1. Txini entota odhugudheya, nanda odhugudheyawa onimpatta dhavi?

WEYO wahiromaga otxutxeya sabwa ya odhugudheya? * Txino wahidhugudheya sabwa ya onyimuliwa na dhologa vina dhokosa dha attu ena. Obe txino odhugudheya wawo witeyile na dhologa dhawo obe dhokosa dhawo. Motagiha, txino weyo okosa dhoddawa vina oroma ozuzuma wubuwelaga wi Yehova txipo kanawulevelele. Yottabwaya jawi, txino onowubuwela wi oyeveliwa nroromelo sabwa ya odhugudheya—kunfwanyela, vina oli muttu wabure. Mbwenye ejiya ebaribari?

2. Dhotagiha gani dha mBibiliani dhinoniha wi odhugudheya kuntapulela oyeveliwa nroromelo?

² Koona dhotagiha dhing’onovi dha mBibiliani. Ana, wadhile okala maye wa namavuhulela Samuwel, wali muyana wana nroromelo ninddimuwa. Mbwenye, wahidha odhugudheya vaddiddi sabwa ya obeddiwa na munanddaye. (1 Sam. 1:7) Murumiwi Paulo wahikaana nroromelo noliba, mbwenye wankubanya mwaha “wozuzumela mitugumano dhotene.” (2 Kor. 11:28) Mwene David wahikaana nroromelo noliba vina Yehova wannimukwela vaddiddi. (Mer. 13:22) Masiki dhawene, David wahira dhottega dhamuttukuleli otabuwa na odhugudheya wottabwa. (Masal. 38:5) Yehova wahapangarhaza vina wahiridhiha murima wa muttu-muttu. Ninfuna none txini enasunzihu na dhotagiha dhawa.

3. Dhologa dha attu ena dhintatamula dhavi odhugudheya?

³ Txino ninodhugudheya akala attu ena anonilogana na owali obe anonikosela merelo ohifanyeela. Eji enttabwa opa akala muttuya onkosa esuwene mwanamudhi obe marho wofiyedheya. Txino ninkala ozuzumene akala mandano ehu na akwehu anofudheya. Masaka mena, muttuya oninyimulile kafuna ologa mazu oninyimulana, masiki dhawene ninovoona ninga nisuviwe na supadda! (Gano 12:18) Na pudha attu ena anologa mazu olata anladdana na futti. Murogora dhahi wa muzombwe wahigumanana makattamiho aba. Iyene ohiloga: “Vyaka dhing’onovi mundduni, muzombwe dhahi wali marho waga wofiyedheya wahiroma oddilogela dhottambi. Eji yahipatta murimaga vina ddahidhugudheya. Mwebaribari miyo kaddanonelamo sabwa yamuttukulele mukwaga oroma ologa dhozivala.” Akala weyo ohinyimuliwa na marho wofiyedheya obe mwanamudhi, onele osunza na yopadduwa ya Ana.

4. Makattamiho gani orutxa agumanilena Ana?

⁴ Ana wahivilela makattamiho orutxa. Mwa vyaka dhinjene iyene kabala. (1 Sam. 1:2) Yeddelo ya ana Izrayel yali yawi, muyana agahikaane mwana, yatapulela wi Mulugu omugwihedha ntowa. Nona eji yannimuttukulela Ana okana manyazo. (Wita 30:1, 2) Yamuttabwiya Ana, jawi mamunaye wahikaana aima na munanddaye, Penina. Penina wamoona Ana ninga mwiddani vina “wannimusosa, wannimunyemula.” (1 Sam. 1:6) Vamaromo, Ana kawodha opemberha mowakwana makattamiho aba. Iyene wakala wosilidhiwene, ‘wunlavi vina kaja.’ Ana wahidhugudheya vina ‘wanniwa opa mmirimani.’ (1 Sam. 1:7, 10) Ana odhile ofwanya dhavi nipangarhazo?

5. Nlobelo namukamihedhile dhavi Ana?

⁵ Ana wahinfugulela Yehova murima waye bamwaddela makattamiho ampatta. Mmaleliye olobela, iyene wahimwaddela Namakutta Munddimuwa Eli makattamiho aye. Namakuthaya wahimwaddela: “Dhowa n’osanzaya; Mulugu wa Izrayel auvahe dhimulobilewe.” Yodhelavoya jivi? Ana “ovenya, odhowa oja; murima waye opangarazeya, kove yaye edhamo.” (1 Sam. 1:17, 18) Nlobelo nahimukamihedha Ana okana wili murenddele.

