1. Nrima naapattile dhavi anamudhi a José?

JAKOBI wannakwela anaye otene, mbwenye wamukweletxa mwanaye José, wana vyaka 17. Abali a José ewamo dhavi? Awene ahimukanela nrima vina ahiroma omwidda. José kakosile elo egamuthukuleli widdiwa na abalaye. Masiki dhawene, awene ahimuguliha ninga mudhari vina ahimuzivalela babiwa wi mwanaye wokweleya wahitakuniwa na enama yawopiha. Nrima nahattukulela awene ogomiha murenddele wa anamudhi vina yahimutotela goi babiwa.—Wita 37:3, 4, 27-34.

2. Mowiwanana na Galásia 5:19-21, nrima nikalele nni na wopiha?

² Mbibiliani, nrima * ninokosa epaddi ya dhilobo “dhinthopa maningo” dhinwodha omuttukulela muttu ohifanya mburo Mumweneni mwa Mulugu. (Kengesa Galásia 5:19-21.) Nrima nipara nimbala misapo dha nddibwi ninga ntxiga, kani, na owali.

3. Txini enasekeserhihu mwari mwa nsunzo ntti?

³ Yotagiha ya abali a José enotonyihedha wi nrima ninowodha otolotxa mandano vina murenddele wa anamudhi. Ebaribari wi iyo kanigakosile ejile yakosile abali a José, mbwenye kanidduwale wi notene nikana murima wosadduwela vina wohiligana. (Jer. 17:9) Nona, enodha opadduwa iyo baniroma wakanela nrima attu ena. Ninfuna none dhotagiha dhing’onovi dha mBibiliani dhinfuna onitxenjerhiha wi ninakaane dhubuwelo dha nrima dhigadhile omela mitxitxi mmirimani mwehu. Omamalelowa ninele osekeserha txini enakosihu wi nirabele nrima vina nitamele murenddele.

4. Sabwaya jani yakosiha Afilistia omukaanela nrima Izaki?

⁴ Okala mureli. Izaki wali mulobwana woreela, nona Afilistia annimukaanela nrima mwaha wa dhorela dhaye. (Wita 26:12-14) Awene ahivuhela matxela a Izaki mwarugiye manje wi avahege dhifuwo dhaye. (Wita 26:15, 16, 27) Ninga Afilistia, masaka abano attu ena anowakanela nrima abale anna dhofuma dhinjene opitta awene. Ottiya ofunavi bahi dhilobo dha attu ena, awene anfuna wi attuya attiye akana dhilobo dhinani.

5. Sabwaya jani yakosiha anddimuwa a makapela omukaanela nrima Yezu?

⁵ Osibiwana merelo apama. Anddimuwa a makapela a Ayuda annimukanela nrima Yezu sabwani attu annimusiba. (Mt. 7:28, 29) Yezu wali mwimeleli wa Mulugu, vina wansunziha ebaribari. Masiki dhawene, anddimuwa abale a makapela anwaza dhottambi wila apigidhe oderetu wa nzina na Yezu. (Mk. 15:10; Jo. 11:47, 48; 12:12, 13, 19) Ninsunzavo eni na nipadduwo ntti? Ninofwanyela owanana efunelo ya wakanela nrima abale anna mweddelo wapama mmulogoni vina ankweliwa na abali otene. Ottiya ejo, ninofwanyela otagiha mikalelo dhawa dha okwela.—1 Kor. 11:1; 3 Jo. 11.

6. Diótrefe otonyihedhi dhavi wi wahikaana nrima?

⁶ Ottomeliwa mabasa mmulogoni. Nsaka zana noroma, Diótrefe wannakaanela nrima abale asogorhela milogo dha Akristu. Iyene wofunetxa “mpaddo munddimuwa” vari va abali a mmulogoni, nona wanloga dhottambi mwaha wa murumiwi Joau vina abali ena wila ahirihiwege na attu. (3 Jo. 9, 10) Masiki nihikosaga ninga mwakosela Diótrefe, ninodha oroma omukaanela nrima mbali mwina ottomeliwe mabasa ajedhelihu wakela—makamaka akala ninubuwela wi nigahikosa mabasaya n’oyesa opitta mbali ottomiwe.

7. Nrima ninladdanihiwa na eni, nanda ninnipatta dhavi?

⁷ Nrima nili ninga taula. Beu eji ya nrima egamela mitxitxi mmirimani mwehu, enodha orutxa oddulamowa. Nrima ninowunuwiha dhubuwelo dhina dhohifwanyelela, ninga aje, ovittukulela vina okumbela vaye. Nrima ninowoga wunuwa wa mikalelo dhapama, ninga okwela, supaje vina oderetu. Nona nigaroma wona wi nrima ninomela mmirimani mwehu ninofwanyela otaulamo mohigoneela. Ninawodhe dhavi orabela nrima?

