NSUNZO 36
Nittukule Muttorho Onwodhihu, Nirule Dhinwalavo
“Ndhoweni nírule muthorho wotene . . . , nithamage na ntidi mudila ennitonyihedha Mulugu.”—AHEB. 12:1.
JIBO 33 Kanvahedhe Yehova Makattamiho Awo
DHINASUNZE IYO a
1. Mowiwanana na Ahebreu 12:1, txini enfwanyela iyo okosa wi niwodhe ottamaga mpaka omagomo?
BIBILIA onoladdaniha egumi ya Mukristu na ottamaga. Anamattamaga anawodhe ottamaga mpaka omagomo, anele wakela egumi yohimala. (2 Tim. 4:7, 8) Iyo ninofwanyela ovilibihedha odhowagavi nittamagaga, sabwani ohalile mudhidhi mung’onovi wi nifiye omagomo wa ottamagawa. Murumiwi Paulo owodhile ogomiha ottamaga waye mudila ya egumi ohiloga enanikamihedhe ottamaga mpaka omagomo. Iyene onaddela “ndhoweni nírule muthorho wotene, . . . nithamage na ntidi mudila ennitonyihedha Mulugu.”—Kengesa Ahebreu 12:1.
2. Txini entapulela mazu aba “ndhoweni nírule muthorho wotene”?
2 Valogile murumiwi Paulo wi “ndhoweni nírule muthorho wotene,” eji entapulela wi Mukristu kanakane muttorho wottukula? Kahiye mwenemo. Iyene waloga wi ninofwanyela orula mittorho dhohifuneya. Mittorho esi dhohifuneya dhinodhaga onizuzumiha vina onilemiha. Wi niwodhe ovilela, ninofwanyela momaguva-mwene ozinddiyela vina orula mittorho dhihili dhofuneya dhigadhile oniyelutxa. Mbwenyi iyo kaninfwanyela orula mittorho dhinfuniwana iyo ottukula. Nigattiya mittorho dhinfwanyela iyo ottukula, ninele okoddihiwa ottamaga. (2 Tim. 2:5) Mittorho gani dhinfwanyela iyo ottukula?
3. (a) Mowiwanana na Galásia 6:5, muttorho gani onfwanyela iyo ottukula? (b) Txini enasunze iyo mwari mwa nsunzo ntti, nanda sabwaya jani?
3 Kengesa Galásia 6:5. Paulo ohiloga mittorho dhinfwanyelihu ottukula. Iyene ohileba “muthu-muthu onopwathela dhitoteyile na merelo aye.” Apa murumiwi Paulo waloga wi vamentoni va Mulugu, iyo nihikana muttorho onfwanyela iyo nanya ottukula. Mwari mwa nsunzo ntti, ninele wona dhiniwanana na mittorho esi vina mukalelo onattukule iyo. Ottiya ejo, ninele oziwa mittorho dhohifuneya txino dhipwattelilehu vina mukalelo wa orula. Ottukula mittorho dhinfuniwihuna vina orula mittorho dhohifuneya, enele onikamihedha odhowavi nittamagaga mudila enttukulela wigumini.
MITTORHO DHINFWANYELA IYO OTTUKULA
Otteba mittorho dhehu eniwanana na okalawo mowiwanana na oviperheka wehu, wakwaniha dhinjedheliwihuna vamuralani,vina orumela dhodhelavo dha dhogana dhehu (Kang’ana ddima 4-9)
4. Ninlogela nni wi oviperheka wehu kahiyo muttorho wolemela? (Koona vina foto.)
4 Oviperheka wehu. Iyo nigaviperheka wa Yehova, ninompikirhela omulabela iyene vina okosa efunelo yaye. Ninofwanyela wakwaniha nipikirhelo ntti. Okalawo mowiwanana na oviperheka wehu kahiyo elobo yovevuwa, mbwenyi vina kahiyo muttorho wolemela. Yehova onittanddile na ewodhelo ya okosa efunelo yaye. (Ovuh. 4:11) Iyene ohika mmurimani mwehu efunelo ya ozuzumela dhilobo dhomuyani vina ohinittandda woladdana na iyene. Sabwa ya ejuwene, enowodheya iyo ofiyedheya na iyene vina ninele wagalala nigakosaga efunelo yaye. (Masal. 40:8) Ottiya ejo, iyo nigakosaga efunelo ya Yehova vina niganfwarhaga Yezu, “ninofwanya nipangarhazo.”—Mt. 11:28-30.
