WEYO oli muttu wotamaalela? Notene ninofanyeelela oziwa yowakula ya nivuzo nthi. Bibilia wahithaga ologa wi masaka abano ankalihu, attu enjene ‘kanatamalelege.’ (2 Tim. 3:2) Txino weyo onowaziwa attu ena anna ekalelo y’ofunaga okoseliwa dhilobo dhotene na akwawa. Awene anubuwela wi anofwanyela okoseliwa dhahene, nona kanoona mwaha wotamaalela esile dhinkoseliwani. Weyo txino kugafunile okala na attu ninga aba kahiyo?

Mottiyana na abo, emeleli a Yehova anokokomeziwa okala: “Athu otamalela.” Iyo ninofwanyela ‘otamaalelaga dhilobo dhotedhene.’ (Kol. 3:15; 1 Tes. 5:18) Mwebaribari, okana elemelelo ya otamalela enonikamihedha nanya. Dhihikalawo sabwa dhinji dhinnikosiha okala attu otamalela.

Sabwa yamakamaka ennittukulela okana elemelelo ya otamalela jawi ejo enonikamihedha okana monelo wapama. Muttu agatamalela onkala oohagalalene, vina oddule onakela matamaaloya onowagalala. Sabwaya jani otamalela ogadhana dhopurelamo esi bili? Kobuwela yotagiha eji: Akala muttu onogana olabihedha mudhidhi waye wi okosele elobo-elobovi, ejo entonyihedha wi onowutanaala. Ejo ebaribari-wene. Woona otanaaliwa oku, onowuthukulela okana monelo wapama mwaha wa egumi yawo. Jijuwene empadduwele Ruti. Boaz wahimutonyihedha nthebwa. Mohaganyedha Ruti wahagalala oziwa wi okalawo muttu wamutanala.—Ruti 2:10-13.

Elobo elitxi yamakamaka ja omutamalela Mulugu. Kavali waganyedha wi, dila dhina weyo onotamalelaga mivaho dha Yehova dhinuvahiye ninga yoja yomuyani vina egumi endowiye ovahagavi. (Olib. 8:17, 18; Mer. 14:17) Mbwenye othiya wubuwela bahi opama wa Mulugu, kakana mudhidhi wa otanalela mareliho menji anuvaha Mulugu vamodha na attu abale anakweliwe. Wila wunuwihe otamaalela oniwe, onofwanyela otanalela nthebwa na Muttanddi wawo, ogakosa dhahene onele wona wi iyene onowukwela vina onowukoya.—1 Jo. 4:9.

Mbwenye kanifwaseyelege bahi otanalela nthebwa vina mareliho anakelihu; nimutamaalelege Yehova sabwa ya opama waye. (Masal. 100:4, 5) Namaleba dhahi wahiloga “otamalela mukalelo wamakamaka onakamihedha attu okana wagalala.”

Mwaha mwina onittukulela okala attu otamalela bwawi ononikamihedha olibiha mandano. Iyo notene ninofanyeela woona wi ninovahiwa thima. Ogatamalela na murima wotene sabwa ya elobo yapama ekosiliwiwe na muttu mwina, moheeli munele okala ofiyedhana muttu na mukwaye. (Rom. 16:3, 4) Ottiya ejo, attu anziwa otamalela anowakamihedha attu ena. Awene anononelamo agakoseliwa oderetu na attu ena, nona anokosa yakakene. Txibarene, wakamihedha attu ena enodhana wagalala. Nona Yezu wahiloga wi: “Ovaha onothabiha opitha ovahiwa.”—Mer. 20:35.

Robert Emmons mwimeleli wa Universidade ya Califórnia mpaddi wa masunzo otamalela, wahiloga: “Wi nikale attu otamalela ninofwanyela ononelamo wi ninofuna nikamihedho na attu ena; kuloga wi mudhidhi mwina ninonvaha elobo muttu mwina, vina mudhidhi mwina iyo ninowakela elobo.” Ebaribariya jawi, wila nikaane egumi yofwasa ninofwanyela ovahiwa nikamihedho  na attu ena na mikalelo dhothiyana-ttiyana. Motagiha, awene txino ononivaha yoja obe nikamihedho nigakala aredda. (1 Kor. 12:21) Muttu wotamaalela anovaha thima nikamihedho ninvahiwiye na akwaye. Egali Dhawene, ninofwanyela ovivuza, miyo ddikana elemelelo y’otamaalela mwaha wa esile dhinkoseliwemi na attu ena?