6. Ninsunzavo eni na yotagiha ya Ana vina nlebo na Filipi 4:6, 7 mwaha wa nlobelo?

⁶ Ninele okaanavi wili murenddele nigadidela olobela. Ana wahimala mudhidhi mwinjene alogaga na Babi waye wa wirimu. (1 Sam. 1:12) Enowodheya omwaddela  Yehova mwaha wa odhugudheya, wova vina dhawobana dhehu. Wila nilobele kili yofuneya okana oyesa wologa obe oziwa oddoddobelela dhilobo gwè. Sabwa ya mazuzumo, txino kaninkanaga yologa nigamwaddelaga Yehova makattamiho ehu munlobeloni. Masiki dhawene, Yehova txipo kanlema ovuruwana dhinlogihu. Mowenjedhedha nigalobela mwaha wa makattamiho ehu, ninofwanyela wubuwela mazu ali va Filipi 4:6, 7. (Kengesa.) Paulo wahiloga wi mwari mwa nlobelona ninofwanyela omutamaalela Yehova. Nikana mwaha dhinjene dha omutamaalela Yehova. Motagiha, ninowodha omutamaalela sabwa ya onivaha egumi, dhilobo dhokoddela dhittanddiliye, okwela waye woweddeyana vina njedhelo notikiniha ninipikireliye. Elobo gani yina enasunzihu na yotagiha ya Ana?

7. Txini yakosetxa Ana vamodha na mamunaye?

⁷ Masiki na makattamiho aye, dila dhotene Ana vamodha na mamunaye andowa o Silo wila amwebedhe Yehova. (1 Sam. 1:1-5) Ana valiye omusanani, Namakutta Munddimuwa Eli wahimulibiha mwa ologa wi Yehova agahakula nlobelona, eji yahimpangarhaza Ana.—1 Sam. 1:9, 17.

8. Matugumano annikamihedha dhavi? Katapulela.

⁸ Ninele okana wili murenddele nigadhowaga omatugumanoni. Matugumano agaromaga abali anokosa nlobelo akumbirhaga wi muya wa Mulugu okale na iyo. Murenddele mpaddi wa misapo dhinbala muya. (Gal. 5:22) Nigafwaseyela wona matugumano ehu masiki nikale okubanyene, Yehova vina abali na arogora ehu anowodha onilibiha vina onikamihedha okana wili murenddele wa muyubuweloni na wa mmurimani. Yehova onolabihedha nlobelo vina matugumano wi anipangarhazena. (Aheb. 10:24, 25) Ninfuna none elobo yina enasunzehu na yotagiha ya Ana.

9. Txini yahatxinjile mmakattamihoni mwa Ana, mbwenye txini yakosiliye?

⁹ Makattamiho amutotela Ana odhugudheya kagomile momaguva-mwene. Vabudduwile Ana omusanani wa webedha beyelela vatakulu, iyene wadhowile okalavi na munanddaye Penina. Bibilia kanloga wi Penina wahitxinja ekalelo yaye. Nona Ana wandowavi avilelaga mazu osuva amulogela munanddaye Penina. Mbwenye Ana wahiwodha okaanavi murenddele wa mmurimani. Ana muziweliye wi Yehova wahivuruwana nlobelo naye, wahifwaseya kakala mudhidhi mwinjene akubanyaga. Wahimuttiya Yehova ompangarhaza vina omuridhiha murima. Osogorhowa, Yehova wahakula nlobelo na Ana vina wahidha okana aima!—1 Sam. 1:19, 20; 2:21.

10. Ninsunzavo eni na yotagiha ya Ana?

¹⁰ Ninele okana wili murenddele masiki akala makattamihoya kangoma. Masiki nilobelege na ntidi vina noonege matugumano dila dhotene, makattamiho mena anelege okalawovi. Mbwenye yotagiha ya Ana, enonisunziha wi Yehova kanttiya opangarhaza murima wehu. Yehova txipo kananidduwale, ovanene obe musogorho iyene onele onittuva sabwa ya ororomeleya wehu.—Aheb. 11:6.