(Kang’ana ddima 4-5)
5. Txini enaukamihedhe wakwaniha nipikirhelo nimukoseliwe Yehova? (1 Joau 5:3)
5 Onawodhe dhavi ottukula muttorho wawo? Dhihikalawo dhilobo bili dhinkamihedha. Yoroma, kadhowagavi olibihaga omukwela wawo Yehova. Enowodheya okosa ejuwene modhela otanalela dhilobo dhotene dhapama dhukoseliye vina maruriho akeliliwe. Venevo vanunuwa omukwela wawo Mulugu, enele okala yovevuwa ovirihamo dhinfuniye. (Kengesa 1 Joau 5:3.) Yanawili, omutagihe Yezu. Iyene ohiwodha okosa efunelo ya Mulugu sabwani wanimulobelela Yehova amukumbirhaga nikamihedho vina wanzuzumela mareliho agakeliliye. (Aheb. 5:7; 12:2) Dhahene ninga Yezu, kamukumbirhe Yehova oliba murima vina wubuwelegevi njedhelo nawo na okalawo namukalakala. Omukwela wawo Yehova ogonuwa vina ogamutagiha Yezu, onele okala omala na wale wi wakwanihe nipikirhelo nimukoseliwe Yehova.
6. Ninfwanyelela nni ozuzumela okosa dhinjedheliwihuna okosa vamuralani? (Koona vina foto.)
6 Enjedheliwihuna okosa vamuralani. Venevo vandowihu nittamagaga mudila ya egumi, iyo ninofwanyela omukwela Yehova vina Yezu opitta okwela onakanelihu amudhihu. (Mt. 10:37) Eji kintapulela wi kaninfwanyela wakwaniha dhinjedheliwihuna wakosela anamudhi ehu. Wila nimwagalalihe Yehova vina Yezu iyo ninofwanyela okosa dhinjedheliwihuna na anamudhi ehu. (1 Tim. 5:4, 8) Nigakosa ejuwene, iyo ninele wagalala. Opitta dhetedhene, Yehova onoziwa wi anamudhi anele wagalala, akala atelaniyá anoweddihana na okwela vina nriho, akala amabali anowakwela anawa vina anowashagiha, vina akala aima anowawiwelela amambali awa.—Ef. 5:33; 6:1, 4.
(Kang’ana ddima 6-7)
7. Onawodhe dhavi wakwaniha dhinjedheliwiwena okosa vamuralani?
7 Onawodhe dhavi ottukula muttorho wawo? Kintanala akala weyo wa muteli, muteliwi obe mwana, onofwanyela ovilibihedha ovirihamo malago a eziwelo a mBibiliani. Vina kukose esile dhinubuweliwe wi sapama, dhinubuwela attu ena mmuruddani munkaliwe obe esile dhinloga aziwitxi. (Gano 24:3, 4) Kakosa dhosakula dhapama olabihedhaga mapublikasau andela mBibiliani. Mwenemo onele ofwanya malago ottiddiheya mabasa anawukamihedhe ovirihamo magano a mBibiliani. Motagiha, artigu dhinfwanyeya mu série “Ajuda Para a Família” muhikalamo makani amakamaka anloga sabwa ya makattamiho angumanana atelani, amambali vina azombwe masaka abano. b Ogane ovirihamo dhotene dhinloga Bibilia masiki akala ena vamuralani kankosa epaddi yawa. Ogakosa dhawene anamudhi awo anele opurelamo, vina weyo onele ojavo mareliho a Yehova.—1 Ped. 3:1, 2.
