1-2. (a) Masaka abano attu enjene anrutxeliwani wakuluvela asogoreli? (b) Txini enasekeserhihu mwari mwa nsunzo ntti?

ATTU enjene masaka abano kanakuluvela asogoreli. Sabwani anowawonaga asogoreli a elabo na asogoreli a politika abarelaga areli na attu ana ewodhelo oku apujaga ayelegi. Bibilia wahibaza ologa ejiwene mulogiliye mazu aba: “Attu ena ali anya ena anotabuwa na opujiwa.” (Koh. 8:9) Ottiya ejo, asogoreli a marelijiau anokosa dhilobo dhohikala. Sabwa ya ejiwene attu enjene kanimukuluvela Mulugu. Nona nigaroma omusunziha muttu Bibiliha ninofwanyela omukamihedha wi amukuluvelege Yehova vina attu abale attomiliye wila anisogorelege.

² Kahiyo bahi anamasunza a Bibilia anfwanyela osunza omukuluvela Yehova na nikuru naye. Abale adhile vawale amulabelaga Yehova anofwanyela okuluvela wi dhinkosa Yehova, mudhidhi wotene s’oligana. Masaka mena enodhaga opadduwa elobo egadhile weha omukuluvela wehu Yeheva. Mwari mwa nsunzo ntti ninele wona mapadduwo mararu agadhile weha nroromelo nehu: (1) nigengesaga mapadduwo mena a Bibilia, (2) nigavahiwa malago na nikuru na Yehova (3) nigadha ogumanana makattamiho orutxa musogoro.

3. Mapadduwo mena a mBibiliani agadhile dhavi weha nroromelo nehu?

 ³ Nigengesaga Nzu na Mulugu, txino ninovikosa mavuzo sabwa ya mukalelo waweddihile Yehova attu ena vina dhosakula dhikosiliye. Motagiha, munivuruni na Olebeliwa ninowengesamo wi Yehova wahimuttongela opiwa Muhizrayel wafwanyiwe addoddelaga kuni na Sabuddu. Munivuruni na Samuwel  wanawili ninowengesamo wi Yehova wahimulevelela Mwene Davidi odduwene wakosile mararuwo vina bampa muttu. (Oleb. 15:32, 35; 2 Sam. 12:9, 13) Attu ena txino anovivuza, ‘Sabwaya jani Yehova amulevelela Davidi okosile mararuwo vina ompile muttu oku bamuttongela muttu mwina opiwa odduwene wakosile yottega enoniwa ninga kiyalitxi enddimuwa vaddiddi?’ Wi nikane yowakula ya nivuzo ntti enofuneya otanalela dhilobo ttaru nigamwengesaga Bibilia.

4. Nlebo na Wita 18:20, 21 vina Olibiha 10:17 ninnikamihedha dhavi okuluvela muttongelo wa Yehova?

⁴Bibilia kanloga matibelo otene a nipadduwona. Motagiha, iyo ninoziwa wi Davidi wahitxinuwa na dhokosa dhaye. (Masal. 51:2-4) Ki mulobwana oddule walupile nlamulo na okoya Sabuddu wahitxinuwa-wene? Masaka a mundduni wahikosaga yottega yina? Wahaddeliwa nottaga nanda kafunile wiwa? Bibilia kanloga. Masiki dhawene iyo ninofwanyela okuluvela wi: Dhottonga dha Yehova ‘sebaribari.’ (Olib. 32:4) Iyene onokana matibelo otene amakaniya—kanimutanya muttu, kanimuttonga muttu sabwa ya ttebe yaye obe elobo yina egamuttukuleli ottonga mohifwanyelela. (Kengesa Wita 18:20, 21; Olibiha 10:17.) Venevo vandowihu nisunzaga sabwa ya Yehova vina dhoruma dhaye ninelege odhowavi nikuluvelaga dhottonga dhaye. Masiki akala kanina matibelo otene a nipadduwo-nipadduwovi iyo ninomuziwa pama Yehova, ninoziwa wi ‘iyene ddomyala murima mudilani mwaye mwetemwene.’—Masal. 145:17.

