1. Iyo ninapurelemo dhavi sabwa ya ologa makani anittukuleli oziwa “ebaribari”?

 “WEYO oziwile dhavi ebaribari?” Kaninaganyedha wi ohakula nivuzo ntti dila dhinjene. Ntti, nivuzo noroma mwa mavuzo ankosetxa abali na arogora nigakala mumodhani. Iyo ninoziveliwa wawiwa abalihu na arogora anaddelaga mukalelo omuziwilani vina oromilani omukwela Yehova vina ninowagalala wawaddela ejile entapulela ebaribari mwa iyo. (Rom. 1:11) Yodhelavo ya makani aba ja onubutxedha ttima ena ebaribari vina wunuwiha efunelo ‘yoweddagavi mwibaribarini’—kuloga odhowavi neddaga muddila ennittukulela wakela mareliho a Yehova vina orumeliwa na iyene.—3 Jo. 4.

2. Txini enasekeserihu mwari mwa nsunzo ntti?

² Mwari mwa nsunzo ntti, ninele osekeserha sabwa dhing’onovi dhinnittukulela okwela ebaribari. Ottiya ejo, ninele osekeserha mukalelo onatonyihedhihu wi ninokwela nvaho obu wa ttima. Kavali waganyedha wi nsunzo ntti ninele wunuwiha efunelo yehu ya omutamalela Yehova sabwa ya onikukusela mwibaribarini. (Jo. 6:44) Ninele vina wunuwiha efunelo ya wawaddela attu ena ebaribari.

3. Sabwa gani yamakamaka ennittukulela okwela ebaribari?

³ Iyo ninokwela ebaribari sabwa ya dhilobo dhinjene. Elitxi yamakamakaya omukwela Yehova, Mulugu oli Nipara na ebaribari. Modhela Nzu naye Bibilia, ninomuziwa ninga Muttanddi wa eziwelo wa elabo ya vati vina wa wirimu ottiya ejo, nihifiyedha omuziwa ninga Babi onnitanala venjene. (1 Ped. 5:7) Iyo ninoziwa wi Mulugu wehu ‘dwa ttagaraga, dwa nttebwa,  ddovilela, ddodhala okwela ddoweddeyana vina dwa txibarene.’ (Obud. 34:6) Yehova onokwela merelo oligana. (Iza. 61:8) Iyene onowiwa opa aganonaga nitabuwaga nona iyene—onofuna vina onele ogomiha—makattamiho otene annitabutxa, mudhidhi wofwanyelela. (Jer. 29:11) Ninojedhela ofiya wa mudhidhi obu wowagalaliha! Eji, ji sabwa yoroma ennittukulela omukwela Yehova vaddiddi!

4-5. Sabwaya jani murumiwi Paulo aladdaniha njedhelo nehu na nangura?

⁴ Sabwa gani yina ennittukulela okwela ebaribari? Ebaribari enonipuriha. Ndowe nitanalele yotagiha modha. Njedhelo nehu na musogorho ninokosa mpaddi wa dhibaribari dhinfwanyeya mBibiliani. Murumiwi Paulo ohilabihedha nladdaniho wi onihe ttima ya njedhelo nehu mulebeliye dhahi: ‘Njedhelo ninolibiha, ninowimetxa mirima dhehu ninga nangura onlikiya mwanddiya.’ (Aheb. 6:19) Dhahene ninga nangura onimetxa mwanddiya, njedhelo nehu nindela mBibiliani ninonimetxa pwi mudhidhi ongumanihuna makattamiho.

⁵ Paulo alogaga mazu anfwanyeya versu eji, walogana Akristu ottikitteliwa ana njedhelo na okala wirimu. Mbwenye mazu aba vina anowapatta Akristu anakale velaboni ya vati na mukalakala. (Jo. 3:16) Txibarene, osunza sabwa ya njedhelo nina iyo na okala velaboni ya vati na mukalaka ononikamihedha oziwa wi egumi yehu ehikana ttima.

6-7. Yvonne okamihedheyile dhavi sabwa ya osunza ebaribari mwaha wa musogorho?

⁶ Katanalela nipadduwo na murogora onkuweliwa Yvonne. Iyene kabaliwe mwibaribarini, bali mwana wannova venjene okwa. Iyene onowubuwela mazu engesiliye ahabudduwa muyubuwelo mwaye: “Labo nimodha nigadhowa ogona kaninavenye vina.” Iyene ohiloga wi: “Mazu aba ahiddittukulela ovenya vari va mattiyu ddihiwodhaga ofwanya tturho baddiroma wubuwela sabwa ya musogorho omattiyu wotene. Ddahubuwela ‘Iyo ninkalelawo nni mudhidhi mung’onovi omamalelowa ninokwa.’ Miyo kaddinfuna okwa!”

