1. Obatiziwa okalelini ttarho yamakamaka? (Koona foto eli omaromo.)

VYAKA dhetene, anamasunza a Bibilia enjene anobatiziwa. Mwa abuwene owinjivaya ankala azombwe na apali. Eena onuwile mwibaribarini. Weyo oli nmodha wa abuwene? Akala oli mmodhaya, ziwá wi okosa elobo yaderetu. Mukristu oli wotene onofayela obatiziwa. Obatiziwa onofuneya wi muttuya akaane mperhe wa oviluwa vina okalawo na mukalakala.—Mateu 28:19, 20; 1 Pedro 3:21.

2. Sabwaya jani kunfanyela wova oviperhekela Yehova?

² Mubatiziwe weyo, Yehova oroma wururiha na mukalelo wottiyana-ttiyana. Weyo vina txino ohivahiwa mabasa maswa. Na mukalelo gani? Labo nibatiziwiwe mbali okosile diskursu ya obatizu wahivuza: “Modheela mukutto wa Yesu Kristu, weyo ohitxinuwa mwa dhottega dhawo  nanda ohiviperheka wa Yehova wila okose efunelo yaye?” Yowakula yawo yali ndde. Weyo opikirhela omukwela Yehova vina omulabela ninga elobo yamakamaka mwigumini mwawo. Weyo ohitxinuwa sabwa y’okosa nipikirhelo ninga nttene? Nne, kutxinuwe! Ogamuttiya Yehova weddiha egumi yawo txipo kunatxinuwe. Abale ahinimuziwa Yehova, anokosa epaddi ya elabo ya Satana. Ddiabo kanatanala awene, obe weyo. Mbwenye iyene onohagalala agona wila ohiyelela njedhelo nawo n’okalawo na mukalakala sabwa yowila oli epaddi yaye ya omunyanyala Yehova.

3. Yehova ourelihile dhavi sabwa ya oviperekela iyene?

³ Kobuwela mukalelo wururihile Yehova sabwa ya oviperekela iyene bubatiziwa. Weyo omperhekela Yehova egumi yawo, nona kaloga na nroromelo: “Nabuya [Yehova] oli na miyo, kaddinova elo; yabure gani enawodhe oddikosela athu?” (Masalmo 118:6) Kawo elobo yottittimiheya opitta okala mumodhani na Mulugu vina oziwa wi iyene onowagalala na weyo.

4, 5. (a) Ninlogela nni wi oviperekela Yehova yosakula yomwinya? (b) Magudulano gani angumanana Akristu ali otene?

⁴ Kuwobuwele wila mandano awo na Yehova ali ninga ‘yogana ya amudhawo’ ninga wugulela telefoni. Masiki akala onkala vamodha na amambali awo, ziwa wi omwebedha wawo Yehova eji yosakula yawo yomwinya. Ekaleleni yaderetu wubuwela ejiya? Mwa iyo notene, kavo onziwa labo nne mukalelo onehiwe nroronelo naye musogorho. Motagiha, txino weyo obatiziwe buli mpali obe muzombwe. Mbwenye ovano eliwe muzombwe, dhubuwelo na etanaalelo yawo etxinja mowiwanana na makattamihoya. Namwali dhahi ohiloga: “Mwana kantanalawo nne kankubanya sabwa y’okala Munamoona wa Yehova nanda ahija bolo na mattanga a oskola waye. Mbwenye movira vyaka, baroma ogaya vina mudhidhi onunuwa efunelo yogonihana, pavenevo vanfwanyeliye oziwa wila wiwelela malamulo a Yehova yosakula yapama.”

⁵ Kahiyo azombwevi ankana magudulano maswa. Masiki abale abatiziwe agali anddimuwa nroromelo newa ninowehiwa na mukalelo wahajedhani. Anowehiwa va mateloni, agakala aredda obe omabasani. Nona, masiki akala nili azombwe obe anddimuwa ninofanyiwa magudulano, noona nimuroromele Yehova masiki na magudulano.—Tiago 1:12-14.

