1. Dhilobo gani dhapama dhinkosa nlogo na Mulugu?

VYAKA dhinjene mundduni Bibilia wahibaza ologa wi nlogo na Mulugu ‘nigahivilevela ottidda mabasa’ aye nisogorheliwaga na Mwanaye. (Masal. 110:3) Nivuhulo ntti ninowakwanihedheya masaka abano. Yaka-yaka alabeli ororomeleya a Yehova, anononga mawora matxikwi na matxikwi mmabasani a olaleya, awene ankosa mabasa aba na ovilevela, anolabihedha vina mudhidhi wawa wi akamihedhe abaliwa mpaddi womaningoni, womuyani vina anowavaha nipangarhazo. Abali ena attomeliwe wasogorhela anononga mudhidhi mwinji asasanyedhaga dhipaddi dha matugumano vina anowaweddelela abali na arogora wi apangarheze. Txini enattukulela okosa mabasa aba? Okwela—omukwela Yehova vina wakwela attu.—Mt. 22:37-39.

2. Ninga munlogela Roma 15:1-3, yotagiha gani ettiyile Yezu?

² Yezu ohittiya yotagiha yapama yawika dhifunelo dha attu ena osogorho wa dhaye. Iyo ninovilibihedha ofwara ttarho dhaye. (Kengesa Roma 15:1-3.) Abale animutagiha anele opurelamo venjene, sabwani Yezu ohiloga dhahi: “Ovaha onothabiha opitha ovahiwa.”—Mer. 20:35.

3. Elobo gani enasunze iyo mwari mwa nsunzo ntti?

³ Mwari mwa nsunzo ntti, ninele osekeserha dhilobo dhing’onovi dhinoniha wi Yezu wankosa guru ya wakamihedha attu ena. Vina ninele wona enanikamihedhe ofwara malago aye, omamalelowa ninele wona dhilobo dhinanikamihedhe wonuwiha efunelo yawakamihedha attu ena.

4. Yezu wikile dhavi dhofuna dha attu ena vamburoni voroma?

⁴Yezu wanvilevela wakamihedha attu ena masiki balemile. Siku dhahi Yezu wahimala omattiyu wantero alobelaga.  Mmangwananimwa, muttitti wa attu wahimutamela nanda anfwanyile vamwangoni waddamela murudda wa Kafarnau. Elobo gani ekosiliye, ebaribari wi iyene wahilema mbwenye voniliye muttittiya wahaweddela ttagaraga ayelegi vina aredda alivo. Venevo wahiroma wapangarhaza na miselu dholibiha vaddiddi dhinziwiwa—ninga Diskursu ya Vamwangoni.—Lk. 6:12-20.

5. Amazambo a ntakulu anatagiha dhavi mubuwelo wa Yezu wa wazuzumela attu ena masiki balemile?

⁵Amazambo a ntakulu anafware dhavi yotagiha ya Yezu? Karoma otanaalela dhahi: Mazambo wa ntakulu ohiworuwa omabasani wolemene. Labona ntto ahikaana Nsunzo na Ntakulu nanda oroma wubuwela olupihedha labo nina, mbwenye ahinatti, omuloba Yehova wi anvahe guru ya weddihana nsunzona. Yehova wakula nlobelo naye venevo owodha osogorhela nsunzona. Vansunzoniva anaye osunza malago amakamaka, nanda awene ozinddiyela wi ejiya ewodheyile sabwa ya amambali awa weka dhofuna dha Yehova vamburoni woroma.

