1. Dhilobo gani dhapama dhiwodheyile na nikamihedho na yobolo?

MUKUTTO wa yobolo wa Yezu Kristu ohiwodhiha wi nakele mareliho menjene. Motagiha, onowodha wafugulela musuwo ana enjene a Adamu ankwela oderetu wi siku nimodha akaane gari yokosa epaddi ya murala wa Mulugu. Marelihoya mena bowila ninojedhela okana egumi ya mukalakala nosanzaya. Ottiya eji, yobolo enowiwanana na makani atatamuliwe wirimu mpaka ofiyedha vati-apano.​—Ahebreu 1:8, 9.

2. (a) Makani gani amakamaka alogile Yezu munlobeloni? (Koona foto eli omaromo.) (b) Mutoma obu onanisunzihe eni?

² Vyaka biili Yezu ahinatti okwa, wahasunziha anamafara aye wi alobelege: “Baba wehu muli odhulu, nzina nenyu nithithimihiwe. Omwene wenyu odhele iyo. Ofuna wenyu okosiwege vati apano ninga odhulu.” (Mateu 6:9, 10) Ndoweni nitanalele wiwanana olivo wa yobolo na ottittimihiwa nzina na Yehova, olamulela wa Omwene wa Mulugu vina okosiwa yofuna yaye.

3. Nzina na Yehova nintapulela eni? Satana osadduweli dhavi nzina na Yehova?

³ Vamaromo-vene, Yezu wahilobela wila nzina na Yehova nttittimihiwe, obe nrihiwege. Nzina na Yehova nintapulela ejile eliye mwinyene. Ddi iyene yeka oli waguru vina woligana orugunuwa elabo yotene. Noona Yezu wahimukuwela Yehova ninga “Baba wokoddela.” (Joau 17:11) Sabwa yawi Yehova ddokoddela, dhetene dhittanddiliye vamodha na malamuloya bokoddela. Mbwenye mu Edeni, Satana na osaringele waye osadduwela nlamulelo na Mulugu na nlogo na attu. Omuzivalela Yehova vina osadduwela nzina na bili ya Mulugu.​—Wita 3:1-5.

4. Yezu olagihile dhavi oriha nzina na Yehova?

⁴ Txibarene Yezu wankwela nzina na Yehova, nanda wankosa guru dhili dhotene wi attittimihe. (Joau 17:25, 26) Na mukalelo gani? Na masunziho aye, Yezu ohakamihedha attu eena ononelamo wi malamulo a Mulugu bamakamaka vina ba oderetu wehu. (Kengesa Masalmo 40:9-11.) Masiki Satana vakosiye guru wi Yezu atabutxiwe vina apiwe na matabuwo, Yezu wannimuroromelavi Yehova. Iyene wahilagiha wila enowodheya muttu woligana omuroromela Yehova kakamwe.

5. Ninalagihe dhavi wila ninoriha nzina na Yehova?

⁵ Ninalagihe dhavi wila ninoriha nzina na Yehova? Modheela yeddelo yehu. Yehova onfuna wila nikale okoddela murima. (Kengesa 1 Pedro 1:15, 16.) Ejo entapulela omwebedha vina omuttittimiha iyenevi na murima wotene. Nigafarafariwaga, nikose guru wi needde nifaraga dila dhinnisunziha Yehova. Nigeeddiha egumi yehu mowiwanana na malago a Yehova, ninolagiha nttittimiho vina oriha nzina naye. (Mateu 5:14-16) Ninolagiha viina wila malamulo aye bapama nanda Satana munyengetti. Vowi kanili attu oligana, dila dhinjene ninokosaga dhilobo dhovirigana. Mbwenye nigavonya ninofanyeela otxinuwa, vina nikose guru wila nihiyelele dhottega dhintakaliha nzina na Yehova.​—Masalmo 79:9.

6. Sabwaya jani Yehova aganonaga na oderetu masiki nigaali attegi?

⁶ Masiki akala nili attikitteliwi, obe mabila “menagu,” Yehova onele olevelela dhottega dhehu nigaroromela mukutto wa yobolo. Abale ansakula na murima wawa omwebedha Mulugu, iyene onowarumela okosa epaddi ya murala waye. Yehova onowakuwela abale ottikitteliwa ninga anaye, nanda abale ali mabila “menagu” ninga akwaye. (Joau 10:16; Roma 5:1, 2; Tiago 2:21-25) Yobolo enonivaha gari ya omwebedha, okaana mandano ofiyedhana na Babi wehu vina ottittimiha nzina naye.

