1. Sabwaya jani enziveliwalana weyo attu ali ovilela?

 IYO ninoziveliwana attu anvilela. Sabwaya jani? Iyo ninowariha otene anjedhela elobo se osilidhiwa. Iyo ninotamalela attu ena aganivilela nigavonya. Vina ninomutamalela namasunziha wehu wa Bibilia olagihile ovilela nsaka navilibihedha iyo osunza, orumela vina ovirihamo dhinsunziha Bibilia. Ottiya ejo, iyo ninomutamalela Yehova Mulugu mwaha wa onilagiha ovilela!—Rom. 2:4.

2. Ninrutxiwa olagiha ovilela dhigapadduwa dhilobo gani?

² Masiki iyo niziveliwagana ovilela wa attu ena, enodhaga okala yorutxa wa iyo olagiha ovilela. Motagiha, enodhaga okala yorutxa okala wofwaseyene akala ninokala mbixani mudhidhi mwinjene nijedhelaga, oku banina elobo yina yafuna iyo okosa momaguva. Ninodhaga orimeliwa ovilela akala ena anoniliga. Vina dila dhina enodhaga okala elobo yorutxa ojedhela nipikirhelo na Yehova na elabo eswa. Weyo ogahiziveliwa okala muttu wovilela? Mwari mwa nsunzo ntti ninela osunza, txini entapulela ovilela, ekalelani yamakamaka vina ninela wona enanikamihedhe wunuwiha mukalelo obu.

3. Txini enkosa muttu wovilela agaligiwa?

³ Katanalela mikalelo minayi dhinwodhihu olagiha ovilela. Woroma, muttu wovilela kammaguvela osilidhiwa. Iyene onovilibihedha okala wofwaseyene akala attu ena anomuliga obe anomukosela elobo yabure. Bibilia onologa wi Yehova; Mulugu wa nttebwa, oneddiwa ttagaraga, wovilela, wodhala opama vina ondhowanavi eliye.—Masal. 86:15.

4. Txini enkosa muttu wovilela oku ajedhaga?

 ⁴ Yanawili, muttu wovilela onojedhela n’ofwaseya. Akala elobo kimpadduwa ninga mwajedheliye, iyene onovilibihedha ohidhugudheya obe osilidhiwa. (Mt. 18:26, 27) Dhikalawo dhipaddi dhinji dhinfwanyela iyo ojedhela n’ofwaseya. Motagiha, muttu mwina agalogaga ninvuruwane n’ofwaseya, kanimaguvelege ologa. (Job 36:2) Iyo vina ninofwanyela ovilela nigamukamihedhaga namasunza wa Bibilia ononelamo ejile ensunziha Bibilia obe opemberha elemelelo yabure.

5. Mpaddi gani mwina onfuneya wi nilagihe ovilela?

⁵ Yanoraru, muttu wovilela kankosa elobo ahinatti otanalela. Ebaribari wi dhilobo dhina dhinofuneya okosiwa momaguva. Masiki dhawene muttu wovilela agafunaga okosa elobo yamakamaka, onottukula mudhidhi wi arome otanalela. Iyene onotamela mudhidhi wi atanalele enfwanyeliye okosa. Omamalelowa onokosa ejile etadeliye.

6. Txini enkosa muttu wovilela agagumanagana yoweha obe makattamiho?

⁶ Yanonayi, muttu wovilela onovilibihedha ovilela makattamiho n’owagalala. Eji ji sabwaya enladdanihedheliwa ovilela na okana ntidi. Kahiyo elobo yabure onfugulela murima wehu marho wofiyedheya nimwaddelaga makattamiho annipatta. Masiki dhawene muttu wovilela onele wubuwela mwaha wa dhilobo dhapama dhimpadduwa mwigumini mwaye vina onele okosa muli-mwetemwene wi adhowegevi bagamulabela Yehova n’owagalala. (Kol. 1:11) Ninga nlogo na Mulugu, ninofwanyela olagiha ovilela dhipaddi-dhene esi. Dhavi? Ndoweni none mwaha dhing’onovi.

7. Mowiwanana na Tiago 5:7, 8, ekalele nni yamakamaka ovilela? (Koona vina foto.)

⁷ Wi iyo nivuneye, enofuneya ovilela. Dhahene ninga adhari ororomeleya a masaka a mundduni, ninofwanyelela ojedhela  n’ovilela mudhidhi onakwanihedhe Mulugu dhopikirhela dhaye. (Aheb. 6:11, 12) Bibilia ononiladdaniha na namalima. (Kengesa Tiago 5:7, 8.) Namalima, onolaba na guru wi atxeye vina ahelele manje dhitxeyiliye, mbwenyi iyene kanziwa mowakwana-mwene mudhidhi onunuwani. Mbwenyi onojedhela wi onele osinanga milima. Na mukalelo wakakene, iyo ninozuzumela mabasa omuyani masiki “nihiziwaga siku ninadhe Nabuya wehu.” (Mt. 24:42) Iyo ninojedhela n’ovilela nikuluvelaga wi nsakana nigafiya Yehova onele wakwanihedha dhotedhene dhipikirheliye. Iyo nigattiya okala attu ovilela txino ninodhaga olema ojedhela vina vang’ono-vang’ono banittiya ebaribari. Iyo vina ninodhaga otamela dhilobo dhinnipuriha momaguva-mwene. Mbwenyi nigakala attu ovilela, ninela ovuneya.—Mik. 7:7; Mt. 24:13.

