1. Koddi Anamoona aba alogiwe ahisakula omwiwelela Yehova?

KOONA nipadduwo ntti ninapatta Anamoona a Yehova araru. (1) Muzombwe wamuyana oli oskola, venevo namasunziha ologa na attu etene ali musala wila akose mpaddi wa mattanga anakosiwe antaganyiheya na webedha wa ottambi. Iyene onoziwa wila mattanga aba kanimuzivela Yehova, na mukalelo woleleya onologa wi kinawodheye okala vamattanganiva. (2) Muzombwe wa mulobwana onolaleya numba na numba. Iyene wanziwa wila numba enfwarela—onkalavo ddi mukwaye woskola onziveliwetxa wabedda Anamoona a Yehova. Noliba murima onodhowa bagogodda musuwo. (3) Mulobwana onolaba wila asapele murala waye, mbwenye labo nimodha muzugwaye omukumbirha wi akose elobo yohikala obe yohikuluveleya. Muzuguya ohiloga wila agahikose dhawene onele oyelela ganyo, mulobwanaya onotapulelamo wila iyene muttu wokuluveleya nona onokodda olupa malamulo a Mulugu.—Rom. 13:1-4; Aheb. 13:18.

2. Ninakule mavuzo gani, nanda sabwaya?

² Attu aba araru alagihile mikalelo gani? Txibarene weyo ohona mikalelo dhowinjiva ninga motagiha, oliba murima na okuluveleya. Mbwenye mukalelo mmodha oli wattimaya olagihilani bubu—ororomeleya. Attu aba araru alagiha omuroromela Yehova. Awene ahikodda olupa magano a Mulugu. Ororomeleya ehattukulela attu aba okana yimelelo yapama. Yehova wahagalala vaddiddi na mikalelo esi dhilagihilani. Iyo vina ninofwanyela omwagalalaliha Babihu wawirimu. Ninele osekeserha mavuzo mararu: Ororomeleya ontapulela nni? Ninfunelela nni okala attu ororomeleya? Enwodheya dhavi wunuwiha ororomeleya wehu ttabwattabwa masaka abano?

3. (a) Ororomeleya ontapulela nni? (b) Yotagiha gani enoniha wila iyo ninofuna elobo yowakwana vina yoligana?

³ Ororomeleya, ontapulela okwela webaribari vina omwebedha Yehova ninga Muttu; jijene enittukulelaga wika efunelo yaye vamburoni voroma nigakosaga dhosakula dhehu. Dhawene ninele wunuwiha mabasa animukoselihu Yehova. Ndoweni nisekeserhe nzu ntti, ororomeleya. Bibilia onotapulela nzu ntti ‘ororomeleya’ ninga elobo yowakwana ehivonyile vego. Motagiha, akala ana Izrayel afuna amperhekele Yehova mukutto wa dhinama, malamulo aloga wila mukuttoya wanfwanyela okala wa enama yamugumi. (Onam. 22:21, 22) Nlogo na Mulugu kanarumelihiwa operheka enama yajombeliwa mweddo, niyaru obe ninto; enama yamuredda yankoddihiwa. Yehova wanvaha ttima mukutto wa enama yohiragala obe yowakwana. (Mal. 1:6-9) Ninowodha onononelamo sabwaya yafunela Yehova dhilobo dhowakwana vina dholigana. Iyo nigatamelaga okana elobo-txilobo ninga musapo, nivuru obe epano yina, ninfuna wi ekale yowakwana [yampubula] ehijombile vego. Iyo ninziveliwa elobo eli yowakwana vina yoligana. Yehova oniwamo na mukalelo wakene nigamutonyihedha okwela wehu obe weddeyana wehu. Dhilobo esi dhinofwanyela okala dhowakwana vina dholigana.

4. (a) Enowodheya muttu wohiligana okala wororomeleya? (b) Mowiwanana na nlebo na Masalmo 103:12-14, txini enjedhela Yehova mwa iyo?

