1, 2. (a) Anamoona a Yehova attiyanile dhavi na marelijiau meena? (b) Mutoma obu vina ondawo onanisunzihe eni?

ATTU enjene anowavuza Anamoona a Yehova eraga: “Musogorheli wenyu bani?” Awene anokosa nivuzo ntti sabwani anowona marelijiau menjene asogorheliwaga na alobwana obe ayana. Ninoziveliwa ologa wila Musogorheli wehu kahiyo muttu wohiligana womaningoni. Txibarene, Musogorheli wehu ddi Yezu Kristu! Iyene onomwiwelela kakamwe Babi waye oli Musogorheli, Yehova.​—Mateu 23:10.

² Nihikalawo vina nikuru na alobwana ninromoliwa “mwimeleli wororomeleya, wamalago,” ninsogorhela nlogo na Mulugu velaboni ya vati ovanene. (Mateu 24:45) Kito ninziwa dhavi wila onnisogorhela ddi Yehova modheela Mwanaye? Ninele woona ttarho ttaru dhinlagiha mukalelo onedda dhilobodha. Masiki niziwaga wila Yehova onowalabihedha alobwana ang’onovi wila asogorhele nlogo naye, ttarho eso dhinele onooniha kakamwe wi ddi Yehova Onsogorhela nlogona.​—Izaiya 58:11.

3. Mizé wakelile guru gani wila asogorhele nlogo na Izrayel?

³ Muya wokoddela wahavaha guru emeleli a Mulugu.  Mulugu wahimusakula Mizé wi akale musogorheli wa ana Izrayel. Txini emukamihedhile opuliha mabasa aba amakamaka? Yehova wahinvaha Mizé “muya waye wokoddela.” (Kengesa Izaiya 63:11-14.) Mwa venevo ninowona wila wali Yehova wasogorhela nlogo naye, sabwani muya waye wannimukamihedha Mizé.

4. Txini enlagiha wila Mizé wahakela muya wa Mulugu? (Koona foto eli omaromo.)

⁴ Koddi nlogo nannimoona Mizé wila wahakela muya wa Mulugu? Txibarene! Muya wa Mulugu wahinvaha Mizé ewodhelo y’okosa matikiniho attittimihile nzina na Mulugu vamentoni va Faraó mwene wa Ejipitu. (Obudduwa 7:1-3) Muya wokoddela wakakene omukamihedha Mizé okala musogorheli wokwela vina wokurumuwa. Iyene wali wottiyana vaddiddi na asogorheli a malogo meena! (Obudduwa 5:2, 6-9) Txibarene ddi Yehova wamusakulile Mizé wi akale musogorheli wa nlogo Naye.

5. Bani mwina wakelile muya wa Yehova wi asogorhele nlogo naye?

⁵ Mwinaya bani wakelile muya wa Yehova wi asogorhele nlogo naye? Bibilia onloga: “Apa Josuwé mwana Nun, wamala odhala muya wononelamo.” (Olibiha 34:9) “Apa Muya wa Nabuya omutitela Jedeau.” (Anamathonga 6:34) Vina “Muya wa Nabuya okala na David.” (1 Samuwel 16:13) Alobwana aba etene ahakela muya wa Mulugu wi akose dhilobo dhahawodhani okosa na guru dhawa. (Josuwé 11:16, 17; Anamathonga 7:7, 22; 1 Samuwel 17:37, 50) Txibarene, wali Yehova wavaha guru esi wi awodhe okosa dhilobo dhinddimuwa, noona ninofanyeela omutamaala.

6. Yehova wafunelani wila nlogo narihege asogorheli a Izrayel?

⁶ Txini ekosile ana Izrayel monelani wila muya wa Mulugu wahinvaha guru Mizé, Josuwé, Jedeau na David? Awene ahilagiha nriho. Nlogo varomilani omusadduwela Mizé, Yehova wahiloga dhahi: “Nlogo-nthi ninatxelele lini oddisadduwela, oku nonaga matikiniho aniremi vari vawa?” (Olebeliwa 14:2, 11) Txibarene, Yehova wahasakula alobwana aba wi asogorhele nlogo naye. Vewelelani malago aye, awene anlagiha wila Yehova wali Musogorheli wawa.

