1-2. (a) Jubileu Txini? (Koona kasha “ Jubileu Wali Eni?”) (b) Txini elogile Yezu va Luka 4:16-18?

DHILABO dhina, ddikana elemelelo ya okosa mattanga akala mwene obe nyanyi ohakwaniha vyaka 50 dholamulela. Yaka enakwaniha mulamuleliya vyaka 50 enkuweliwa yaka ya Jubileu. Mattanga aba a Jubileu anomala labo, sumana obe masiku menjene, mbwenye mohigoneela mattangaya anogoma vina wagalalawa onodduwaliwa momaguva.

² Ninele osekeserha pama mwaha wa Jubileu, sabwani ana Izrayel agakwaniha vyaka 50 ankosa mattanga mwari mwa yaka modha. Jubileu wawale wanavaha ofuru ana Izrayel. Ninfunela nni osunza mwaha wa Jubileu masaka abano? Sabwani yaka ya Jubileu wa ana Izrayel enonubutxedha masasanyedho akosile Yehova wi nikaane ofuru wamukalakala, ofuru obe woboleliwa wotikiniha walogile Yezu.—Kengesa Luka 4:16-18.

3. Mowiwanana na Onamakutha 25:8-12, ana Izrayel apurelamo dhavi mattanga a Jubileu?

³ Wi ninonelemo pama txini yatapulela ejile yalogile Yezu mwaha wa woboleliwa, voroma, ninofwanyela omusunza Jubileu wamukosa nlogo na Mulugu. Yehova wawaddela ana Izrayel: “N’esidhá munovuwiha mwilaboni thima ya yaka yomakumatanu, munolaleya ofuruliwa wa etene ankalamo. Yaka eji yithaniwege ‘Jubileu’, kuloga yaka y’othaba. Muyakani-mwampo, maddebe agulihiwege, anowiyelihedhiwa anya, adhari anofuruliwa.” (Kengesa Onamakutha 25:8-12.) Mwari mwa mutoma ovirile, nisunza mukalelo  wapurelemo ana Izrayel nlamulo na Sabuddu. Kito ana Izrayel apurelamo nni na mattanga aba a Jubileu? Kobuwela Muizrayel wana mangau, wanfiyedha oguliha nddebe naye wi apitxele mangawuya. Mbwenye yaka ya Jubileu, iyene wankaana ofuru wa wiyelihedhiwa nddebe naye. Dhahene, iyene wanwodha ‘wiyelela dhili dhaye,’ vina osogorhowa anaye agahikana ofuru wa ohalana nddebe na babiwa. Kobuwela vina, akala muttu wela orutxiwa opitxa mangau wanfiyedha omuguliha mwanaye—obe oviguliha mwinyene—ninga mudhari wi apitxele mangau. Mbwenye yaka ya Jubileu, mudhariya ‘wanniyelela wa amudhaye.’ Na mukalelo obu, kavo watowa njedhelo, otene anfuruliwa! Masasanyedho aba anowoniha wi Yehova wanzuzumela nlogo naye!

4-5. Ninfwanyelela nni osunza mwaha wa Jubileu masaka abano?

⁴ Yopurelamo yina ya Jubileu jivi? Yehova wahinonihedhamo: “Vari venyu kavakale atabuwi, sabwa Nabuya onoururihani mwilaboni enfuna Mulugu wenyu ouvahani wi ekale yenyu-ene.” (Olib. 15:4) Eji ehittiyana na esi dhimpadduwa masaka abano, ayelegi onottabwavi oyelega, areeli anodhowavi arelaga!

⁵ Ninga Akristu, iyo kanili mutxiddo mwa Malamulo a Mizé. Eji entapulela wi kaninfwanyela ofwara masasanyedho a Jubileu ninga a wafurula adhari, olevelela mangau vina wiyelihedha maddebe. (Rom. 7:4; 10:4; Ef. 2:15) Mbwenye, jamakamaka osunza mwaha wa Jubileu. Sabwaya? Sabwani ofuru wavahile Yehova nlogo na Izrayel ononubutxedha ofuru obe woboleliwa onakaanihu.

6. Nlogo na attu ninfunela nni ofuruliwa?

⁶ Notene iyo ninofanyeelela ofuruliwa sabwani nili mudharini mwa wopiha—adhari a yottega. Sabwa yokala attegi, ninowuluvala, ninobulela vina ninokwa. Enjene  anowoona wi attegi agaviyang’anaga musupeyoni obe agadhowa o sipitale sabwa ya oredda. Notene ninokubanyaga nigakosa yottega. Murumiwi Paulo wahiloga wi mmaningoni mwaye mwakala makalelo amudidela “okala mudhari wa yothega.” Iyene ologavi: “Ntowa gani ninna miyo! Mmwilini mwaga mukala yothega enditotela okwa. Onaddivunemo bani?”—Rom. 7:23, 24.