5. Ohiligana ompatta dhavi muttongelo wehu? (Koona kasha “ Ohiligana Kunnoniha Dhilobo Dhahene Ninga Munonela Yehova.”)

⁵Sabwa yokala attegi kaninwodha ottonga noligana. Iyo nipaddutxiwe moligana na Mulugu nona nihikana efunelo yowaweddiha attu ena noligana. (Wita 1:26) Mbwenye sabwa yohiligana, masiki nikanaga matibelo otene ninodhaga wattonga attu na mukalelo wohifwanyelela. Jijene epadduwile na Jona, iyene wahisilidhiwa na akadda Nínive venevo vaganile Yehova waweddela ttagaraga. (Jon. 3:10–4:1) Mbwenye katanalela edhile opadduwa vasogorova. Akadda Nínive owakwana 120.000 atxinuwile ahivuniwa! Veneva wafwanyela osisiguliwa bani—Yehova—obe Jona?

6. Sabwaya jani Yehova kammageleliwa onitapulelamo dhogana dhaye?

 ⁶Yehova kammageleliwa watapulelamo attu matibelo ali otene. Ebaribari wi masaka a wale, Yehova wahattiya alabeli aye ovaha monelo dhawa sabwa ya makaniya. (Wita 18:25; Jon. 4:2, 3) Dila dhina wahitapulelamo matibeloya. (Jon. 4:10, 11) Masiki dhawene, Yehova kammageleliwa onitapulelamo sabwaya enimuttukulela okosa yogana. Ninga Muttanddi wehu, Yehova kanjedhela wi nivahe monelo sabwa ya dhogana dhaye.—Iza. 40:13, 14; 55:9.

7. Makattamiho gani angumanihuna, nanda sabwaya jani?

⁷ Kaninaganyedha wi dila dha Yehova s’oligana. Mbwenye makattamiho andihuna ogumanana baba. Iyo ninowakuluvela attu attomiliye wila anisogorelege? Txino ninodhaga wubuwela, alobwana aba attomeliwe na Yehova wila asogorele nlogo naye aneddiha mowiwanana na efunelo ya Yehova obe anfwara dhubuwelo dhawa? Txino attu akalilewo nsaka na Bibilia ahikana mobuwelo ninga obwene. Katanalela dhotagiha dhilogiwe  ddima 3. Txino anamudhi a mulobwana oddule olupile nlamulo na okoya Sabuddu anvivuza: Mizé ahinatti omuttongela muttu oddu opiwa wahiroma onvuza Yehova? Txino amarho a Uriya manuni wa Betsabé ahidha wubuwela, Davidi ovunehile sabwa ya okala mwene. Ebaribariya jiji, iyo kaninaloge wi ninomukuluvela Yehova oku nikoddaga waroromela abale attomiliye wi eddiye nikuru naye.

8. Mukalelo onedda mulogo wa Okristu masaka abano oniwanana dhavi na mazu anfwanyeya va Merelo 16:4, 5?

⁸ Yehova masaka abano onimulabihedha “mwimeleli wororomeleya” wi eddihe nlogo naye nili velaboni ya vati. (Mt. 24:45) Dhahene ninga nikuru nolamunela naliwo nsaka na Akristu oroma, mwimeleli wororomeleya onosogorela nlogo na Mulugu ozugunuwa elabo yotene vina onowavaha malago anddimuwa a mmulogoni. (Kengesa Merelo 16:4, 5.) Anddimuwa a mmulogoni agakela malago aba anowakamihedhana abali a mmulogoni. Iyo ninolagiha wi ninowiwelela mukalelo wa Yehova okosa dhilobo modhela wiwelela malago annivaha nikuru naye vina anddimuwa a mmulogoni.

9. Ninrutxeliwani ofwara malago anvahiwehu na anddimuwa a mmulogoni nanda sabwaya jani?

⁹ Mudhidhi mwina enokala yorutxa okamihedha yogana ya anddimuwa a mmulogoni. Motagiha, vyaka dhing’onovi mundduni, ahikosiwa masasanyedho apattile anameddelela milogo vina apattile milogo. Anddimuwa a mmulogoni ahakumbira anamalaleya ena wi atugumanege Milogo dhina. Akala masasanyedho aba anipatta txino yahikala yorutxa, sabwani yanfuneya wattiya amarho ehu vina anamudhi ehu. Koddi Yehova wahawaddela anddimuwa a mmulogoni mulogo wafwanyelani omuttomela namalaleya mmodha-mmodha? Nne. Nona enokalaga yorutxa ofwara malago anakelihu. Mbwenye Yehova onokuluvela dhogana dhinkosa anddimuwa a mmulogoni iyo vina ninofwanyela wakuluvela. *

10. Ninfwanyelela eni wawiwelela anddimuwa a mmulogoni? (Ahebreu 13:17)

¹⁰ Iyo ninfwanyelela eni okamihedha dhogana dha anddimuwa a mmulogoni masiki dhoganadha dhihinizivelaga? Nigakosa dhahene nlogo na Mulugu ninokala nowiwanana.  (Ef. 4:2, 3) Mulogo onele okala woliba akala abali otene anofwara dhogana dha nikuru na anddimuwa a mmulogoni na ovyeviha. (Kengesa Ahebreu 13:17.) Yamakamakaya, ninele otonyihedha wi ninomukuluvela Yehova vina abale attomiliye wi anisogorelege.—Mer. 20:28.