7. Angelo amukamihedhile dhavi Mizé?

⁷ Angelo ahakamihedha emeleli a Mulugu. (Kengesa Ahebreu 1:7, 14.) Mulugu ohalabihedha angelo wi amusogorhele Mizé. Voroma, mungelo mmodha “omoneyele mu nikupunimwá” omuttoma wi afurule nlogo na Izrayel nanda asogorhele. (Merelo 7:35) Vanawili, Mulugu ohalabihedha angelo wi anvahe Mizé Malamulo na malago a waweddiha ana Izrayel. (Galásia 3:19) Vanoraru, Yehova ologa na iyene: “Ovano wathukule athu, odhowena mburo onawaddelimi. [Woone!] Anju waga onoutonyihedha  dila.” (Obudduwa 32:34) Bibilia kanloga wila ana Izrayel annawona angelo akosaga mabasa ninga aba. Sabwa ya malago eddihana Mizé nlogo nttile, yanlagiha wila wankamihedhiwa na angelo.

8. Angelo amukamihedhile dhavi Josuwé na Ezekiya?

⁸ Bani mwina wakamihedhiwe na angelo? Bibilia onloga wila “munddimuwa wa nikuru na anyakoddo a Nabuya,” wali mungelo wahidha omukamihedha Josuwé adhowaga oraba koddo na akadda Kaná. (Josuwé 5:13-15; 6:2, 21) Musogorho-mwa Mwene Ezekiya asogorhelaga nlogo na Mulugu, muttitti wa anyakoddo o Asíria ahidha wi atolotxe kwatti ya Jeruzalemi. Omattiyu-wene obule, “anju wa Nabuya odhowa vasanjarha va anyakoddo akadda Asíria, oapavo athu 185.000.”​—2 Amwene 19:35.

9. Masiki asogorheli valani attu ottega, txini yajedhiwa wila ana Izrayeli akose?

⁹ Angelo boligana. Mbwenye attu anakamihedhani kahiyo oligana. Motagiha, dila modha Mizé wahidduwala omuttittimiha Yehova. (Olebeliwa 20:12) Josuwé wahidduwala onvuza Yehova yafanyeliye okosa mudhidhi wadhile akadda Gabaón wi akose nipagano na awene. (Josuwé 9:14, 15) Mudhidhi mwina Ezekiya wahiroma ovittittimiha. (2 Mapadduwo 32:25, 26) Masiki attu aba valani ohiligana, yanjedhiwa yawi ana Izrayel arumele osogorheliwa na alobwana aba. Ana Izrayel ahoona dila dhinjene wila Yehova wannalabihedha angelo wi akamihedhe asogorheli awa. Txibarene Yehova wela osogorhela nlogo naye.

10. Mizé weddihiwe dhavi na Nlamulo na Mulugu?

¹⁰ Nzu na Mulugu nihaweddiha emeleli a Mulugu. Bibilia onotonya malamulo avahiwe ana Izrayel ninga adhela “mmalamuloni a Mizé.” (1 Amwene 2:3) Bibilia onowooniha kakamwe wila wali Yehova wavaha ana Izrayel malamuloyá. Mbwenye Mizé wela ovirihamo bahi. (2 Mapadduwo 34:14) Motagiha, mumalele Yehova omwaddela Mizé mukalelo wafunani omaga musasa, “Mizé ohira dhetene dhamurumile Nabuya.” Iyene ovirihamo.​—Obudduwa 40:1-16.

11, 12. (a) Txini yajedhiwa wila Josuwé na amwene eena a Izrayel akose? (b) Mazu a Mulugu akamihedhi dhavi abale asogorhela nlogo?

¹¹ Nsaka nittomiwe Josuwé ninga musogorheli wa nlogo, iyene wahikana Nzu na Mulugu, nanda Yehova wahiloga: “Mazu otene a nivuru nthi na malamulo aba, kumàlihege mwano mwawo, otakunelege mmurimani mwawo mutana na mathiyu.” (Josuwé 1:8) Amwene eena adhile olamulela nlogo na Mulugu, anfanyela wengesa Nlamulo siku-siku, oleba na ovirihamo “magano otene anrumiwamo.”​—Kengesa Olibiha 17:18-20.

¹² Nzu na Mulugu naweddihile dhavi alobwana adhile olamulela nlogo? Ndoweni nimubuwele Mwene Josiya. Mumaleli ofanyiwa nivuru na Nlamulo na Mizé, namaleba wa mwene Josiya omwengesela. * “Mwene Josiya, mwiweliye mazu a munivuruni na malamulo a Nabuya, otaya guwo dhabalileye.” Mazu a Mulugu ahimukosiha Josiya watolotxa amulugu etene osemiwa nanda wahikosa masasanyedho wi ajiwe Paskwa munddimuwa. (2 Amwene 22:11; 23:1-23) Sabwa yawi Josiya vamodha na asogorheli eena anfara Mazu a Mulugu, awene ali omala na wale wi akose masasanyedho a  weeddihana nlogo. Masasanyedho abo ahikamihedha nlogo omwiwelela Mulugu.

