1-3. (a) Txini enfunihu wika vamburoni voroma wa dhorumeela dhehu? (b) Ovenyihiwa mukwani okalelini elobo yamakamaka? (Koona foto eli omaromo.)

KOBUWELA, kovuziwa na muttu-muttuvi, masunziho amakamaka a nroromelo nawo, weyo, ogakulile dhavi? Mohaganyedha ogahakula wila onorumela yawi Yehova ddi Muttanddi vina ddiyene onivahile egumi. Ogahiloga wila onorumela yawi Yezu Kristu, okwile wi anobole. Ogahenjedhedhavi bugaloga dha Paraizu wa musogorho velaboni ya vatti, munakale emeleli a Mulugu namukalakala. Kito, ogahiloga dha ovenyihiwa mukwani ninga yorumela yawo yamakamakaya?

² Japama ologa dha ovenyihiwa mukwani ninga epaddi ya dhorumeela dhehu, masiki niziwaga wila ninele owanela ovuluwa mmasakani a goyi enddimuwa wila nakele egumi yohimala. Murumiwi Paulo ohitonyihedha mwahaya ekalelani yamakamaka ovenyihiwa mu okwani. Iyene ohiloga: “Akala akwile kanvenya, Kristu vina kavenyile mukwani.” Akala Yezu  kavenyihiwe mukwani, kinwodheya iyene okala Mwene wa wirimu, vina olaleya wehu kunna ttima. (Kengesa 1 Korinto 15:12-19.) Iyo nihiziwa wila Yezu ovenya mukwani. Sabwa ya orumeela wehu wila iyene ovenyihiwa mukwani, nihittiyana vaddiddi na Ayuda aloga wila muttu agakwa kana njedhelo nokalawo wili. Masiki attu eena anibeddege, nroromelo nehu, nawi Mulugu onowavenyiha aliba okwa ninkalavi noliba pwí.—Marko 12:18; Merelo 4:2, 3; 17:32; 23:6-8.

³ Paulo wahiloga wi nsunzo ntti na “ovenya wa aliba okwa” ninokosa epaddi ya ‘masunziho oromaya anda mwa Kristu.’ (Ahebreu 6:1, 2) Iyene wahinonihedhamo makaniya pama sabwa wannroromela esuwene. (Merelo 24:10, 15, 24, 25) Masiki ovenyihiwa mu okwani okale masunziho oroma anttidda iyo mmazuni a Mulugu, ninofanyela opepesa vina osunza n’ofaseya. (Ahebreu 5:12) Sabwaya?

4. Mavuzo gani anakosihu sabwa ya ovenyihiwa mukwani?

⁴ Attu agaroma omusunza Bibilia, anowengesaga mapadduwo menjene a ovenyihiwa mukwani, ninga motagiha ovenyihiwa wa Lázaro. Anosunza vina wi Abramu, Job, na Daniyel anroromela wila musogorho abale akwile enele wiyelela okalawo wili. Mwadhahene, kokumbirhiwa wila olagihe mbibiliani sabwa enfunelihu okuluvela wila ovenyihiwa mukwani onele opadduwa-wene masiki egalogiwe wale, weyo ogakulile dhavi? Koddi Bibilia onologa nsaka gani ninavenyihiwe attu mukwani? Dhowakula dha mavudho aba dhinolibiha nroromelo nehu.

5. Voroma txini enaloge iyo?

⁵ Enkala ninga kayo yotikiniha omoona muttu okwile ovanenevi nanda bavenyihiwa wi akalewo wili. (Joau 11:11; Merelo 20:9, 10) Ottiya eji, japama okaana ekuluvelo yawi masiki dhivire vyaka dhinjene abale akwile anele ovenyihiwa musogorho? Enanittukulele orumeela ku oziwa wila muttuya ovenyihiwe okwile wale obe okwile ovanene? Txino weyo onorumela ntikiniho na ovenyihiwa mukwani opadduwile masaka a mundduni ninga mwamalilani ottakiwa. Onomubuwela muttuya wavenyihiweyá? Ovenyihiwa mukwani ninga okuwene onlibiha dhavi nroromelo nawo nawi musogorho onele okosiwa mopitta?

6. Wakwanihedheya wa Masalmo 118, onimpatta dhavi Yezu?

⁶ Nilabihedhaga Masalmo 118, txino alebiwe na David, ndowe niloge ovenyihiwa mukwani wamalile ologiwa masaka a mudduni vaddiddi. Va Masalmo aba, vakala mazu anloga: “Nabuya, avunení emeleli enyu!” vina “Arelihiwe ole ondha na nzina na Nabuya.” Attu ena anologa nivuhulo ntti amwaddagana Mesiya, ttabwa-ttabwa siku navolowile Yezu mu Jeruzalemi labo 9 na Nisan, malabo mang’onovi ahinatti opiwa. (Masalmo 118:25, 26; Mateu 21:7-9) Kito Masalmo 118 enlogela nni ya ovenyihiwa mukwani onapadduwe musogorho? Kobuwela elobo yina enloga masalmo akakene: “Nlugu nipwaziwe na anamaga numba, thidhile othiddela numba yotene.”—Masalmo 118:22.