7. Txini yattagile ologa namavuhulela Izaiya mwaha wa ofuruliwa?

⁷ Ninomutamaalela Mulugu okosile masasanyedho, wila nifuruliwe muthegani. Yezu ji fugulo ya ofuru wehu. Okwaranya vyaka 700 Yezu ahinatti odha velaboni ya vati, namavuhulela Izaiya wahittaga ologa wi ogahipadduwa ofuruliwa onddimuwa. Ofuruliwa oku onddimuwa kwa wakwana opitta ofuruliwa wapadduwa yaka ya Jubileu wa ana Izrayel. Iyene wahileba: “Muya wa Mulugu oddititela. Iyene oddithikithela, oddiruma ddàlaleyele atabuwi mpaganyo onathabiha, ddàvolihe mirima dhosuveya, ddàpange adhari ofuruliwa wawa, afugeliwi otapuliwa wawa.” (Iza. 61:1) Nivuhulo ntti namutonya ani?

8. Nivuhulo ntti na Izaiya mwaha wa ofuruliwa namutonya ani?

⁸ Nivuhulo ntti na makamaka mwaha wa ofuruliwa niromile wakwanihedheya muromeli Yezu mabasaye olaleya. Mudhoweliye mu sinagoga ya Nazareti muthethe wabaliwiye, Yezu wahengesa nivuhulo ntti na Izaiya vari va Ayuda alimo. Yezu wahiloga wi mazu abale amwaddana iyene: “Nabuya oddirumela muya waye, oddithikithela wi ddafiyedhena atabuwi mpaganyo onathabiha. Oddiruma wi ddàlaleyele afungiwi woboleliwa wawa, aliba ohona wiyelela wawa wona. Oddirumela wavuna anpujiwa, olaleya yaka ya nthebwa na Nabuya.” (Lk. 4:16-19) Yezu wakwanihedhi dhavi nivuhulo ntti?

9. Attu a nsaka na Yezu ajeedhela ofuruliwa gani?

⁹ Ninga mwattagile ologa Izaiya vina ninga mwengesile Yezu, attu aromile ofuruliwa obe woboleliwa nsakanene nttile. Yezu wahitapulelamo wi: “Ddabunene mazu a Bíblia ewalinyu, ahireya.” (Lk. 4:21) Attu enjene ewale mazu engesile Yezu, anjeedhela wi agahifuruliwa mmadani mwa olamulela wa Roma. Txino awene obuwela ninga alobwana  dhahi eeli alogile: “Iyo nanroromela wi iyene ddinobole nlogo na Izrayel.” (Lk. 24:13, 21) Mbwenye iyo ninoziwa wi Yezu wahawaddela anamafwara aye wila anasadduwele olamulela wa Roma. Ottiya ejo, iyene wahisunziha wi “mumvahe Sésari dhili dha Sésari.” (Mt. 22:21) Koddi Yezu wafurulile dhavi attu a nsaka nttile?

10. Yezu ofugulile dila gani wi attu afuruliwe?

¹⁰ Mwana Mulugu odhele wakamihedha attu ofuruliwa, mwa mikalelo minli. Woroma, Yezu ofugula dila wi attu afuruliwe mwari mwa masunziho onyengetta alabihedha anddimuwa a marelijiau. Ayuda enjene a masaka abale ali adhari a dhilemelelo vina masunziho onyengetta. (Mt. 5:31-37; 15:1-11) Abale afanyeela osunziha nlogo na Mulugu, babuwene akala ninga attu ohona. Sabwa ya omukoodda Mesiya vina okodda ororomela masunziho aye, awene ali ninga attu edda mwiddimani vina muttegani. (Jo. 9:1, 14-16, 35-41) Na masunziho ebaribari vina yotagiha yaye yapama, Yezu wahakamihedha attu oviyeviha ofuruliwa mpaddi womuyani.—Mk. 1:22; 2:23–3:5.

11. Mukalelo wanawili wa ofuruliwa odhilena Yezu buvi?

¹¹ Wanawili, Yezu wahidhana ofuruliwa wi nlogo na attu noboleliwe mudharini mwa yottega. Sabwa ya mukutto wa yobolo operhekele Yezu, Mulugu onolevelela dhottega dha abale antonyihedha nroromelo vina anrumeela mukuttoya. (Aheb. 10:12-18) Yezu wahiloga: “Akala Mwana onowobolani, munokala-wene afuru.” (Jo. 8:36) Ofuruliwa oku onddimuwa-wene opitta okule wakela ana Izrayel vayakani ya Jubileu! Motagiha, Muizrayel wafuruliwa vayakani ya Jubileu agahiyelela okala mudhari wili, vina na sikuna agahifiyedha okwa.