Sabwa yina enfanyeelelihu okana elemelelo y’otamalela jawi ejo enonikamihedha ofwaseyela dhilobo dha pama othiya dhabure dhinnipadduwela. Na mukalelo mwina yubuwelo yehu enlaba ninga mpembe wotxithika. Eji enonikamihedha ofwaseyela dhilobo dhapama dhinoonihu nirabelaga dhilobo dhohifwanyelela. Onofwanyela otamela woona dhilobo dhapama vina ohang’anetxetxa makatamiho annifwanya. Ogatamalelagavi, onelege woona dhilobo dhapama, dhaene onelege odhowavi otonyihedhaga otamalela wawo. Ogafwaseyela wona dhilobo dhapama dhimpadduwa mwigumini mwawo enele wukamihedha ofara malago a murumiwi Paulo: “Thabaniví mwa Nabuya.”—Fil. 4:4.

Otamalela onele wukamihedha orabela dhubuwelo dhabure. Kunrumela wi enorutxa okala muttu wotamaalela oku buna ntxiga, aje, obe buli wosilidhiwene? Othiya ejo, attu antamaalela kantameletxa dhokaana. Awene anoriha ejile enani vina kanzuzumela ofunetxa dhilobo dhina.—Fil. 4:12.

Ninga Mukristu, kaziwa wi Satana onziveliwa wuwoona ogaali okubanyene vina okumuwene sabwa ya makattamiho a masaka abano omariha. Iyene onoziveliwa ogawonaga ottukulaga ekalelo ya muttu wovanya vaddiddi vina mubuwelo wohifwanyela. Okana monelo ninga obu, onogudulana na mabasa awo a olaleya miselu dhapama. Otamalela onedda mumodhani na dhobaala dha muya wa Mulugu, entaganyiheya na othaba na dhapama dhotene dhinnivaha Mulugu vina ororomela mapikirelo otene a musogorho.—Gal. 5:22, 23.

Sabwa yokosa mpaddi wa nikuru na Yehova, txino weyo onorumeela esile dhilogiwe mwari mwa mutoma obu mwaha wotamaalela. Masiki dhahene, kahiyo elobo yovevuwa oziwa otamalela, vina okana monelo wapama. Mbwenye kukumuwe sabwa ya ejuwene. Enowodheya wunuwiha vina okaanavi monelo wotamaalela. Dhavi? Masiku otene, otamelege mudhidhi w’otanalela dhilobo dhapama dha mwigumini mwawo dhinawuttukulele otamalela. Ogakosagavi dhawene, kinawurutxe otonyihedha elemelelo ya otamalela. Eji enele wuttukulela okala muttu wowagalala opitta abale anzuzumeletxa makattamiho a mwigumini mwawa. Kobuwela dhilobo dhapama dhinuvaha Mulugu vina esile dhunukosela attu ena, wi awulibihe. Kakana elemelelo ya siku-siku olebelaga dhilobo bili obe ttaru esuwene dhinawukamihedhe okala muttu wotamaalela.

Anamapepesa ansunza makani otamalela ahiloga wi “okana elemelelo ya otamalela enosadduwa mukalelo onlaba ogogo wehu wi enokamihedha okana ofwasa mwigumini mwehu.” Muttu wotamaalela muttu onna wagalala webaribari. Katanalela mareliho anewina, kalabihedha dhotagiha dhapama dhinkaniwe mwigumini, kala muttu wotamaalela! Othiya wubuwela wi onofanyeelela dhilobo dhapama dhinupadduwela, “Mutamalení Nabuya vowi ddwapama.” Ndde, “Mmutamalelege Mulugu mwetemwene.”—1 Map. 16:34; 1 Tes. 5:18.