7. Ayuda amukoddile dhavi Yezu?

⁷ “Anamamaga numba” amukoddile Mesiya  aali asogorheli a relijiau a Ayuda. Kahiyo wila awene ela-ompwaza bahi, ahimukodda vina kamurumeelile wila ddi Kristu. Ayuda enjene amukodda modhela omudidela Pilato wila ampe. (Luka 23:18-23) Awene bapwatteli muladdu wa okwa wa Yezu.

8. Yezu odhile dhavi okala “nlugu ninlibiha numba yotene”?

⁸ Akala Yezu ofiyedha okoddiwa bapiwa iyene onkala dhavi “nlugo ninlibiha numba yotene.” Eji empadduwa akala Yezu ovenyihiwa mukwani. Yezu wahitonyihedha wi ejoya yali ebaribari valogiliye emariya ya mulobwana wana munddaye, nanda warumawo emeleli aye wi afiyedhena mpaganyo anamalimaya. Anamalimayá ahasosotta emeleliya otene. Musogorhomwa, omurumawo mwanaye, obuwelaga wila anamalimaya anele omuriha vina onvuruwana. Mbwenye ottiya onvuruwana, awene ampa mwanaya. Mmaleliye ologa emariya eji, Yezu ohitonya nivuhulo nili va Masalmo 118:22. (Luka 20:9-17) Murumiwi Pedro wahilabihedha malebo akakene mudhidhi walogiye na “anddimuwa a Ayuda, makolo, anamasunziha a magano o Jeruzalemi.” Iyene ologa wi ddinimwaddana ‘Yezu Kristu, munazareti omukomelihilenyu va pingirizini, mmalelani Mulugu banvenyiha mukwani.’ Mmaleliye ohiloga: “Yezu oddo ddulene omulogile Malebo Okoddela eraga: ‘Nlugu nipwazile anamamaga numba, thidhile olibiha numbayá.’”—Merelo 3:15; 4:5-11; 1 Pedro 2:5-7.

9. Yopadduwa gani yamakamaka elogiwe va Masalmo 118:22?

⁹ Nivuhulo va Masalmo 118:22 nahiloga dha ovenyihiwa mukwani ogadhile opadduwa vyaka dhinjene dha musogorho. Mesiya agahidha okoddiwa vina opiwa. Masiki dhawene, iyene agahivenyihiwa mukwani nanda agahidha okala nlugo ninlibiha numbayá. Mmaleliye ovenyihiwa mukwani, ehidha wooneya wila “mwilaboni kamuli nzina nina nivahiwe athu, ninavulumutxe” ahili Yezu.—Merelo 4:12; Éfeso 1:20.

10. (a) Txini enloga Masalmo 16:10? (b) Ninziwa dhavi wila Masalmo 16:10 kamwaddana David?

¹⁰ Ndowe none versu dhina dhinloga ovenyihiwa mukwani. Ejiya edhile wakwanihedheya dhigavirile vyaka txikwi musogorhomwa. Nipadduwo ntti, ninonivaha ekuluvelo yawi ovenyihiwa mukwani onele opadduwa masiki dhigavirile vyaka  dhinjene bimalile ottagiwa. Va Masamo 16, ninowengesavo mazu alogile David: “Nyuwo kamunaddileve mmasiye. Kamunamuthiye mwimeleli wenyu ototowa.” (Masalmo 16:10) David kalogile wila iyene txipo kagakwile obe kekiwe omasiye. Mazu a Mulugu anologa wi David wahuluvala nanda bakwa obe odhowa otibeliwa vali azamani aye, “oheyiwa mmuthetheni, onromoliwa muthethe wa David.” (1 Amwene 2:1, 10) Nlebo ntti ninimwaddana ani?

11. Pedro otapuleli mudhidhi gani malebo va Masalmo 16:10?

¹¹ Muvirile vyaka dhinjene David bamalile oleba mazu aba, Pedro ohimuloga muttuya waddiwana va Masalmo 16:10. Sumana dhing’onovi Yezu bakwile vina avenyihiwa mu okwani, Pedro wahiloga na Ayuda obaliwana vamodha na abele ayilemo bakala ayuda [prosélitos]. (Kengesa Merelo 2:29-32.) Iyene wahawubutxedha wila Davi wahikwa nanda beyiwa. Bibilia kanloga wila okalawo wampambihile Pedro, valogiye wi David “wankutha ovenya mukwani wa Kristu.”