8. Dhogana dhehu dhinnipatta dhavi?
8 Nirumele dhodhelavo dha dhogana dhehu. Yehova onivaha ofuru wa osakula, vina iyene onjedhela wi iyo nijevo dhodhelavo dha dhogana dhehu dhapama. Mbwenyi iyene vina kananibarele mwa dhilobo dhigapadduwile sabwa ya dhogana dhehu dhabure. (Gal. 6:) Nona, iyo ninele ottukula mittorho mwa dhosakula dhabure dhinakosihu, vina nigaloga obe nigakosa elobo yabure. Okosa elobo yabure, enele onittukulela okana mubuwelo wolemela. Nona, oziwa wi ototile muladduya ddi iyo enele onittukulela ologa yottega yehu, osasanyedha vavonyilihu, vina orabela okosa yottega yakene. Okosa ejene enele onikamihedha odhowavi nittamagaga mudila ennittukulela wigumini. 7, 8
(Kang’ana ddima 8-9)
9. Txini enfwanyeliwe okosa akala ohikosa yogana yabure? (Koona vina foto.)
9 Onattukule dhavi muttorho wawo? Akala ohikosa yogana yabure txini enfwanyela weyo okosa? Kudduwale wi weyo kunwodha otxinja dhilobo dhikosiliwe mundduni. Kunonge mudhidhi wawo vina guru dhawo otamelaga woniha wi weyo kukosile elobo yabure obe wapwatheliha attu ena yovonya yawo. Ottiya ejo, orumele yovonya yawo vina ovilibihedhe okosa dhilobo dhapama. Ogona wi ohikosa elobo yabure, na ovyeviha kamulobelele Yehova, karumela yovonya yawo vina omukumbirhe wi awulevelele. (Masal. 25:11; 51:3, 4) Egawodheya wakumbirhe nlevelelo attu abale anyimuliliwe, vina egafuneya, okumbirhe nikamihedho na anddimuwa a mmulogoni. (Tia. 5:14, 15) Osunze na dhovonya dhawo, vina ovilibihedhe orabela okosa yovonya yakene. Ogakosa dhawene, kakana ebaribari wi Yehova onele wutonyihedha ttagaraga yaye vina onele wuvaha nikamihedho ninfuniwe.—Masal. 103:8-13.
MITTORHO DHINFWANYELIHU “ORULA”
10. Enlogeliwa nni wi kaninaviwemo pama nigaviladdanihaga na attu ena? (Galásia 6:4)
10 Wubuwela wi onofwanyela okosa venjene. Iyo kaninaviwemo pama akala ninoviladdaniha na attu ena. (Kengesa Galásia 6:4.) Akala mudhidhi wetene ninoviladdaniha na attu ena, ninodhaga okala attu a nrima vina anziveliwa mavurhano. (Gal. 5:26) Nigatamelaga okosa dhinkosa attu ena oku nihikanaga ewodhelo ya okosa eloboya, ninodhaga osuveya mmurimani. Kobuwela eji: Bibilia ononaddela wi ororomela elobo ehimpadduwa ovanene, onoribiha murima, (Gano 13:12) Iyo ninele oribetxa murima akala ninojedha elobo ehinakane iyo! Ejo egapadduwa ninodhaga olema vina vang’ono-vang’ono banittiya ottamaga mudila ya egumi.—Gano 24:10.
11. Txini enaukamihedhe orabela otamela okosa dhilobo dhihinwodha weyo?
11 Onawodhe dhavi orula muttorho obu? Kutamelege okosa dhilobo dhinkwaranya esile dhinukumbirha Yehova. Iyene kanukumbirha onvaha elobo ehina weyo. (2 Kor. 8:12) Okuluvele wi Yehova kanladdaniha dhinkosiwe na dhinkosa attu ena. (Mt. 25:20-23) Iyene onovaha ttima mabasa anttiddiwe na murima wawo wotene, ororomeleya wawo vina ovilela wawo. Kakala muttu woviyeviha vina ononelemo wi kunawodhe okosa dhilobo dhigafunile weyo okosa ovanene sabwa ya yimo yawo, egumi yawo obe dhinupadduwela. Dhahene ninga Barzelai, okale womala-nawale wi ottiye mabasa ahinwodha weyo okosa. (2 Sam. 19:35, 36) Ninga Mizé, orumele nikamihedho vina wattomele mabasa attu ena egafuneya. (Obud. 18:21, 22) Weyo ogakala muttu woviyeviha onele orabela dhilobo dhigahulemihile ogattamagaga mudila enuttukulela wigumini.