8. Ovilela onnikamihedha dhavi waweddiha attu ena? (Kolosi 3:12, 13)

⁸ Ovilela ononikamihedha waweddiha pama attu ena. Ononikamihedha vina ofwaseyela wavuruwana attu ena agalogaga. (Tia. 1:19) Ottiya ejo, ovilela onowunuwiha murenddele. Ovilela ononibarela ohikosa dhilobo momaguva vina orabela okosa dhilobo dhohifwanyela. Nigakala attu ovilela, kaninamaguvele osilidhiwa muttu aganinyimula. Ottiya wiyihedhana obure na obure, ninelege odhowa nivilelagana vina nilevelelagana muttu na mukwaye dila dhotene dhinttegelana iyo.—Kengesa Kolosi 3:12, 13.

9. Ovilela onnikamihedha dhavi okosa dhosakula dha malago? (Gano 21:5)

⁹ Ovilela ononikamihedha okosa dhosakula dhapama. Ottiya okosa dhilobo s’oroma otanalela, nirome opepesa wila ninonelemo yoganaya enfwanyelihu okosa, dhawene panakanehu dhopurelamo dhapama. (Kengesa Gano 21:5.) Motagiha, akala nintamela mabasa, iyo nigahirumela mabasa agafwanyilehu masiki anijelaga mudhidhi wa odhowa omatugumanoni obe mmabasani a olaleya? Iyo nigakala attu ovilela, vamaromo ninotanalela akala omabasaniwa olapa, wora dhinnogihu vina mukalelo ogapattile mabasaya murala wehu na dhilobo dhomuyani. Sabwa ya okala attu ovilela, nigahiwodha orabela okosa dhosakula dhigadhile onitotela makattamiho.

10. Mukristu onwodha dhavi wunuwiha vina odhowavi alagihaga ovilela?

¹⁰ Olobele venjene okumbirhaga ovilela. Ovilela mukalelo mmodha onkosa mpaddi wa dhobala dha muya. (Gal. 5:22, 23) Nona, kalobela okumbirhaga muya wokoddela vina kamulobe Yehova wi owodhe wunuwiha mukalelo obu. Nigagumanana makattamiho aneha ovilela wehu nididele okumbirha muya wokoddela wi onikamihedhe okala attu ovilela. (Lk. 11:9, 13) Nimukumbirhe vina Yehova wi nonege makaniya dhahene ninga munonela iyene. Nigamala olobela, enofuneya ovilibihedha venjene olagihaga ovilela siku na siku. Nigadidela olobela wi nikale attu ovilela vina nigavilibihedha olagiha mukalelo obu, Yehova onele onikamihedha masiki akala wale kanalagiha ovilela.

11-12. Yehova onlagiha dhavi ovilela?

¹¹ Otanalela dhotagiha dhinfwanyeya mBibiliani. Mbibiliani munofwanyeya dhotagiha dhinjidhene dha attu alagihile ovilela. Nigatanalela dhotagiha esi, ninele osunza mukalelo wa olagiha ovilela. Mbwenyi nihinatti otanalela dhotagiha dhing’onovi dhinfwanyeya mBibiliani, ninfuna noneni yotagiha yamakamaka wa ovilela wa—Yehova.

 ¹² Mmunddani mwa Edeni, Satana wahipigidha nzina na Yehova vina wahimuttukulela Eva wubuwela wi Iyene Mulamuleli wohifwanyelela, ohinna okwela. Ottiya omaguvela omutolotxa Satana, Yehova ohoniha ovilela vina ovipimelela masiki aziwaga wi eji egahigonela wi onihe olamulela Waye wapama. Oku ajedhelagavi, iyene onovilelavi opigidhiwa wa nzina naye. Ottiya ejo, Yehova onodhowavi avilelaga attu enjene wi afwanye gari yowakela egumi yamukalakala. (2 Ped. 3:9, 15) Eji endana yopurelamo gani? Amiliau enjene a attu, anomuziwa Yehova. Iyo nigazuzumela wang’ana dhopurelamo dha ovilela wa Yehova, enele okala yovevuwa ojedhela nsaka ninadhiyena ogoma wa elabo ejino.

13. Yezu otagihile dhavi mowakwana-mwene ovilela wa Babe? (Koona vina foto.)

¹³ Yezu ohitagiha mowakwana-mwene ovilela wa Yehova vina bali velaboni ya vati, iyene ohoniha pama mukalelo obu. Mbwenyi kiyali yovevuwa olagiha mukalelo obu, ttabwa-ttabwa sabwa ya anamasunziha magano na Afarizi ali agwarhagwambi. (Jo. 8:25-27) Dhahene ninga Babe, Yezu kamaguvela osilidhiwa, masiki aligiwaga obe aruwaniwaga iyene keyihedha obure na obure. (1 Ped. 2:23) Yezu ohiwodha ovilela makattamiho aba otene n’owagalala. Nona Bibilia agaloga “mubuwelení iyene, ovilelile opambiha onddimuwa wa athegi”! (Aheb. 12:2, 3) Na nikamihedho na Yehova, iyo vina ninele owodha ovilela na ntidi makattamiho angumanihuna.