11. Mwaha gani dhamukosiha Paulo odhugudheya?

¹¹ Paulo wahikaana mwaha dhinjene dhamuttukulela odhugudheya. Motagiha, vowi iyene wannakwela abali na arogora, iyene wakala wozuzumene sabwa ya makattamiho apattiwani. (2 Kor. 2:4; 11:28) Muttomeliwiye ninga murumiwi, Paulo wahavilela amwiddani abuwene  amusottotta vina anfugela mukambura. Iyene wanvilela makattamiho orutxa amutotela okala odhugudheyene, ninga “opiwa dala.” (Fil. 4:12) Vakosiliye oleddo mbara na paporo wahibwina dila ttaru afunaga okwa, esi dhahimutotela odhugudheya vaddiddi. (2 Kor. 11:23-27) Paulo owodhile dhavi ovilela odhugudheya oku?

12. Txini emukamihedhile Paulo ovugula odhugudheya?

¹² Dhoweha dhagumanilena abali na arogora dhahimutotela Paulo odhugudheya, mbwenye iyene kagomihile makattamiho awa otene. Paulo wali muttu wovipimelela. Iyene wahakumbirha attu ena wi akamihedhege mabasa a mmulogoni. Motagiha, iyene wahattoma alobwana okuluveleya ninga Timóteo na Tito. Kavali waganyedha wi mabasa akosa abali aba ahimukamihedha Paulo ovugula odhugudheya waye.—Fil. 2:19, 20; Tito 1:1, 4, 5.

13. Anddimuwa a mulogo anawodhe dhavi omutagiha Paulo?

¹³ Okumbirhe nikamihedho na attu ena. Ninga Paulo, anddimuwa a mmulogoni enjene a masaka abano anodhugudheya sabwa ya makattamiho angumanana abali na arogora. Mbwenye munddimuwa mmodha wa mulogo kanawodhe wakamihedha attu otene a mmulogoni. Ovipimelela onele omuttukulela wattoma asogorheli ena vina washagiha azombwe wila amukamihedhe ozuzumela mabila a Mulugu.—2 Tim. 2:2.

14. Txini yakodda wubuwela Paulo, nanda iyo ninsunzavo eni na yotagiha yaye?

¹⁴ Kaziwa wi onofuna nipangarhazo na attu ena. Paulo wali muttu woviyeviha, iyene wanziwa vina wannakela nipangarhazo navahiwiye na abali. Mohaganyedha iyene kobuwela wi agahooniwa ninga muttu wawobana kurumela wakela nipangarhazo na attu ena. Amulebelaga Filemone, Paulo ohiloga: “Txibarene okwela wawo, mbalaga, oddithabiha venjene, oddipangarhaza.” (Filé. 7) Paulo ohiloga venjene mwaha wa mabasa akosile anamafwara aba vina nipangarhazo nakelile iyene nsaka nagumaniyena makattamiho. (Kol. 4:7-11) Nigakala attu oviyeviha ninele ononelamo wi ninofuna nikamihedho, vina abali na arogora anakale otapuwene wi anivahe nikamihedho ninfunihu.

15. Txini yakuluvela Paulo vafwanyiwiye makattamiho odhugudha?

¹⁵ Kakuluvela Mazu a Mulugu. Paulo wanziwa wi Malebo agahimpangarhaza. (Rom. 15:4) Maleboya agahinvaha ononelamo  kogumanana makattamiho-makattamihovi. (2 Tim. 3:15, 16) Vafugeliwiye dila yanawili o Roma, Paulo wahinonelamo wi agahikwa momaguva. Txini yakosile Paulo mwari mwa makattamiho aba? Iyene wahimukumbirha Timotéo wi adhowe amoone vina adhowena manivuru “a thebe.” (2 Tim. 4:6, 7, 9, 13) Sabwaya? Sabwani manivuru aba a ttebe ali Malebo a Ebraiko abuwene agalabihedhi Paulo munsunzoni naye na Bibilia. Nigamutagiha Paulo modhela osunza Mazu a Mulugu mudhidhi wotene, Yehova onele olabihedha Malebo wila aniridhihena murima—kintanala makattamiho angumanihuna.

16. Txini yamukosihile David odhugudheya?

¹⁶ David wahikosa dhilobo dhabure dhamukubanyiha. Iyene wahimurarutxa Betsabé, wahimpiha mamunaye vina wahitamela ovita muladdu obu. (2 Sam. 12:9) Vamaromo, David wahipwaza mubuwelo waye wamulemela mwaha wa muladduya. Yodhelavoya, iyene wahipatta mandano aye na Yehova vina wahobana muyubuweloni ofiyedha okala muredda. (Masal. 32:3, 4) Txini emukamihedhile David ovilela odhugudheya waniye sabwa ya dhoddawa dhaye? Elobo gani enanikamihedhe nigakosa yoddawa?

