1. Iyo ninfunelani malago, nanda ekalelini yamakamaka?

IYO NOTENE mudhidhi na mudhidhi ninofwanyela wakela malago. Dila dhina ddihiyo onroma omukumbira mbali wi anivahe malago. Mpaddi mwina mbali aganona wi ‘ninovirigana’ onodha banivaha malago. (Gal. 6:1) Masaka mena ninovahiwa malago na mukalelo wa onisisigula nigakosa yottega enddimuwa. Kintanala mukaleloya onvahiwihu malago, iyo ninofwanyela ovuruwana. Okosa eji japama vowi ninodha ovuna egumi yehu!—Gano 6:23.

2. Mowiwanana na Gano 12:15 ninfwanyelela eni ovuruwana malago?

² Nlebo na nsunzo ntti ninonikokomeza ‘ofwaseyela ovuruwana enloga attu a malago.’ (Gano 22:17) Kawo muttu onziwa dhilobo dhotedhene; nona anele okalawo muttu ona eziwelo obe onziwa okosa dhilobo pama opitta iyo. (Kengesa Gano 12:15.) Nona ovuruwana malago ezinddiyelo ya olagiha ovyeviha. Vina eji enonubutxedha wi akala vangomelihu; japama okumbira malago nigafunaga wakwanihedha dhogana dhehu. Muziwetxi Mwene Salomau wahivudheleliwa oleba dhahi: “Osogorha wa mabasa oli na ovuza zelu.”—Gano 15:22.

3. Iyo ninakela malago na mukalelo gani?

³ Iyo ninowakela malago opottowa na malago ohipipiriheya. Txini entapulela malago opottowa? Iyo wengesa elobo mBibiliani obe mmapublikasauni mwehu ennittukulela otxinja mubuwelo vina merelo ehu. (Aheb. 4:12) Eji enkuweliwa malago opottowa. Txini entapulela malago ohipipiriheya? Munddimuwa wa mulogo obe mbali mwina oliba omuyani onaddela wi ninofwanyela osisigula elobo mwigumini mwehu. Ntti ninkuweliwa  nlago nohipipiriheya. Muttu onnikwela venjene aganivaha malago andela mBibiliani iyo ninofwanyela woniha otamalela wehu modhela ovuruwana vina ovirihamo malagoya anivahiliye.

4. Mowiwanana na Kohelét 7:9, dhubuwelo gani dhinfwanyela iyo orabela nigakela malago?

⁴ Enorutxaga venjene wakela malago ohipipiriheya. Vina ninofiyedhaga onyimuwa. Sabwaya? Vowi nili attu ohiligana enokalaga yorutxa wakela malago annivaha muttu sabwa ya elobo evonyilehu. (Kengesa Kohelét 7:9.) Ninodhaga otamela mikalelo dhovibarela. Iyo ovivuzaga: Txini emuttukuleli oddivaha nlago? Vina mukalelo oddivahiliye kaddiziveliwe. Ninodhaga omunyanyuwela namavaha malagoya nilogaga: ‘Onddivahelani malago? Iyene kana dhovonya dhaye?’ Nlagona nivahiwihu akala kaniziveliwe, iyo ninopwaza odhowa onvuza muttu mwina wi anivahe nlago ninanizivele.

5. Txini enasekeserhe iyo mwari mwa nsunzo ntti?

⁵ Mwari mwa nsunzo ntti, ninele osekeserha dhotagiha dhinfwanyeya mBibiliani dha attu akoddile malago vina attu arumelile. Ninele osekeserha dhilobo dhinanikamihedhe orumela malago vina dhopurelamo dhinakelihu nigavirihamo malagoya.

