Mavuzo Ankosa Anamengesa
Artigu ona mutoma “Nzina Nenyu Nithithimihiwe” obudduwile Mmwang’anelini wa Junyu wa 2020, ononihedhimo dhavi okoddelihiwa wa nzina na Yehova vina olamulela waye?
Mu artigunimwa iyo nihisunza makani manddimuwa anapatta anju vina attu otene, kuloga okoddelihiwa wa nzina na Yehova. Akala mukalelo wa Yehova olamulela bwapama—obe nne eji enopatta okoddelihiwa wa nzina naye. Na mukalelo wakene, akala muttu onodhowavi amuroromelaga Mulugu obe nne eji enopatta vina okoddelihiwa wa nzina na Yehova.
Sabwaya jani enzuzumela iyo makani aba a okoddelihiwa wa nzina na Yehova? Ndoweni none sabwa ttaru.
Oromana osadduwela opadduwile mmunddani mwa Edeni, Satana onodhowavi apigidhaga nzina na Yehova
Yoroma, mmunddani mwa Edeni Satana ohipigidha nzina na Yehova. Nivuzo nimukosile Satana Eva natapulela wi Yehova wali mukumbela vaye vina malago avahile Yehova Adamu na Eva kakalile. Mazu alogile Satana oniha wi Mulugu muttambi. Sabwa ya opigidha nzina na Yehova iyene ohikala Ddiabo entapulela muttambi. (Jo. 8:44) Sabwa ya Eva orumela ottambi wa Satana, iyene ohimpambiha Mulugu vina ohisadduwela olamulela waye. (Wita 3:1-6) Oromana labo nttile nipigidhile Satana nzina na Mulugu, iyene onodhowavi avuwihaga ottambi sabwa ya Yehova. Abale anrumela dhottambi esi anokodda omwiwelela Yehova. Mwa nlogo na Mulugu, opigidhiwa wa nzina na Yehova elobo yohifwanyelela. Sabwani obu bu mwaha munddimuwaya ontotela makattamiho mwilaboni.
Yanawili, Yehova ohigana okoddeliha vina okuputta nzina naye mwa ottambi wotene wi dhottanddiwa dhotene dhipurelemo. Eji elobo yattima vaddiddi vamentoni va Yehova. Nona iyene aloga dhahi: “Ddinere woniha malogo otene othithimiheya wa nzina naga ninddimuwa.” (Ezek. 36:23) Yezu ohoniha wi jofuneya alabeli a Yehova ororomeleya wika vamburoni voroma okoddelihiwa wa nzina na Yehova mulogeliye dhahi: “Nzina nenyu nikoddelihiwe.” (Mt. 6:9) Bibilia onowiyelela dila dhinjene ttima ya okoddelihiwa wa nzina na Yehova. Koona dhotagiha dhing’onovi: “Mvahení Nabuya [Yehova] nriho nininfwanyelela nzina naye.” (1 Map. 16:29; Masal. 96:8) “Ebelaní nthithimiho nzina naye.” (Masal. 66:2) “Ddinothithimiha nzina nenyu vamukala-kala.” (Masal. 86:12) Dila modha mwa dila dhina dhotene dhilogile Yehova ovenyana wirimu epadduwile mumparhani o Jeruzalemi mudhidhi walogile Yezu dhahi: “Babani, thithimihani nzina nenyu.” Yehova wahakula, “Ddimala othithimiha, ddinothithimiha vina!”—Jo. 12:28. a
Yaneraru, okoddelihiwa wa nzina na Yehova onowiwanana na efunelo yaye. Karoma otanalela ttima ya okoddelihiwa wa nzina na Yehova omagomo wa yoweha yomariha vina omagomo wa Olamulela wa Kristu wa Vyaka Txikwi. Onele okalawovi ogawana wa anamudhi a Yehova ali wirimu vina velaboni ya vati sabwa ya okoddelihiwa wa nzina na Yehova? Wi nakule nivuzo ntti, nirome
otanalela dhilobo bili dhamakamaka—ororomeleya wa attu vamentoni va Yehova vina ottonga waye. Attu anoniha wi anomuroromela Yehova anele orutxiwa odhowagavi amwiwelelaga? Nne. Awene anele okala attu oligana vina anele wehiwa. Omamalelowa anele wakela egumi yamukalakala. Ottiya ejo kinakale yofuneya woniha akala olamulela wa Yehova kwamakamaka. Nsaka ntto otene ali wirimu vina velaboni ya vati anele okala mumodhani vina anele orumela olamulela wa Yehova. Txini enapadduwe na nzina na Yehova?Nzina na Yehova ninele okoddelihiwa kakamwe vina ninele okuputtiwa mwa ottambi wotene. Nzina na Yehova ninele odhowavi nikalaga na ttima mwa alabeli otene ororomeleya ali wirimu vina velaboni ya vati. Sabwaya? Sabwani awene anele odhowavi onaga dhilobo dhotikiniha dhinakosege Yehova. Karoma otanalela: Yezu na ovyeviha onele ottiya olamulela wotene mmadani mwa Yehova, dhahene “Mulugu oner’okala mwinya wa etene na dhetene.” (1 Kor. 15:28) Esi dhigavira attu otene anakale velaboni ya vati anele “ojavo ofuru, nthithimiho ninakele ana Mulugu.” (Rom. 8:21) Omamalelowa Yehova onele wakwanihedha dhipikireliye oromana nsaka na wale wagumaniha attu a velaboni ya vati na anju a wirimu ninga murala munddimuwa wowiwanana.—Ef. 1:10.
Dhetene esi dhigapadduwa anamudhi otene a Yehova a wirimu vina a velaboni ya vati anaviwemo dhavi? Kaninaganyedha wi ninele okana—efunelo enddimuwa—ya odhowavi nittittimihaga nzina na Yehova. Munasalmo Davidi na nikamihedho na Yehova ohileba dhahi: “Athithimihiwe Nabuya, Mulugu . . . Nthithimihiwege nzina naye novuweya.” (Masal. 72:18, 19) Oku nikalagawovi namukalakala, ninele okana mwaha dhinanittukulelege omuttittimiha Yehova.
Nzina na Yehova nintapulela dhilobo dhotene sabwa ya ekalelo eli iyene. Iyo nigubuwela nzina na Yehova ninowubuwela sabwa ya okwela waye. (1 Jo. 4:8) Ninelege odhowavi nubuwelaga wi Yehova onittanddile sabwa ya onikwela, ohinivaha yobolo vowi ononikwela vina onelodhowavi anilamulelaga na oligana vowi ononikwela. Ottiya ejo ninele odhowavi nonaga mukalelo oninlagiha Yehova okwela. Nsaka ninakalegewo iyo namukalakala, ninele okala ofiyedheya na Babi wehu Yehova vina ninelege wiba jibo dhinttittimiha nzina naye.—Masal. 73:28.
a Bibilia vina onologa merelo akosile Yehova “erelaga oriha nzina naye.” Motagiha, iyene osogorhela nlogo naye, ohakamihedha, ohavuna, ohalevelela vina ohattiya okalawo—okosile esi dhotene sabwa ya nzina naye ninddimuwa, Yehova.—Masal. 23:3; 31:3; 79:9; 106:8; 143:11.