6. (a) Ologa wila ovivelela wawo kuniyelela mundduni entapulela nni? (b) Txini ensunza iyo va Filipi 4:11-13?

⁶ Wila odhowevi vasogorho na nroromelo nawo, onofuniwana wubuwela yawi nipikirhelo nikosile weyo na omwiwelela Yehova kanniyelela mundduni. Eji entapulela wi opikirhela omwiwelela Mwinya wa Elabo, masiki epadduwe elobo txilobo, obe masiki amarho na amudhawo attiye okosa. (Masalmo 27:10) Nigafanyiwa magudulano yamakamakaya yokosa jomukumbirha Yehova nikamihedho wi niwodhe osorhiha dhipikirhelihu.—Kengesa Filipi 4:11-13.

7. Olabela na “wova n’oribela murima” ovulumutxiwa wawo entapulela nni?

⁷ Yehova onfuna wi okale marho waye.  Mbwenye vanofuneya ovilibihedha wi owaralihe omarho wawo vina olabele ovulumutxiwa wawo. Filipi 2:12 onloga: “Mulabele na wova, n’oribela murima ovulumutxiwa wenyu.” Eji entapulela wi ninofanyela wubuwela mofwaseya-mwene mukalelo onamususelihu Yehova vina okalavi wororomeleya, masiki epadduwe elobo txilobo. Kanikalege ologavi wila ninele okosa. Kobuwela wi masiki abale amulabeli Yehova mwa vyaka dhinjene, enaya ahobaniha nroromelo nawa. Dhilobo gani dhinawukamihedhe olabela ovulumutxiwa wawo?

8. Nsunzo nomunya nintapulela nni? Ejiya ekalelini yamakamaka?

⁸ Wi okale marho wa Yehova, enofanyela omwiwa vina ologa na iyene. Noona omusunza Bibilia bu mukalelo w’onvuruwana Yehova. Eji entapulela wengesa vina otanaalela Mazu a Mulugu anvahiwa iyo mmanivuruni andhela mBibiliani. Mbwenye omusunza Bibilia, onopitta otanalela mapadduwo, txino ninga munkoseliwe na mabigiho a oskola. Ottiya ejene, enkala ninga wedda woziva venevo vanziwa weyo dhilobo dhiswa mwaha wa Yehova. Omususele Mulugu, iyene vina onele wususela.—Tiago 4:8.

9. Marhe gani agokamihedhile na nsunzo nawo nomwinya?

⁹ Nikuru na Yehova ninosasanyedha dhipano dhowinjiva dhinaukamihedhe va masunzoni vawo. Motagiha, mu jw.org muhikala epaddi esasanyedheliwe  wukamihedha ononelamo mapadduwo a mBibiliani anfuniwe osunza entxemerhiwa “Exercícios Bíblicos” epaddi ya “Adolescentes.” Vina mu jw.org mukala dhipano dhopepesana ninga “Txini Ensunziha Bibilia Txibarene?” Epano eji na dhina dhinowukamiha ovaddihaga nroromelo nawo vina wasunziha attu eena. Koona dhologa dhina dhinalibihe nsunzo nawo nomwinya, mu epaddi ya “Os Jovens Perguntam” mutoma onloga . . . “Como tornar a leitura da Bíblia agradável?” mu Despertai! Abril 2009. Osunza na otanaalela dhinele wukamihedha olabela n’oribela murima ovulumutxiwa wawo.—Kengesa Masalmo 119:105.

10. Mukristu wobatiziwa onfanyelelani olobela?

¹⁰ Nigamusunzaga Bibilia, nininvuruwana Yehova, mbwenye nigalobelaga ninloga na iyene. Kanubuwele wila nlobelo ninkoseliwa elemelelo obe ‘murobwe’ wowakelana gari. Olobela ontapulela ologa kakamwe na Muttanddi wehu. Kaziwa yawi: Yehova onofuna wiwa enniwe wila omwaddele! (Kengesa Filipi 4:6.) Ogakaana makattamiho, Bibilia belaga, “omuroromeléna Nabuya makathamiho awo.” (Masalmo 55:22) Abali enjene anele owaddela wila okosa ejene enokamihedha. Eji enele wukamihedha weyo vina.

