1, 2. Mudhoweli Yezu wirimu arumiwi aye aganyedha eni?

ARUMIWI a Yezu aali Vamwangoni wa Olivera bagamoona namasunziha vina mukwawa Yezu bagawela wirimu, mpaka okuneleya na murabo. (Merelo 1:9, 10) Iyene ohimala vyaka bili bali na awene asunzihaga, alibihaga, vina asogorhelaga. Mbwenye ovano iyene onodhowa. Koddi txini egakosilani?

² Mudhidhi mung’onovi ahinatti owela wirimu, wahiloga na anamafara aye: “Munere oziwiha elimi mu Jeruzalemi, mu Judeya, mu Samariya, mwilaboni mwetemwene, ofiyedha okomoniwá.” (Merelo 1:8) Awene agawodhile dhavi okosa mabasaya aba? Yezu wahilibela wila muya wokoddela wa Mulugu ogahidha wakamihedha. (Merelo 1:5) Bani agaali vasogorho va masasanyedho a wimetxa mabasa a olaleya elabo yotene? Arumiwi anziwa wila masaka a mundduni Yehova wahalabihedha alobwana wi asogorhele ana  Izrayel. N’eji awene anaganyedha akala Yehova agahimuttoma musogorheli mwina muswa.

3. (a) Yezu mudhoweliye wirimu, yosakula gani yamakamaka ekosile anafara aye? (b) Ninakule mavuzo gani mwari mwa mutoma obu?

³ Muweleli Yezu wirimu, arumiwi aye apepesa Malebo, amuloba Mulugu nikamihedho, nanda amusakula Matiya wi ahale vamburoni va Juda Iskarioti wi akwanihe muttengo wa arumiwi 12. (Merelo 1:15-26) Osakuliwa oku wakaleli-nni waderetu wa awene vamodha na Yehova? Awene ahinonelamo wila anfanyeela okala arumiwi 12. * Yezu wahasakula arumiwi nanda bashagiha wi akose mabasa amakamaka vari va nlogo na Mulugu. Mabasaya aba bavi, nanda Yehova na Yezu ashagihile dhavi arumiwi wi attidde mabasa aba? Masasanyedho gani oligana aliwo masaka abano? Ninawodhe dhavi ‘wawubuwela abale annisogorhela’ makamaka “mwimeleli wororomeleya, wamalago”?​—Ahebreu 13:7; Mateu 24:45.

4. Mabasa gani akosa anamafwara vamodha na anddimuwa a mulogo o Jeruzalemi?

⁴ Oromana Pentekoste wa 33, paromile arumiwi osogorhela mulogo w’Okristu. Bibilia onloga wila “Pedro ovenya vamodha na arumiwi akwaye kumi na mmodha” nanda osunziha ebaribari vari va attu. (Merelo 2:14, 15) Attu enjene arumeela okala Akristu. Akristu abo aswa “andidela wiwa masunziho a arumiwi.” (Merelo 2:42) Arumiwi andhowavi bageeddiha mabasa na korowa ya mulogo. (Merelo 4:34, 35) Awene annasunziha attu a nlogo na Mulugu nanda anlobela eraga: ‘Iyo ninovilevela malobelo na olaleya nzu.” (Merelo 6:4) Awene aharuma Akristu aana ewodhelo wi alaleye mimburo dhina dhiswa. (Merelo 8:14, 15) Musogorhomwa, anddimuwa a mulogo ottikitteliwa avitaganyiha na arumiwi wi asogorhele milogo. Nikuru ntto nolamulela nanvaha malago milogo dhetene.​—Merelo 15:2.

5, 6. (a) Muya wokoddela wakamihedha dhavi nikuru nolamulela? (Koona foto eli omaromo.) (b) Angelo akamihedhile dhavi nikuru nolamulela? (c) Nikuru nolamulela needdihiwe dhavi na Nzu na Mulugu?