7. Mareliho gani awodheyile na nikamihedho na yobolo?

⁷ Mu nlobeloni nakakene, Yezu ologa: “Omwene wenyu odhele iyo.” Yobolo eniwanana dhavi na Omwene wa Mulugu? Omwene wa Mulugu, nlamulelo ninsogorheliwa na Yezu vamodha na attu 144.000 asakuliwe velaboni ya vati. Na mukutto wa yobolo ehiwodheya wila attu aba avenyihiwe mu okwani wi adhowe wirimu. (Ovuhulela 5:9, 10; 14:1) Awene anele okala amwene vina anamakutta nanda anele olamulela elabo ya vati na Yezu mwari mwa vyaka txikwi. Nsaka-ntto, Yehova onele olabihedha Omwene wi asaddulena elabo ya vati wi  ekale paraizu vina akamihedhe attu etene okala oligana. Omamalelowa, emeleli etene a Yehova wirimu na velaboni ya vati, anele okosa epaddi ya murala mmodha bahi wa Yehova. (Ovuhulela 5:13; 20:6) Yezu onele omutolotxa Satana vina ogomiha makattamiho etene antotiye.​—Wita 3:15.

8. (a) Yezu wakamihedhile dhavi anamafara aye ononelamo wila Omwene wa Mulugu kwa makamaka? (b) Ninawodhe dhavi okamihedha Omwene nsaka nttino?

⁸ Yezu wahakamihedha anamasunza aye ononelamo wila Omwene wa Mulugu kwa makamaka. Na mukalelo gani? Mmaleliye obatiziwa, mohigonela iyene oroma olaleya “Muthaka wapama” wa Omwene wa Mulugu mimburo dhetene. (Luka 4:43) Wahawaddela anamafara aye wila anvuwihe “mwilaboni mwetemwene, ofiyedha okomoniwá.” (Merelo 1:6-8) Masaka abano, mabasa a olaleya Omwene ankosiwa, anowavaha attu gari ya osunza ejile entapulela yobolo, enaya anorumeela Omwene wa Mulugu. Ninolagiha wila ninowiwelela Omwene modheela ovivelela wi nilaleye muttaka wapama onkosiwa orugunuwa elabo yotene.​—Mateu 24:14; 25:40.

9. Ninkaana dhavi ebaribari yawi Yehova onele wakwaniha dholibela dhaye na nlogo na attu?

⁹ Yezu wafuna atapulele eni valogiye wi “Ofuna wenyu okosiwege”? Yehova agaloga wila elobo eji epadduwe, ejo enopadduwa wene. (Izaiya 55:11) Yehova txipo kondeyile guru sabwa ya osadduwela wa Satana. Efunelo ya Yehova na elabo ya vati yali evi? Yehova wafuna wila Adamu na Eva abaale ana oligana vina adhale velaboni ya vati. (Wita 1:28) Kowiliwa Adamu na Eva ahikwa ahinatti wabala aima, efunelo ya Mulugu ya winjivana mwilaboni ana a Adamu kigadhile wakwanihedheya. Noona Yehova wahattiya wila abale aima. Noona mukutto wa yobolo onowavaha etene ana nroromelo gari ya okala oligana musogorho, vina okalawo na mukalakala. Yehova onowakwela attu etene, noona onofuna wila nikalegewo na egumi yohagalala ninga mwafuneliye omaromo.

10. Abale akwile ampurelamo dhavi yobolo?

¹⁰ Koddi txini enapadduwele attu matxikwi menjene akwile ahinatti wiwa miselu dha Yehova? Yehova onofuna wila attu akalegewo. Nona onele wawiyihedha egumi attu etene akwile wi akalewo wili. Sabwa ya yobolo, enele owodheya attu etene akwile wiyihedhiwa wili egumi yawa. Awene anele okaana gari ya osunza sabwa ya Yehova wi akalewo na mukalakala. (Merelo 24:15) Yehova ddi nipara na egumi. Yehova agawiyihedha wili egumi abale akwile, iyene onele okala Babi wawa. (Masalmo 36:9) Noona mu nlobeloni Yezu ologa: “Baba wehu muli odhulu.” (Mateu 6:9) Yehova onvaha Yezu mabasa amakamaka a okosa, wavenyiha mu okwani abale akwile. Yezu ologa: “Miyo ddili onvenyiha mukwani, ddili egumi.”​—Joau 6:40, 44; 11:25.

11. Efunelo ya Mulugu na muttitti munddimuwa jivi?

¹¹ Yezu ologa: “Onvirihamo enimfunana Mulugu, oddo ddi mbalaga, ddi murogoraga, ddi mma.” (Marko 3:35) Mulugu onfuna wila attu a malogo, mahimo na dhilogelo dhottiyana amwebedhege iyene. Attuya abo anologiwa ninga “muthithi munddimuwa wa athu ohelegeya.” Awene ahiroromela mukutto wa yobolo nanda  ahikosa guru ya omuttittimiha Mulugu. Awene anomuttittimiha iyene nanda anologa: “Mperhe bwa Mulugu wehu, ogilatile vampaddoni, vina bwa Mwana-Nibila.”​—Ovuhulela 7:9, 10.

