Onoziwa yowakula ya mavuzo aba asekeserhiwe mwari mwa Mwang’aneli wa 2019?

Txini entapulela nipikirhelo na Mulugu nawi: “Nona kaiwo futti enawodhe ounonga”? (Iza. 54:17)

Ninofwanyela okuluvela wi Mulugu onele onibarela na “ekupekupe ya amwiddani ehu.” (Iza. 25:4, 5) Amwiddani ehu txipo kananipemberhe, sabwa yawi Yehova onowodha osaddula obure onkoseliwa iyo.—w19.01, makuku 6-7.

Yehova owodhile dhavi wavilela noligana akadda Kaná vamodha na ana Izrayel amusadduwele?

Mulugu wahattonga abale akosa ogonihana wonyakuwa obe abale atabutxa awadhiwa vina anawa. Mudhidhi wewelela ana Izrayel yaloga Mulugu anrurihiwa vina masaka aweddiha ana Izrayel attu ena na oligana, Yehova wanaruriha.—w19.02, makuku 22-23.

Txini enfwanyelihu okosa akala nili wego nanda onfuna okosa nlobelo mmalabo?

Ninofwanyela ohirumela elo vina nitonyihedhe nriho, nihirumele “amen” vina kanirumele ottiddela mada a attu ena. Egafuneya wi nikose nlobelo nehu nooka, kaniloge “amen” na lizu nowiweya.—w19.03, nikuku 31.

Ngovi ya wararutxa aima ekalele nni muladdu wawopiha?

Wararutxa aima yottega enddimuwa, omuttegela namapujiwa, ottegela mulogo, wattegela alamuleli a mwilaboni vina omuttegela Mulugu. Dhilabo dhina dhihikana malamulo a ngovi y’orarutxiwa wa aima, nona anddimuwa a mulogo anofwara dhinloga malamulo aba.—w19.05, makuku 9-10.

Onawodhe dhavi wogolela mobuwelo wawo?

Tarhodha sisi: Kaloga na Yehova na nlobelo. Otanalele dhogana dhawo. Osakule manddano apama.—w19.06, nikuku 11.

Ovano, txini enakosihu wila nivisasanyedhe nihinatti ofwara-fwariwa?

Ninofwanyela olibiha mandano ehu na Yehova. Nikuluvele wi Yehova ononikwela vina txipo kananittiye nooka. Nimwengesege Bibilia malabo otene vina nilobelege mudhidhi wotene. Nikuluvele wi mareliho a Omwene wa Mulugu anele wakwanihedheya. Nikoye malebo annizivela vina jibo dhinimuttittimiha Yehova.—w19.07, makuku 2-4.

Ninawodhe dhavi wakamihedha amudhihu wila avuneye?

Jamakamaka watonyihedha ntanaalo, nittiye mweddelo wehu wapama ologe, nikala anamavilela na oderetu.—w19.08, makuku 15-17.

Nipikirhelo na Yezu nili va Mateu 11:28, ninnilibiha dhavi?

Iyo nikana anamedddelela apama, amarho apama, vina nikana mabasa apama.—w19.09, nikuku 23.

Mulugu onwodha dhavi onnivaha efunelo vina guru yawirana mabasa? (Fil. 2:13)

Mulugu ononivaha guru vina efunelo yawirana mabasa aye, nigengesaga Mazu a Mulugu vina nigatanaalela dhinengesihu. Muya waye wokoddela onowodha wunuwiha ewodhelo enihuna.—w19.10, nikuku 21.

Ttarho gani dha eziwelo dhinfwanyeelihu ofwara nihinatti okosa yogana yamakamaka?

Dhili ttarho tanu: Kapepesa mowakwana. Kalobela okumbiraga eziwelo. Otanaalele dhogana dhawo. Kakana dhogana dhofwanyelela. Kakana ebaribari.—w19.11, makuku 27-29.

Mulogeli Satana wi Eva kagakwile, wafuna amuziwihe Eva wi muzimu kunkwa?

Enkala ninga kahiyo mwenemo. Satana kalogile wi Eva kooja mulima wakooddihile Mulugu, agakalile ninga okwile. Kaliwo masunziho ottambi aviluwile na Mpulo wa nsaka na Nowé. Mobuwelo wawi ohikalawo muzimu ohinkwa txino witeyile Mulugu ahinatti wabalaletxe attu ammaga murhingothi wa Babel.—w19.12, nikuku 15.