NSUNZO 34
Naagalale Na Mabasa Maswa Attomeliwehu
“Mulugu ddoligana, kandduwala mabasinyu, okwela onimukwelenyuna.”—AHEB. 6:10.
JIBO 23 Yehova Ddi Guru Dhehu
DHINASUNZE IYO *
1-3. (a) Attu ena anlaba mmabasani a mudhidhi wotene antxinjeliwani mabasa attomeliwani? (b) Mavuzo gani anakuliwe mwari mwa mutoma obu?
ROBERT NA MARY JO anowubuwela: “Muvirile vyaka 21 nilabaga nowagalala mmabasani a omisionario attomeliwehu, amambali ehu onayi ahifwanyiwa eredda.” Ahenjedhedha: “Iyo n’ahiziveliwa mwaha wa wakoya awene. Masiki dhawene, nahikubanya vaddiddi sabwa yottiya mabasa akosihu.”
2 William na Terrie ahiloga: “Vaziwilihu wila kaninawodhe osogorhiha mabasa attomeliwehu mwaha wa egumi yehu, nawunla. Sabwani efunelo yehu yomulabela Yehova mwari mwa elabo yina y’ahigoma.”
3 Aleksey ologa: “Nahiziwa wi amwiddani ehu anfuna ofuga katti yalabimi. Vafugiwani, notene nahittiya Betel, ejo yahinidhugudha vaddiddi.”
4. Mavuzo gani anakuliwe mwari mwa mutoma obu?
4 Kawubuwele a Betelita enjene vina abali ena attomeliwe mabasa maswa. * Mwa abali enjene ororomeleya anofwanyiwa makattamiho sabwa yottiya mabasa akosani. Txini enawodhe wakamihedha abali aba ovilela matxinjo anfwanyiwani? Weyo onawodhe wakamihedha dhavi? Dhowakula dha mavuzo aba dhinele onikamihedha ovilela matxinjo mwigumini mwehu.
ONAWODHE DHAVI OVILELA MATXINJO
Ekaleli nni yorutxa wa abale anlaba mmabasani a mudhidhi wotene ottiya mabasa attomeliwani? (Koona ddima 5) *
5. Na mukalelo gani onpattiwehu nigattomeliwa mabasa mena?
5 Masiki akala ninlaba o Betel obe mabasa mena, iyo ninowodha wunuwiha omarho na abali ena vina okwela mburo onlabihu. Mbwenye akala ninottiya mabasaya, murima wehu onokumuwa. Ninonukeliwa okala na abalihu, ninowazuzumela awene, ttabwa-ttabwa akala ninttiyela sabwa ya ofwara-fwariwa. (Mt. 10:23; 2 Kor. 11:28, 29) Ottiya ejo, orumela mabasa maswa attomeliwihu—obe wiyelela vatakulu—elobo yorutxa vowi ninogumanana makattamiho a elemelelo yina. Robert na Mary Jo ahiloga: “Sabwa yolaba elabo yina, veyelelihu vatakulu nahidduwala elemelelo yehu vina n’anrutxiwa olaleya na elogelo yehu. Nakala ninga kanali a elabo ejile.” Attu ena agattomeliwa mabasa maswa anogumanana makattamiho a ononga kobiri mohijeedheleya. Eji txino enowatotela waganyedha, wova vina wobana. Txini enakamihedhe?
Japama olibiha mandano ehu na Yehova vina omukuluvela iyene (Koona ddima 6-7) *
6. Ninawodhe dhavi okala ofiyedheya na Yehova?
6 Onfiyedhe Yehova. (Tia. 4:8) Ninakose dhavi? Modhela omukuluvela vowi iyene namakela “nlobelo.” (Masal. 65:3) Masalmo 62:8 onologa: “Vali iyene ddinothawelavo, ddinokoyeyavo.” Yehova onowodha “wira mwetemwene esile dhinkwaranya vopitha dhinlobihu, dhinubuwelihu.” (Ef. 3:20) Iyene ononivaha dhilobo dhinjene opitta esile dhinkumbirihu munlobeloni. Yehova ononikamihedha okwaranya makattamiho na mukalelo wahajedhelihu.