13. Ottiyana gani waliwo wa asogorheli a nlogo na Mulugu na amalabo?

¹³ Asogorheli a malogo mena eddihiwa na dhubuwelo dha attu. Motagiha, asogorheli a akadda Kanaá vamodha na nlogona ankosa dhilobo dhonyakuwa, ninga ogonihana wa muttu na murogoriye, ogonihana attu a vyano dholigana, wapa aima wi akose mukutto vina wawebedha amulugu osemiwa. (Onamakutha 18:6, 21-25) Yakakene, asogorheli akadda Babilónia vina Ejipitu, kaana malamulo okoddela ninga aba ana nlogo na Mulugu. (Olebeliwa 19:13) Masiki dhawene, nlogo na Mulugu, nannona mweddihedho weddiha asogorheli awa ororomela, alibihaga nlogo wi nilibihe webedha webaribari, oyesa womaningoni vina akosege matelo orihiwa. Txibarene ddi Yehova wasogorhela awene.

14. Yehova wasaddeyela eni asogorheli eena a nlogo naye?

¹⁴ Kahiyo asogorheli etene a nlogo na Mulugu avirihamo malamuloyá. Asogorheli abo ahaana nroromelo, annkodda omwiwelela Mulugu, na malamulo aye otene, annkodda okamihedhiwa na muya wokoddela, angelo vina Nzu naye. Dila dhina, Yehova wanasaddeya obe watxinja asogorheliya. (1 Samuwel 13:13, 14) Noona musogorhomwa, Yehova omuttoma muttu agadhile okala musogorheli woligana.

15. (a) Anamavuhulela atonyihedhi dhavi wila wandha musogorheli woligana? (b) Musogorheliya oddo woligana wali ani?

¹⁵ Mwa vyaka dhinjene, Yehova wahilibela omuttoma muttu woligana agadhile osogorhela nlogo naye. Motagiha Mizé wahawaddela ana Izrayel: “Nabuya Mulugu wenyu ousakulelani namavuhulela onligana na miyo. Nyuwoyá mumvuruwanege iyene.” (Olibiha 18:15) Izaiya wahiloga wila Muttu agadhile agaali “mwene, namathonga wa nlogo.” (Izaiya 55:4) Daniyel wahileba sabwa ya Mesiya wila agahidha “Murumiwi othomiwe.” (Daniyel 9:25) Musogorhomwa Yezu Kristu wahivilagiha ninga “Musogorheli” wa nlogo na Mulugu. (Kengesa Mateu 23:10.) Anamafara a Yezu n’ohagalala aninfara, nanda anrumela wila iyene wasakuliwe na Yehova. (Joau 6:68, 69) Txini yakosiha orumela wila Yezu Kristu wasakuliwe na Yehova wila akale musogorheli wa nlogo naye?

16. Txini yalagiha wila Yezu wahilibihiwa na muya wokoddela?

¹⁶ Muya wokoddela omulibiha Yezu. Mumaleliye obatiziwa, Joau ohona “erimu jifuguwile, ohona muya Wawingoo ammothelaga Yezu n’ekalelo ya kangayiwa.” Nomala, “Muya wokoddela omuthukulela Yezu mwiddeddereni.” (Marko 1:10-12) Mudhidhi wa mabasa olaleya a Yezu velaboni ya vati, muya wokoddela onvaha guru ya osunziha vina okosa matikiniho. (Merelo 10:38) Mowenjedhedha, muya wokoddela omukamihedha Yezu olagiha mikalelo  dhottiyana, ninga okwela, ohagalala na nroromelo noliba. (Joau 15:9; Ahebreu 12:2) Kawo musogorheli mwina olagihile okaana muya wokoddela ninga iyene. Txibarene, Yehova wahimusakula Yezu wi akale Musogorheli.

17. Txini ekosile angelo wila amukamihedhe Yezu?

¹⁷ Angelo amukamihedha Yezu. Mmaleli Yezu obatiziwa, “anju a Mulugu adha omwimelela.” (Mateu 4:11) Mudhidhi mung’onovi ahinatti okwa, “othwanyuweliwa anju odhile wirimu, wi ampangaraze.” (Luka 22:43) Yezu wanziwa wila Yehova agahimuruma mungelo waye wi ampangarhaze mudhidhi worutxa.​—Mateu 26:53.

