Yehova wahawaddela ana Izrayel wi akale attu okoddela. Vasogorhova wahakokomeza mazu aba: “Kamutotele makani mmulogoni mwenyu na dhothambi, Kamwandanele omwirela mukwinyu yawopiha. Miyo ddili Nabuya [Yehova].”—Onam. 19:2, 16.

Mazu aba ‘kumwaddamele’ attukuliwe dhahene ninga mulebeliwani na Hebraiko, mbwenye antapulela eni? Nivuru dhahi na Ayuda nilogaga sabwa ya mazu aba anfwanyeya va Onamakutha ninloga dhahi: “Mazu anfwanyeya versu eji . . . anorutxa vaddiddi otapulelamowa, sabwani na elogelo ya Ebraiko mazu [aba antapulela] ‘okala vakukuvi, vakukuvi, vakukuvi.’”

Anamasunza ena anologa wi mazu aba anoluddeleleya na mazu aba oroma anloga: ‘Mugattongaga miladdu fwaragani mudilanimwa kamunluluvihedhe muyelegi mmuladduni mwaye. Kamupibe muladdu wa fumu, mwamuttongaga muttu kamwang’ane mukalelo waye.’ (Onam. 19:15) Nona nlamulo ninfwanyeya versu 16 ninloga wi ‘kumwaddamele mukwawo omwirela yabure,’ natapulela wi ana Izrayel kafwanyela okosa elobo txilobo yohiligana agattongaga miladdu, agakala mmarhonddani, obe mwari mwa anamudhi. Vina kafwanyela okosa elobo yohiroromeleya wila aranjulena. Eji enonisunziha wi kaninfwanyela okosa dhilobodhene esi. Mbwenye okalawo mukalelo mwina wa ononelamo pama mazu anfwanyeya versu 16.

Karoma otanalela mazu oroma a versu eji. Nlamulo na Mulugu naloga wi nlogo kanafwanyela ogilatela ovuwiha dhottambi. Ebaribari wi okala kanlupiwa elo onotatamula makani. (Gano 10:19; Koh. 10:12-14; 1 Tim. 5:11-15; Tia. 3:6) Mbwenye muttu oli muttambi dhinlogiye dhinotatamula makani ottabwa, iyene onotadela dhottambi dhaye na efunelo ya omputtula muttu mwina. Onovaha onamoona wohifwanyelela vina dhologa dhaye dhinodhaga omutotela muttuya opiwa. Kobuwela wi attambi ahimmagedha Naboti muladdu amutotelaga opiwa aponyedhiwaga malugu. (1 Amwe. 21:8-13) Muttambi onomwaddale muttu wi omwirela yabure, dhahene ninga mulogiwani epaddi yanawili ya nivuru na Onamakutha 19:16.

Ottiya ejo muttu w’ottambi onomuzivalela muttu mwina modhela omwidda. Va 1 Joau 3:15, ninengesavo dhahi: ‘Muttu ddi muttu onimwidda mukwaye onkala panga nyuwo muziwa wi namapa kaneddana egumi yohimala.’ Mazu aba alogile Yehova wi kammwaddamele mukwinyu wila mmukosena yawopiha, anfuna eloge wi: ‘Kaninfwanyela omukoyela mbalihu ntxiga mmirimani.’—Onam. 19:17.

Ebaribari wi mazu anfwanyeya va Onamakutha 19:16 anowavaha Akristu nlago namaka-maka vaddiddi. Ninofwanyela orabela mubuwelo wohikala vina nihazivalelege attu. Iyo nigamwaddamela muttu wi ‘nimukosele yawopiha’ obe nigamuzivalela mwaha wa iyo ohiziveliwa na muttuya obe omukanela aje, eji txibarene enoniha wi ninomwidda muttuya. Nona Akristu anofwanyela orabela okosa ejene.—Mt. 12:36, 37.