6. Txini ensunzihu na mukalelo wakelile Mwene Roboau malago?

⁶ Karoma otanalela yotagiha ya Roboau. Mukaleliye mwene wa ana Izrayel nlogo nahidha ologa na iyene. Awene ahimuloba wi avugulele mabasa vina kanga yolemela yamagelile babe Salomau. Venevo Roboau odhowa wavuza anddimuwa a mu Izrayel wi one txini egakuliliye nlogo. Anddimuwa abale ahinvaha malago a wi, agavuruwana enloga nlogo, nlogona ninele omukamihedha. (1 Amwe. 12:3-7) Roboau kaziveliwe na malago avahiwiye nona wahidhowa otamela malago na azombwe akwaye onuwile na iyene. Enoneya wi alobwana abo ana vyaka 40, vina ana mirugu dhakene na Roboau. (2 Map. 12:13) Mokubanyiha, ahinvaha Roboau malago ohikala. Awene ahimwaddela wi enjedhedhe muttorho wa nlogo. (1 Amwe. 12:8-11) Na monelo esi minli dhottiyana Roboau wanfwanyela omutamela Yehova wi aziwe monelo gani wafwanyeliye ofwara. Ottiya ejo, iyene ofwarile malago anvahile azombwe akwaye. Yodhelavoya yahimutotela makattamiho Roboau vina nlogo na Izrayel. Masaka abano, kahiye dila dhotene dhinakelihu malago annizivela. Masiki dhawene akala malagoya anda Munzuni na Mulugu, ninofwanyela wiwelela.

7. Txini ennisunziha yotagiha ya Mwenye Uziya?

⁷Mwene Uziya wahikodda wakela malago. Iyene welovolowa mumparhani mwa Yehova wi amuddumeye lubani mabasa arumeliwa bahi anamakutta. Venevo anamakuttaya ahimulogana dhahi: ‘Nyuwo mwene Uziya, omuddumeyela lubani Yehova kahiye mabasa a mwene! Aba mabasa attomeliwe anamakutta.’ Txini ekosiliye? Kowiliwa Uziya elovyeviha barumela malago nanda babudduwa momaguva mumparhanimwa, Yehova agahimulevelela. Ottiya ejo, “Uziya . . . osilidheya venjene na anamakutha abale.” Txini emuttukuleli okodda malago? Iyene obuwela wi sabwa ya okala mwene wahikana mwaha wa okosa elobo-elobovi yafuniye mbwenye Yehova kona dhawene. Edhile opadduwa sabwa ya opanela wa Uziya? Iyene wahipattiwa na maranya vina “maranyaya ahimuwaddelavi mpaka okwa waye.” (2 Map. 26:16-21) Yotagiha ya Uziya ennisunziha wi kintanala elihu, akala ninokodda malago andela mBibiliani ninele oyelela mandano ehu na Yehova.

8. Muvahiwe Job malago okosile eni?

⁸ Mottiyana na dhotagiha dha attu ahirumelile malago, mBibiliani ninofwanyamo dhotagiha dhapama dha attu arelihiwe sabwa ya wakela malago. Katanalela yotagiha ya Job. Masiki iyene vamoviye Mugulu, wali muttu ohiligana. Sabwa ya ejiwene wahifiyedha ologa dhilobo dhohikala. Edhile opadduwa, iyene wahivahiwa malago ohipipiriheya na Eliyú vina Yehova. Txini edhiliye okosa? Iyene wahivyeviha vina wahakela malagoya. Vasogorhova Job ohiloga: “Dhilogilemi kahiye mwenemo . . . Ddinoupigirihelani vambwebweni, vamunddurani.” Yehova wahimureliha Job sabwa ya ovyeviha waye vina wakela malago.—Job 42:3-6, 12-17.

9. Muvahiwe Mizé malago okosile eni nanda iyene okalileni yotagiha yapama?

⁹Mizé yotagiha yapama ya muttu orumelile wakela malago mukosiliye yottega enddimuwa. Nsaka dhahi iyene wahittiya ovyang’anela, venevo batowa nriho na Yehova. Sabwa ya ejuwene, Mizé wahiyelela gari yovolowa Mwilaboni Yolibeliwa. (Oleb. 20:1-13) Mulogiliye na Yehova wi amuttiye ovolowa Mwilaboni Yolibeliwa Yehova wahimwakula dhahi: “Kàmala, kuddikalele ntidi n’ejuwene.” (Olib. 3:23-27) Mbwenye Mizé kasiliziwe. Iyene wahakela malago a Yehova vina Yehova wahidhowavi amulabihedhaga ninga musogorheli wa nlogo na Izrayel. (Olib. 4:1) Job na Mizé ahittiya yotagiha yapama enfwanyela iyo ofwara nigavahiwa malago. Job wahisisigula monelo waye; vina katamelile ovibarela. Mizé wahoniha wi wahakela malago a Yehova sabwa ya okalavi ororomeleya masiki mmaleliye oyelela gari yovolowa Elabo Yolibeliwa.