⁵ Akristu a vyaka zana dhoroma, annziwa wila modhela Yezu, Yehova wanlabihedha nikuru nolamulela. Awene arumeelela eni ejoya? Voroma, muya wokoddela wanavaha guru abali a nikuru nolamulela. (Joau 16:13) Masiki vavahiwe Akristu otene ottikitteliwa muya wokoddela, akelile guru dhosogorhelana mulogo ali arumiwi na anddimuwa akosa epaddi ya  nikuru nolamulela. Motagiha, yaka ya 49, muya wokoddela, wahikamihedha nikuru nolamulela wi akose yosakula yaderetu mwaha wa makani a otxetteliwa. Milogo dhanvirihamo malago etene. Ninga yodhavoya, “mitugumano dhanliba muroromelani; muthengo wa akristu wanunuwa siku-siku.” (Merelo 16:4, 5) Nigengesa karta yavahedhiwe milogo, sabwa ya makani otxetteliwa, ninowoona wila txibarene nikuru nolamulela nahakela muya wa Mulugu nanda ahilagiha okwela na nroromelo.​—Merelo 15:11, 25-29; Galásia 5:22, 23.

⁶ Vanawili, angelo ahikamihedha nikuru nolamulela. Motagiha, mungelo mmodha wahimwaddela Kornélio wi amutamele Pedro. Mumaleli Pedro omulaleya Kornélio na amudhaye, awene ahakela muya wokoddela, masiki valani attu ohitxetteliwa. Kornélio ddiromile okala Mukristu mwa amalabo etene ohitxetteliwa. Arumiwi na abali eena vaziwilani makaniya aba, awene arumeela wila Mulugu onowarumeela amalabo ohitxetteliwa wi akose epaddi ya mulogo wa Okristu. (Merelo 11:13-18) N’eji, ninowoona wi angelo annkamihedha mabasa a olaleya asogorheliwa na nikuru nolamulela. (Merelo 5:19, 20) Vanoraru, nikuru nolamulela niheddihiwa na Mazu a Mulugu. Alobwana aba anlabihedha Malebo wi akamihedhe okosa dhosakula dhapama vina malago oweeddihana milogo.​—Merelo 1:20-22; 15:15-20.

7. Ninlogela eni wila ddi Yezu wasogorhela Akristu oroma?

⁷ Masiki milogo vasogorheliwani na nikuru nolamulela, awene anziwa wila Musogorheli wawa ddi Yezu Kristu. Ninziwa dhavi? Murumiwi Paulo wahiloga wila Kristu oattomela ena “okala arumiwi.” Wahenjedhedhavi eraga Kristu wali “musorho” obe musogorheli wa mulogo. (Éfeso 4:11, 15) Ottiya ovittoma anya-anya murumiwi agakwa, anamafaraya ‘anziwiwa ninga Akristu.’ (Merelo 11:26) Paulo wanziwa wila yali yamakamaka ofara masunziho andhela mBibiliani avahiwa na arumiwi vina alobwana asogorhela. N’eji Paulo wahiloga: “Apa ddinofuna munonelegemo eji: Kristu ddi munddimuwa wa muthu-muthu.” Mazu abo annapatta abale etene akosa epaddi ya nikuru nolamulela. Nomala Paulo vina wahiloga: “Mulugu ddi munddimuwa wa Kristu.” (1 Korinto 11:2, 3) Txibarene, Yehova wahimuttoma Mwanaye Yezu Kristu, wi asogorhele mulogo.

8, 9. Mabasa gani amakamaka ana Mbali Russell?