11. Ekaleleni yaderetu omutamalela Yehova?

¹¹ Kanimulobege Yehova nigafwanyiwa segedho bahi wila anikamihedhe. Bibilia ononubutxa eraga: “Mukalegevi athu otamalela.” (Kolosi 3:15) Masaka meena sabwa ya segedho dhinjene, ninodduwalaga dhilobo dhapama dhinehu. Nona kakosa dhahi: Malabo etene karoma wubuwela dhilobo ttaru dhinnewi, ogamala omutamalele Yehova, sabwa ya esuwene. Namwali dhahi oniliwa Abigail, obatiziwe bana vyaka 12, ohiloga: “Enonamo miyo, jawila Yehova ddi muttu mmodha bahi mwilaboni muzima onfwanyeelihu omutamaala. Omutamala malabo otene sabwa ya nvaho wa mukutto onivahiliye.” Malabo meena Abigail onovikosaga nivuzo dhahi newilegiye: ‘Apa ddigela ddivenyaga mangwana ddifwanya dhilobo dhetene dhimukumbirhilemi Yehova, ddinakaane eni-wene?’ * (Koona yowenjedha.)

12, 13. Wonile dhavi wamwinya wila Yehova ddwaderetu, nanda ekalelini yaderetu wubuwela mukalelo wukamihedhile Yehova?

¹² Yehova omukamihedha Mwene David okwaranya dhoweha dhinjene. Nona David wahiloga ninga yotagiha yomwinya veriye: “Pimaní munowona oziva wa murima wa Nabuya; wagari ddule onimuroromela!” (Masalmo 34:9) Versu eji enonitonyihedha wi nipime obe nitanaalele oderetu  onnikosela Yehova. Ogamwengesa Bibilia, manivuru ehu vina woona matugumano, onele ononelamo mukalelo wakamihile Yehova attu eena olibihavi nroromelo nawa. Mbwenye wila olibihe omarho wawo na Yehova, onofanyela wubuwela mukalelo onukamihedhiye. Okaana yotagiha enlagiha wila Yehova ddwaderetu mwa weyo?

¹³ Akristu otene anowoonaga oderetu wa Yehova na mikalelo dhottiyana-ttiyana. Iyene onomuwoba muttu-muttu wa iyo wi ninfiyedhe iyene na Mwanaye. Yezu ologa: “Kawo onwodha ofiya vali miyo, ahikukusiwe na Baba, oddirumile.” (Joau 6:44) Onowubuwelaga wi Yehova ohukukusela oli iyene? Onowubuwelaga wila, ‘Yehova ohakukusela oliye amambali awo, nanda weyo bugafara awene’? Kudduwale wila vaviperhekeliwe Yehova nanda obatiziwa, venevo oroma omarho wawo wa ttima na iyene. Bibilia belaga: “Vano onimukwela Mulugu, onoziwiwa na iyene.” (1 Korinto 8:3) Kavaha ttima mburo wuvahile Yehova munikuruni mwaye.

14, 15. Olaleya onukamihedha dhavi okaana nroromelo noliba?

¹⁴ Weyo vina onowoonaga oderetu wa Yehova, ogalogaga n’oliba murima mwaha wa nroromelo nawo mmalaleyoni obe oskola. Masaka mena enorutxa walaleyela akwawo a oskola. Txino onozuzumaga, wovaga mukalelo onoonemo awene. Mudhidhi mwina enowopiya ologa dhororomela dhawo na attu enjene. Txini enawukamihedhe?

¹⁵ Karoma wubuwela sabwa enttiddeleliwe dhorumeela dhawo. Marhe aba osunzana vina opepesana, ali mu jw.org, kalabihedha mabasa na elogelo yawo. Onele okamihedheya wubuwela kakamwe dhorumela dhawo, sabwaya enrumeleliwe, vina mukalelo onawaddeliwe attu eena dhorumela dhawo. Ogakaana ebaribari vina ovisasanyedha deretu onele ofuna ovaha onamoona sabwa ya Yehova.—Jeremiya 20:8, 9.

