NSAKA na Bibilia, mulobwana wafuna otela wampitxa muttengo wa pette, anamudhi a muyana vina a mulobwanaya agagumana. Mulobwanaya wapitxa dhilobo dhamakamaka ninga, anenama, obe kobiri. Masaka mena apitxa na olaba, dhahene ninga epadduwile na Jakobi, mudhidhi wafuniye omutela Rakel wahimulabela babe vyaka tanu na bili. (Wita 29:17, 18, 20) Muttengoya obu wapitxiwa walabihedhiwa eni?

Namasunza wa Bibilia onkuweliwa Carol Meyers ohiloga: “Muttengo obu wa pette wahala vamburoni va namwali wateliwa sabwani wanakamihedha amambali aye na mabasa [olima].” Masaka mena muttengo obu wa pette wanlibiha mandano a anamudhi amulobwana vina a muyana. Wandana oku ogahattukulela anamudhi a muyana vina a mulobwana wakamihedha atelaniya mudhidhi ogadhilani ogumanana makattamiho. Elobo yina jiji, muttengo obule wapitxiwa walagiha wi namwaliya okana mwinya, musogorhomwa babe agahittiya omuzuzumela vina ombarela, agahalilena muttorho obu ddi mulobwana wafuna omutela.

Opitxiwa wa muttengo wa pette kiyatapulela wi muyanaya wateliwa, woniwa ninga elobo yaguliwa vina yagulihiwa. Nivuru Israel Antigo—Sua Vida e Instituições ninloga wi: “Okokiwa oku wa opitxiwa muttengo wa pette, obe elobo yina yakwanela wi avahiwe anamudhi a muyanaya yanattukulela ana Izrayel wubuwela wi muyanaya oteliwe wile oguliwa obe ogulihiwa. Mbwenye [muttengo obu wa pette] kuwafwanyela woniwa dhawene, sabwani wahala vamburoni va namwali wateliwa wi wakamihedhe anamudhi abale.”

Masaka abano, dhilabo dhina, attuya anofwaravi yeddelo eji ya opitxa muttengo wa pette. Akala Akristu ali amambali anofuna opitxeliwa muttengo wa pette, ‘ofwewa wawa murima onofwanyela woniwa na attu otene’ modhela orabela okumbira kobiri dhinjene. (Fil. 4:5; 1 Kor. 10:32, 33) Dhawene anele woniha wi ‘kanjiwa murima na kobiri’ vina kali attu ofunetxetxa. (2 Tim. 3:2) Elobo yina jiji, akala amambali ali Akristu kamkumbira muttengo mwinjene wa pette, musogorho kili yofuneya omutximiha mulobwanaya otele wi atamela vego va olaba wi awodhe opitxa muttengo wa pette. Vina agatela kinakale yofuneya ommagelela ottiya mabasa a opionero, akala walaba ninga pionero wi atamele mabasa mwilaboni anamuwodhiye ogumela kobiri ya opitxa pette.

Dhipaddi dhina dha mwilaboni, alamuleli bangwiha nlamulo n’opitxa pette. Amambali ali Akristu ankala dhilabo eso onofwanyela wiwelela nlamulona. Sabwaya? Nzu na Mulugu ninowakokomeza Akristu ‘wakurumuwela abale attomeliwe ottonga elabo’ vina wiwelela nlamulo nihingudulana na Nzu na Mulugu.—Rom. 13:1; Mer. 5:29.