⁸ Oromana yaka ya 1870, Charles Taze Russell na amarho aye ahitamela osunza anyene, vina wakamihedha attu eena wi amwebedhe Mulugu mowiwanana na Bibilia. Ejo yataganyihena wakamihedha attu a dhilogelo dhottiyana. Sociedade Torre de Vigia e Tratados nahirumeeliwa mowiwanana na malamulo yaka ya 1884, nanda Mbali Russell wahirumeeliwa okala musogorheliya. * Iyene wannimusunza kakamwe Bibilia nanda s’ohova wanawaddela attu wi masunziho anloga dha Oraru, ohikwa wa muya, kandela mBibiliani. Wahisunza wila Yezu oneyele n’ekalelo yomuyani, nanda ‘nsaka na amalabo’ ninagome yaka  ya 1914. (Luka 21:24) Mbali Russell olabihedha mudhidhi waye, guru na kobiri wi asunzihe attu eena ebaribari ya Bibilia. Kavali waganyedha wi Yehova na Yezu amulabihedha Mbali Russell wi akale musogorheli mudhidhi wa mapadduwo manddimuwa.

⁹ Mbali Russell kafuna osibiwa na attu eena. Yaka ya 1896 wahileba wila iyene vamodha na akwaye, kafuna nttittimiho na nriho. Awene katamelile ovivaha nzina na ettomo, vina kavedile wi nikuru ntti niziwiwe na nzina nawa. Iyene musogorhomwa oleba: “Aba kahiyo mabasa a attu.”

10. (a) Yezu omuttomile lini “mwimeleli wororomeleya wamalago”? (b) Katapulela mukalelo odhilani ononeliwamo wi Nikuru Nolamulela kahiyo Associação Torre de Vigia?

¹⁰ Mbali Russell okwile yaka ya 1916, vyaka ttaru musogorhomwa Yezu omuttoma “mwimeleli wororomeleya wamalago.” Efunelo yaye yali evi? Wafuna wi mwimeleli oddu “àgawelege poso mudhidhi ogafiya” anamafara etene a Yezu. (Mateu 24:45) Oromana vyaka dhene-eso, nikuru ntti ning’ono na abali ottikitteliwa ninfanyeya o Brooklyn, Nova Iorque, nivahaga poso nomuyani anamafara etene a Yezu. Nzu ntti “nikuru nolamulela” niromile wekiwa mmanivuruni mwehu oromana 1940. Nsaka nene nttile nikuru nolamulela ali abale edda kakamwe na anddimuwa o Associação Torre de Vigia de Bíblias e Tratados. Mbwenye 1971 yahitapuleliwa wila Nikuru Nolamulela nahittiyana vaddiddi na Associação Torre de Vigia attomeliwe wang’anela bahi makani alamuleli. Oromana venevo, abali ottikitteliwa ahikaana gari ya okosa epaddi ya nikuru nolamulela masiki s’ohikala asogorheli. Ovanenevi, abali ankosa epaddi ya “mabila menagu” anottomeliwa okala asogorheli a Sociedade, obe vina okosa mabasa meena ankamihedha nlogo na Mulugu. Yopurelamoya, Nikuru Nolamulela ninodhowavi banigavaha malago a Bibilia vamodha na masunzihoya. (Joau 10:16; Merelo 6:4) A Sentinela 15 de Julho 2013 ologa, “mwimeleli wororomeleya wamalago” nikuru ning’ono na abali ottikitteliwa ankosa epaddi ya Nikuru Nolamulela.

11. Nikuru nolamulela ninkosa dhavi dhosakula dhawa?

¹¹ Nikuru Nolamulela ninokosa matugumano sumana dhotene wi akose dhosakula dhapama. Matugumano abo anowakamihedha ofiyedhana vina wiwanana. (Gano 20:18) Vowi kavo mbali wa Nikuru Nolamulela oli wamakamaka wapitta eena, yaka-yaka mbali mmodha onosakuliwa wi asogorhele matugumano ankosani. (1 Pedro 5:1) Ejo enopadduwa vina mwari mwa comisau tanu namodha dha Nikuru Nolamulela. Mwa abali aba a Nikuru  Nolamulela, kavo onivyona ninga munddimuwayá wa abali aye. Awene anojeedha wakela poso nomuyani vina anofara malago a mwimeleli wororomeleya wamalago.