8. Mikalelo gani dhinawodhe onikamihedha orabela nrima?

⁸ Ninawodhe orabela nrima nigonuwiha oviyeviha vina ovipimelela. Nigonuwiha mikalelo esi mmurimani mwehu, nrima kaninakanemo mburo. Oviyeviha onele onikamihedha orabela ovigwarula. Muttu woviyeviha kanubuwela wi onofwanyela dhinji opitta muttu-muttuvi. (Gal. 6:3, 4) Muttu onlagiha ovipimelela onowagalala na dhinniye vina kangilatela oviladdaniha na attu ena. (1 Tim. 6:7, 8) Muttu woviyeviha vina wovipimelela agamonaga muttu mwina bagavahiwa dhilobo dhapama, iyene onowagalala na muttuya.

9. Mowiwanana na Galásia 5:16 vina Filipi 2:3, 4, muya wokoddela onanikamihedhe okosa eni?

⁹ Wila nirabele nrima ninofuna nikamihedho na muya wokoddela wa Mulugu vina wunuwiha oviyeviha na ovipimelela. (Kengesa Galásia 5:16; Filipi 2:3, 4.) Muya wokoddela wa Yehova onowodha onikamihedha opima dhubuwelo vina dhifunelo dhehu. Na nikamihedho na Mulugu, ninowodha ottiya dhubuwelo dhohifwanyelela banunuwiha  dhubuwelo dhapama. (Masal. 26:2; 51:12) Katanaalela dhotagiha dha Mizé na Paulo, alobwana awodhile opemberha nrima.

10. Yopadduwa gani egakalile yoweha wa Mizé? (Kang’ana foto ya kapa.)

¹⁰ Mizé wahikaana ettomo enddimuwa vari va nlogo na Mulugu, mbwenye kana aje na gari eji. Motagiha, mudhidhi dhahi, Yehova wahittapamo vang’onovi guru dha muya wokoddela wali mwa Mizé bavaha anddimuwa akadda Izrayel ali vansajarhani. Mwa mudhidhi mung’onovi, Mizé wahiwa wi anddimuwa eeli ahadhowile omusasani ahakela muya wokoddela vina ahiroma okala ninga anamavuhulela. Txini yakosile Mizé mwakumbirhile Josuwé wila aamalihe anddimuwa abale eeli? Mizé kakaaneli nrima alobwana abale eeli akamihedhiwe na Yehova. Ottiya ejo, na oviyeviha Mizé wahagalala nawene sabwa ya gari yakelilani. (Oleb. 11:24-29) Ninsunzavo eni na yotagiha eji ya Mizé?

11. Anddimuwa a mmulogoni anamutagihe dhavi Mizé?

¹¹ Akala weyo wa munddimuwa wa mulogo, wahiromaga okumbirhiwa wi omushagihe muttu mwina wi asogorhele mabasa a mmulogoni anuzivela? Motagiha, txino weyo onoziveliwa weddiha Nsunzo na Mwang’aneli sumana dhotene. Mbwenye ogakala muttu woviyeviha ninga Mizé, kunawove ogakumbirhiwa omushagiha mbali mwina, wi na mudhidhiya awodhege osogorhela mabasaya. Ottiya ejo, weyo onele wagalala omukamihedha mbalawo.

12. Akristu enjene a masaka abano antonyihedha dhavi ovipimelela vina oviyeviha?

¹² Katanalela nipadduwo ntti nina ningumanagana abali enjene owunuwelavo. Anddimuwa a mulogo anlaba ninga asogorheli a nikuru na anddimuwa a mulogo (Coordenador de Corpo de Anciãos) agakwaniha vyaka 80, na oviyeviha anottiya mabasaya battomela abali ena. Anameddelela milogo agakwaniha vyaka 70, n’oviyeviha anottiya mabasa awa vina anorumeela ottomeliwa mabasa mena anvahiwani. Ovanenevi, anamudhi enjene alaba o Betel ahittomeliwa mabasa maswa a olaba ninga apionero. Abali na arogora aba ororomeleya kanakanela ntxiga abale attomeliwe mabasa akosani.

13. Txini egamuthukuleli Paulo wakanela nrima arumiwi 12?

¹³ Murumiwi Paulo yotagiha yina yapama ya muttu wunuwihile oviyeviha vina ovipimelela. Paulo kattiyile wi nrima nunuwe mmurimani mwaye. Iyene wahilaba na guru mmabasani a olaleya, mbwenye n’oviyeviha ohiloga: “Txibarene, miyo mwa arumiwi ddilí mimayámo; kinddifwanyela withaniwa murumiwi.” (1 Kor. 15:9, 10) Arumiwi 12 annifwara Yezu mmabasani a olaleya bali velaboni ya vati, oku Paulo odhile okala Mukristu mmaleli Yezu okwa vina ovenyihiwa mukwani. Masiki osogorhowa vadhiliye okala ‘murumiwi wa amalabo,’ Paulo kaakelile gari yavawoka ya okosa mpaddi wa arumiwi 12. (Rom. 11:13; Mer. 1:21-26) Paulo kakaanela nrima arumiwi abale 12, nne vina wagalala wanani na Yezu, ottiya ejo, iyene wanagalala na mabasa aniyena.