7. (a) Txini enanikamihedhe okalavi ofiyedheya na Yehova? (b) Mowiwanana na Ahebreu 6:10-12, yopurelamo gani endela sabwa yodhowavi nimulabelaga Yehova nororomela?
7 Wila ninfiyedhe Yehova, enofuneya omwengesa Bibilia masiku otene vina otanalela. Mbali dhahi olabile ninga misionario ohiloga: “Odhowegevi bugakosa webedha wa ntakulu na osasanyedha matugumano ninga mwakoseliwe mundduni.” Odhowege mmabasani olaleya vamodha na mulogo mwawo muswa. Yehova onowawubuwela abale andhowavi bagamulabela nororomela, masiki akala kankosa ninga mwakoselani.—Kengesa Ahebreu 6:10-12.
8. Mazu anfwanyeya munivuruni na 1 Joau 2:15-17 anawukamihedhe dhavi ovevutxa egumi yawo?
8 Katamela ovevutxa egumi yawo. Kuttiye wi dhozuzumiha dhamwilaboni eji ya Satana ‘dhobanihe’ epaddi yawo yomuyani. (Mt. 13:22) Kuttiye dhozivela dha elabo eji, obe amarho na anamudhi wukwekwettela otamela muhaku mwilaboni mpuno mwa Satana. (Kengesa 1 Joau 2:15-17.) Kamukuluvele Yehova, opikirheli onivaha dhotene dhinfunihu omuyani, muyubuweloni vina omaningoni ‘na mudhidhiya.’—Aheb. 4:16; 13:5, 6.
9. Mowiwanana na Gano 22:3, 7, nifwanyelelani orabela mangau, nanda txini enanikamihedhe okosa dhogana dhapama?
9 Orabele otota mangau. (Kengesa Gano 22:3, 7.) Omwala, onononga dhilobo dhinjene vina onomukosiha muttu otota mangau. Wila orabele otota mangau, onofwanyela okala pasope na ogula dhilobo dhihilitxi dhofuneya. Nigafwanyiwa magudulano, ninga omuzuzumela munammudhi okweleya oli muredda, txino enorutxa wang’ananiha muttengo wa kobiri onfunihu ofiyari. Kobuwela wi “malobelo, mmunlelaga” Yehova enele wukamihedha okosa yogana yapama. Yehova onowakula malobelo awo modhela wuvaha murenddele “okoya murima na mobuwelo,” onawukamihedhe wubuwela dhilobo nofwaseya.—Fil. 4:6, 7; 1 Ped. 5:7.
10. Ninawodhe dhavi wunuwiha mandano maswa?
10 Kakaanavi mandano apama na akwawo. Kaapange amarho awo dhubuwelo na dhotagiha dhawo, makamaka abale afwanyiwe dhotagiha na magudulano akakene. Eji enele wukamihedha okana mubuwelo woliba. (Koh. 4:9, 10) Akwawo alabiwena wale ohinatti ottomeliwa mabasa mena anele okalavi akwawo. Ovano, vattomeliwiwe mabasa maswa, onofwanyela okana amarho aswa. Kobuwela wila okaane amarho enofuneya okale marho. Onawodhe dhavi wunuwiha mandano awo? Walagihe dhotagiha dhapama dhiniwena vina waaziwihe wagalala oniwe mmabasani a Yehova. Ena mmulogoni kananonelemo enkweliwe mabasa a mudhidhi wotene, enagu agaziwa anele oziveliwa na dhotagiha dhawo vina anele ofuna okana omarho na weyo. Mbwenye okale pasope, orabele okalelaga ologavi dhotagiha dhawo bahi, na dhilobo dhabure dhupadduweli.
11. Onawodhe dhavi okaanavi wagalala vamuralani vawo?
11 Dila dhina, atelani anottiya mabasa attomeliwani sabwa ya oredda wa mmodhayavo. Egali dhawene, awene kanfwanyela ovipwatteliha muladdu, obuwelaga wi omunyimula mamunaye obe mwadhiye. Kamudduwale wila nyuwo muli “muthu mmodha,” vina Yehova opikirhela wukoyani muttu-muttu masiki na magudulano. (Mt. 19:5, 6) Akala weyo onottiya mabasaya sabwa ya yari yohijeedheleya kunyimuwe, mwanaya agonuwa kamwaddele wila iyene dwamakamaka opitta mabasa attomeliwiwe mundduni. Omwaddele mwanawo wi iyene “nruriho” nindela wa Mulugu. (Masal. 127:3-5) Mudhidhene obo, omwaddele mwanawo dhotagiha dhotikiniha dhiniwena mmabasani attomeliwiwe. Omukamihedhe mwanawo wi alabihedhe egumi yaye amulabelaga Yehova mmabasani a mudhidhi wotene.
