1. Bani okamihedhile witeya mulogo o Filipi?

VAFIYILE murumiwi Paulo, Sila, Luka na Timóteo elabo ya Filipi wattongiwa na Roma, ahafwanya attu enjene anna efunelo ya miselu Dhomwene. Abali aba anai ahilaba na murima wotene akamihedhaga witeya wa mulogo muswa, vina Akristu aswa otene ahiroma otugumana vamodhavi txino vatakulu va Lídia.—Mer. 16:40.

2. Makattamiho gani agumanilena mulogoya momaguva?

² Mohigoneela mulogo obule wahigumanana makattamiho. Satana wahalabihedha amwiddani wila arome ofwara-fwara mabasa olaleya akosa Akristu. Paulo na Sila ahittukuliwa, ahisosottiwa vina ahifugeliwa. Vabudduwilani mukambura, ahidhowa wawaredhela Akristu abale aswa wila alibihe. Nomala Paulo, Sila na Timóteo ahibudduwamo musidadi mpule, enkala ninga Luka waala. Txini egakosile mulogo obule muswa? Na nikamihedho na muya wa Yehova, abali abale ahigana odhowavi amulabelaga Yehova. (Fil. 2:12) Paulo wahikaana ttangwi yoziveliwa na ekosilani!

3. Mowiwanana na Filipi 1:9-11, txini ekumbirhile Paulo munlobeloni?

³ Muvireli vyaka kumi, Paulo wahilebela karta mulogo o Filipi. Ogengesa karta eji, otamele wonamo okwela wana Paulo na abalaye. Iyene wahalebela dhahi: “Mulugu oziwa oukwelani waga onddimuwa, oli ninga oukwelani wa Yezu Kristu.” (Fil. 1:8) Mukartani mpu, Paulo ohiloga wi wanalobelela.  Wahimukumbirha Yehova wila akamihedhe wunuwiha okwela wawa, wi awodhe osakula dhofwanyelela, ahisumululiwe, arabele wakwakwattutxa ena na odhowavi onuwihaga milima mabasa apama. Kavali waganyedha wila mazu okwela a Paulo anopureleyamo masaka abano. Nona, ninfuna nengese yalebele Paulo Akristu o Filipi. (Kengesa Filipi 1:9-11.) Ninele osekeserha ttarho dhilogiliye vina wona mukalelo onawodhihu ovirihamo ttarho modha-modha.

4. (a) Mowiwanana na 1 Joau 4:9, 10, Yehova o’nilagihile dhavi okwela waye? (b) Nilagihe dhavi omukwela Mulugu?

⁴ Yehova ohilagiha okwela waye onddimuwa modhela onivaha Mwanaye wi avune dhotega dhehu. (Kengesa 1 Joau 4:9, 10.) Okwela wa Yehova ononittukulela omukwela iyene. (Rom. 5:8) Nilagihe dhavi omukwela Mulugu? Yezu ohakula nivuzo ntti vavuziwiye na Mfarizi: “Omukwele Nabuya, Mulugu wawo, na murima wawo wotene, na guru dhawo dhotene na zelu dhawo dhotene.” (Mt. 22:36, 37) Omukwela wehu Mulugu kukale wogaweya. Ottiya ejo, ninfuna wi omukwela wehu iyene wunuwegevi siku na siku. Paulo wahawaddela Akristu o Filipi wila “okwela wenyu wunuwegevi.” Txini enakosihu wila omukwela wehu Mulugu wunuwegevi?

