1. Mavuzo gani anda muyubuweloni mwehu nigatanalelaga dhottandda dha Yehova?

NIGATANALELA munuwelo wa elabo ettanddile Yehova, ninele wiwamo ninga munasalmo David ovuzile munlobeloni mwaye: “Ddañganaga odhulu opaddutxilenyu, ddonagawo mweri na vineneri dhikilewo nyuwo, ddipima: muthu nni ofiyedha nyuwo omubuwela, mwana muthu txini wi nyuwo mmuzuzumele?” (Masal. 8:3, 4) Ninga David, nigaviladdaniha na dhineneri ninowona wi iyo niyeva vaddiddi, mbwenye oziwa wi Yehova ononitanaala enonitikiniha venjene. Yehova wanazuzumela atelani oroma Adamu na Eva vina owattiya okosa mpaddi wa murala waye.

2. Efunelo ya Yehova yali evi na anaye oroma?

² Adamu na Eva aana a Yehova oroma velaboni ya vati, vina Yehova wali Babiwa wokwela wa wirimu. Iyene wafuna wi atelani aba aabale aima. Mulugu ologa na awene: “Kalanina guru dh’obala, enjivihanani, dhalani mwilaboni, muthongemo.” (Wita 1:28) Awene agahikaana aima vina agaheddiha deretu dha mwilaboni. Kowiwelela vina kovirihamo efunelo yana Yehova na awene, Adamu na Eva vamodha na ziza nawa agahikalawo namukalakala akosaga mpaddi wa murala wa Mulugu.

3. Ninlogela nni wi Adamu na Eva ahikaana mburo wottittimiheya munikuruni na Yehova?

³ Adamu na Eva ahikaana mburho wottittimiheya munikuruni na Yehova. David wahiloga va Masalmo 8:5 mukalelo ompaddutxile Yehova muttu: ‘Oyevilevi, mumpaddutxilé wottiyana na anju, munvaha nriho na nttittimiho ninddimuwa.’ Ebaribari wi, attu kavahiwe owodha, zelu na ttotto dhina anju. (Masal. 103:20) Nlogo na attu ‘niyeva’ opitta anju. Eji  jotikiniha! Yehova wahattandda Adamu na Eva bavaha egumi yowagalaliha.

4. Txini epadduwile na mburo wana Adamu na Eva munikuruni na Yehova, nanda ninasekeserhe eni mwari mwa nsunzo ntti?

 ⁴ Mokubanyiha-mwene, Adamu na Eva ayelela mburo wanani munikuruni na Yehova. Eji ehatotela makattamiho menjene aniwa, dhahene ninga munone iyo nsunzo ninfwarela. Efunelo ya Mulugu kitxinjile. Iyene onfuna wi attu owiwelela akale anaye okala-nokala-wene. Yoroma, ninfuna noone makalelo anoniha Yehova wi ononittittimiha. Ottiya ejo, ninele wona enakosihu ovanene enlagiha wi ninofuna okosa mpaddi wa nikuru na Mulugu. Omamalelowa, ninele wona mareliwo anavahe Yehova anaye na mukalakala.

5. Iyo ninawodhe dhavi omuttittimiha Mulugu sabwa yonittandda moladdana na iyene?

⁵ Yehova ohinittittimiha mwaha wa onipaddutxa moladdana na iyene. (Wita 1:26, 27) Sabwa yopaddutxiwa moladdana na Mulugu, ninowodha olagiha mikalelo dhapama ninga, okwela, ttagaraga, weddeyana vina olagiha merelo oligana. (Masal. 86:15; 145:17) Na mikalelo esi, panwodhihu omuttittimiha Yehova vina olagiha wi ninomutamalela. (1 Ped. 1:14-16) Iyo nigeddaga na mukalelo onimuzivela Babihu wa wirimu, ninele wagalala. Sabwa yottanddiwa moladdana na Yehova, iyene ohinivaha ewodhelo yokala attu anafuniye munikuruni mwaye.