⁴ Wi niwodhe okala attu ororomeleya, jofuneya okala oligana? Ninowubuwelaga wila kanili elobwene vamentoni va Yehova sabwani ninovonya vaddiddi. Nihidduwale dhilobo bili. Yoroma, Yehova kanzuzumela dhovonya dhehu. Bibilia onologa: “Nabuya, mugalaza dhothega dhehu, on’halavo bani?” (Masal. 130:3) Iyene ohiziwa wila nili ohiligana nona ononilevelela masiki nihifwanyelelaga. (Masal. 86:5) Yanawili, Yehova onoziwa vangomela guru dhehu, nona kannikumbirha okosa elobo enziwiye wila kaninwodha wira. (Kengesa Masalmo 103:12-14.) Ninakale oligana vina owakwana vamentoni va Yehova na mukalelo gani?

5. Elobo gani yakamihedhile alabeli a Yehova okala ororomeleya?

⁵ Mwa alabeli a Yehova, elobo enakamihedha okala attu ororomeleya okwela onani. Omukwela wehu Mulugu, omwebedha wehu Babihu wawirimu enonikamihedha okalavi owakwana vina oligana. Okwela wehu ogahidebe masiki nifwanyiwaga makattamiho ninotonyihedhavi ororomeleya. (1 Map. 28:9; Mt. 22:37) Ndoweni nawubuwele wili Anamoona a Yehova araru alogiwe omaromo. Txini yattukuleli okana yimelelo yanani? Muzombwe oddule wa muyana kaziveliwa waredha?, Muzombwe wamulobwana onziveleliwa oteyiwa nakwaye oskola? Obe mulobwana onofuna oyelela ganyo yamukamihedha wasapela amudhaye? Mwa ebaribari, nne. Awene anziwa mwawakwana-mwene magano a Yehova, nona asakula omwagalaliha Babiwa wa wirimu. Omukwela wawa owattukulela wika efunelo ya Yehova vamburoni voroma mwa dhosakula dhawa. Noliba murima ahitonyihedha wila attu ororomeleya.

6. (a) Iyo ninfunela nni okala attu ororomeleya? (b) Adamu na Eva atonyihedhile dhavi wila kali attu ororomeleya?

⁶ Iyo notene ninfunelela nni okala attu ororomeleya? Jofuneya sabwani Satana  onomuliga Yehova vina onouliga. Anju omuzugunuweli Yehova ovikosa Satana obe “Mwiddani,” mmunddani mwa Edeni. Iyene wahikosa muli-mwetemwene wila atakalihe nzina na Yehova, nona wahiloga wila Mulugu ddwabure, namakumbela vaye vina kankuluveleya. Mokubanyiha, Adamu na Eva ahisakula omwiwelela Satana, amuzugunuwelaga Yehova. (Wita 3:1-6) Egumi yanani mmunddani mwa Edeni yahavaha gari yolibiha omukwela wawa Yehova. Masaka abale Satana wahazivalela wila okwela wa Mulugu kuwali webaribari, wowakwana vina wofwanyelela. Enowodheya muttu omukwela Yehova mpaka ohirimeliwa ororomeleya waye? Na mazu mena, enowodheya muttu otonyihedha ororomeleya? Mavuzo aba anele wakuliwa musogorho. Job wahikoseliwa mavuzo akene.

7. Job 1:8-11 ninoniha dhavi monelo wa Yehova vina wa Satana mwaha wororomeleya wa Job?

⁷ Mudhidhi watxedheliwe ana Izrayel mw’Ejipitu Job wakalawo. Kaliwo muttu wana ororomeleya ninga Job. Iyene wali muttu wohiligana ninga iyo. Mudhidhi mwina wanvonya. Masiki dhawene Yehova wanimukwela sabwa yororomeleya waye. Satana wahimwaddela Yehova wi kagakalilewo muttu agakalile wororomeleya. Yehova wahimulabihedha Job ninga tagiha ya muttu wororomeleya. Attu enjene akalilewo ahitonyihedha wila Satana muttambi! Satana waheha ororomeleya wa Job. Yehova wahimukuluvela Job, nona wahimuttiya Satana omweha.—Kengesa Job 1:8-11.

