Olibiha 22:25-27 kanizuzumela woniha muladdu wa mulobwana, sabwani mwari mwa nipadduwo ntti mulobwanaya wahimala okana muladdu. Nlamulo ntti ninzuzumela woniha wi muyana kana muladdu. Ndoweni nisekeserhe makaniya.

Maversikulu a mundduni anloga mwaha wa mulobwana onimugoniha muyana wamwinya “mmuthetheni.” Sabwa ya okosa ejuwene, mulobwana wahimala okana muladdu wa oraruwa, velani muyana weddeliwa woniwa ninga muteliwi. Kito muyanaya? “Muyana onapeliwe okodda okuwa akumbirhaga ovuniwa oku bali mmuthetheni.” Muyanaya kokuwa, athu ena agahinvuruwana vina agahinvunela. Mbwenye iyene kakuwile. Dhahene, iyene vina wahikaana muladdu wa oraruwa, nona oheeli ampwattelihiwa muladduya.—Olib. 22:23, 24.

Mbwenye nlamulo ntti naloga nipadduwo nottiyana: “Vano mulobwana agamfwanya muddabo namwali oneddeliwa, agamusegedha araruwane, venevo onapiwe ddi mulobwana bahi. Namwaliyá keriwena elo-wene, vowi kavali elo enimfwanyelihedha opiwa; ejiyá epadduwile ninga mulobwana onimulata mulobwana mukwaye afiyedha ompa. Namwali oddo ofwanyiwe muddabo, masiki kokuwa, kagamonile mvuneli.”—Olib. 22:25-27.

Egapadduwa dhahene, nlamulo nannivaha muyana mperhe. Na mukalelo gani? Sabwani “masiki kokuwa, kagamonile mvuneli.” Nona, muyana oddule katotile muladdu wa oraruwa. Mbwenye, mulobwanaya, wahikaana muladdu wa otota ngovi vina wa omurarutxa sabwani iyene ‘omusegedha mpaka omugoniha muyanaya.’

Masiki nlamulona nizuzumelega woniha wi muyana kana muladdu, nipadduwona bahi ninowoniha wi mulobwana wakaana muladdu wa otota ngovi vina wa oraruwa. Txibarene, anamattonga andowa ‘otamela oziwa pama makaniya’ vina anttonga mowiwanana na magano oligana a Mulugu avahiwani dila dhinjene.—Olib. 13:14; 17:4; Obud. 20:14.