12. Ninfuna nakule nivuzo gani?

¹² Nikuru Nolamulela, kahiyo attu oligana, ankamihedhiwa na muya. Mudhidhi mwina awene anovonyaga agatapulelaga malebo obe agafaraga dila dha nikuru na Mulugu. Motagiha, mu Indice das Publicações da Torre de Vigia, muhikala mutoma onloga, “Esclarecimento de Crenças” vali muddonddonddo wa munonelo muswa wa Bibilia oromana yaka ya 1870. Yezu kalogile wila mwimeleli wororomeleya agahidhana poso nomuyani noligana. Kito ninawodhe dhavi wakula nivuzo na Yezu ninloga “Mwimeleli worormeleya wamalago dduvi?” (Mateu 24:45) Txini enlagiha wila txibarene Nikuru nolamulela ddi mwimeleli wororomeleya wamalago? Ndoweni  nitanaalele ttarho ttaru dhinakamihedha abali a nikuru nolamulela dhahene ninga mwakamihedhiwa arumiwi.

13. Muya wokoddela onkamihedha dhavi nikuru nolamulela?

¹³ Muya wokoddela onokamihedha Nikuru Nolamulela. Muya wokoddela onowakamihedha abali a Nikuru Nolamulela wi anonelemo ebaribari ya Bibilia yahanoneleyamo wale. Motagiha, ndoweni nitanaalele dhilobo esile dhilogiwe va esclarecimento de crenças dhilogiwe mundduni. Kavo muttu mwina agawodhile ononelamo nanda batapulela “dhetene, ofiyedha mobuwelo oviteya a Mulugu” na dhubuwelo dhaye! (Kengesa 1 Korinto 2:10.) Nikuru Nolamulela ninofara vakuvi mazu alebile murumiwi Paulo: “Esidha ninloga na malogelo anisunzihile muya, kayiye na malogelo a onona wa vati.” (1 Korinto 2:13) Masiki badhivirile vyaka mazana menjene a masunziho onyengetta, vina eddima yomuyani, enonelo ya Bibilia edhile dhavi wunuwa oromana yaka ya 1919? Mulugu onowakamihedha na muya wokoddela!

14. Mowiwanana na Ovuhulela 14:6, 7, angelo ankamihedha dhavi Nikuru Nolamulela vamodha na nlogo na Mulugu ovanene?

¹⁴ Angelo anokamihedha Nikuru Nolamulela. Nikuru Nolamulela, nihikaana mabasa manddimuwa a opaka manivuru owakwana milhau mitanu na miraru, wi akosiwena mabasa a olaleya orugunuwa elabo yotene. Mabasa aba ampulihiwa dhavi? Makaniya bawi awene anowakela nikamihedho na angelo. (Kengesa Ovuhulela 14:6, 7.) Dila dhina angelo anowattukulela anamalaleya vatakulu va muttu walobela atamelaga nikamihedho na Mulugu! * Masiki na ofarafariwa onddimuwa, mabasa a olaleya na osunziha ebaribari ya Bibilia anodhowavi vasogorho. Eji enowodheya sabwa ya nikamihedho na angelo.

