Enkala ninga kahiyo mwenemo. Ddiabo kalogile wi Eva kooja mulima wakooddihile Mulugu, agakalile ninga okwile oku epaddi yina yohooneya ya Eva (enziweya masaka abano ninga muzimu ohinkwa) ogadhowile okalaga mpaddi mwina. Alabihedhaga nowa, Satana wahimwaddela Eva wi, ‘nne kamunakwe’ mugaja mulima onziwiha opama na obure. Na mazu aba iyene wafuna aloge wi, Eva welege okalawovi na wagalala velaboni ya vati, s’ohimwiwelela Mulugu.—Wita 2:17; 3:3-5.

Akala masunziho ottambi awi muzimu kunkwa ninga munsunzihiwani masaka abano, ketteyile mmunddani wa Edeni, kito adhile wuvi? Kaninziwa mowakwana. Enziwehu jawi webedha wotene wottambi wahitolotxiwa na Mpulo wa nsaka na Nowé. Kaliwo masunziho ottambi aviluwile na Mpulo wa nsaka na Nowé, sabwani Nowé bahi vamodha na amudhaye—akosa webedha wa ebaribari—baviluwile.

Nona masunziho aba awi muzimu kunkwa eeteyile mmaleli ovira Mpulo. Mmaleli Mulugu orabuliha dhilogelo o Babel vina attuya abalaleyela “mwilaboni mwetemwene,” kavali waganyedha wi awene ahittukula mubuwelo wawi attu ahikaana muzimu ohinkwa. (Wita 11:8, 9) Kintanala mukalelo witeyile masunziho aba, ninoziwa wi Satana Ddiabo, oli “nipara na wota,” ddinapupurutxa attu vina onoziveliwa agoonaga othambi obu omwadheyelaga elabo yotene.—Jo. 8:44.