8. Satana ombuddugeli dhavi Job?

⁸ Satana ddwabure vina panga. Voroma Iyene wahilupela dhinama dhaye, dhorela,  anamalaba aye vina watakaliha omuttu wa Job mmuruddani mwakaliye. Iyene wahilupela murala wa Job vina wahapa anaye. Satana wahimugwihedha eredda ya elodda oromana omusorho mpaka mmanyaloni. Egumi ya Job yali yaburevi, mwadhiye wahittabwiya omukubanyiha mwalogeliye wila amuruwane Mulugu ngamala akwe. Job mwinyene wanunlela okwa, mbwenye kattiyile ororomeleya waye. Satana wahikosa muli mwetemwene wila ammottiye Job. Satana wahalabihedha vina akwaye araru a Job. Alobwana aba adhowa omona, ottiya ompangarhaza alomuttabwiha. Awene ahinvanya vaddiddi. Ahifiyedha ologa wila ddi Mulugu watatamulile makattamihoya vina katanalela ororomeleya waye. Ahiloga wila Job muttu wabure nona wanfwanyela ogweliwa makattamiho aniye!—Job 1:13-22; 2:7-11; 15:4, 5; 22:3-6; 25:4-6.

9. Mudhidhi wagumanana Job masoso manddimuwa, elobo gani ekosiliye?

⁹ Job wasilidheliwe nni na malago avahiwiye? Iyene kali muttu woligana. Nona wahisilidhiwa vaddiddi na miselu dhaddeliwiye dhali nipangarhazo nokubanyiha, ofiyedha ovaha yowakula yadhile omutxinutxa. Iyene wahamelela oligana waye opitta mwafunela Mulugu. (Job 6:3; 13:4, 5; 32:2; 34:5) Masiki egalivi dhawene Job wahikodda omusaddduwela Mulugu. Karumelile dhottambi dhaloga akwaye. Wahiloga: ‘Ejo kili yofwanyelela wa miyo onyanyala oligana waga! Mpaka okwa waga, kaddinattiye ororomeleya!’ (Job 27:5) Obule wali mudhidhi worutxa vaddiddi ogamuttukulele Job omusadduwela Mulugu. Mbwenye iyene kakosile ejiwene.

10. Ottambi wa Satana onupatta dhavi moligana na yotagiha ya Job?

¹⁰ Satana ohikana mittorho dhinfuniye onivaha iyo notene. Moligana na Job nipakelo gani nintameliye owupwatteliha? Iyene onloga wi kinwodheya omwebedha Yehova ebewene, ogafwanyiwa dhorutxa onele omunyanyala! (Job 2:4, 5; Ovuh. 12:10) Iyene onuttukulela wubuwela dhavi? Koddi ejo enowukubanyiha? Karoma wubuwela dhahi: Yehova onowukuluvela kakamwe, wi auvahe mareliho manddimuwa. Mbwenye iyene onottiya wi ororomeleya wawo wehiwe na Satana. Yehova onoroma wuwaddela wi jowodheya weyo ottiddelavi ororomeleya wawo mwari mwa wehiwa na ottambi wa Satana. Nanda onologa wi onele oukamihedha. (Aheb. 13:6) Eji gari enddimuwa okamihedhiwa na muttanddi wa elabo yotene! Weyo onowodha wona ttima ena ororomeleya wawo? Ejo enonikamihedha okodda ottambi wa Satana, nitamelaga wamelela nzina na Mulugu wehu, oli mulamuleli munddimuwa. Elobo gani enakose iyo wi nikalevi wororomeleya?

11. Ninsunzavo nni na yotagiha ya Job?

¹¹ ‘Masaka abano omariha’ Satana onowenjedhedhavi obure waye. (2 Tim. 3:1) Ninawodhe dhavi olibiha ororomeleya wehu masiki nifwanyiwaga makattamiho? Ninele osunza yotagiha ya Job. Ahinatti wehiwa iyene wahilibiha ororomeleya waye. Ninele wona dhilobo ttaru dhinanikamihedhe olibiha ororomeleya wehu ninga Job.

12. (a) Txini enfwanyeya va Job 26:7, 8, 14, entonyihedha wila Job wanimuriha Yehova? (b) Ninatonyihedhe dhavi wila ninomuriha Yehova?

¹² Job wahilibiha omukwela waye Mulugu. Wampura mudhidhi wi ang’ane dhottandda dha Yehova. (Kengesa Job 26:7, 8, 14.) Vang’anileyi elabo, erimu, mirabo vina jai, wahitikina vaddiddi nona wahinonelamo  wila kanziwetxa dhotene dhittanddile Yehova. Wantikina na dhottandda dha Yehova. Ofiyedha ologa: “Ddivirihamo magano aye.” (Job 23:12) Job wanimuriha Nabuya. Iyene wanimukwela Babe vina wannivilibihedha okosa dhinimuzivela. Yodhavoya jawi Job wahigana odhowanavi ororomeleya waye. Ninofwanyela okana yimelelo ninga ya Job. Iyo ninoziwa dhilobo gwé mwaha wa dhottandda dha Yehova mottiyana na attu a masaka a Job. Nihikana Bibilia onnikamihedha omuziwa kakamwe Yehova. Dhotene dhinsunza iyo dhinodhaliha murima wehu na otikina. Omuriha wehu Yehova ononittukulela omukwela vina omwiwelela wi nidhowenavi ororomeleya wehu.—Job 28:28.