12. Masalmo 16:10 akwanihedheyi dhavi, nanda ejoya eniwanana dhavi na yolibela ya ovenyihiwa mukwani?

¹² Pedro wahidhalihedha mubuweno wa mazu a David ali va Masalmo 110:1. (Kengesa Merelo 2:33-36.) Otanalela Malebo wakosa Pedro ohakamihedha attu enjene ononelamo wila Yezu wali “Nabuya, vina moboleli.” Attu adha ononelamo wi Masalmo 16:10 adhile wakwanihedheya mmaleli Yezu ovenyihiwa mukwani. Musogorhomwa, murumiwi Paulo aloga makani akakene valogiye na Ayuda akala kwatti ya Antiyokiya y’o Pisídia. Masunziho abo, anatikiniha vaddiddi, nanda anfunavi wiwa. (Kengesa Merelo 13:32-37, 42.) Nikaane ebaribari yawi mavuhulo a Bibilia anloga dha ovenyihiwa mukwani onapadduwe musogorho, anele wakwanihedheya masiki egattagiwe na wale.

13. Mavuzo gani anakosihu sabwa ya ovenyihiwa mukwani?

¹³ Jopangarhaza oziwa wila ovenyihiwa mukwani onele opadduwa-wene masiki dhigavirile vyaka matxikwi menjene bimalile ologiwa. Masiki dhawene, attu eena anovuzaga: ‘Koddi ejoya entapulela wila ddinele ojedhela mudhidhi mwinjene mpaka mmudhaga ovenyihiwa mukwani? Ovenyihiwa oko onapadduwe nsaka gani?’ Yezu, wahawaddela anamafwara aye wila dhahikalawo dhilobo dhahanonelamo iyene vina kagadhile oziwa. Dhihikalawo dhilobo ninga “nsaka peno mudhidhi othomile baba n’funa waye.” (Merelo 1:6, 7; Joau 16:12) Egalivi dhawene, ninowaddeliwa nsaka na mudhidhi onavenyihiwe aliba okwa mukwani.

14. Ovenyihiwa wa Yezu mukwani ottiyanile dhavi na wa attu eena?

¹⁴ Ovenyihiwa mukwani wamakamaka elebiwe mBibiliani kwa Yezu. Iyene kohivenyihiwa mukwani, kawo mwa iyo agaana njedhelo na wawona wili anamudhi aye akwile. Abale avenyihiwe mukwani Yezu ahinakwa, kuloga abale evenyihiwe na Elias vina na Eliseu, kakalilewo na mukalakala. Awene ahikwa wili, atibeliwa bakala mbwebwe mmasiye. Mbwenye Yezu “vavenyiliye mukwani” okalawo. Iyene  “kankwa vina okwa kunna guru dhomuthidda.” Wirimu, iyene onokalawo ‘okala n’okala-wene.’—Roma 6:9; Ovuhulela 1:5, 18; Kolosi 1:18; 1 Pedro 3:18.

15. Yezu wakuweleliwe nni “muthaji”?

¹⁵ Ovenyihiwa wa Yezu wi adhowe wirimo ninga muttu womuyani, wali woroma vina wamakamaka wa mukalelo ninga obuwene. (Merelo 26:23) Kayo iyenevi bahi ovenyihiwe mukwani wi adhowe wirimu. Yezu wahittaga na anamafwara aye wila agahilamulela vamodha na iyene wirimu. (Luka 22:28-30) Nbwenye ottuviwa ninga okuwene, awene agakelile agamala okwa. Dhahene ninga Yezu, awene anvenyihiwa na ningo nomuyani. Paulo oleba wila “Kristu ovenya mukwani: iyene ddi muthaji w’ovenya mukwani vari va akwile.” Paulo wahiloga wila akalawo eena agavenyihiwe wi adhowe wirimo, eraga: “Mudhidhi w’ovenya muthu-muthu, onothiyana: oromile ddi kristu oli muthaji osogorhowa anere ovenya akadda Kristu nsaka nineyeliye.”—1 Korinto 15:20, 23.

16. Monelo gani onnikamihedha wona nsaka ninavenyihiwe abale anadhowe wirimu?

¹⁶ Mazu a Paulo anonivaha monelo wa nsaka ninavenyihiwe abale anadhowe wirimu. Eji enapadduwe nsaka nineyele Kristu. Mwa vyaka dhinjene, Anamoona a Yehova ohitonyihedha mBibiliani wila ‘wiyela’ wa Kristu oromile yaka ya 1914. Ovano nili masaka a ‘odha waye’ vina omagomo wa elabo ejino yotabala onowaddamela.

17, 18. Txini enapadduwele attikitteliwi eena nsaka n’odha wa Kristu?