NINAWODHE DHAVI WAKAMIHEDHA ATTU ENA
12. (a) Ninawodhe dhavi wakamihedha anlaba mmabasani a mudhidhi wotene odhowanavi mabasawa? (b) Ninakose dhavi wila awene awodhe ovilela matxinjo a mabasa maswa attomeliwani?
12 Japama wawona abali mmulogoni, akamihedhaga abali ena anlaba mmabasani a mudhidhi wotene owodha odhowanavi mabasa attomeliwani. Awene anowalibiha abaliya odhowanavi vasogorho mabasa awa, anowakamihedha na muhaku obe na dhilobo dhina, vina anowakamihedha amambali awa wi aneyelele mundduni. (Gal. 6:2) Akala ahikalawo abali attomeliwe mabasa maswa mmulogoni mwawo, kubuwele wi awene atxinjeliwe sabwani kawodhile wakwanihedha mabasa attomeliwani wale. * Ottiya ejo, wakamihedhe ovilela matxinjoya. Wamoyele, wasibe sabwa ya mabasa awa masiki akala egumi yawa enowobana. Katamela waziwa pama. Weyo onele osunza na eziwelo, oshaga na dhotagiha dhawa.
13. Ninawodhe dhavi wattambirha abale attomeliwe mabasa maswa?
13 Vamaromo, abale attomeliwe mabasa maswa anofuna, okamihedhiwa okana numba, ganyo, na dhilobo dhina dhofwanyelela. Ena txino anele ofuna oziwa miselu dha labo na labo, ninga ompitxiwa musoko na dhina. Yamakamakaya jawi, awene anfuna ononelamo, ottiya okaneliwa ttagaraga. Txino awene anowanana makattamiho a egumi obe a mwanamudhi wawa. Txino anokubanya sabwa ya omuyeleela munammudhi wokweleya. * Txino-vina andhaga wunla moviteyani, sabwa ya mandano ofiyedheya attiyilani mmabasani attomeliwani wale. Vanovira mudhidhi wi awodhe otanalela vina ovilela makattamiho aba otene.
14. Murogora dhahi okamihedhiwe dhavi na anamalaleya a mmulogoni olemela mabasa attomeliwiye?
14 Na mudhidhiya, yotagiha na nikamihedho nawo, ninowakamihedha odhowanavi mabasawa. Murogora dhahi olabile vyaka dhinji elabo yina, ohiloga “mmabasani attomeliwemi wale, ddanneddiha masunzo a Bibilia malabo etene. Mbwenye na mabasa aba maswa enoddirutxa oroma okana nsunzo na bibilia obe otonyihedha vidiyu mmalaleyoni. Abali a mulogo muswa ahiddiwoba odhowa waredhela na weddiha masunzo a Bibilia. Vawoona miyo abali na arogora ororomeleya eddihaga masunzo adhowa vasogorho, ddahiwodha osaddula monelo waga. Ddahiroma wita makani olaleya mmuruddani mpule. Dhotedhene esi dhahiddikamihedha wagalala wili.”
KADHOWA VASOGORHO!
Kaveda mikalelo dha wunuwiha mabasa olaleya murudda ottomeliwiwe (Koona ddima 15-16) *
15. Onawodhe dhavi opemberha ogattomeliwa mabasa maswa?
15 Enowodheya opemberha mmabasani maswa attomeliwiwe. Kuwubuwele wi ohivonya sabwa yottomeliwa mabasa mena. Kafwaseyela wona mukalelo onukamihedha Yehova vina odhowegevi olaleyaga. Kafwara yotagiha ya Akristu ororomeleya a vyaka zana dhoroma. Vego pa vego valani, awene “anlaleyavi nzu na Mulugu mwetemwene mwavirani.” (Mer. 8:1, 4) Ovilibihedha wawo mmabasani olaleya onodhana dhopurelamo dhapama. Motagiha, Apionero alaba elabo dhahi ahittamagihiwa bamwalela elabo yowaddamela, wenewale wamwalelani wahikala ofuneya wa attu aloga elogelo ya apionero abale. Mwari mwa mweri dhing’onovi, ahita nikuru niswa na elogelo yawa.