5. Ninawodhe dhavi wunuwihagavi okwela wehu?

⁵ Wila nimukwele Mulugu ninofwanyela omuziwa pama. Bibilia onologa: “Ohinkwela, kamuziwile Mulugu, vowi Mulugu ddi okwela.” (1 Jo. 4:8) Murumiwi Paulo wahiloga wi omukwela wehu Mulugu wunuwegevi “olibihiwaga na zelu dhotene, na ononelamo” ebaribari mwaha wa Yehova. (Fil. 1:9) Vanromihu omusunza Bibilia, omukwela Mulugu onuwunuwavi masiki nihiziwaga mowakwana-mwene mikalelo dhaye dhotikiniha. Na mudhidhiya, ninosunza dhilobo dhinjene mwaha wa Yehova, neji omukwela wehu onowunuwavi. Nona, ninoona nsunzo na Bibilia, na otanaalela Mazu a Mulugu ninga mpaddi wa dhilobo dhamakamaka mwigumini mwehu!—Fil. 2:16.

6. Mowiwanana na 1 Joau 4:11, 20, 21, mukalelo gani onawodhihu wunuwiha okwela wehu?

⁶ Okwela onilagihile Mulugu onele onittukulela wakwela abalihu. (Kengesa 1 Joau 4:11, 20, 21.) Txino ninowubuwela wi wakwela abalihu ekalelo yobaliwana. Iyo ninomwebedha Yehova vina ninovilibihedha otagiha mikalelo dhaye. Ninfwara yotagiha ya Yezu, onikwelile vaddiddi mwa onivaha egumi yaye. Mbwenye, dila dhina ninofwanya makattamiho a wiwelela magano a okwelana muttu na mukwaye. Koona epadduwile mwari mwa mulogo o Filipi.

7. Ninsunzavo eni na malago a Paulo ahavahiliye Evódia na Síntike?

⁷ Evódia na Síntike aali arogora alabile na murima wotene “vamodha” na Paulo. Txino awene ahikaana magudulano ofiyedha opambihana. Nona, mwari mwa karta yalebeliye mulogo wa o Filipi, Paulo wahilogamo mazina a Evódia na Síntike vina wahavaha malago aloga wi “ewananege.” (Fil. 4:2, 3) Nejuwene, Paulo wahipura gari yovaha malago aba mulogo: “Eraganí dhetedhene muhabagana, muhipambihagana.” (Fil. 2:14) Kavali waganyedha wi,  malago a Paulo aavahiliye arogora abale aweddeyana awakamihedha abali otene a mmulogonimwa wunuwiha okwela wawa.

8. Magudulano gani angumana na okwela wehu na abali, nanda ninawodhe okwaranya dhavi?

⁸ Ninga Evódia na Síntike, iyo txino ninofwanyiwa magudulano menjene annirutxiha wunuwiha okwela wehu na attu ena—sabwa ya ohiligana. Notene ninovonya malabo otene. Nigafwaseyela wang’ana dhovonya dha attu ena, okwela wehu onele wobana. Motagiha, txino nindaga osilidhiwa akala mbali onodduwala okamihedha okuputta va Numbani ya Omwene. Nigazuzumela wang’ana dhovonya dha attu ena ninele okoyaga ntxiga mmirimani, osilidhiwa wehu onele wunuwa, oku okwela wehu onele wobana. Nona, akala onofwanyiwa magudulano oligana, onofwanyela wubuwela ebaribari eji: Yehova onowoona ohiligana wehu na wa abalihu. Masiki dhawene, iyene ononikwela iyo notene. Na mwaha obu, iyo ninofwanyela otagiha okwela wa Yehova vina okana monelo wapama na abalihu. Nigavilibihedha wakwela abalihu, onamudhi wehu onele oliba vina ninele wiwanana.—Fil. 2:1, 2.

9. Dhilobo gani “dhofwanyelela” dhalogile Paulo?

⁹ Muya wokoddela ohimukamihedha Paulo wavaha malago Akristu o Filipi—na Akristu otene—aloga “wi muwodhe osakula dhofwanyelela.” (Fil. 1:10) Dhilobo dhofwanyelela ninga otxeniha nzina na Yehova, wakwanihedha efunelo yaye vina okana murenddele mmulogoni. (Mt. 6:9, 10; Jo. 13:35) Omukwela wehu Yehova, onele onittukulela okosa dhilobo dhofwanyelela mwigumini mwehu.