11. Txini enanikamihedhe okuluvela malago annivaha anddimuwa a mmulogoni?

¹¹ Anddimuwa a mmulogoni ahinatti okosa yogana empatta mulogo anolobela akumbiraga muya wokoddela. Oziwa ejiwene enolibiha ororomela wehu malago annivahani. Awene anofwaseyela ofwara magano anfwanyani mBibiliani na magano mena anvahiwani na nikuru na Yehova. Abali aba ororomeleya anoziwa wi anofwanyela weddiha na nriho muttorho obu wattomeli Yehova. (1 Ped. 5:2, 3) Katanalela eji, attu a mwilaboni anogawana sabwa ya ttebe, relijiau vina politika oku nlogo na Yehova banili nowiwanana nimulabelaga Mulugu webaribari na murenddele. Eji empadduwa sabwa yawi Yehova onokamihedha nikuru naye!

12. Dhilobo gani dhinfwanyela anddimuwa a mmulogoni osekeserha wi one akala muttegi ohitxinuwa txibarene?

¹² Yehova owakuluvelihana anddimuwa a mmulogoni mabasa ottiya mulogo wotxenene. Akala Mukristu onokosa yottega enddimuwa Yehova onjedhela wi anddimuwa a mmulogoni eddiye makaniya wi one akala onofwanyela okalavi mmulogoni obe nne. Awene anopepesa wi afwanye ebaribariya wila one akala muttegiya ohitxinuwa txibarene. Iyene txino onotonyihedha wi ohitxunuwa, mbwenye onowidda yottega ekosiliye? Ohigana ohiyelela wili? Akala yottegaya yatoteyile na mandano abure, oli womala-nawale wi agwadde mandanoya? Anddimuwa a mmulogoni anotanalela sabwa esi dhotene na nlobelo vina anofwara malago anfwanyeya mBibiliani atanalelaga monelo wa muttegiya. Awene agamala otanalela esi dhotene, anosakula akala enofuneya omuttiyavi mmulogoni obe nne. Masaka mena onoburutxiwa mmulogoni.—1 Kor. 5:11-13.

13. Nindaga okana dhowaganyedha gani akala mmudhihu obe marho wehu onoburutxiwa mmulogoni?

¹³ Elobo gani egadhile weha wakuluvela wehu anddimuwa a mmulogoni? Txino akala muttu oburutxiwe mmulogoni kahiyo mmudhehu obe marho wehu kinrutxa okamihedha yogana ekosile anddimuwa a mmulogoni. Mbwenye akala oburutxiwe mmulogoni munammudhi obe marho wehu enodhaga onikalela yorutxa nubuwelaga wi awene kafwarile malago ali otene obe kattongile makaniya ninga mugattongile Yehova. Txini enanikamihedhe wiwelela yogana ekosile anddimuwa a mmulogoni?

14. Txini enanikamihedhe akala marho wehu obe mmudhihu onoburutxiwa mmulogoni?

¹⁴ Ninofwanyela wubuwela wi oburutxiwa mmulogoni masasanyedho akosile Yehova wi akamihedhe otxeniha mulogo vina amukamihedhe muttegiya. Akala muttu ottegile sohitxinuwa onokalavi mmulogoni agahakwekwettela attu ena okosa yottega yakakene. (Gal. 5:9) Vina agahidha wubuwela wi yottega ekosiliye kahiye enddimuwa vaddiddi nanda kagahonile sabwa ya otxinja mubuwelo waye na merelo aye wi aleveleliwe na Yehova. (Koh. 8:11) Ninofwanyela okana ebaribari wi anddimuwa a mmulogoni anoziwa wi muttorho munddimuwa ogana omburutxa muttu mmulogoni obe nne. Awene ankosa yakene yakosa anamattonga a Mwizrayel, ‘kanttonga na nzina na mutu anttonga na nzina na Yehova.’—2 Map. 19:6, 7.