6. Kavaha yotagiha enoniha wi Yezu wanazuzumela attu ena masiki afunaga okala yeka?

⁶Yezu wanazuzumela attu ena masiki afunaga okala yeka. Onowodha otanalela okubanya wana Yezu mwaziweliye wi mukwaye Joau Batista wahipiwa? Kavali waganyedha, iyene wahikumuwa venjene. Bibilia onloga dhahi: “Yezu mwiwaliye sabwa ya [okwa wa Joau Batista] ovenya owela mmwanddiyani, odhowa okala vaye-vene.” (Mt. 14:10-13) Iyo ninowodha ononelamo yamuttukuleli Yezu odhowa okala vaye-vene. Enji wa iyo anoziveliwa okala vawa-vene agakubanyaga. Mbwenye kayawodheyile Yezu okala vaye-vene. Sabwani muttitti wahinfwara banfwanya okule wadhowiliye. Iyene wewilemo dhavi? Moneliye muttitti obule wa attu nanda atanalela dhojombeliwa dhawa, “thagaraga ehimwedda.” Iyene wahinonelamo wi attu abale anveda nikamihedho vina nipamgarhazo nadha wa Mulugu. Venevo “iyene wahiroma wasunziha [ottiya dhilobo dhing’onovi] mbwenye dhinjene.”—Mk. 6:31-34; Lk. 9:10, 11.

7-8. Kavaha yotagiha enoniha wi anddimuwa a mmulogoni anomutagiha Yezu vageteya dhofuneya.

 ⁷Anddimuwa a mmulogoni anamutagige dhavi Yezu? Iyo ninotamalela venjene mabasa ankosa anddimuwa a mmulogoni wi anikamihedhe. Mabasa menjene ankosani kanoniwa na attu enjene a mmulogoni. Motagiha, vagapadduwa muselu wa namaguve, Nikuru na Abali Anlaba Mumodhani na Masipitale anovenya momaguva wi adhowe akamihedhe abali na arogora. Masaka mena museluya wa namaguve, anakela vari va mattiyu! Mbwenye sabwa ya waweddela ttagaraga abali na arogora afwanyiwe makattamiho, anovenya namattiyu-wene wi adhowe akamihedhe. Awene anowika dhofuna dha abali awa vamburoni woroma attiyaga dhofuna dha anamudhi awa.

⁸ Anddimuwa a mmulogoni anokamihedha mabasa omaga Numba dha Omwene, ovenyihedha vina anokamihedha egapadduwa efoyo. Awene vina anottukula mudhidhi mwinjene apangarhazaga vina akamihedhaga abali a mmulogoni mwawa. Iyo ninofwanyela watamalela abali aba otene vamodha na amudhawa. Ninokuluvela wi Yehova onele odhowavi akamihedhaga sabwa ya oderetu wawa! Moligana na mbali-mbalivi, anddimuwa a mmulogoni anofwanyela ovipimelela. Kili yofuneya awene onongela mudhidhi mwinjene na dhofuneya dha omwene oku attiyaga dhofuneya dha amudhawa.

9. Mowiwanana na Filipi 2:4, 5, Akristu otene anfwanyela wunuwiha mubuwelo gani?

⁹ Kengesa Filipi 2:4, 5. Nlebo ntti ninonisunziha wi kahiyo anddimuwavi bahi a mmulogoni  anfwanyela wakamihedha attu ena. Iyo notene ninofwanyela wunuwiha mubuwelo wakene wana Yezu Kristu wawakamihedha attu ena. Bibilia onloga dhahi iyene “othukula yeddelo ya mwimeleli.” (Fil. 2:7) Karoma otanalela ennisunziha versu eji. Ttima ya mudhari obe mwimeleli jowang’ana wi one akala onorumiwa mabasa anamwagalalihe nabuye. Jijuwene vina empadduwa, iyo ninga adhari a Yehova, ninotamela wang’ana akala ninokosa mabasa wi nakamihedhe abalihu. Kavali waganyedha wi iyo nikana efunelo yolabihedhiwa venjene na Yehova vina na abalihu, ndowe nitanalele malago mang’onovi ananikamihedhe okosa ejuwene.