15. Nikuru Nolamulela nittiyanile dhavi na asogorheli a marelijiau? Kavaha yotagiha.

¹⁵ Mazu a Mulugu anoweddiha Nikuru na Mulugu. (Kengesa Joau 17:17.) Kobuwela epadduwile yeka ya 1973. Revista A Sentinela 1  de Junho nahidhana nivuzo naloga akala “muttu ohinatti onyanyala ekarho yaye na oja fola, onorumeeliwa obatiziwa.” Yowakula ya nivuzo ntti, yattiddiwe mBibiliani! A Sentinela wahitonya malebo nanda wahitapulela wila muttu onkoodda onyanyala oja fola aburutxiwe mmulogoni. (1 Korinto 5:7; 2 Korinto 7:1) Revista nahiloga wila malamulo abale kadha mu yubuweloni ya muttu, mbwenye ‘andha wa Mulugu onloga modhela Nzu naye.’ Kuli nikuru nina na relijiau nigaali nomala na wale wi nikuluvele Nzu na Mulugu kakamwe masiki ekalaga yorutxa wa anamafara enjene. Nivuru nilebiwe ovanene ninloga dha marelijiau o Estados Unido niloga: ‘Asogorheli a marelijiau anosasanyedhaga masunziho awa na dhorumeela dhawa wi akwekwette efunelo ya anamewaya.’ Nikuru Nolamulela kanineeddihiwa na esile dhinfuna attuya. Ottiya eji awene anorumeela weeddihiwa na Nzu na Mulugu,bagalagiha wi ddi Yehova txibarene onsogorhela nlogo naye ovanene.

16. Ninawodhe dhavi wawubuwela abali ankosa epaddi ya Nikuru Nolamulela?

¹⁶ Kengesa Ahebreu 13:7. Bibilia onloga wi “mwawubuwele abale ausongorheleni.” Mukalelo mmodha wa okosa ejuwene ku waromola abali abo mmalobeloni mwehu. (Éfeso 6:18) Awene akaana mabasa menjene antaganyiheya na onivaha yoja yomuyani, osogorhela mabasa olaleya orugunuwa elabo yotene, ogawa mowakwana sokela dhetene dha nikuru na Yehova. Txibarene ninofanyeela wawika mmalobeloni mwehu!

17, 18. (a) Ninafare dhavi malago a nikuru nolamulela? (b) Mabasa ehu olaleya ankamihedha dhavi Nikuru Nolamulela vamodha na Yezu?

¹⁷ Mukalelo mwina wa wawubuwela abali a Nikuru nolamulela ku ovirihamo malago na masunziho annivahani. Nikuru Nolamulela ninonivaha malago modheela manivuru, mutugumano wa mulogo, asembeleya na kongeresu. Ninowattoma vina asogorheli a murudda, abene anattoma anddimuwa a mulogo. Nigavirihamo malago a musogorheli wa murudda vina a anddimuwa a mulogo, ninolagiha wawubuwela abali a Nikuru Nolamulela. Mwa dhotene esi ninolagiha nriho na Musogorheli wehu Yezu, modheela wawiwelela alobwana aba analabihedhiye ovanene.​—Ahebreu 13:17.

¹⁸ Ttarho yina ya wubuwelana Nikuru Nolamulela jokosa munwodhelihu mabasa olaleya. Va Ahebreu 13:7 anokokomeziwa Akristu wi afare nroromelo n’abale annisogorhela. Nikuru Nolamulela ninolagiha nroromelo noliba modheela ovilevela mabasa a olaleya miselu dhapama. Koddi ninowakamihedha na mabasa aba amakamaka? Akala ninowakamihedha, bahito ninele ohagalala niganvuruwana Yezu agalogaga: “Ddinoddubela siku thi siku nimwirelinyu esi mmodha wa abalaga aba añgono-ñgono, mwaddirela miyo-wene.”​—Mateu 25:34-40.

19. N’ofuna wawo osakulelini onfara Musogorheli wehu Yezu?

¹⁹ Muweleli Yezu wirimu, iyene kanyanyalile anamafara aye. (Mateu 28:20) Iyene wahakela nikamihedho na muya wokoddela, angelo vamodha Mazu a Mulugu bali velaboni ya vati. Nikuru Nolamulela ninowakela nikamihedho nakakene ovanene. Abali a Nikuru Nolamulela “anomfwara Mwana-Nibila ‘Yezu’ mwetemwene munviriye.” (Ovuhulela 14:4) Venevo vanfarihu malago a Ninkuru Nolamulela nininfara Musogorheli, Yezu. Momaguva iyene onele onivaha egumi yamukalakala. (Ovuhulela 7:14-17) Kavo musogorheli womaningoni onwodha olibela elobo ninga ejuwene.