1-2. Txini enasekeserhe iyo mwari mwa nsunzo ntti?

WEYO oniwamo dhavi ogajedhelaga elobo mbwenye eloboya bigagonela ofiya? Onosilidhiwa? Obe oniwamo ninga munlogela Gano 13:12: “Ororomela elobo ehinpadduwa ovanene, onoribiha murima.” Akala onoziwa wi yajedheliwe kifiyile namudhidhiya sabwa ya elobo yaderetu-wene? Txino oziwa ejene enodha wukurumutxa buroma ojedhela novilela.

² Mwari mwa nsunzo ntti, ninele woona magano menjene a mBibiliani ananikamihedhe ‘ojedha novilela.’ (Mik. 7:7) Ninele woona vina dhotagiha bili dhinfwanyela iyo omujedhela Yehova novilela. Omagomelowa, ninele osunza mareliho anavahe Yehova attu anagane ojedha novilela.

3. Nlago ninfwanyeya va Gano 13:11 ninnisunziha nni?

³ Yotagiha yoroma ennittukulela ovilela enfwanyeya va Gano 13:11. Enloga: “Orela wothamagela kunrutxa olala; ole onddoddela vañgono-vañgono, onorela.” Nlebo ntti ninnisunziha nni? Muttu onna zelu onokosa dhilobo nokurumuwa apimaga ahinatti okosa, dhahene dhintadiye dhinele osogorha.

4. Gano 4:18 enloga nigano gani?

⁴ Gano 4:18 ennisunziha wi “dila dha abale anpendda magano, dhinkala ninga txeza ya vati voya, endhowa jigonuwa mpaka mutana.” Mazu aba anowiwanana na mukamihedho onakamihedha Yehova alabeli aye ononelamo efunelo yaye —iyene onkosa vang’ono-vang’ono. Nlebona, ninonikamihedha vina woona mukalelo onkosa mulabeli wa Yehova matxinjo mwigumini mwaye wi anfiyedhevi Mulugu. Wunuwa mpaddi womuyani onottukula mudhidhi. Nigakala anamasunza ovilibihedha, attu anvirihamo malago a mBibiliani vina a nikuru na Mulugu, vang’ono-vang’ono ninele owodha otagiha mikalelo dha Kristu. Ninele vina wenjedhedha omuziwa wehu Mulugu. Ndowe noone musibo wa Yezu onanikamihedhe ononelamo deretu makani aba.

5. Yezu ologile musibo gani?

⁵ Yezu wahilabihedha musibo wi aninonihedhemo mukalelo onunuwa miselu dha Omwene mmurimani mwa attu ankwela eli yapama. Iyene ohiloga: “Beudhá dhinomela, dhinowunuwa—oku iyene [namála] agonaga peno athiddaga mabasa mena, ahiziwelagamo monuweloyá. Mathaka oka anomeliha beu: oromana nthuku, ofwárela nlala mpaka nigala modhala mbuga.” (Mk. 4:27, 28) Yezu wafuna aloge eni na mazu aba? Iyene wafuna anonihedhemo wi dhahene ninga mununuwa beu vang’ono-vang’ono, wunuwa wa muttu onrumela miselu dha Omwene onkala vina vang’ono-vang’ono. Motagiha, namasunza wa Bibilia agaroma onfiyedha Yehova, vang’ono-vang’ono ninoroma woona matxinjo ankosiye mwigumini mwaye. (Ef. 4:22-24) Mbwenye kanidduwale wi onunuwiha beuyá ddi Yehova.—1 Kor. 3:7.

6-7. Txini ensunza iyo na muttanddelo ottanddile Yehova elabo?

⁶ Yehova onkosa dhilobo dhotene novilela. Onkosa ejene alabihedhaga mudhidhi onfuneya, ahidduwalaga otxeniha nzina naye vina wakamihedha attu ena. Motagiha, koona musasanyedho osasanyile Yehova elabo vang’ono-vang’ono.