10. Txini enakosihu wi nihisumuleliwena elobo?

¹⁰ Paulo ohiloga kamufwanyiwena muladdu “nne yosumululiwana.” Eji kintapulela wi nili attu oligana. Iyo kaninawodhe okala s’ohisumuleliwa ninga Yehova Mulugu ohimsumuleliwa. Mbwenye nigazuzumela dhilobo dhofwanyelela na wunuwiha okwela wehu, Yehova onele onona ninga attu ahina yosumuleliwana. Mukalelo mmodha, bwa otonyihedha okwela modhela orabela wakwakwattutxa attu ena.

11. Enfuneyela nni orabela wakwakwattutxa attu ena?

¹¹ Malago mena amakamaka ba orabela wakwakwattutxa ena. Nigawodhile dhavi omukwakwattutxa muttu? Txino modhela mavego ansakula iyo, guwo dhinabalihu, obe ganyo ensakulihu. Dhinkosihu txino kahiyo dhabure. Mbwenye akala yosakula yehu enosilidha yubuwelo ya muttu mwina, ofiyedha omukwakwattutxa obo muladdu. Yezu wahiloga wi akala muttu onokwakwattutxa nibila naye nimodha egahikala omageliwa libwe mukotti bavokeliwa mbara!—Mt. 18:6.

12. Ninsunzavo eni na yotagiha ya atelani dhahi ali pionero?

¹² Koona mukalelo ovirihilemo atelani dhahi apionero malago a Yezu. Mulogo walaani mwahikala atelani ena aswa, aleliwe na anamudhi a malago. Atelani aba aswa arumeela wi Akristu kanfwanyela odhowa mmafilimini—masiki na mavidiyu ahinlagiha dhabure. Awene ahisilidhiwa mwiwelani wi atelani abale apionero ahidhowa mufilimini. Atelani abale ahittiya odhowa mmafilimini mpaka atelani abale aswa oshagiha  mubuwelo wawa ofiyedha ononelamo eli yapama na eli yabure. (Aheb. 5:14) Modhela merelo awa, apionero abale ahilagiha wi anowakwela abali aswa na mazu vina merelo awa.—Rom. 14:19-21; 1 Jo. 3:18.

13. Enwodheya dhavi omuttukulela muttu wira dhotega?

¹³ Mukalelo mwina wa omukwakwattuxa muttu bwa omuttukulela wira dhotega. Ejuwene egapadduwile dhavi? Katanalela nipadduwo ntti. Namasunza wa Bibilia owana vaddiddi na efunelo yottiya olezela, osogorhowa ohiwodha ottiya. Iyene oddubela ohifuna omwa-vina elobo yolezeliha. Onowunuwa omuyani momaguva ofiyedha obatiziwa. Mbwenye, mbali nefunelo yomweha onomukuwelela vatakulu vaye wi aje siyarhi vina ononvaha dhomwa dholezeliha, baloga: “Ddabuno to weyo obatiziwa; okana muya wa Yehova. Mukalelo mmodha wa muya wokoddela bwa ovyang’anela. Bahito, akala onovyang’anela, kamwa, mbwenye kulezele.” Kobuwela egampadduweli mbali oddule muswa kofwara nlago ntti notowa zelu!

14. Matugumano annikamihedha dhavi ovirihamo malago ali munivuruni na Filipi 1:10?

¹⁴ Matugumano anonikamihedha ovirihamo masunziho ali munivuruni na Filipi 1:10 na mikalelo dhottiyana-ttiyana. Voroma, matugumano anonikamihedha oziwa dhilobo dhamakamaka dhinfuna Yehova. Yanawili, ninowodha ovirihamo dhinsunzihu wi nihikaane yosumuleliwana.  Yaneraru, ninolibihana “okwela, othidda mabasa apama.” (Aheb. 10:24, 25) Olibihiwa na abalihu, ononikamihedha wunuwiha okwela wehu na Mulugu vina wakwela awene. Mmirimani mwehu mugakala mikalelo esi dha okwelana, ninele owodha orabela wakwakwattutxa abalihu.