18, 19. Nzu na Mulugu nimweddihile dhavi Yezu mwigumini vina mmasunzihoni aye?

¹⁸ Yezu oheddihiwa na Mazu a Mulugu. Ovenyana omaromo wa mabasa aye olaleya mpaka mudhidhi okwiliye va pingirizini, iyene wahirumela weddihiwa kakamwe na malebo. Masiki ohalaga mudhidhi mung’onovi wila akwe, wanniviloga ninga Mesiya wa mmavuhuloni. (Mateu 4:4; 27:46; Luka 23:46) Mbwenye asogorheli a marelijiau, a nsaka nttile, aali ottiyana vaddiddi na Yezu. Awene ahisakula opwaza Mazu a Mulugu, vina karumela masunziho aye. Yezu wahiloga Mazu a Mulugu mudhidhi walogiye nawene: “Nlogo naga-nthi ninddithithimiha na mulomo bahi, oku murima wawa olapelanaga na miyo. Oddebedha wawa kuna mabasa, vowi ansunziha meddelo a athu bahi.” (Mateu 15:7-9) Yehova txipo kagattiyile nlogo naye osogorheliwa n’attu ankodda ofara Mazu aye.

¹⁹ Yezu wanlabihedha Mazu a Mulugu wi asunzihe attu eena. Asogorheli a marelijiau  mwaromelani ompambiha, iyene kalabihedhi enonelo yaye y’omunya wi awakule. Ottiya eji, wanasunziha attu alabihedhaga Malebo. (Mateu 22:33-40) Obe, Yezu katameli watikiniha attu na dhologa gwé dha mwigumini mwaye bali wirimu, obe mudhidhi wattanddiwa elabo. Mbwenye sabwa yawi wankwela vaddiddi Mazu a Mulugu, wanziveliwa vaddiddi ologa dha mmalebonimwa na attu eena nanda wantapulela mazu a “Malebo Okoddela.”​—Luka 24:32, 45.

20. (a) Yezu omurihile dhavi Yehova? (b) Yezu wattiyanile dhavi na Herodi Agripa I?

²⁰ Masiki anamewa vatikinani mulogelo waye, nttittimiho notene wamuttiyedha Namasunziha waye, Yehova. (Luka 4:22) Mulobwana dhahi worela, vafuniye omuttittimiha Yezu amukuwelaga “Namasunziha wapama,” n’oviyeviha omwakula “Onddiromolela nni wapama? Wapama ddi Mulugu bahi, kawo mwina.” (Marko 10:17, 18) Nomala, Herodi Agripa I oroma olamulela mu Judá vyaka tanu na ttaru musogorhomwa, nanda iyene wahittiyana vaddiddi na Yezu. Siku dhahi, Herodi ohabalela dh’omwene, ogilati va mpaddoni vaye, oroma ologa banja. Àlivo amobela mada akuwaga: “Ologa oko kwa Mulugu-wene, kaiye wa muthu!” Herodi wafuna attittimihiwe iyene. Mbwenye txini yampadduweli? ‘Momaguva-mwene, mungelo wa Yehova omugwihedha ntowa, sabwa yokodda omuttittimiha Mulugu, Herodi ojiwa mitipa, okwa.’ (Merelo 12:21-23) Yehova kamusakulile Herodi wila akale musogorheli. Mbwenye Yezu wanlagiha wila wasakuliwe na Yehova, nanda mudhidhi wotene wannimuttittimiha Yehova ninga Musogorheli Munddimuwa wa nlogo naye.

21. Mutoma ondawo onanisunzihe eni?

²¹ Yehova wafuna wila Yezu alamulele ottiya mudhidhi mung’onovi. Mumaleliye ovenyihiwa mu okwani, Yezu wahawaddela anafara aye: “Miyo ddivahiwa owodha wa elabo ya wirimu na ya vati.” Odhowanavi: “Onani! Miyo ddili na nyuwo masiku otene ofiyedha omagomelo wa elabo.” (Mateu 28:18-20) Yezu onwodha dhavi osogorhela nlogo na Mulugu vati-apano iyene bali wirimu? Yehova agamusakulile ani wi amwimelele Yezu vati-apano? Akristu anwodha dhavi wazinddiyela abale animelela nlogo na Yehova? Mutoma ondawo onele wakula mavuzo aba.