1-2. Yehova ofugule dhavi dila wi nikose mpaddi wa amudhaye, nanda sabwaya jani?

YEHOVA ononiwoba wi nikose mpaddi wa anamudhi aye animwebedha. Ntti niwobo nowagalaliha vaddiddi! Amudhihu babale avivelelile wa Mulugu vina anroromela mukutto wa yobolo operhekile Mwanaye. Iyo nikana anamudhi owagalala. Nikana egumi yowagalaliha ovanene vina ninojeedha okana egumi yohimala—wirimu obe Mparaizu velaboni ya vati

² Na okwela onddimuwa, Yehova okosa guru ya ofugula dila wi iyo nikose mpaddi wa amudhaye. (Jo. 3:16) Iyo niwoboleliwa na “muthengo munddimuwene.” (1 Kor. 6:20) Sabwa ya yobolo, Yehova ohinivaha gari yokana mandano ofiyedheya na iyene. Nikana nttittimiho na omukuwela Babi, Muttu munddimuwa wa elabo yotene. Ninga moonelihu nsunzo nivirile, Yehova Babi wattima.

3. Mavuzo gani anfanyeelihu ovikosa? (Kang’ana kasha “ Koddi Yehova Onoddona?”)

³ Dhahene ninga namaleba mmodha wa Bibilia, ninodha ovivuza: “Ddinamutamalele dhavi Nabuya, ddonaga dhapama dhetene dhiddireliye?” (Masal. 116:12) Yowakulaya jawi, iyo txipo kaninawodhe wiyelihedha dhotene dhinnikosela Babihu wa wirimu. Mbwenye onikwela waye ononittukulela omukwela vina. Murumiwi Joau ohileba: “Iyo ninomukwela Mulugu, vowi ddi iyene oromile onikwela.” (1 Jo. 4:19) Na mikalelo gani dhinawodhihu otonyihedha wi ninomukwela Babihu wa wirimu?

4. Mowiwanana na Tiago 4:8, ninfwanyelela nni ovilibihedha okala ofiyedheya na Yehova?

⁴ Yehova onfuna wi iyo nimususele vina nilogege na iyene.  (Kengesa Tiago 4:8.) Mulugu ononikokomeza ‘odidela olobela,’ vowi iyene oli womala nawale wi avuruwane malobelo ehu. (Rom. 12:12) Iyene kanzuzuma na mabasa obe kanlema ovuruwana malobelo ehu. Wila nimwiyihedhe, ninofwanyela omvuruwana nigengesaga Mazu aye, vamodha na manivuru annikamihedha omunonelamo Bibilia. Ninofwanyela omvuruwana nigafwaseya mmatugumanoni. Dhahene ninga makani apama anakamihedha aima okala ofiyedhaya na amambali awa, makani apama na Yehova anonikamihedha okala ofiyedheya na iyene.

5. Ninawodhe dhavi ovilibihedha wunuwiha mukalelo wehu wolobela?

⁵ Kobuwela mukalelo onkala malobelo awo na Mulugu. Yehova onfuna wi ninfugulele murima wehu na nlobelo. (Masal. 62:9) Egali dhawene, ninofwanyela ovivuza: ‘Malobelo aga ankala a mazu mamodhene ninga muselu olebiwe vego obe ankala a murima wotene?’ Kavali waganyedha wi weyo onomukwela vaddiddi Yehova vina onofuna okana mandano oliba na iyene. Nona, onofwanyela ologa na iyene mudhidhi wotene. Omukuluvele Yehova. Ompange txini enottukulela wagalala vina dhinukubanyiha. Kakaanavi nikuluvelo nawi iyene onelege wukamihedha.