10. Mavuzo gani anfwanyela iyo ovikosa?

¹⁰Orome otanalela mubuwelo wawo. Karoma ovikosa mavuzo aba: ‘Ddili womala-nawale wi ddakamihedhe attu ena? Motagiha, ddigewilemo dhavi kuwiliwa ddele okumbirhiwa na anddimuwa a mmulogoni wi ddidhowe ddamoone mbali obe murogora oli muredda vanive obe ddimukamihedhe murogora wawunuwelavo odhowa omatugumanoni? Ddili womala-nawale wi ddikamihedhe egafuneya okuputta Vanumbani ya Omwene obe mimburo dhinkosiwa matugumano manddimuwa?’ Iyo nigaviperheka wa Yehova ninompikirela wi ninele omulabela na dhotene dhina iyo, iyene ofuna wi nilabihedhe mudhidhi wehu, guru dhehu dhokana dhehu wi—nakamihedhena attu ena. Ovano nigona wi ekalavo elobo enjoba txini enfwanyela iyo okosa?

11. Olobela onaukamihedhe dhavi wunuwiha efunelo yowakamihedha attu ena?

¹¹Omulobelele Yehova na murima wotene. Karoma otanalela, akala weyo wamwinya onozinddiyela wi kuna elemelelo yowakamihedha attu ena, onawodhe dhavi otxinja mubuwelo wawo? Akala eli dhawene kamulobelele Yehova na murima wawo wotene, kaloga ebaribariya, omwaddele Yehova eniwamo weyo, omulobe wi auvahe ‘guru vina efunelo yowirana ejile enfuniwe okosa.’—Fil. 2:13.

12. Mbali wa muzombwe wobatiziwa onawodhe dhavi okamihedha mmulogoni?

¹² Weyo akala oli mbali wa muzombwe wobatiziwa, kamukumbirhe Yehova wi aukamihedhe okana efunelo yowakamihedha abali na arogora a mmulogoni mwawo. Dhilabo dhina dhihikana anddimuwa enjene a mmulogoni opitta emeleli orumeliwa, mwa emeleli abo orumeliwa enjiya abali owunuwelavo obe anakalaba. Vowi nikuru nehu ninodhowavi nunuwaga, enofuneya abali enjene a azombwe wi adhowegevi bagakamihedha nikuru na Yehova. Weyo ogakala womala-nawele wi odhowe wakamihedhe wego kuwego onjobeliwa anamalaleya onele wagalala. Sabwaya? Sabwani onele odhowagavi bugamulabela Yehova vina abali na arogora anelege ouloga pama sabwa ya wona efunelo yawo ya ovilevela wakamihedha attu ena.

13-14. Ttarho gani dhinfwanela iyo otanalela nigakamihedhaga abali na arogora? (Kang’ana foto ya kapa.)

¹³Nizuzumele dhojombeliwa dha attu ena. Murumiwi Paulo wahakokomeza Ahebreu na mazu aba: “Muhidduwale wira dhapama, mukamihedhagana na dhinnenyuna, vowi mikutho dhinimuzivela Nabuya, sisene.” (Aheb. 13:16) Nlago ntti nali namakamaka! Kavavirile mudhidhi mwinjene mwamalilani wakela karta eji, Akritu akala o Judeya yanfwanyela ottiya numba dhawa, marhondda awa vina amudhawa ahali Akritu wi ‘attawele omwangoni.’ (Mt. 24:16) Mudhidhi obule kavali waganyedha wi yanfuneya okamihedhana muttu na mukwaye. Abale ewelele nlago  nttile na murumiwi Paulo kattihile ogawana dhanani na akwawa, vina eji yahakamihedha okalagawo na dhilobo dhing’novi dhagumelani.

¹⁴ Kahiye mudhidhi wotene onnaddela abali na arogora dhojombeliwa dhawa. Motagiha, mbali okweliwe mwadhiye onokubanya venjene. Koddi mbali oddu onele oveda nikamihedho na dhoja, boleya obe okoseliwa mabasa a vatakulu? Iyene txino onodhaga ohiloga elobo ovaga onilemeliha muttorho. Mbwenye onele otamalela venjene iyo nigamukamihedha na dhojombeliwa dhaye. Kanubuwele wi txino ohikalawo muttu onimukamihedha obe wi iyene kovedega nikamihedho agahinaddela. Kavikose nivuzo ntti: ‘Kowiliwa miyo ddahifwanyiwa makattamiho akakene, ddigaziveliwe wakela nikamihedho gani?’