13-14. (a) Vanlebo ya Job 31:1, Job otonyihedhile dhavi wila wali muttu wowiwelela? (b) Ninasaze dhavi yotagiha ya Job?

¹³ Job wahivilibiha otonyihedhe ororomeleya waye na merelo vina wiwelela. Job wanziwa wi ororomeleya na wiwelela dhinedda mummodhani. Ebaribari wila wiwelela na merelo onowaraliha yimelelo yehu yokala ororomeleya. Iyene wanivilibihedha amwiwelele Yehova mwigumini mwaye mwetene. Motagiha, wahikosa nipagano na mento aye wila wahimwang’ane muyana mwina. (Kengesa Job 31:1.) Ninga mamuni, wanziwa wi jabure omwanganetxa muyana ohili mwadhiye. Mwilaboni mpuno, attu kanabala deretu ejo enowattukulela ena okana mubuwelo wonyakuwa. Ninga Job, onovilibihedha ohimwanganetxa muyana ohili mwadhiyo? Ninottawiha mento ehu wona mafoto onyakuwa? (Mt. 5:28) Nigawodha ovyamelela mwa dhilobo esi dhonyakuwa, ninokana efunelo yokala attu ororomeleya vina oliba.

¹⁴ Job wanimwiwelela Yehova na mukalelo woniye dhilobo dhomaningoni. Job kororomelaga dhorela dhaye, agahittiya omwiwelela Yehova bafiyedha oddawa omamalelowa basottottiwa. (Job 31:24, 25, 28) Iyo ninkala  mwilaboni munika attu dhorela vamburoni voroma. Nigewelelaga magano a Bibilia, nang’ananihaga mukalelo onzuzumelihu kobiri obe okana ettomo, kaninattiye ororomeleya wehu.—Gano 30:8, 9; Mt. 6:19-21.

15. (a) Njedhelo gani nimukamihedhile Job ohirimeliwa ororomeleya? (b) Otanalela maruriho ananivahe Yehova musogorho onanikamihedhe dhavi okala ororomeleya?

¹⁵ Job wandowanavi ororomeleya waye sabwani wahikana njedhelo wila Mulugu agahimuliva musogorho. Iyene wanroromela wila Yehova agahimukamihedha okalavi ororomeleya. (Job 31:6) Masiki vafwanyiwiye makatamiho Job wanimuroromelavi Yehova wila agahimukamihedha. Ejene enonikamihedha ottiddelavi ttu ororomeleya wehu. Yehova wahiziveliwa na ororomeleya wa Job, iyene wahimururiha vaddiddi masiki Job akalaga mulobwana wohiligana! (Job 42:12-17; Tia. 5:11) Job wahikana yafuniye. Weyo ohikana njedhelo wila Yehova onele wukamihedha wi onayelele ororomeleya wawo? Mulugu wehu kasadduwile. (Mal. 3:6) Ninofwanyela wubuwela wila iyene onottittimiha ororomeleya wehu, iyo nihikana njedhelo nowagalala mwilaboni eji.—1 Tes. 5:8, 9.

16. Txini enfwanyelela iyo okosa?

¹⁶ Olibe murima, kuttiye ororomeleya wawo! Ebaribari wila masaka mena enkala ninga oli weka mbwenye kuli weka. Weyo oli na attu matxikwi na matxikwi anawukamihedhe olibiha ororomeleya wawo. Vina okala mwari mwa attu a masaka a mundduni alibihile ororomeleya wawa masiki atxutxiwaga nopiwa. (Aheb. 11:36-38; 12:1) Nivilibihedhege omutagiha Job mwigumini mwehu, wila niloge ninga elogiliye: ‘Mpaka okwa waga, kaddinatxelele ororomeleya waga!’ Vina ddinele omuttittimiha Yehova namukalakala!