6. Txini enfwanyelihu okosa wi nikale ofiyedheya na Babihu wa wirimu?

⁶ Wila nikale ofiyedheya na Babihu wa wirimu, ninofwanyela okana ekalelo y’otamalela. Iyo nikana monelo wakene wa munasalmo olebile: “Nabuya Mulugu waga, dhotikiniha na dhawumiha milomo dhinirelinyu si dhinjidhene; kawo onligana na nyuwo! Ddanfuna olaleya, ovuwiha, kaddiwodhile, dhithabwa winjiva.” (Masal. 40:6) Dhinkosihu dhinopitta otamalela; iyo ninotonyihedha omutamaalela wehu Yehova na mazu vina na merelo. Eji enonikosiha okala ottiyana na attu enjene a masaka abano. Ninkalawo mwilaboni muli attu ahinwodha otamalela dhotene dhinakosela Mulugu. Mwebaribari, elobo modha enoniha wi ninkalawo “masaka omariha” jawi attu kanziwa otamalela. (2 Tim. 3:1, 2) Iyo txipo kaninfuna orava ekalelo eji!!

7. Txini enfuna Yehova wi iyo nikose, nanda sabwaya jani?

⁷ Amambali kanfuna wi anawa awanege, mbwenye anfuna wi akale amarho. Yakakene jinfuna Yehova, iyene onfuna wi anaye otene akale attu awiwanana muttu na mukwaye. Sabwani okwela, yeddelo enoniha wi nili Akristu ebaribari. (Jo. 13:35) Iyo nikana monelo wakene wa munasalmo olebile: “Mone oziva onjavo anamudhi, anedda mumodhani!” (Masal. 133:1) Nigakwelaga abali na arogora, ninomulagiha Yehova wi iyo ninomukwela. (1 Jo. 4:20) Kavali waganyedha wi jowagalaliha okosa mpaddi wa anamudhi, abali na arogora abuwene ali “athu a murima, aneddelana thagaraga!”—Ef. 4:32.

8. Mowiwanana na 1 Joau 5:3, mwaha gani woroma onnittukulela omwiwelela Yehova?

⁸ Yehova onjedhela wi aima awiwelelege amambali awa, vina iyene onjedhela wi iyo nimwiwelelege. (Ef. 6:1) Mulugu onofwanyela wiweleliwa sabwani ddi Muttanddi wehu, Ddinsapela egumi yehu, vina ddwa eziwelo opitta ababi otene. Mbwenye mwaha woroma onnittukulela omwiwelela Yehova bwawi iyo ninomukwela. (Kengesa 1 Joau 5:3.) Masiki na mwaha dhinjene dhinfwanyeelihu omwiwelela Yehova, iyene kanimagelela okosa  ejuwene. Yehova ohinivaha ofuru, nona iyene onowagalala nigasakula omwiwelela sabwa ya omukwela.

9-10. Ekalele nni yamakamaka oziwa vina ovirihamo magano a Mulugu?

⁹ Amambali anowazuzumela anawa wi akale obareleya. Awene anowita malamulo wi alelena aniwa. Aimaya agewelela malago aba, anotonyihedha wi anowakuluvela amambali awa vina anowariha. Nona jamakamaka oziwa vina wiwelela magano a Babihu wa wirimu. Nigakosa dhawene, ninomulagiha Yehova wi iyo ninomukwela, ninomuriha vina wiwelela wehu ononipuriha nanya. (Iza. 48:17, 18) Mwa mpaddi mwina, abale animukoodda Yehova vina ampwaza magano aye anoviputtula anya.—Gal. 6:7, 8.

¹⁰ Nigavirihagamo ennikumbirha Yehova, ninobareleya mpaddi womaningoni, wa muyubuweloni vina womuyani. Yehova onoziwa elitxi yapama wa iyo. Aurora, onkala o Amerika, ohiloga: “Miyo ddinoziwa wi omwiwelela Yehova mudhidhi wotene onodhiha egumi yapama.” Mazu aba alogiliye ebaribari. Weyo opurelimo nni sabwa yowiwelela magano okwela a Yehova?