⁷ Vasogorhova bali muzombwe, Yvonne wahigumana na Anamoona a Yehova. Iyene ohiloga dhahi: “Miyo ddahiroma orumela wi nihikana njedhelo nokala na mukalakala Mparaizu velaboni ya vati.” Osunza ebaribari enpurihile dhavi murogora Yvonne? Iyene ohenjedhedha: “Ovano kaddinkala omattiyu wetene se ofwanya tturho ddubuwelaga sabwa ya musogorho vina ddovaga okwa.” Onowodha wubuwela mukalelo ofuruleyile Yvonne sabwa ya oziwa ebaribari vina wagalala okaniliye sabwa ya w’awaddela attu ena njedhelo na musogorho.—1 Tim. 4:16.

8-9. (a) Mmusiboni mmodha wa Yezu, mulobwana dhahi wonihile dhavi wi ohivaha ttima nifumo nafwanyiliye? (b) Mwa weyo ttima gani ena ebaribari?

⁸ Miselu dhapama dha Omwene wa Mulugu dhinokosa vina mpaddi wa ebaribari enfwanyeya mBibiliani. Yezu ohiladdaniha ebaribari ya Omwene wa Mulugu na nifumo nivitiwe mmunddani. Ninga mulebeliwani va Mateu 13:44, Yezu ohiloga wi: “Omwene wa wirimu onladdana na nifumo niviteyile mmuddani, nifwanyiwe na muttu dhahi, avita wili; na ottaba odhowa oguliha dhotedhene dhaniye, odhowa ogula munddaya.” Noneni wi mulobwana oddule katamela nifumo, masiki dhawene mufwanyeliye wahikosa guru ya ogumela. Iyene ohidhowa oguliya dhilobo dhotene dhaniye. Sabwaya? Sabwani wanziwa wi nifumo nttile nahikana ttima enddimuwa vaddiddi. Nali na ttima opitta elobo-elobovi yaniye.

 ⁹ Weyo oniwamo dhawene sabwa ya ebaribari? Ndde! Iyo ninoziwa wi kuli elo envahiwehu mwilaboni mpuno enladdanihiwa na wagalala onihu wa omulabela Yehova ovanene vina njedhelo na okala namukalakala musogorho mpo nilamuleliwaga na Omwene wa Mulugu. Iyo nihikana gari enddimuwa vaddiddi ya okana mandano ofiyedheya na Yehova nona nikose guru eli yotene wi nilibihe mandano aba. Ottaba wehu onddimuwa ‘onomwagalaliha venjene’ Yehova.—Kol. 1:10.

10-11. Txini emuttukuleli Michael okosa matxinjo manddimuwa?

¹⁰ Enjene mwa iyo mufwanyilani ebaribari ahikosa guru enddimuwa vaddiddi wi arumeliwe na Yehova. Ena ahinyanyala dhilobo dhamakamaka dhanani mwilaboni mpuno. Oku enaya ahittiya otamela dhorela. Mwa mpaddi mwina ena ahitxinja kakamwe egumi yawa sabwa ya osunza mwaha wa Yehova. Jijene ekosile Michael. Iyene kabaliwe mwibaribarini. Bali muzombwe wahisunza artes marciais. Iyene ohiloga dhahi: “Mwa miyo eji yali elobo yamakamaka vaddiddi yazuzumeletximi.” Mbwenye muromiliye omusunza Bibilia, Michael ohisunza monelo wa Yehova sabwa ya owana. (Masal. 11:5) Alogaga mwaha wa atelani amusunziha Bibilia, Michael ohiloga dhahi: “Awene txipo kaddaddeli wi ddanfwanyela ottiya artes marciais ottiya ejo awene ahidhowavi addisunzihaga ebaribari ya Bibilia.”

¹¹ Venevo vadhowa Michael asunzaga mwaha wa Yehova, omukwela waye wannunuwavi. Eddiginyile murima waye ji ttagaraga ena Yehova na alabeli Aye. Mwa ovira wa mudhidhi, Michael wahinonelamo wi wanfwanyela okosa matxinjo. Iyene ohiloga dhahi: “Miyo ddanziwa wi ottiya mpaje egali elobo yorutxa vaddiddi egakosilemi mbwenye ddanziwa wi egahimwagalaliha Yehova vina ddahinonelamo wi ddanfwanyela okosa guru eli yotene wila ddiwodhe omulabela Yehova.” Michael wanvaha ttima vaddiddi ebaribari efwanyileye nanda eji ehimuttukulela okosa matxinjo manddimuwa mwigumini mwaye.—Tia. 1:25.

12-13. Ebaribari ya mBibiliani emukamihedhile dhavi Mayli?

¹² Ttima enddimuwa ya ebaribari eli mBibiliani enoladdanihiwa na txeza ya panti mwiddimani. (Masal. 119:105; Ef. 5:8) Mayli, wa elabo ya Azerbaijan, ohitamalela venjene mufwanyiliye ebaribari ya Bibilia. Iyene wunuwile vamuralani vali ogaweya wa relijiau. Babe wali Mmwenye oku maye wali Muyuda. Iyene ohiloga dhahi: “Miyo ddanziwa wi Mulugu ohikalawo, mbwenye ddahikana mavuzo menjene. Miyo ddanivivuza, ‘Mulugu wattanddele nni attu, nanda muttu ontabuwela nni okalawo waye wotene omamalelowa badhowa otabutxiwa okala-nokala-wene velalani ya motto?’ Sabwa ya attu ologa wi dhilobo dhotene dhimpadduwa efunelo ya Mulugu, miyo ddanivivuza, ‘Mulugu onziveliwa bahi agawonaga attu atabuwaga?’”