⁷ Bibilia atapulelagamo muttanddelo wa elabo ohiloga wi Yehova ‘opimelela wunuwawá,’ onoziwa ‘vemetxiliye’ vina ‘vekiliye nlugu ninttiddela elaboya.’ (Job 38:5, 6) Iyene wahitamela mudhidhi wopima  mabasa aye. (Wita 1:10, 12) Onowodha wubuwela yewamo anju monilani dhottanda dha Yehova? Awene txino ahitikina vaddiddi! Bibilia ohiloga wi anju ali ‘ottabene.’ (Job 38:7) Ninsunzavo eni? Yehova ohittukula vyaka matxikwi na matxikwi wila agomihe dhottandda dhaye, mbwenye sabwa yokosa dhotene vang’ono-vang’ono iyene owodha wona yopurelamoya. Yehova vang’aniliye mabasa etene eriliye ohona wi “bapama-wene.”—Wita 1:31.

8. Txini enasekeserhe iyo ovanene?

⁸ Ninga monilihu na dhotagiha dha mundduni, magano menjene a mBibiliani anonikamihedha okala attu ovilela. Ovano ninele woona dhilobo bili dhinnittukulela omujedhela Yehova novilela.

9. Mudhidhi gani onfwanyela iyo omujedhela Yehova?

⁹ Txino ninojedhela Yehova wakula malobelo ehu. Nigalobela nimukumbirhaga Yehova guru dhowanana makattamiho angumanana iyo obe onikamihedha opemberha dhowobana dhehu, txino ninodhaga wubuwela wi Yehova onogonela wakula malobelo ehu. Iyene onkoddela nni wakula momaguva malobelo etene ankosa iyo?

10. Nigalobelaga ninfwanyelela nni okala attu ovilela?

¹⁰ Yehova onovuruwana malobelo ankosa iyo. (Masal. 65:2) Nigamulobelelaga na murima wotene ninotonyihedha ovadda wa nroromelo nehu. (Aheb. 11:6) Nigalobelaga Yehova onofwaseyela ovuruwana wi oone akala elogilehu munlobeloni nilogile na murima wotene vina onowona akala iyo ninokosa dhilobo mowiwanana na ekumbirilehu munlobelonimwa. (1 Jo. 3:22) Nigalobela nimukumbiraga Yehova wi anikamihedhe okwaranya emanya yabure ninofwanyela ovilela vina ovilibihedha wila niwodhe ottiya emanyaya. Yezu ohiniziwiha wila malobelo meena kanaakuliwe momaguva. Iyene ohinikokomeza: “Lobaní, munovahiwa; tamelaní, munofwanya; kopelaní munowakeliwa. Pumwenemo: onloba, ddinvahiwa; ontamela, ddinfwanya; onkopela, ddinakeliwa.” (Mt. 7:7, 8) Nigafwara nlago na ‘odidela olobela’ Babihu wa wirimu onele onivuruwana vina wakula malobeloya.—Kol. 4:2.

11. Nigoona ninga malobelo ehu anogonela wakuliwa, nlebo na Ahebreu 4:16 ninanikamihedhe dhavi?

¹¹ Nigona wi nlobelo nikosilihu ninogonela wakuliwa kanidduwale wila Yehova ohipikirhela wakula malobelo ehu ‘mudhidhi wofwanyelela.’ (Kengesa Ahebreu 4:16.) Akala nihikosa nlobelo nanda ninogonela wakuliwa kanubuwele wi Yehova kanaakule. Motagiha, attu enjene mwari mwa vyaka dhinji anolobelela odha wa Omwene wa Mulugu wi otolotxe elabo eji yabure. Yezu ohinisunziha olobelela odha wa Omwene obu. (Mt. 6:10) Mbwenye ogahikala mubuwelo wotowa malago, ologa wi omagomo wa elabo kudhile mudhidhi wafunihu wi odhe! (Aheb. 2:3; Mt. 24:44) Elobo yapama enfwanyela iyo okosa omujedhela Yehova nilobelaga oku nikuluvelaga wi iyene onele wakula malobeloya. Omagomo wa elabo onele ofiya mudhidhi wofwanyelela sabwani ddi Yehova onziwa ‘sikuna na mudhidhiya’ noona enele opadduwa.—Mt. 24:36; 2 Ped. 3:15.