6. Yehova wattittimihile dhavi attu sabwa yosasanyedha elabo?

⁶ Yehova ohittandda elabo na mukalelo wapama wi nikalemo. Vamaromo ahinatti ompaddutxa muttu, Yehova waromile ottandda elabo. (Job 38:4-6; Jer. 10:12) Sabwa ya Yehova okala muttu wapama vina wotapuwa mada, ohinivaha dhilobo dhinji dhaderetu dhinnittabiha. (Masal. 104:14, 15, 24) Vasogorhova iyene wahigilati bapima mabasa akosiliye bona wi “bapama-wene.” (Wita 1:10, 12, 31) Yehova ohattittimiha attu modhela wavaha gari ya “weddiha dhetene” dhittanddiliye velaboni ya vati. (Masal. 8:6) Efunelo ya Mulugu jawi attu oligana akaane wagalala eddihaga mabasa aba namukalakala. Weyo onomutamalelaga Yehova sabwa ya nlibelo ntti nowagalaliha?

7. Nlebo ntti na Josuwé 24:15 ninoniha dhavi wi muttu ddi muttu ohikaana ofuru wosakula?

⁷ Yehova ohinivaha nvaho wa ofuru wosakula. Iyo ninowodha osakula mukalelo onfunihu weddiha egumi yehu. (Kengesa Josuwé 24:15.) Ewodhelo eji enkuweliwa ofuru wosakula. Mulugu wehu wokwela, onowagalala nigasakula omwebedha iyene. (Masal. 84:11; Gano 27:11) Ninowodha olabihedha ofuru wehu wosakula dhipaddi dhinjene. Ndowe noone yotagiha ettihile Yezu.

8. Kavaha yotagiha enoniha mukalelo olabihedhile Yezu ofuru waye wosakula.

⁸ Nifwaraga yotagiha ya Yezu, enowodheya wika dhifunelo dha attu ena vamburoni voroma ottiya dhehu. Mudhidhi dhahi Yezu na arumiwi aye ahilema vaddiddi, badhowa otamela mburo wila avume vang’onovi. Mbwenye, eji kiyawodheyile. Muttitti wahafwarawo, vowi anfuna osunzihiwa. Yezu kanyonyehile. Vawoniliye ttagaraga emwedda. Ekalaga dhahene, txini ekosiliye? “Venevo oroma wasunziha dhinjidhene.” (Mk. 6:30-34) Nigamutagiha Yezu nilabihedhaga mudhidhi na guru dhehu wila nakamihedhe attu, eji enele omuttittimiha Babihu wawirimu. (Mt. 5:14-16) Dhahene ninele olagiha wi ninofuna okosa mpaddi wa nikuru na Yehova.

9. Nvaho gani wamakamaka wavahile Yehova amambali?

 ⁹ Yehova ohavaha attu gari ya okaana aima na mabasa owasunziha aimaya omukwela vina omulabela iyene. Weyo akala wa mambali, onotamalela nvaho obu? Yehova owavaha anju dhiwodhelo dhinjene mbwenye kaavahile gari eji yokaana aima. Noona akala wa mambali, katamalela gari eji yowalela aima. Amambali ahikuluveliwana mabasa owalela aniwa ‘na malago animuzivela Yehova.’ (Ef. 6:4; Olib. 6:5-7; Masal. 127:3) Nikuru na Mulugu ninopakaga manivuru andela mBibiliani, mavidiyu, jibo na dhipano dhina dha mwinternetini wila aakamihedhena amambali walela aniwa. Mwebaribari, Yehova na Mwanaye anowakwela venjene aima. (Lk. 18:15-17) Amambali agamukuluvela Yehova vina agakosa mpaka vanwodhelani wila aalele aniwa Yehova onowagalala. Awene vina anowodha wakamihedha aniwa okaana gari ya okosa mpaddi wa nikuru na Yehova namukalakala!

10-11. Txini ekosile Yehova modhela mukutto wa yobolo?

¹⁰ Yehova ohinivaha Mwanaye wokweleya wi niwodhe okosa mpaddi wa nikuru Naye. Ninga monelihu  ddima 4, Adamu na Eva vamodha na ziza nawa ahiyelela mburu wawa munikuruni na Yehova. (Rom. 5:12) Awene na ofuna wawa ahinvanya Mulugu, ejene ehattukulela ohikosa mpaddi wa anamudhi a Yehova. Kito ziza nawa? Yehova n’okwela, wahikosa masasanyedho agaakamihedhile okala wili mpaddi wa nikuru naye. Iyene okosile ejuwene sabwa ya mukutto wa Mwanaye Yezu Kristu. (Jo. 3:16; Rom. 5:19) Sabwa ya mukutto wa Yezu, attu ororomeleya owakwana 144.000 ahisakuliwa na Yehova wi akale anaye.—Rom. 8:15-17; Ovuh. 14:1.