14. Txini ensunzihu na yotagiha ya Abrahamu? (Ahebreu 6:15) (Koona vina foto.)

¹⁴ Kito akala esile dhajedhelihu wona omagomo wa elabo ejino, kadhinatti wakwanihedheya? Ena mwa iyo txino obuwela wi  omagomo wa alabo ejino ogadhile vyaka dhinjene mundduni. Iyo txino ninowova wi kaninakalewo mudhidhi mwinjene wila none dhilobo esi dhipadduwaga. Txini enanikamihedhe odhowavi nivilelaga? Nitanaleleni yotagiha ya Abrahamu. Vakwanihedhiye vyaka 75 ahinatti okana mwana, Yehova wahimpikirhela dhahi: “Ddinere owira nikolo na nlogo ninddimuwa.” (Wita 12:1-4) Koddi Abrahamu ohona wakwanihedheya wa nivuhulo ntti? Kawodhile wona dhotedhene. Mwabuweliye Mwinje Eufrate vina ajedhela vyaka 25, Abrahamu pawodhiliye wona matikiniho a obaliwa wa mwanaye Izaki, vasogorhova badhivirile vyaka 60, pawodhiliye wona obaliwa wa adhulaye eli, Ezau na Jakob. (Kengesa Ahebreu 6:15.) Mbwenyi Abrahamu txipo kawodhile wona ziza naye nunuwaga ofiyedha okala nlogo ninddimuwa vina nivolowaga Mwilaboni Yopikirheliwa. Masiki dhawene, mulobwana oddu wa nroromelo wahikana mandano ofiyedheya vaddiddi na Muttanddi waye. (Tia. 2:23) Abrahamu agavenyihiwa mukwani, onele wagalala venjene agasunza wi malogo menjene ahakela mareliho sabwa ya nroromelo vina ovilela waye! (Wita 22:18) Txini ensunzihu? Iyo txino kaninawodhe wona ovanene mapikirhelo otene a Yehova akwanihedheyaga. Mbwenyi, nigakala attu ovilela ninga Abrahamu, ninele okana ebaribari wi Yehova onele onittuva ovanene vina venjene mwilaboni eswa.—Mk. 10:29, 30.

15. Elobo gani egafwanyeliwe okosa vansunzoni nawo nomwinya?

¹⁵ Mbibiliani munofwanyeya dhotagiha dha attu enjene alagihile ovilela. (Tia. 5:10) Vansunzoni nawo nomwinya, onkoddelani okosa  masasanyedho a osunza dhotagiha esi? b Motagiha, mmaleli Davidi ottikitteliwa wi akale mwene wa Izrayel, iyene ohijedhela vyaka dhinjene wi arome olamulela. Simeau na Ana ahimulabela Yehova n’ororomeleya oku ajedhelaga odha wa Mesiya. (Lk. 2:25, 36-38) Ogasunzaga mapadduwo aba, katamela ofwanya dhowakula dha mavuzo aba: Txini emukamihedhile muttu oddu owodha ovilela? Dhopurelamo gani dhikaniliye sabwa ya ovilela? Ddinawodhe dhavi omutagiha? Ottiya osunzavi dhotagiha dha abale alagihile ovilela, kasunza vina dha abale ahilagihile. (1 Sam. 13:8-14) Ogamala ovivuze: ‘Txini emuttukuleli muttu oddu, ohiwodha ovilela? Makattamiho gani agumaniliyena?’

16. Dhopurelamo gani dhinkanihu sabwa ya ovilela?

¹⁶ Katanalela dhopurelamo dhinkanihu nigakala attu ovilela. Ovilela ononikamihedha okana wagalala vina ofwaseya. Okana egumi ya deretu vina dhubuwelo dhapama. Nigavilelaga attu ena, ninokana mandano apama na awene. Ninokana wiwanana mmulogoni. Muttu mwina aganiliga, kaninamaguvele osilidhiwa vina kaninatamele ottabwiha makaniya. (Masal. 37:8; Gano 14:29) Ottiya esi dhetene, nigakala attu ovilela ninomutagiha Babi wehu wa wirimu vina ninele okala ofiyedheya na iyene.

17. Txini enfwanyeliwe ogana okosa?

¹⁷ Ovilela mukalelo wapama, onnipuriha iyo notene! Masiki akala ninorutxiwa olagiha ovilela na nikamihedho na Yehova, ninele owodha wunuwiha mukalelo obu. Oku nijedhelaga ofiya wa elabo eswa, nikane nikuluvelo wi Yehova onowawang’ana attu animova, abale anjedhela okwela waye. (Masal. 33:18) Notene nivilibihedhe odhowavi nivilelaga.