12. Makani gani animukosiha muttu orutxiwa ovilela?

¹² Txino ninofwanyela okala ovilela nimujedhelaga Yehova ogwadda makaniya. Mwilaboni ninowawonaga attu anaweddiha attu ena mohifwanyelela sabwa yokala a yano yottiyana, ttebe, nlogo, yeddelo vina mburo obaliwe muttuya. Ena anoweddihiwa mobureni  sabwa yoragala obe akala ahikaana makattamiho a muyubuweloni. Anamoona a Yehova enjene anopujiwa sabwa ya dhorumela dhawa dhindela mBibiliani. Nigafwanyiwa opujiwa ninga okwene ninofwanyela wubuwela mazu a Yezu. Anloga: ‘Ole onadidele oddiroromela ofiyedha omagomo, odduwene ddinavuneye.’ (Mt. 24:13) Txini enfwanyela weyo okosa ogaziwa wi muttu mmodha wa mmulogoni ohikosa yoddawa enddimuwa? Anddimuwa a mmulogoni agadha oziwa yottegaya onele ottiya makaniya mmadani mwawa? Onele ojedha n’ovilela mpaka mudhidhi oneddihe awene makaniya na mukalelo onfuna Yehova?

13. Vagapadduwa yoddawa enddimuwa mmulogoni anddimuwa anjedhiwana nni na Yehova?

¹³ Anddimuwa a mmulogoni agoona wi muttu okosa yoddawa enddimuwa anolobela akumbirhaga “ononélamo ondha odhulu” wila one makaniya dhawene ninga munonela Yehova. (Tia. 3:17) Yogana ya anddimuwa a mmulogoni ja omukamihedha ole opupuruwile ‘obudduwa mudila yovirigana yafwariye’ egawodheya. (Tia. 5:19, 20) Awene vina anovilibihedha obarela otxena wa mulogo vina ompangarhaza muttu opujiwe. (2 Kor. 1:3, 4) Ageddihaga makani aniwanana na yoddawa enddimuwa anddimuwa a mmulogoni anofwanyela okaana matibelo etene a makaniya, wila eji epadduwe enottukula mudhidhi mwinjene. Voroma anolobela, na ofwasa anonvaha muttegiya malago andela mBibiliani vina anomutxinyutxa na “goyi dhofwanyelela.” (Jer. 30:11) Ebaribari wi anddimuwa a mmulogoni kanfuna ogonela ottonga makaniya mbwenye awene kangwadda na maruru. Awene agattonga makani na mukalelo wofwanyelela otene a mmulugoni anowagalala. Mbwenye muttu opujiwe na namattegaya txino onosilidhiwavi. Akala eji ehupadduwela txini enfwanyiliwe okosa wi ohiwetxe opa?

14. Akala weyo ohisilidhiwa na mbali wa mmulogoni yotagiha gani ya mBibiliani enawukamihedhe?

¹⁴ Weyo wahiromaga weddihiwa nohiligana na mbali wa mmulogoni? Mbibiliani muhikala dhotagiha dhaderetu dhinnisunziha omujedha Yehova ogomiha makaniya. Motagiha, José wahipujiwa na abalaye masiki dhawene iyene kattihile dhoddawa dhawa omukosiha okala muttu wabure. Ottiya  ejo, José wahidhowavi azuzumelaga omulabela waye Yehova, akalaga muttu wovilela vina ajedhaga na ntidi. (Wita 39:21) Wahivira mudhidhi mwinjene nanda José wahiwodha walevelela abalaye, sabwa yokosa ejene wahirurihiwa venjene. (Wita 45:5) Dhahene ninga José, ninopangarhazeya niganfiyedha Yehova vina nigamuttiya iyene ogomiha makaniya.—Masal. 7:17; 73:28.