¹¹ Ottiya ejo, attu ororomeleya matxikwi na matxikwi anokosavi efunelo ya Yehova. Awene anele okaana gari y’okosa mpaddi wa nikuru na Mulugu agavira muwehiwani omagomo wa vyaka txikwi. (Masal. 25:14; Rom. 8:20, 21) Na njedhelo ntto muyubuweloni, awene anelege omukuwela Muttanddi wawa Yehova, “Baba.” (Mt. 6:9) Ovenyihiwa mukwani onele wavaha vina gari yosunza mwaha wa Yehova. Nanda anasakule omwiwelela, anele okosa mpaddi wa anamudhi a Yehova.

12. Nivuzo gani ninakule iyo ovanene?

¹² Dhahene ninga moonelihu, Yehova onowattittimiha attu na mikalelo dhottiyana-ttiyana. Iyene omala wasakula attikitteliwi ninga anaye, vina abale ankosa mpaddi wa “muthithi munddimuwa” anele okaana gari yokalawo mwilaboni eswa. (Ovuh. 7:9) Txini enfunihu okosa ovanene wi Yehova one wi ninofuna okosa mpaddi wa nikuru naye okala nokala-wene?

13. Txini enfwanyelihu okosa wi nikale munikuruni na Yehova? (Marko 12:30)

¹³ Katonyihedha omukwela wawo Yehova omulabelaga na murima wawo wotene. (Kengesa Marko 12:30.) Dhilobo dhotene dhina iyo mahala a Mulugu, yattimaya-ttimaya ena iyo ewodhelo yomwebedha iyene. Iyo ninotonyihedha omukwela Yehova mwaha wa ‘ovirihagamo malamulo aye.’ (1 Jo. 5:3) Nlamulo nimodha ninnifunana Yehova ttintti ninivahile Yezu na odhowa wakosa anamafwara. (Mt. 28:19) Iyene vina ohinivaha nlamulo nokwelana muttu na mukwaye. (Jo. 13:35) Yehova onowamoyela abale anivilibihedha ofwara malamulo aye wi akose mpaddi wa nlogo ninfwanyeya mwilaboni mwetene.—Masal. 15:1, 2.

14. Ninatonyihedhe dhavi wi ninowakwela attu ena? (Mateu 9:36-38; Roma 12:10)

 ¹⁴ Wakwela attu ena. Okwela mukalelo wamakamaka wa Yehova. (1 Jo. 4:8) Iyo nihinatti omuziwa Yehova iyene wannikwela. (1 Jo. 4:9, 10) Iyo nigaakwelaga attu ena ninimutagiha Yehova. (Ef. 5:1) Mukalelo mmodha wowakwela attu ena bowakamihedha osunza sabwa ya Yehova mudhidhi buliwo. (Kengesa Mateu 9:36-38.) Nigakosa dhawene, ninowavaha gari yokosa mpaddi wa nikuru na Mulugu. Muttu agamala obatiziwa nidhohegevi nimutonyihedhaga okwela vina nriho. (1 Jo. 4:20, 21) Ninawodhe dhavi okosa ejuwene? Elobo modha enfanyelihu okosa, jomukuluvela. Motagiha, akala iyene onokosa elobo iyo nihiziwaga sabwaya ekoseliye, kanubuwele wi okoseli na pudha. Ottiya ejo, iyo ninofwanyela otonyihedha wi ninomuttittimiha mbalihu modhela omoonana ttima empitta yehu.—Kengesa Roma 12:10; Fil. 2:3.

15. Bani anfwanyelihu watonyihedha ttagaraga na opama?

¹⁵ Kaatonyihedhe ttagaraga vina opama attu otene. Akala iyo ninofuna okala vamodha na abale anfuna omukuwelaga Yehova Babi, ninofwanyela weddagana Mazu a Mulugu. Motagiha, Yezu onisunziha wi ninofwanyela watonyihedha ttagaraga na opama attu otene, vina amwiddani ehu. (Lk. 6:32-36) Masaka meena, enorutxaga okosa ejuwene. Mbwenye iyo ninfuna nisunze okosa dhilobo ninga mwakosela Yezu. Iyo nigakosaga mpaka apale vanwodhelihu nimwelelaga Yehova vina Yezu, ninele omulagiha Babihu wa wirimu wi ninofuna okosa mpaddi wa nikuru naye namukalakala.