15. Ninfwanyelela nni okuluvela mukalelo onkosa Yehova dhilobo ovanene?

¹⁵ Vowi omagomelo wa elabo eji onowaddamela, ninofwanyela okuluvela venjene mukalelo onkosa Yehova dhilobo. Sabwaya? Sabwani goi enddimuwa egaroma iyo ninele wakela malago anonegihu ninga borutxa ononelamo vina ofwarawa. Yehova kanaloge na iyo. Iyene onalabihedhe abale attomiliye wi anisogorelege. Mudhidhi obo ogafiya kaninfwanyela waganyedha malago anavahiwihu txino nivikosaga nivuzo ntti: ‘Ejiya endela wa Yehova-wene obe dhilobo dhubuweli anddimuwa a mmulogoni?’ Onele omukuluvela Yehova na nikuru naye? Yowakulaya eniwanana na mukalelo oniweleliwe malago anvayiwihu masaka abano. Akala iyo ninowiwelela malago annivaha nikuru na Yehova masaka abano txino goi enddimuwa egaroma ninakose yakakene.—Lk. 16:10.

16. Okuluvela wehu muttongelo wa Yehova ogadhile dhavi wehiwa musogoro?

¹⁶ Ninofwanyela otanalela pama mukalelo onattonge Yehova omagomo wa elabo ejino. Iyo nihikana efunelo yawi amudhehu ahinimulabela Yehova afwanye mudhidhi wa omulabela Yehova omagomo wa elabo ejino ohinafiya. Mbwenye mudhidhi wa Armagedon, Yehova onamulabihedhe Yezu wi akose yosakula yomariha. (Mt. 25:31-33; 2 Tes. 1:7-9) Iyo kaninziwa bani oneddeliwe ttagaraga na Yehova vina ohineddeliwe ttagaraga. (Mt. 25:34, 41, 46) Koddi iyo ninele okuluvela muttongelo wa Yehova obe dhogana dhaye dhinele onikwakwattutxa? Kavali waganyedha wi ninofwanyela omukuluvela Yehova ovanene wila niwodhe omukuluvela musorogoro mpo.

17. Dhilobo gani dhapama dhinapadduwe sabwa ya muttongelo wa Yehova?

¹⁷ Kobuwela mukalelo enewemo iyo mwilaboni eswa ya Mulugu nigona dhodhelavo dha ottonga wa Yehova. Marelijiau ottambi, marhondda manddimuwa vina alamuleli anatabutxa attu kanakalewo vina. Makattamiho a mwigumini, wuluvala vina okweliwa attu anakwelihu dhinele ovira. Satana na ademonyo anele ofugeliwa mwari mwa vyaka txikwi. Dhilobo dhotene dhabure dhikosilani kadhinakalewo vina. (Ovuh. 20:2, 3) Ninele ononelamo wi jopurelamo okuluvela mukalelo wa Yehova okosa dhilobo!

18. Txini ensunza iyo na yotagiya ya ana Izrayel ninga munlogela Olebeliwa 11:4-6 vina 21:5?

¹⁸ Mwilaboni eswa ninele ogumanana makattamiho agadhile weha omukuluvela wehu  Yehova? Motagiha, ana Izrayel mufuruleliwani mu Ejipitu, attu ena ahiroma orogela dhoja dhanani mu Ejipitu apwazaga mana yavahile Yehova. (Kengesa Olebeliwa 11:4-6; 21:5.) Egahidha opadduwa iyo oroma orogela ninga ana Izrayel nigavolowa elabo eswa? Iyo kaninziwa mudhidhi mungasi onattukule iyo wi nitxeniye elabo vina osaddula okala paraizu. Txino ninodhaga okana mabasa menji okosa vowi dhilobo dhotedhene kadhinakale dholigana momaguva. Iyo ninele orogela dhilobo dhinanivahe Yehova? Nigavaha ttima dhilobo dhinnivaha Yehova ovanene eji enele onikamihedha ovaha ttima dhinfuniye onivaha musogoro.

19. Ogagwaddeli dhavi nsunzo ntti?

¹⁹ Mwari mwa nsunzo ntti nihona wi dhotedhene dhinkosa Yehova s’oligana. Nona iyo kaninfwanyela waganyedha. Nihona vina wi ninofwanyela waroromela abale asakuliwe na Yehova wila eddihe nikuru naye. Txipo kanidduwale mazu amwaddeli Yehova namavuhulela Izaiya oleba: ‘Guru dhenyu dhinda mugakala wofwaseyene vina mugaroromela.’—Iza. 30:15.