14. Txini enakosihu nigakala attu oviyeviya vina ovipimelela?

¹⁴ Iyo nigakala attu oviyeviya vina ovipimelela ninga Paulo ninele watonyihedha nriho abale attomiwe na muya wa Yehova. (Mer. 21:20-26) Iyene ohattoma alobwana aba okuluveleya wi asogorhelege milogo dha Akristu. Akalilevi ohakwana Yehova onowawoona ‘athu aba ninga mivaho.’ (Ef. 4:8, 11) Nigaarihaga alobwana aba attomiwe vina nigewelela malago awa n’oviyeviha, ninele  okala ofiyedheya na Yehova vina ninele okana murenddele na abalihu.

15. Txini enfwanyelihu okosa?

¹⁵ Nigattiya nrima wunuwa mmirimani mwehu kaninawodhe okana murenddele na attu ena. Ninofwanyela otaulamo ezinddiyelo ya nrima mmirimani mwehu vina nirabele otxeya dhubuwelo dha nrima mmirimani mwa attu ena. Ttarho esi samakamaka nigafuna wiwelela nikokomezo na Yehova nawi “nitamele dhinnifwanyiha murenddele, vina wunuwihana muroromelani.” (Rom. 14:19) Txini enakosihu wi nakamihedhe attu ena orabela nrima, nanda ninawodhe dhavi wunuwiha murenddele?

16. Ninawodhe dhavi wakamihedha attu ena orabela nrima?

¹⁶ Mweddelo na merelo ehu anowodha wapakela attu ena. Elabo ejino enonikwekwettela “ovithukulelana muhaku.” (1 Jo. 2:16) Mbwenye mweddelo obu onowunuwiha nrima. Wi niwodhe orabela wunuwiha nrima mmurimani mwa attu ena, enofuneya ohilogaga mudhidhi wotene dhilobo dhinihuna obe dhinfunihu ogula. Mukalelo mwina wa orabela wunuwiha nrima bwa okala attu okurumuwa na ettomo enihuna mmulogoni. Ogilatela ologaga mwaha wa ettomo enihu munikuruni mwa Yehova, enkala ninga ninsasanyedha mattaka ofewa vanfuna wunuwa nrima. Ottiya ejo, nigalagihaga efunelo ya wazuzumela vina wasiba attu ena mwaha wa  dhilobo dhapama dhinkosani, ninowakamihedha okala ovipimelela vina ninele wunuwiha murenddele na wiwanana wa mmulogoni.

17. Txini ewodhile okosa abali a José, nanda sabwaya jani?

¹⁷ Enowodheya opemberha nrima! Katanalela wili yotagiha ya abali a José. Mvireli vyaka dhinji bamalile omoniha goi José, awene ahidha onfanya Mwijipitu. José ahinatti oviziwiha w’abalaye, iyene wahaweha wi awoone akala ahitxinja. Iyene wahikosa masasanyedho a wavaha yoja, venevo wahenjedhedha oja mmuziyoni mwa mbalaye mung’onoya, Benjamim, opitta mwa abalaye ena. (Wita 43:33, 34) Mbwenye kavali nlagiho ninooniha wi abalaye ahimukanela nrima Benjamim. Ottiya ejo, awene ahimuzuzumela vaddiddi mbalawa vina babiwa, Jakobi. (Wita 44:30-34) Sabwa ya abali a José oddulamo nrima mmirimani, awene ahiwodha wimetxa wili murenddele wa anamudhi awa. Yakakene, nigaddulamo dhubuwelo dha nrima mmirimani mwehu, ninele wakamihedha amudhihu vina abalihu a mmulogoni okaanavi murenddele.

18. Mowiwanana na Tiago 3:17, 18, txini enapadduwe akala ninokamihedha wunuwiha murenddele?

¹⁸ Yehova onfuna wi iyo nirabele nrima vina nitamele murenddele. Egali dhahene enofuneya ovilibihedha wila niwodhe okosa dhilobo esi dhobili. Ninga monelihu mwari mwa mutoma obu, iyo nikana ekalelo yotedemanela nrima. (Tia. 4:5) Vina ninkalawo mwilaboni muli attu anunuwiha nrima. Mbwenye nigonuwiha oviyeviha, ovipimelela vina wavaha ttima attu ena, kaninattiye nrima omela mitxitxi mmurimani mwehu. Ottiya ejo, ninele osasanyedha mattaka anawodhe wunuwiha misapo dholigana dhindana murenddele.—Kengesa Tiago 3:17, 18.