17. Nivuru na Masalmo 51:3-6 ninooniha dhavi wi David wahitxinuwa na dhakosiliye?

¹⁷ Olobelege Okumbiraga Oleveleliwa. David wahilobela wa Yehova. Na murima wotxinuwa, iyene wahimwaddela Yehova dhoddawa dhaye. (Kengesa Masalmo 51:3-6.) Eji yahimukamihedha okala wofwaseyene vina wowagalala! (Masal. 32:1, 2, 4, 5) Akala weyo ohikosa dhottega, kutamele ovuba muladdu wawo. Ottiya ejo, na nlobelo omwaddele Yehova dhottega dhawo. Weyo onele ofwaseya vina kunakale wodhugudheyene sabwa ya muladduya. Mbwenye ogafuna wiyelela mandano awo na Yehova, onofwanyela okosa dhilobo dhina ottiya olobela bahi.

18. David orumeelile dhavi olagiwa?

¹⁸ Karumela olagiwa. Yehova vamurumiliye namavuhulela Natan wi avitule dhottega dha David, David katamelile opottotxa makaniya obe ologa wi yakosiliye kiyalitxi yabure. Mohigonela iyene wahinonelamo wi yakosiliye yali yottega, ottiya omuttegela mamuna Betsabé bahi, makamaka w’amuttegele Yehova. David wahirumela olagiwa na Yehova, nona  Yehova wahimulevelela. (2 Sam. 12:10-14) Akala nihikosa yottega enddimuwa, ninofwanyela wawaddela abale attomiwe na Yehova wi anisogorhele. (Tia. 5:14, 15) Vina ninofwanyela orabela opottotxa makaniya. Mohigonela nirumeele olagiwa vina nivirihemo nlagona ninakelihu, dhahene ninele okana wili murenddele vina wagalala.

19. Ninfwanyelela ogana okosa eni?

¹⁹ Kagana ohiyelela okosa dhovonya dhakakene. Mwene David wanziwa wi wanfuna nikamihedho na Yehova, wila adhowegevi arabelaga okosa dhottega dhakakene. (Masal. 51:9, 12, 14) Mmaleliye oleveleliwa na Yehova, David wahigana orabela dhubuwelo dhoputtula. Yodhelavoya jawi, iyene wahikaana wili murenddele wa mmurimani mwaye.

20. Ninawodhe dhavi otonyihedha wi ninotamaalela olevelela wa Yehova?

²⁰ Ninalagihe wi ninotamaalela olevelela wa Yehova, nigalobela nikumbiraga oleveleliwa, nigarumeela olagiwa, vina nigavilibihedha ohiyelela okosa dhovonya dhakakene. Nigafwara ttarho esi, ninele okana wili murenddele wa mmurimani. Mbali James, wakosile dhottega ohinonelamo ebaribari eji. Iyene ohiloga: “Vawaddelimi anddimuwa a mmulogoni yottega yaga, ddahiluluveya sabwani yakalile ninga ddakeliwe muttorho wali vetturini vaga. Ddahiroma okana wili murenddele wa muyubuweloni.” Oziwa wi “Nabuya onoawaddamela ansuveya murima, onowalibiha anojeya,” enonilibiha vaddiddi!—Masal. 34:19.

21. Ninawodhe dhavi opangarhaziwa na Yehova?

²¹ Vowi omagomo wa masiku omariha onowaddamela, dhilobo dhinnitotela odhugudheya dhinelege winjivavi. Ogaroma okana dhubuwelo dhinudhugudha, kugoneele okumbirhe nikamihedho na Yehova. Omusunzege Bibilia n’efunelo yopurelamo. Osunze dhotagiha dha Ana, Paulo na David. Omukumbirhe Babi wa wirimu wi awukamihedhe ononelamo esile dhinutotela odhugudheya. (Masal. 139:23) Omuttiye iyene awukamihedhe makattamiho awo, makamaka abale ahinwodhiwe wakwaniha weka obe wang’anela. Ogakosa dhawene, onokala ninga munasalmo wamwibeli Yehova wi: “Vanthabwa miyo odhugudheya, opangaraza wenyu oddiridhiha murima.”—Masal. 94:19.