12. Bani aromile wakela ofuruliwa ovuwihile Yezu?

¹² Siku na Pentekoste wa 33 E.C., Yehova wahathikithela na muya wokoddela arumiwi vina alobwana na ayana ororomeleya. Iyene wahawittana ninga anaye wi musogorhomwa avenyihiwe wila adhowe alamulele vamodha na Yezu wirimu. (Rom. 8:2, 15-17) Abale ali attu oroma aakelile ofuruliwa wavuwihile Yezu mu sinagoga ya Nazareti. Alobwana na ayana aba ali mudharini mwa masunziho ottambi vina mweddelo wa asogorheli a marelijiau Ayuda. Vamentoni va Mulugu awene ahifuruliwa mmadani mwa yottega entota okwa. Woboleliwa oku wavahile Yehova, oromile vathikitteliwe  anamafwara a Kristu yaka ya 33 E.C. onagome na olamulela wa Yezu wa Vyaka Txikwi. Dhilobo gani dhapama dhinapadduwe omagomelo wa Vyaka Txikwi?

13-14. Ottiya Akristu ottikitteliwa bahi, bani anakele ofuruliwa ovuwihile Yezu?

¹³ Masaka abano, attu enjene oviyeviha a malogo otene anokosa mpaddi wa mabila “menagu.” (Jo. 10:16) Awene kasakuliwe na Mulugu wi alamulele na Yezu wirimu. Mbwenye akana njedhelo nindela mBibiliani na okalawo na mukalakala velaboni ya vati. Njedhelo nawo ttinttene?

¹⁴ Akala pumwenemo weyo onopurelamo mareliho mena anvahiwa attikitteliwi. Modhela ororomela mukutto wa Yezu, weyo onowodha omukumbirha Yehova wi alevelele dhottega dhawo. Dhawene, onorumeeliwa na Mulugu vina onokaana mubuwelo wotxena vamentoni vaye. (Ef. 1:7; Ovuh. 7:14, 15) Kobuwela vina mareliho aniwena sabwa ya ofuruliwa mwari mwa masunziho awota. Yezu wahiloga: “Munonona ebaribari; ebaribariyá jinaufuruleni.” (Jo. 8:32) Jowagalaliha okana ofuru obu!

15. Ofuruliwa gani onakaanihu vina mareliho gani anjeedhelihu mohigoneela?

¹⁵ Ninojeedhela ofuruliwa onddimuwa onapadduwe. Mohigonela, Yezu onele otolotxa  marelijiau othambi vina olamulela wa attu. Mulugu onele obarela “muthithi munddimuwa” wa attu animulabela, vina onele wareliha na egumi yowagalaliha mparaizu velaboni ya vati. (Ovuh. 7:9, 14) Attu awinjivaya anele oveyihiwa mukwani vina anele ofuruliwa mwa obure wotene ototeyile na dhottega dha Adamu.—Mer. 24:15.

16. Ofuruliwa gani wowagalaliha onjedhela nlogo na attu?

¹⁶ Mwari mwa Vyaka Txikwi, Yezu na abale analamulele na iyene anele okamihedha nlogo na attu okana egumi vina mandano owakwana na Mulugu. Nsaka ntho na ovenyihedhiwa vina ofuruliwa ninele oladdana na Jubileu wa ana Izrayel. Eji entapulela wi abale otene aneddeyana na Yehova anele okala owakwana vina kanakaane yothega.

17. Txini enloga Izaiya 65:21-23 mwaha wa esile dhinapadduwe na nlogo na Mulugu musogorho? (Koona foto ya kapa.)

¹⁷ Nivuhulo na Izaiya 65:21-23 ninowoniha mukalelo onakale egumi velaboni ya vati musogorho. (Kengesa.) Egumi yehu kinakale yorutxa. Ottiya ejo, Bibilia onowoniha wi nlogo na Mulugu ninelege okosa mabasa ozivela. Nikuluvele wi omagomo wa Vyaka Txikwi, dhopaddutxiwa dhinele “ovuniwa mmadani modhari ontolotxa, dhidhé ojavo ofuru, nthithimiho ninakele ana Mulugu.”—Rom. 8:21.

18. Ninfwanyelela nni okana ebaribari wi musogorho ninele wagalala?

¹⁸ Yehova wahikosa masasanyedho wi ana Izrayel apimelele mudhidhi wolaba na wovuma, nona iyene onfuna wi mwari mwa Vyaka Txikwi nlogo naye nikaanevi opimelela wakakene. Txibarene obo onakale mudhidhi wofwaseyela mabasa omuyani. Omwebedha Mulugu ttarho yokana wagalala masaka abano, nona mwilaboni eswa ninelege ozuzumela okosa yakene. Kavali waganyedha, wi attu otene ororomeleya anele wagalala sabwa ya okana mabasa vina omulabela Mulugu mwari mwa Vyaka Txikwi.