12. Ninofwanyela ovipwatteliha muladdu sabwa ya dhovonya dha attu ena? Katapulela.
12 Kuvipwattelihe muladdu mwaha wa dhovonya dha attu ena. Iyo kaninasakulela attu ena vina kahiyo dila dhotene dhinabarela iyo attu ena opwattela muladdu ototeyile na dhosakula dhawa dhabure. Motagiha, mwana wa mulobwana obe mwana wa muyana dila dhina onogana yeka ottiya omulabela Yehova. Yogana eji masaka mena enowattukulela amambali wiwa opa vaddiddi. Nona amambali anvipwatteliha muladdu mwaha wa dhogana dhabure dhikosile anawa, anottukula muttorho munddimuwa vaddiddi. Obu kahiyo muttorho onafunana Yehova awene ottukula.—Rom. 14:12.
13. Txini enfwanyela oziwa amambali akala mwaniwa ohikosa dhogana dhabure?
13 Onawodhe dhavi orula muttorho obu? Kudduwale wi Yehova wavahile attu etene ofuru wosakula. Iyene onomuttiya muttu-muttu okosa yosakula yaye. Eji enowiwana na omulabela iyene. Yehova onoziwa wi weyo kuli mambali woligana, iyene onfuna wi weyo okose mpaka apale vanwodheliwe. Yosakula ya mwanawo muttorho waye, ottiya wenyu. (Gano 20:11) Mbwenyi enodhaga opadduwa weyo odhowavi wubuwelaga dhovonya dhikosiliwe mundduni ninga mambali. Egapadduwa dhahene, kamwaddele Yehova eniwamo weyo vina omukumbirhe nlevelelo. Iyene onoziwa wi weyo kunwodha otxinja dhilobo dhipadduwile mundduni, mbwenyi weyo onowodha okosa ovanene dhilobo dhottiyana. Iyene kanjedhela wi weyo ombarele mwanawo osinanga dhaliliye. Okane ebaribari wi akala mwanawo onovilibihedha omwiyelela Yehova, Iyene onele omwakela wili.—Lk. 15:18-20.
14. Enlogeliwa nni wi ovipwattelihetxa muladdu muttorho onfwanyela iyo orula?
14 Ovipwatteliha muladdu mudhidhi wetene. Enononeleyamo iyo nigavipwatteliha muladdu mwaha wa dhottega dhehu. Mbwenyi Yehova kanfuna wi iyo nidhowegevi banigavipwatteliha muladdu. Obu muttorho onfwanyela iyo orula. Ninaziwe dhavi wi ninottabwiha ovipwatteliha muladdu? Iyo nigaloga yottega yehu, nigatxinuwa vina nigarabela okosa yottegaya wili nikane ebaribari wi Yehova ohinilevelela. (Mer. 3:19) Nigamala okosa dhilobo esi, Yehova kanfuna wi iyo nidhowegevi nivipwattelihaga muladdu. Iyene onoziwa wi iyo nigakosa ejuwene ninele ovivoreya. (Masal. 31:10) Iyo nigakubanya vaddiddi ninodhaga ottiya ottamaga mudila ennittukulela wigumini.—2 Kor. 2:7.