16. Iyo ninawodhe dhavi obarela okoddela wa nlogo na Yehova?

¹⁶ Kabarela okoddela wa nikuru na Yehova. Vamuralani vali aima, mwana mung’onoya onomusanza mbalaye owunuwelavo. Akala onoweddana magano a mBibiliani mwigumini mwaye, iyene onele okala yotagiha ya pama wa mbalaye mung’ono. Akala munddimuwaya onofwara mweddelo wohifwanyelela obe wabure, mimaya onele otagiha mweddelo wabure wa mbalaye. Yakene jimpadduwa munikuruni na Yehova. Akala Mukristu wororomeleya onoroma ottukula mubuwelo wa musadduweli, egumi yonyakuwa obe yoputtula, attu ena a mmulogoni anele ovitaganyiha na iyene afwaraga mweddelo obu wabure. Attu ankosa ejuwene anologiha bure nlogo na Yehova. (1 Tes. 4:3-8) Iyo ninofwanyela orabela ofwara dhotagiha dhabure vina dhilobo dhiganittukuleli ogwadda mandano ehu na Babihu wokwela wa wirimu.

17. Dhilobo gani dhinfwanyelihu orabela, nanda sabwaya jani?

¹⁷ Omukuluvele Yehova ottiya dhilobo dhamwilaboni. Yehova ohipikirhela wi onele oniva dhoja, dhowabala na vokala nigeka Omwene waye vamburoni voroma vina nigavirihagamo magano aye oligana mwigumini mwehu. (Masal. 55:22; Mt. 6:33) Nigakaana ejene muyubuweloni, ninele orabela wubuwela wi okaana dhilobo dhamwilaboni dhinele onidhelana nibarelo na wagalala wamukalakala. Iyo ninoziwa wi ninakaane murenddele watxibarene nigakosa ejile ennifunana Mulugu. (Fil. 4:6, 7) Akala iyo ninozuzumela ogula dhilobo dhinjene, ninofwanyela otanaalela akala nihikaana guru vina mudhidhi wolabihedha dhilobodha. Enodha opadduwa iyo ozuzumeletxa dhorela dhehu? Ninofwanyela wubuwela wila Yehova onjedhela wi iyo nikale attu anvilibihedha okamihedha nikuru naye. Eji entapulela wi kaninfwanyela ottiya elobo txilobo onizuzumiha.  Iyo kaninfuna okala ninga muzombwe oddule, wakoddile onfwara Yezu venevo bayelela gari yomulabela Yehova vina—osakuliwa wila akale vamodha na abale analamulele na Yezu!—Mk. 10:17-22.

18. Mareliho gani vina na nttittimiho ninakele attu animulabela Mulugu?

¹⁸ Attu otene owiwelela anele ojavo murenddele munddimuwa—nttittimiho notene na gari ya omukwela vina omwebedhaga Yehova namukalakala! Abale ana njedhelo nokala velaboni ya vati anele wagalala na okoddeliha elabo eji yavahile Yehova wi akalegemo. Mohigonela, Omwene wa Mulugu onele osaddula dhilobo dhotene badhikala dholigana dhahene ninga mwattanddiliye omaromo. Yezu onele ogomiha makattamiho otene atotehile na ovanya wa Adamu na Eva. Yehova onele wavenyiha mukwani attu matxikwi na matxikwi aavahaga gari yokaana egumi yoligana vina osasanyedha elabo bikala parayizu. (Lk. 23:42, 43) Attu animulabela Yehova agadha okala oligana anele wakela “nriho na nthithimiho ninddimuwa” ninga mwaloga David.—Masal. 8:6.

19. Txini enfwanyelihu okaana muyubuweloni?

¹⁹ Akala weyo onokosa mpaddi wa “muthithi munddimuwa,” ohikaana njedhelo nowagalaliha. Mulugu onowukwela; iyene onfuna wi okose mpaddi wa anamudhi aye. Okose muli mwetemwene wi omwagalalihe. Vankaliwe kudduwale elibelile Mulugu. Otamaalele gari eniwe yomwebedha Babihu wokwela Yehova, vina ovahe ttima gari yawo ya omwagalaliha na mukalakala!