15. Txini emukamehedhile murogora odduwala opujiwa wafwanyiwiye?

¹⁵ Ebaribari wi opujiwa wotene ongumanana iyo ohittiyana na dhimpadduweli José, mbwenye weddihiwa mohifwanyelela onosuva murima wa muttu ddi muttu. Akala nihikaana makani na mbalihu obe muttu ohinimulabela Yehova elobo yapama enfwanyela iyo okosa ofwara magano a mBibiliani. (Fil. 2:3, 4) Ndowe noone empadduweli murogora dhahi. Iyene wahidha oziwa wila muttu mmodha wa omabasani waye wanimuloga bure na attu ena. Ottiya ogomiha makaniya na maruru, iyene wahitanalela yotagiha ya Yezu. Varuwaniwiye, iyene kakula na mazu ovadda. (1 Ped. 2:21, 23) Na mazu aba muyubuweloni iyene wahigana odduwala makaniya. Movira wa mudhidhi murogora oddu wahidha oziwa wi muttu oddule wamuloga bure wakaana eredda yowopiha noona akala odhugudheyene. Iyene wahidha ozinddiyela wi dhalogiye kalogela na efunelo yomunyimula. Murogorihu wahagalala sabwa yokala muttu wovilela vina karimeliwe murenddele.

16. Akala ohifwanyiwa opujiwa elobo gani enawupangarhaze? (1 Pedro 3:12)

¹⁶ Akala weyo onotabuwa sabwa ya opujiwa obe makattamiho-makattamihovi, kudduwale wi Yehova onowawaddamela “ansuveya murima.” (Masal. 34:19) Okaane ebaribari wi Yehova onowukwela mwaha wa ovilela wawo vina sabwa yompanga makattamiho angumanana weyo. (Masal. 55:22) Iyene Namattonga woligana wa mwilaboni mwetene. Yehova onoziwa dhotene dhimpadduwa. (Kengesa 1 Pedro 3:12.) Noona ogafwanyiwa makattamiho ahinwodha weyo ogomiha, elobo yapama enfwanyeliwe okosa ku omujedhela Yehova wi agomihe makattamihoya.

17. Mowiwanana na Izaiya 30:18, Yehova onnikuluveliha nni?

¹⁷ Mohigonela Babihu wa wirimu onele oniruriha modhela Omwene waye. Izaiya 30:18 onologa: “N’esi dhetedhene, Nabuya [Yehova] onojedha oulevelelani, onoupiselani murima, vowi Mulugu dhinireye sovulumutxavi. Wagari ddule onimuroromela.” Ole onadidelevi omujedhela Yehova onele orurihiwa ovanene vina mwilaboni eswa.

18. Maruriho gani anjedhela iyo?

¹⁸ Nlogo na Mulugu nigavolowa mwilaboni eswa kanafwanyiwe makattamiho angumananina masaka abano. Opujiwa wotene na wiwopa kunobuweliwe vina. (Ovuh. 21:4) Kaninajedhelege mudhidhi mwinjene dhilobo dhinfunihu, attu otene anele okaana dhilobo dhotene dhinfunani vina dhinele wejendhedhiwa vang’onovi. (Masal. 72:16; Iza. 54:13) Ninele orurihiwa venjene na Yehova!

19. Yehova masaka abano onnisasanyedhela nni?

¹⁹ Masaka abano, nigakamihedhiwaga na Yehova opemberha emanya-emanyavi obe okaana mikalelo dha Mukristu kuloga iyene ononisasanyedha wila nikale mwilaboni eswa. Noona kukumuwe vina kuwiyelele mundduni. Iyo ninojedhela dhilobo dhowagalaliha! Nimujedhelege Yehova na ovilela mpaka mudhidhi onagomihiye makattamiho otene!