10. (a) Gano 4:10-13 enoniha dhopurelamo gani dhowakela malago? (b) Yimelelo gani enlagiha abali ena agavahiwa malago?

¹⁰ Iyo ninopurelamo venjene nigafwara dhotagiha dha alobwana aba ororomeleya Job na Mizé. (Kengesa Gano 4:10-13.) Abali na arogora enjene ankosa yakakene. Kona ekosile mbali Emmanuel onkala o Congo, iyene ohiloga dhahi sabwa ya nlago nakeliliye: “Abali oliba omuyani a mmulogoni mwaga ahona wi ddahikana makattamiho mpaddi womuyani nona ahidha oddikamihedha. Miyo ddahivirihamo nlagona naddivahilani, vina eji ehiddikamihedha orabela makattamiho agadhile opadduwa.” * Pionera dhahi onkuweliwa Megan onkala o Canadá ohiloga: “Nlago nivahiwemi kanaddiziveli mbwenye ttinttuwene nafunemi.” Mbali Marko onkala o Croácia ohiloga dhahi: “Miyo ddahiyelela ettomo yana miyo mmulogoni, mbwenye ddihinonelamo wi nikamihedho nakelilimi nihiddikamihedha olibiha wili mandano aga na Yehova.”

11. Txini yonilemo Mbali Karl Klein sabwa ya wakela malago?

¹¹ Yotagiha yina ya muttu opurelilemo sabwa ya wakela malago ddi Mbali Karl Klein okosile mpaddi wa Nikuru Nolamulela. Mu nipadduwoni naye na mwigumini Mbali Klein ohiloga wi ohikalawo mudhidhi wavayiweye nlago nohivegana na mbali Joseph F. Rutherford, odduwene wali mukwaye wofiyedheya. Mbali Klein onologa wi vamaromo kewamo pama sabwa ya nlago navahiwime. Iyene bela dhahi: “Siku nina [Mbali Rutherford] wahiddilejela, ‘Bom dia Karl!’ Vowi miyo ddali osilidhiwene ddamwakulile na mazu ohiweya. Iyene wahiddakula dhahi, ‘Karl, okale txenjewa! Satana oli odduni wawo!’ Miyo na manyazo omwakula, ‘Kuli elo, Mbali Rutherford.’ Mbwenye iyene wanziwa pama yalogiye, wahiyelela, ‘Ebaribariya jijuwene. Okale txenjewa. Satana oli odduni wawo.’ Eji yalogiye yali  ebaribari! Akala ninomukoyela mbali ntxiga sabwa ya onaddela elobo enoniye wi japama . . . , nininvaha mburo Satana.” * (Ef. 4:25-27) Mbali Klein wahirumela nlago nanvahile Mbali Rutherford vina ahidhowavi alibihaga mandano awa.

12. Ovyeviha onanikamihedhe dhavi wakela malago? (Masalmo 141:5)

¹² Txini enanikamihedhe wakela malago? Ninofwanyela okala attu ovyeviha nubuwelaga wi sabwa yokala attu ohiligana dila dhinjene ninovonya nona enofuneya wakela malago. Dhahene ninga mumalelihu osekeserha dhotagiha dhivirile, Job wahikana monelo wohifwanyelela. Mbwenye vasogorhova wahitxinja nanda Yehova wahimururiha. Sabwaya? Sabwani Job wali wovyeviha. Iyene wahoniha ovyeviha waye sabwa ya wakela malago anvahile Eliyú, masiki Eliyú valiye muzombwe opitta iyene. (Job 32:6, 7) Na mukalelo wakakene ovyeviha onele onikamihedha wakela malago masiki nigona wi kaniziveliwena mukalelo ovahiwehu nlagona obe akala oleya onnivaha nlagona muzombwe opitta iyo. Munddimuwa dhahi wa mulogo onkala o Canadá ohiloga, “Vowi iyo kaninwodha ovyona nanya ninawodhe dhavi wunuwa agahikalewo muttu wonivaha malago?” Iyo ninofwanyela wunuwiha mikalelo dhapama dhimbala muya wi nikale anamasunziha apama vina niwodhege olaleya miselu dhapama na ttotto.—Kengesa Masalmo 141:5.