15. Txini entapulela “milima dha mabasa apama”?

¹⁵ Munlobeloni, Paulo wahikumbirha wi Akristu o Filipi adhale “milima dha mabasa apama.” (Fil. 1:11) Txibarene, “milima dha mabasa apama” yatapulela omukwela Yehova na nlogo naye. Eji eniwanana wawaddela attu ena nroromelo nawo na Yezu vina njedhelo nawo na musogorho. Munivuruni na Filipi 2:15 Paulo onologamo elobo yina yawi, “muzerimele ninga vineneri.” Eji yahifanyeelela, sabwani Yezu wahawittana anamafwara aye wi nyuwo muli “warya wa elabo.” (Mt. 5:14-16) Iyene wahakokomeza arumiwi wi ‘mwakose anamafwara’ vina wahapanga wi “munere oziwiha elimi . . . mwilaboni mwetemwene, ofiyedha okomoniwá.” (Mt. 28:18-20; Mer. 1:8) Nona, wunuwiha “milima dha mabasa apama,” ku olaba na guru mmabasani aba amakamaka.

16. Mowiwanana na Filipi 1:12-14 ninawodhe dhavi ozerimela ninga vineneri masiki na dhozuzumiha dha mwigumini? (Koona foto ya kapa.)

¹⁶ Enowodheya ozerimela ninga vineneri masiki na dhozuzumiha dha mwigumini. Dila dhina, mazuzumiho txino anowodha onivaha gari ya olaleya miselu dhapama. Koona yotagiha ya murumiwi Paulo, mwafugeliwiye o Roma wahalebela karta Akristu o Filipi. Masiki bamagiwe na pingwi, iyene  wanalaleyavi awang’aneli na attu adha omoona. Masiki na dhozuzumiha, Paulo wanlaleya na murima wotene, wahalibiha murima vina wahattukulela abali odhowanavi “olaleya nzu na Mulugu ahovaga elo.”—Kengesa Filipi 1:12-14; 4:22.

17. Kavaha yotagiha ya abali a masaka abano anunuwiha milima dha mabasa apama masiki na dhorutxa.

¹⁷ Abali enjene anofwara yotagiha ya oliba murima wa Paulo. Awene ankala mwilaboni munkoddihiwa olaleya numba na numba, mbwenye anofwanya mikalelo dhina dholaleya miselu dhapama. (Mt. 10:16-20) Nameddelela milogo wa elabo dhahi, wahivaha malago awi namalaleya mmodha-mmodha onofwanyela okana “murudda” waye wolaleya, obe aalaleye amudhaye, anamwanddamani, akwaye oskola obe oganyoni na amarho. Muvireli vyaka bili, muttengo wa milogo dha murudda obule wa wunuwa vaddiddi. Txino elabo enkalihu nihikaana ofuru wolaleya. Egali dhawene, enowodheya osunza na dhotagiha dha abali na arogora anivilibihedha: Katamela mukalelo wa winjiviha mabasa olaleya, kakuluvela wi Yehova onele wuvaha guru dha weyo okwaranya magudulano otene.—Fil. 2:13.

18. Txini enfanyeelelihu ogana okosa?

¹⁸ Masaka abano, ninofwanyela ovilibihedha ovirihamo malago aavahile Paulo Akristu o Filipi. Ninofwanyela osakula dhilobo dhofwanyelela, ohisumuleliwa,orabela wakwakwattutxa attu ena na wunuwiha milima dha mabasa apama. Dhawene, okwela wehu onele wunuwa vina ninele omuttittimiha Babihu wokwela Yehova.