12. Nlobelo na Yezu ninnisunziha eni sabwa ya efunelo ya Mulugu na nlogo na attu?

¹² Mu nlobeloni ninisunzihile Yesu, iyo nihisunza vaddiddi sabwa ya Yehova, vina ejile enfuniye na nlogo na attu. Elobo yoroma esunzile iyo jawila ninofanyela ottittimiha nzina na Yehova vina omuriha iyenene. (Izaiya 8:13) Mukutto wa yobolo okosile Yezu, onivaha gari ya oviluwa vina oriha nzina na Yehova. Txibarene nzina na Yezu nintapulela ‘Yehova ddi Nvuni.’ Yanawili, jawila Yehova onele olabihedha Omwene wi arurihe attu ororomela. Yanoraru, nisunza wila kuli elobo yina egawodhile ogomiha efunelo ya Yehova.​—Masalmo 135:6; Izaiya 46:9, 10.

13. Muttu onfanyeelela eni obatiziwa?

¹³ Ttarho yina enlagiha wila ninotamaalela yobolo, ku omperhekela Yehova egumi yehu nanda nibatiziwa. Na ttarho ejo, iyo ninolagiha wila txibarene ninororomela yobolo vina wila “ninomukalelawo Nabuya.” (Roma 14:8) Nigabatiziwa, ninomuloba Yehova wi anivahe “murima womyala.” (1 Pedro 3:21) Yehova onowakula malobeloya alabihedhaga dhopurelamo dhindha na mukutto wa yobolo. Vina nikaana ebaribari yawi onele onivaha dhetene dhinnifuniyena.​—Roma 8:32.

14. Yehova onnikokomezela eni wila nakwelege attu eena?

¹⁴ Yehova ohikosa dhilobo dhetene sabwa ya okwela waye. Onfuna wila abale etene animwebedha amutagihe vina àkwelege akwawa. (1 Joau 4:8-11) Nigalagiha okwela, ninotonyihedha wila nili ana a Babihu “wodhulu.” (Mateu 5:43-48) Malamulo meeli manddimuwa anloga wi, voroma nimukwele Yehova, vanawili, nakwela attu eena. (Mateu 22:37-40) Mukalelo mmodha wolagiha wila ninowakwela attu eena bwa wasunziha miselu dhapama dha Omwene wa Mulugu. Nigewelela nlamulo na Mulugu na wakwela  attu eena makamaka abali ehu, “ninowoneyana okwela waye wawakwana.”​—1 Joau 4:12, 20.

15. (a) Mareliho gani akelilehu wa Yehova? (b) Mareliho gani anakele iyo musogorho?

¹⁵ Yehova onologa wila nigaroromela yobolo, ononilevelela ‘dhothega dhehu.’ Onele ofudha kakamwe dhottegadha dhehu. (Kengesa Merelo 3:19-21.) Ninga musunzele iyo omaromo, yobolo ehidhana gari ya osakuliwa attu velaboni ya vati wi akale ana aye wirimu. Awene attikitteliwi. (Roma 8:15-17) Awene anowoba mabila “menagu” wi akose epaddi ya murala wa Yehova velaboni ya vati. Awene agamala okala attu oligana, anele wehiwa dila yomariha. Agamwiwelela Yehova, anele osakuliwa ninga ana a Mulugu. (Roma 8:20, 21; Ovuhulela 20:7-9) Yehova onele wakwela anaye na mukalakala. Yobolo enelege odhowavi bigavaha mareliho na mukalakala. (Ahebreu 9:12) Yehova onivaha nvaho obo wa ttima vaddiddi, nanda kavo onawodhe onakiya.

16. Yobolo ennikamihedha dhavi okaana ofuru?

¹⁶ Nigatxinuwa na dhottega dhehu, kavali elobo yina enakose Ddiabo wi anittiyihe okosa epaddi ya murala wa Yehova. Yezu okwile ‘dila modha mwa dhetene.’ Yobolo epitxiwa kakamwe. (Ahebreu 9:24-26) Adamu oniraviha okwa, mbwenye mukutto wa Yezu onele onivaha egumi ya mukalakala. Yobolo enowodha onifurula mwilaboni ya Satana vina wova okwa.​—Ahebreu 2:14, 15.

17. Okwela wa Yehova ontapulela eni mwa weyo?

¹⁷ Dholibela dha Yehova dhinele wakwanihedheya. Ninga munkoddela Yehova osaddula malamulo elabo, txipo kanasaddule dholibela dhaye. Iyene txipo kananinyimule. (Malakiya 3:6) Ottiya egumivi, Yehova onivaha dhilobo dhinjene. Ontonyihedha onikwela waye. “Iyo nihona, nirumela okwela onnikwelana Mulugu. Mulugu ddi okwela.” (1 Joau 4:16) Dholibela dhaye dhetene sebaribari. Musogorhomwa elabo yotene ya vati enele okala paraizu wokoddela. Attu etene anela okalawo amutagihaga Yehova, vina anele wakwela attu eena. Nomala, emeleli etene ali wirimu na velaboni ya vati enele ologa: “Matamalo, nthithimiho, ononelamo, otamalela, nriho, owodha, guru sa Mulugu wehu okala n’okala-wene. Amen.”​—Ovuhulela 7:12.