13. Ninfwanyela wona dhavi malago anakelihu?

¹³Wonege wi ovahiwa malago okwela onulagiha Yehova. Yehova onnifunana ejile eli yamakamaka. (Gano 4:20-22) Yehova onolagiha onikwela waye mwa onivaha malago andhela mBibiliani, mmapublikasauni vina walabihedha abali oliba mpaddi womuyani. ‘Mulugu onnilagela opama wehu’ jijene enloga Ahebreu 12:9, 10.

14. Txini enfwanyelihu ozuzumela nigavahiwa malago?

¹⁴Ozuzumelege nlago ninvahiwiwe ottiya namavahaya. Dila dhina ninodhaga wubuwela wi malagoya kanivahiwe na mukalelo wofwanyelela. Txibarene ole onvaha malago onofwanyela ovevutxa nlagona wi nihirutxe orumelawa. * (Gal. 6:1) Mbwenye akala ddi iyo onvahiwa malagoya—ninofwanyela ozuzumela nlagona ottiya ozuzumela mukalelo onvahiwehu. Ninofwanyela ovivuza: ‘Masiki akala nlagona kaddivahiwe na mukalelo wofwanyelela ejileya elogiwe ebaribari? Ddinele opwaza dhovonya dhaye wi ddizuzumele nlago ninddivahiye?’ Egahikala ya malago otamela makalelo wopurelamo malagoya anvahiwihu.—Gano 15:31.

15. Ninfwanyelela eni okumbira malago?

¹⁵ Bibilia ononikokomeza otamela malago. Gano 13:10 enloga dhahi: ‘Ononelamo onkala mwa attu antamela malago.’ Abale antamela malago anowunuwa mpaddi womuyani opitta abale ahinkumbira malago. Nona kakana efunelo yoveda malago.

16. Dhilobo gani dhiganittukuleli okumbira malago?

¹⁶ Mudhidhi gani onfwanyela iyo omuloba mbali obe murogora malago? Karoma otanalela dhotagiha esi. (1) Murogora onomukumbira murogora mwina ona ewodhelo yoweddiha masunzo pama wi eddihe nsunzo, omamalelowa onomukumbira malago anamukamihedhe okala namalaleya wa ttotto. (2) Murogora wa muziye onogana ogula dhowabala venevo omukumbira murogora mwina woliba omuyani wi avahe monelo wohipipiriheya sabwa ya makaniya. (3) Mbali onottomeliwa dila yoroma okosa diskursu mmulogoni. Venevo iyene omukumbira mbali odhile vawale akosaga madiskursu wi awodhe omukamihedha dhipaddi dhinfwanyeliye wogolela. Mwa mpaddi mwina, mbali odhile akosaga madiskursu mwa vyaka dhinjene, egahikala yapama omukumbira malago mbali onkosa madiskursu na ttotto vina ovirihamo malagoya anavahiwiye.

17. Ninapurelemo dhavi nigakela malago?

¹⁷ Sumana eso obe myeri eso dhindawo, iyo notene ninele wakela malago. Txino malago opottowa obe ohipipiriheya ejo egapadduwa kobuwela esi dhimalile iyo osunza. Okale wovyeviha. Ozuzumele nlagona nivahiwiwe ottiya namavahaya. Ovirihemo nlagona ninakeliwe. Kavo wa iyo obaliwe aziwaga dhilobo dhotene. Nona “akelá olagiwa rumelá osumululiwa,” Nzu na Mulugu ninologa wi ogakosa dhawene “onodha okala muziwetxi.”—Gano 19:20.