¹³ Mayli wahidhowavi atamelaga dhowakula dha mavuzo aye. Mwa ovira wa mudhidhi, wahirumela omusunza Bibilia bafiyedha oziwa ebaribari. Iyene ohiloga: “Ebaribari ya Bibilia ehitxinja egumi yaga vina ehiddikamihedha okala muttu wowagalala. Ebaribari ya Nzu na Mulugu ehiddikamihedha okana murenddele.” Dhahene ninga Mayli, iyo notene ninomuttittimiha Yehova, ‘Onittanile mwiddimani mwalihu wi nivolowe mu warihani motikiniha.’—1 Ped. 2:9.

14. Ninawodhe dhavi wunuwihavi okwela wehu ebaribari? (Koona kasha “ Maladdaniho Mena.”)

¹⁴ Esi dhotagiha dhing’onovi dhinoniha ttima ya ebaribari. Kanina waganyedha wi  onowubuwela dhotagiha dhinjene dha attu ena. Onkoddelani okosa masasanyedho a nsunzo na o mwinya wi ofwanyevi sabwa dhina dhinnittukulela okwela ebaribari? Venevo vandowihu nikwelagavi ebaribari ninelege otamelavi mikalelo dhina dhawoniha wi ninokwela ebaribari.

15. Ninonihe dhavi wi ninokwela ebaribari?

¹⁵ Ninonihe wi ninokwela ebaribari nigamwengesaga Bibilia malabo otene vina manivuru andela mBibiliani. Kintanala akala nili mwibaribarini mwa mudhidhi mwinjene obe nne, iyo notene nihikana dhilobo dhinjene dha osunza. Artigo woroma wa revista A Sentinela ohiloga wi: “Ebaribari eli ninga folori ewereweriwe na minga, wi ofwanye foloriya onofwanyela okosa guru enddimuwa vaddiddi. Mbwenye kunagalale sabwa ya ofwanya folori modha bahi. . . . Onofwanyela odhowavi atamelaga folori dhina. Na mukalelo wakakene kaninfwanyela wagalala na ebaribari modha bahi. . . . Nidhowegevi nisunzaga dhibaribari dhina dha mBibiliani.” Osunza kahiye elobo yovevuwa mbwenye nigavilibihedha ninele okana dhopurelamo.

16. Marhe gani anlabihedhiwe vina anukamihedha? (Gano 2:4-6)

 ¹⁶ Ena mwa iyo kaninziveliwa wengesa vina osunza. Mbwenye Yehova ononiwoba wi ‘nididele otamela’ vina ‘nididele opepesa’ wi niwodhe ononelamo deretu ebaribari. (Kengesa Gano 2:4-6.) Nigakosa guru ejo, ninele okana dhopurelamo. Corey obuwelaga nsunzo naye nomwinya, ohiloga wi wantamela mudhidhi wa osunza versu modha-modha. Iyene ohiloga dhahi: “Miyo ddinowengesa manota otene, mareferensia vina ddinokosa guru ya opepesa. . . . Ddinopurelamo venjene na marhe aba a wengesa!” Kintanala akala ninlabihedha marhe akene obe nne, ninele woniha wi ninotamalela ebaribari nigatamela mudhidhi vina nigakosa guru ya osunza.—Masal. 1:1-3.

17. Txini entapulela okalawo mowiwanana na ebaribari? (Tiago 1:25)

¹⁷ Iyo ninoziwa wi osunza bahi ebaribari kinakwana. Wi nipurelamo venjene, ninofwanyela okalagawo mowiwanana na ebaribari, eji entapulela ovirihamo mwigumini mwehu ejile ensunzihu. Dhawene panawodhe ebaribari onidhelana wagalala watxibarene. (Kengesa Tiago 1:25.) Ninaziwe dhavi wi ninoweddana ebaribari? Mbali dhahi ohivaha nlago ntti wi muttu-muttu onofwanyela ovipima wi aziwe dhipaddi gani dhinedda pama mwigumini mwaye vina dhipaddi gani dhinfwanyeleliye wogolela. Murumiwi Paulo ohiloga yakene mulebeliye dhahi: “Apa vafiyilehu, ndhoweni nisogorhenavi dila eneddihuna.”—Fil. 3:16.

18. Ninfwanyelela nni okosa guru wi ‘nidhowegevi neddaga mwibaribarini’?

¹⁸ Karoma otanalela dhopurelamo dhinda sabwa ya ovilibihedha wehu wa ‘odhowavi neddaga mwibaribarini’! Ottiya okana egumi yaderetu ninomwagalaliha Yehova vina abali na arogora. (Gano 27:11; 3 Jo. 4) Koddi dhikalawo sabwa dhamakamaka dhinnittukulela okwela ebaribari vina weddaga mwibaribarini?