11. Olobela onnikamihedha okosa eni?

¹¹ Olobela ononikamihedha wiwelela, masiki akala eloboya jorutxa okosawa. Masaka mena, sabwa ya ohiligana ninorutxiwaga omwiwelela Yehova, mbwenye ninofwanyela ovilibihedha wi ninamuttegele. Munasalmo wahimuloba Mulugu: ‘Ddivaheni  murima wovilevela wila dduwiweleleni.’ (Masal. 51:14) Denise, oli pionera wa mudhidhi wotene, ohiloga: “Ddigona wi enorutxa wiwelela nikokomezo na Yehova, ddinolobelaga ddikumbirhaga guru dha okosana eli yapama.” Ninofwanyela okuluvela wi Yehova onele wakula malobelo ninga aba.—Lk. 11:9-13.

12. Mowiwanana na Éfeso 5:1, txini enfwanyelihu okosa?

¹² Kengesa Éfeso 5:1. Vowi nili ‘ana okweleya’ a Yehova, ninofwanyela ovilibihedha omutagiha iyene. Ninatagihe mikalelo dhaye, nigakala attu okwela, a murima wapama vina nigalevelelaga attu ena. Abale ahinimuziwa Mulugu agoona mweddelo wehu wapama, txino anele ofuna osunza mwaha wa Mulugu. (1 Ped. 2:12) Amambali anofwanyela walela anawa atagihaga mukalelo onneeddiha Yehova. Agakosa dhawene, anawa txino anele ofuna okala amarho a Babihu wokwela wa wirimu.

13. Txini enfwanyelihu okosa wila nikale oliba?

¹³ Mwana onogayana dhinimukosela babe vina onoziveliwa wawaddela akwaye dhinkoseliwiye. Na mukalelo wakakene, iyo ninomugayana Babihu wa wirimu, vina ninfuna wi attu ena amuziwe. Murima wehu onottaba ninga Mwene David, olebile: “Murima waga onomugayela Nabuya.” (Masal. 34:3) Kito akala ninokana manyazo a walaleya attu  ena? Ninawodhe dhavi okala oliba? Ninalibe nigatanaalela mukalelo onagalala Yehova nigaalaleyaga attu ena. Yehova onele onivaha oliba murima onfunihu. Iyene wahakamihedha abalihu a nsaka zana noroma okala oliba, nona iyene onele onikamihedha.—1 Tes. 2:2.

14. Ekalele nni yapama walaleya attu ena?

¹⁴ Yehova kana nsakulano, nona iyene onowagalala aganoonaga naweddihaga attu ena nokwela, nihang’anaga onda attuya obe mikalelo dhawa. (Mer. 10:34, 35) Mukalelo mmodha wapama wotonyihedha okwela bwa walaleya attu ena miselu dhapama. (Mt. 28:19, 20) Mabasa aba bamakamaka, sabwani abale anvuruwana anowodha okana egumi yapama ovanene vina njedhelo na egumi yohimala musogorho.—1 Tim. 4:16.

15-16. Mwaha gani dhinihuna dhinnittukulela wagalala?

¹⁵ Yehova Babi wokwela, iyene onfuna wi amudhaye akale owagalala. (Iza. 65:14) Nikana mwaha dhinjidhene dhapama dhinnittukulela wagalala ovanene, masiki nigagumanana dhorutxa. Motagiha, ninokuluvela wi Babihu wa wirimu ononikwela vaddiddi. Nikana eziwelo yebaribari ya Mazu a Mulugu, eli mBibiliani. (Jer. 15:16) Vina ninokosa mpaddi wa anamudhi avawoka, abuwene animukwela Yehova, ankwela magano aye vina ankwelana muttu na mukwaye.—Masal. 106:4, 5.

Ninokalavi ohagalala sabwa y’okuluvela wi egumi musogorho enakale yapama. Ninoziwa wi mohigoneela Yehova onele okuputta obure wotene vina modhela Omwene waye, elabo ya vati enele okala paraizu. Nikana njedhelo notikiniha nawi abale akwile anele wiyelela okalawo, ninele wawona wili amudhihu okweleya. (Jo. 5:28, 29) Nsaka ntto ninakale nowagalaliha! Yamakamakaya jawi, ninokuluvela wi mohigoneela abale ali wirimu vina velaboni ya vati anele onvaha Babihu wokweleya nttittimiho, nriho, vina webedha oninfwanyelela.