninga aba. Mbali Royal Spatz obatiziwe yaka ya 1908 vaniye vyaka 20. Iyene wahiroromela wila momaguva agahidhowa odhulu. Nona, vafuniye omutela Pearl yaka ya 1911, wamwaddela dhahi: “Weyo onoziwa enapadduwe yaka ya 1914. Nona, akala jotelana, bahito nitelane momaguva!” Yaka ejile ya 1914 yahifiya, mbwenye kadhowile odhulu, koddi atelani aba ahikukumuwa battiya ottamaga? Nne, awene azuzumele omulabela Mulugu nororomeleya, ottiya ozuzumela mperhe. Ahigana ottamaga n’ovilela. Royal na Pearl aali olibene mwari vyaka dhinjene mpaka ogomiha egumi yawa velaboni ya vati. Kavali waganyedha wi weyo onjedhela otxenihiwa wa nzina na Yehova vina wakwanihedheya wa mapikirelo aye. Kakuluvela wi dhilobo dhotene dhinele opadduwa na mudhidhi oganile Yehova. Oku nijedhelaga, ninfuna nizuzumele mabasa a Yehova vina nihittiye elobo-txilobo wobaniha njedhelo nehu.

11-12. Ninfanyeelelani ovilibihedha masiki na wobana wa maningo? Kavaha yotagiha.

¹¹ Wobana wa maningo ehu. Mottiyana na mavurhano a anamattamaga, kahiyo yofuneya okana guru wila wunuwegevi mpaddi womuyani. Joziweya wi abali enjene anovilibihedha wunuwavi mpaddi womuyani masiki na wobana wa maningo awa. (2 Kor. 4:16) Motagiha, Mbali Arthur Secord * wana vyaka 88 vina walabile o Betel mwari mwa vyaka 55, wapattiwa eredda. Enfermeira dhahi wahinfiyedha wila amukamihedhe. wahimwang’ana na supaje, baloga: “Mbali Secord, maningo enyu ahilaba vaddiddi mmabasani a Yehova.” Mbwenye, Arthur kaazuzumeli mabasa akosiliye wale. Iyene wahimwakula nemwerumweru: “Pumwenemo, ebaribari. Mbwenye, kahiyo dhikosilihu mundduni dhilitxi dhamakamaka. Dhilitxi dhamakamaka ba mabasa ankosihu ovanene mpaka musogorho.”

¹² Txino weyo ohimulabela Yehova vyaka  dhinjene, ovano opattiwa eredda enurutxiha wira mabasa ninga mwakosiwe mundduni. Egali dhawene kukukumuwe. Kakuluvela wi Yehova onovaha ttima dhotene dhakwanihiliwe mundduni. (Aheb. 6:10) Kobuwela wila omukwela Yehova na murima wotene, kahiyo omulabela mabasa menjene. Ottiya ejo, ninolagiha omukwela Yehova modhela okosa mabasaye mpaka munwodhelihu. (Kol. 3:23) Yehova ononelamo vangomela guru dhehu, iyene kannimagelela wira dhinwodhihu.—Mk. 12:43, 44.

13. Yotagiha ya Anatoly na Lidiya ennilibiha dhavi ovilibihedha mmabasani a Yehova masiki na magudulano?

¹³ Magudulano angoneela mudhidhi mwinjene. Mwari mwa vyaka dhinjene, emeleli ena a Yehova anovilela makattamiho na ofwara-fwariwa. Motagiha, Anatoly Melnik * wa o Moldávia, wana vyaka 12 vattukuliwe babe bafugeliwa vina batxedheliwa o Sibéria, wolapelana na amudhaye makilometro matxikwi 7. Mvireli yaka mmodha, Anatoly, maye na abibe ahitxedheliwa o Sibéria vina. Na mudhidhiya, awene ahidhowa otugumana murudda mwina, wolapelana makilometro 30 eddaga mu ekuguni. Osogorhowa, Mbali Melnik wahifugeliwa vyaka ttaru, wolapelana na mwadhiye, Lidiya wana mwana wa yaka mmodha. Masiki na makattamiho ogonela vyaka dhinjene, Anatoly na amudhaye ahivilibihedha odhowavi amulabelaga Yehova. Ovano Anatoly onna vyaka 82, onlaba mpaddi wa Nikuru na Asogorheli a Katti elabo ya Ásia Central. Ninga Anatoly na Lidiya, ninofwanyela okosa guru mpaka vanwodhelihu mmabasani a Yehova, nivilelege ninga mwakoselihu mundduni.—Gal. 6:9.

14. Txini yafanyeela okosa Paulo wila akele mperhe waye?

¹⁴ Paulo wahikuluvela wila agahiwodha wakwanihedha muthamango waye wila akele mperhe. Ninga Muttikitteliwi, njedhelo naye nali na wakela “mperhe onnithanela Mulugu.” Iyene wahiziwa wi, wila akele mperheya wanfwanyela ‘ovikoma.’ (Fil. 3:14) Paulo wahilabihedha nladdaniho napama wila akamihedhe Akristu o Filipi ozuzumela wang’ana mperhe.

15. Wila akamihedhe Akristu o Filipi akale ‘ovikomene,’ Paulo olabihedhi nladdaniho gani?

 ¹⁵ Paulo wahakamihedha Akristu o Filipi wubuwela wila elabo yawa yali yodhulu. (Fil. 3:20) Sabwaya jani yafanyeelelani wubuwela? Sabwani nsaka nttile, attu anvittukulela sabwa yokala akadda Roma. * Elabo ya Akristu ottikitteliwa yali yodhulu, ejuwene yali gari enddimuwa. Okala mukadda Roma kiyali elobwene nigaladdaniha na njedhelo nolamulela odhulu! Nona, Paulo wahalibiha Akristu o Filipi alogaga wi “enukokomezani miyo, jiji bahi: mweddegena ekalelo enfwanyelela muthu wa Kristu.” (Fil. 1:27) Nifare yotagiha ya Akristu ottikitteliwa a masaka abano anvilibihedha wakela mperhe wa egumi yamukalakala odhulu.

16. Mowiwanana na Filipi 4:6, 7, txini enfanyeelelihu okosagavi, masiki akala njedhelo nehu tta odhulu obe velaboni ya vati?

¹⁶ Masiki akala njedhelo nehu tta okala odhulu obe velaboni ya vati, ninofwanyela ovilibihedha wakela mperhe wehu. Kanizuzumele wubuwela dhilobo dha mundduni; nne ottiya elobo-txilobo wimetxa mabasa animukoselihu Yehova. (Fil. 3:16) Nunuwihe njedhelo nehu masiki akala dhinroromelihu dhinogonela obe maningo ehu anowobana. Txino iyo nihivilela makattamiho na ofwara-fwariwa mwari mwa vyaka dhinjene. Nona, masiki akala mazuzumo awo ahittiyana, ‘kugulugudheye na elo-wene.’ Ottiya ejo, makattamiho awo omperhekele Mulugu, iyene onele wuvaha murenddele wahajedheliwe.—Kengesa Filipi 4:6, 7.

17. Txini enasunzehu na mutoma ondawo?

¹⁷ Ninga anamattamaga anivilibihedha wakela mperhe, iyo vina nizuzumele mperheya wila nakwanihedhe muttamango. Yehova onele onittuva, nona nivilibihedhe odhowavi osogorho mpaka vangomela guru dhehu. Txini enfwanyelihu okosa wi nittamagege na mukalelo wapama nihikukumuwaga? Mutoma ondawo onele onikamihedha ozuzumela dhilobo dhamakamaka wi niwodhe “osakula dhofwanyelela.”—Fil. 1:9, 10.