Ogatxinuwa na murima wotene Yehova kanubuwela vina dhottega dhawo, weyo vina kunfwanyela wubuwela (Kang’ana ddima 15
15. Txini enanikamihedhe owanana ovipwattelihetxa muladdu? (1 Joau 3:19, 20) (Koona vina foto.)
15 Onawodhe dhavi orula muttorho obu? Akala kunwodha ottiya ovipwatteliha muladdu, ozuzumele olevelela webaribari wa Mulugu. (Masal. 130:4) Yehova agamulevelela muttu otxinuwile wene iyene onopikirhela alogaga: “Kaddinubuwela vina dhothega dhawa.” (Jer. 31:34) Eji entapulela wi Yehova kanubuwela vina yottega dhimaliliye wulevelela. Nona, kuwubuwele wi dhodhelavo dha dhottega dhawo enoneya wi Yehova kawuleveleli. Vina kunyonyeye sabwa ya weyo oyelela ettomo yaniwena mmulogoni. Yehova txipo kanubuwela dhottega dhawo vina weyo kunfwanyela wubuwela.—Kengesa 1 Joau 3:19, 20.
OTTAMAGE WILA OPEMBERE
16. Ninga anamattamaga txini enfwanyela iyo oziwa?
16 Vowi iyo ninottamaga mudila ennittukulela wigumini, ninofwanyela ottamaga wi niwodhe ofwanya mperhe. (1 Kor. 9:24) Iyo ninele owodha opemberha nigaziwa ottiyana wa mittorho dhinfwanyela iyo ottukula vina mittorho dhinfwanyela iyo ottiya. Mwari mwa nsunzo ntti nihisunza dhotagiha dhing’onovi dhinoniha mittorho dhinfwanyela iyo ottukula vina dhinfwanyela iyo orula. Mbwenyi dhihikalawo dhina dhihilogiwe. Yezu ohiloga wi iyo ninofwanyela okala pwerhe-pwerhe wi “mirima dhenyu dhinabwine n’ojetxavo elabo, n’othabwiha olezela, n’ozuzumeletxa dha vati.” (Lk. 21:34) Nlebo ntti na Malebo mena dhinodhaga wukamihedha ozinddiyela matxinjo anfwanyela weyo okosa ogattamagaga mudila enttukulela wigumini.
17. Ninfwanyela nni okana ebaribari wi jowodheya iyo opemberha nigattamagaga mudila enttukulela wigumini?
17 Nikane nikuluvelo wi Yehova onele onivaha guru dhinfunihu wi niwodhe opemberha ottamaga oku onanittukulele wigumini. (Iza. 40:29-31) Nona, kuttiye ottamaga! Omutagihe murumiwi Paulo ovilibihedhe ottamaga mpaka ottambirha mperhe. (Fil. 3:13, 14) Kawo muttu onattamage vamburoni vawo, mbwenyi na nikamihedho na Yehova weyo onele owodha opemberha. Yehova onele wukamihedha ottukula mittorho dhinfwanyela weyo ottukula, vina orula dhinfwanyeliwe orula. (Masal. 68:19) Na nikamihedho na Yehova onele owodha ottamaga na ovilela vina owodha opemberha!
JIBO 65 Nihiyelele Mundduni!
a Nsunzo ntti ninele onikamihedha ottamaga mudila enttukulela wigumini. Ninga anamattamaga, ninofwanyela ottukula mittorho dhing’onovi. Mittorho esi dhiniwanana na oviperheka wehu, vina orumela dhodhelavo dha dhogana dhehu. Mbwenyi iyo ninofwanyela orula mittorho dhihili dhofuneya dhigadhile oniyelutxa. Eji entapulela eni? Nsunzo ntti ninele wakula nivuzo ntti.
b Enowodheya ofwanya artigu dha série “Ajuda Para a Família” mu jw.org. Motagiha artigu dhing’onovi dhisasanyedheliwe atelani sisi “Como mostrar respeito” vina “Como mostrar que valoriza seu cônjuge”; dhisasanyedheliwe amambali sisi, “Ensine seu filho a usar um smartphone de maneira responsável” vina “Como se comunicar com seu filho adolescente”; dhisasanyedheliwe azombwe sisi, “Como resistir à pressão dos colegas” vina “Como lidar com a solidão.”