16. Txini enawukamihedhe wagalala mmabasani attomeliwiwe?
16 “Vowi oziveliwa wa Nabuya, guru dhenyu.” (Neh. 8:10) Ninofwanyela oziveliwa sabwa yomulabela Yehova, ottiya wagalala bahi na mabasa attomeliwehu. Nona, olibihegevi omarho wawo na Yehova, omukumbirhe wi ovahege eziwelo, malago, na nikamihedho. Wubuwele wila weyo wakwela mabasa abale attomeliwiwe sabwa ya oderetu wawo wa wakamihedha attu. Kavaha ttima mabasa maswa attomeliwiwe, vina kafwaseyela wona mukalelo onawukamihedhe Yehova omukwelagavi.—Koh. 7:10.
17. Txini enfwanyelihu wubuwela sabwa ya mabasa maswa attomeliwehu?
17 Kanidduwale wi omulabela Yehova kwa masaka etene, mbwenye mabasa attomeliwehu bovanene anovira. Txino mwilaboni eswa, ninele ottomeliwa mabasa mena. Aleksey, ologiwe mundduni, ologa wi dhotene dhimpadduweli dhinela omukamihedha na matxinjo a musogorho. Iyene ohiloga “miyo ddanziwa wi Yehova na elabo eswa ebaribari, mbwenye dhakala ninga dhili wolapelana na miyo. Ovanene ddinomoona Yehova malabo etene, nanda elabo eswa enowaddamela.” (Mer. 2:25) Nihang’anaga mabasa attomeliwehu, ninfuna needdegevi na Yehova. Iyene kananittiye, onele onikamihedha okaana murenddele mmabasani mwaye—masiki wego-wegovi.—Iza. 41:13.
JIBO 53 Nimulabe Mulugu Mumodhani
^ par. 5 Dila dhina, abali anlaba mmabasani a mudhidhi wotene anottiya, obe anottomeliwa mabasa maswa. Mutoma obu onele otapulelamo makattamiho angumananina vina oziwa enakamihedhe opemberha. Ninele wona txini enfwanyela attu ena okosa wila aalibihe vina aakamihedhe, ninele osunza-vina magano ananikamihedhe iyo notene ovilela matxinjo mwigumini mwehu.
^ par. 4 Yakakene epadduwa na abali enjene ana ettomo, mwakwanihilani vyaka dhuwunuwelavo, ahattoma abali aswa. Koona mutoma “Irmãos mais velhos—Jeová dá muito valor à vossa lealdade,” mu A Sentinela wa Setembro wa 2018, vina mutoma “Kakanavi Murenddele Masiki Dhamwigumini Mwawo Dhigasadduwa,” mu Mwang’aneli wa Outuburu wa 2018.
^ par. 12 Anddimuwa a mulogo anofwanyela operhengeza karta ya waziwiha abali attomeliwe mabasa maswa mmulogoni mundhowani, ejo enele wavaha gari yolabavi ninga apionero, anddimuwa a mulogo obe adhari okamihedha.
^ par. 13 Koona mitoma dhofwarelana dha “Como lidar com a dor da morte,” mu Despertai! número 3 de 2018.
^ par. 57 FOTO YA NIKUKU: Atelani amisionario attiya mabasa attomeliwani mwilaboni mwalani anopaganya mulogoya okubanyene.
^ par. 59 FOTO YA NIKUKU: Bali owaniwa, atelani akakene onolobela wa Yehova akumbiraga nikamihedho wi apemberhe makattamiho angumananina.
^ par. 61 FOTO YA NIKUKU: Na nikamihedho na Yehova, atelani abale anowiyelela mabasa a mudhidhi wotene. Alabihedhaga elogelo esunzilani na mabasa o misionario, anowalaleya anawedda ali mmuruddani mwa mulogo wawa muswa.