15. Txini enfwanyela iyo okosa akala ninfuna nakamihedhe attu ena?

¹⁵Okale wofiyedheya. Kavali waganyedha wi weyo onowaziwa abali na arogora a mmulogoni mwawo ana elemelelo yawakamihedha attu ena. Awene kanubuwela wi iyo nili muttorho wawa, vina kaninaganyedha wi nigakana dhojombeliwa awene anele onikamihedha, iyo ninotamela okala ninga awene. Murogora dhahi onkuweliwa Alan wa vyaka 40, onovilibihedha okala muttu wofiyedheya, atamelaga omutagiha Yezu, Alan ohiloga dhahi: “Yezu kakanetxa mudhidhi mbwenye attu ottiyana-ttiyana ankala ofiyedheya na iyene vina kakana manyazo omukumbirha nikamihedho. Awene amona ninga muttu-muttuvi wali womala-nawale wi akamihedhe. Miyo ddinfuna ddikane monelo wakane wa Yezu, vina ddinfuna attu addiziwe ninga marho wofiyedheya onatanala attu ena.”

16. Ovirihamo mazu a Masalmo 119:59, 60 enanikamihedhe dhavi ofwara yotagiha ya Yezu?

 ¹⁶ Iyo kaninfwanyela okumuwa nigona wi kanifwarile ttarho dha Yezu mowakwana-mwene. (Tia. 3:2) Namasunza kankosa dhilobo dholigana agamutagihaga namasunziha waye. Iyene onele osunza na dhovonya dhaye vina onele ovilibihedha omutagiha namasunziha waye mpaka apale vanwodheliye, agera dhawene iyene onele odhowagavi bagenjedhedha eziwelo yaye. Na mukalelo wakakene, iyo nigavirihagamo esile dhisunzilehu va nsunzoni na omwinya, nikosa bari apale vanwodhela iyo wi nisisigule dhovonya dhehu, dhokosa dhehu dhigansogora vina ninele odhowagavi banigafwara ttarho dha Yezu.—Kengesa Masalmo 119:59, 60.

17-18. Ninawodhe dhavi otagiha mubuwelo wakene wa Yezu wa wazuzumela attu ena nanda ninakane dhopurelamo gani?

¹⁷ Iyo nigakala womala-nawele wi nakamihedhe attu ena, eji enele wattukulela ena wira yakakene. Munddimuwa dhahi wa mulogo onkuweliwa Tim ohiloga: “Iyo nahikana muzombwe dhahi wakosile guru yowunuwa mpaddi womuyani vasogorhova attomiwa ninga mudhari—worumeliwa. Abali ena ali azombwe—monilani yotagiha yaye ahittukuleleya okosa yakakene sabwa yawona wi iyene wali womala-nawale wi akamihedhe attu ena. Guru ekosiliye ehikamihedha venjene mulogo vina ehakamihedha anddimuwa a mmulogoni.”

¹⁸ Iyo ninkala mwilaboni mudhalile omukumbela vaye. Mbwenye nlogo na Yehova ttottiyana vaddiddi. Iyo nihikana efunelo yawakamihedha attu ena nifwaraga mubuwelo wakene wa Yezu vina ninovilibihedha ofwara yotagiha yaye. Iyo kaninawodhe ofwara ttarho dhaye mowakwana-mwene, mbwenye ninowodha ofwara “mvirileye.” (1 Ped. 2:21) Ninovilibihedha otagiha mubuwelo wa Yezu wa wazuzumela attu ena, okosa eji enonikamihedha ofwanya wagalala vina orumeliwa na Yehova.