16. Txini enawulibihe murima wi ologe dhorumela dhawo?

¹⁶ Masiki ovisasanyedhe deretu, dila dhina onosilidhiwaga ogalogaga na attu eena dhororomela dhawo. Murogora dhahi wa vyka 18, obatiziwe bana vyaka 13 ohiloga: “Ddinoziwa deretu dhororomela dhaga, mbwenye dila dhina enoddihima osaddula dhubuwelo dhaga wila dhikale mazu.” Iyene onovilibihedha ologa dhorumela dhaye mokurumuwa-mwene vina s’owova. Iye ohiloga: “Anamasunza akwaga anologaga ahovaga dhilobo dhinkosani. Miyo vina ddafuna ddikosege yakakene. Ddinroma ologa elobo ninga ‘Labo dhahi ddamusunziha muttu Bibilia, nomala . . . ’ Ddigamala miyo odhowanavi makaniya. Masiki makaniya ahikaletxaga a Bibiliavi, enaya anozuzumaga afunaga oziwa mukalelo onsunziha miyo dha mBibiliani. Dila dhina awene anokosaga mavuzo menjene. Ddigakosa guru yolabihedha marhe abo, makaniya kanrutxa odhowa vasogorho.  Ddigamala ddinowoonaga osanzaya omentoni waga!”

17. Elobo yina jivi enawukamihedhe ologa na attu eena?

¹⁷ Attu ena agoona wila onowazuzumela vina onowariha, awene vina anele okosa yakakene na dhorumeela dhawo. Olivia wa vyaka 17, obatiziwe ahinonuwetxa, ohiloga: “Miyo ddanovaga, ddobuwelaga wila ddigaloga dha Bibilia mmakanini mwaga ddinoniwege ninga munakapela mwinya.” Mmaleliye oroma woona dhilobodha na mukalelo wottiyana. Ottiya otanalagavi dha woova waye, iyene ohubuwela: “Azombwe enjene kanziwa mwaha wa anamona a Yehova. Ddihiyo oli anamona a Yehova onivilagiha. Nona mweddelo wehu bunalagihe mukalelo onakule obe onarumele awene. Kito akala nili attu a manyazo, nigova ologa nroromelo nehu, obe nigaanyimuwa na mukalelo onlogihu? Txino awene anele onoona ninga attu ahineka ttima elihuya. Awene txino anele wakula n’obedda sabwa yotuwa wehu nikuluvelo. Noona nigaloga nohagalala, n’ottugareya dhorumela dhehu, makaniya anele ogalamuwa vina attuya anele oniriha vina onika ttima.”

18. Txini enfanyeliwe okosa wi olabele ovulumutxiwa wawo?

¹⁸ Nimala woona wi jamakamaka olabela ovolumutxiwa wehu. Wi nikose ejuwene, enofanyela wengesa vina otanalela Mazu a Mulugu, omulobelela Yehova vina otanalela mukalelo onukamiyedha iyene. Okosa ejene enele wukamihedha omuroromela Yehova ninga Marho wawo. Ejoya enele wuttukulela wawaddela attu eena nroromelo nawo.—Kengesa Masalmo 73:28.

19. Ekalelini yaderetu ovilibihedha olabela ovulumutxiwa wehu?

¹⁹ Yezu ohiloga: ‘Onfuna oddifara, avikodde mwinya avijele pingirhizi yaye addifaregena.’ (Mateu 16:24) Wi ninfare Yezu, muttu muttu wa iyo onofuniwana oviperhekela wa Yehova wi abatiziwe. Mbwenye oko, omaromo wa egumi yosanzaya ovanene, enadhowihuna mpaka mwilaboni eswa ya Mulugu. Noona, kakosa muli mwetemwene wi olabele na wova, n’oribela murima ovulumutxiwa wawo!