¹⁷ Bibilia otapulela ovenyihiwa mukwani w’odhowa wirimu eraga: “Kaninfuna wi muhiziwe mukalelo wa aliba okwa . . . Iyo ninorumela wi Yezu okwa, ovenya múkwani; n’ekalelo yokokene ninorumela wi Mulugu onere wavenyiha múkwani na guru dha Yezu, etene akwile amuroromelaga . . . Iyo niliwo, ninakalewovi ofihedha odha, Nabuya, kaninathiyane na abale akwile wale; Nabuya onere otita odhulu . . . venevo panarome ovenyihiwa múkwani abale akwile amuroromelaga Kristu. Osogorhowa, iyo niliwo, niliví mwilaboni ninere othukuleliwa wirimu mmuraboni vamodha na awene, nagumane na Nabuya; dhahene ninere okalaga na Nabuya malabo etene.”—1 Tesalónika 4:13-17.

¹⁸ Ovenyihiwa mukwani w’odhowa wirimu woroma, opadduwile varomile masaka a odha wa Kristu. Attikitteliwi anakalewo mudhidhi wa goi enddimuwa, anere “othukuleliwa wirimu mmuraboni.” (Mateu 24:31) Ejiya entapulela nni? Abale ‘anathukuliwe’ “kakwile” eji, entapulela wi kanavire mudhidhi mwinjene agali okwene. Ottiya ejenevi, awene agakwa, otene anere osadduliwa nanda “ejiyá enapadduwe vowaguva, ninga enira okapila wa mento, vanárume parhaza womariha.”—1 Korinto 15:51, 52.

19. Ovenyihiwa mukwani wa “egumi yebaribari,” kuvi?

¹⁹ Ddabuno, Akristu ororomela enjiya kattikitteliwe, ottiya eji vina kasakuliwe wi alamulele na Yezu wirimu. Masiki dhawene, anojedhela ‘labo na Yehova’ nttuwene ninatolotxiye elabo ejino yabure. Kavo onziwa mudhidhiya onadhe omagomelo wa elabo, mbwenye dhilobodha dhimpadduwa dhintonyihedha wila eli vakukuvi. (1 Tesalónika 5:1-3) Elabo eswa ya  Mulugu egadha, onele okalawo mukalelo mwina wa ovenyihiwa mukwani. Nsakana ntto attu anele ovenyihiwa mukwani akelege mwilaboni, vina anele okana njedhelo n’okala attu oligana vina akalegewo na mukala-kala. Ovenyihiwa mukwani oko ‘onele okala wa ttimaya’ opitta wa abale avenyihiwe mukwani masaka a mundduni, sabwani awene musogorhomwa akwa wili-wili.—Ahebreu 11:35.

20. Ninkanela nni ekuluvelo yawi ovenyihiwa mukwani onakale wosasanyedheya?

²⁰ Bibilia onloga wi abale anvenyihiwa wi adhowe wirimo “mudhidhi w’ovenya muthu-muthu onothiyana.” (1 Korinto 15:23) Noona nikuluvele wila ovenyihiwa mukwani wi nikale velaboni ya vati onele okala wosasanyedheya. Ejo enonittukulela okosa nivuzo nawi: Abale akwile ovanene anele ovenyihiwa mukwani waddamelaga Olamulela wa Kristu wa vyaka Txikwi vina anele wakeliwa na amudhawa? Niloge wila emeleli ororomelaya asogorhela nlogo masaka a mundduni banakale oromaya ovenyihiwa mukwani wi asasanyedhe nlogo na Mulugu mwilaboni eswa? Txini enapadduwele abale ahimuziwile vina ahimulabeli Yehova? Aweneya anavenyihiwe dhavi vina nsaka gani? Aba ba mavuzo menaya agakosile iyo. Mbwenye kanizuzume nne kanittiddiwe woova na dhilobo esi ovanene. Yapamaya ja ojedha wi noone enapadduwe. Mbwenye ninofanyela oziwa wila enele okala yohagalaliha vaddiddi woona mukalelo onakose Yehova esidha.

21. Txini enjeedhela weyo?

²¹ Ovano nilibihe nroromelo nehu mwa Yehova. Iye wahimpikirhela Yezu wila aliba okwa ali mu yubuweloni mwaye, anele wiyelela okalawo. (Joau 5:28, 29; 11:23) Wi niziwe-wene wila Yehova onowavenyiha attu mukwani, Yezu wahiloga wi Abramu, Izaki na Jakobi “onakalihawo ddi iyene.” (Luka 20:37, 38) Mohaganyedha iyo nihikana mwaha waderetu wologa ninga mologeli murumiwi Paulo: “Ddinomuroromela Mulugu . . . wi athu apama na abure anere ovenya mukwani.”—Merelo 24:15.