Waziwa?
Yakaleleni yapama Yehova wawaddela ana Izrayel wi amukuttelege mukutto balame bili dhottiyana?
MUTXIDDO mwa Nlamulo na Mizé, balame esi bili kangayiwa na majiwa dhanrumelihiwa omperhekela Yehova ninga mukutto. Nlamulo nanloga vina wi balame esi dhobili, kadhafwanyela otxinjiwa na elobo yina. (Onam. 1:14; 12:8; 14:30) Mwaha mmodha bwawi majiwa kafwanyeya mudhidhi wotene. Sabwaya jani?
Njiwa
Majiwa balame dhina elemelelo ya omwalela elabo ya Izrayel nsaka na oviya. Ogafiya mweri wa Otuburu, balame esi dhinomwalela dhilabo dhina dhinviha, dhiniyelela w’Izrayel nsaka nakene na elimwe. (Jibo 2:11, 12; Jer. 8:7) Eji yatapulela wi nsaka na oridha yanrutxa vaddiddi ana Izrayel omperhekela majiwa Yehova ninga mukutto.
Kangayiwa
Oku kangayiwa, kadhinvavela dhipaddi dhina, vyaka dhotene balame esi dhanfwanyeya mu Izrayel. Elobo yina jowi kangayiwa balame dhinfuwiwa vatakulu. (Kaladdaniha na Joau 2:14, 16.) Mowiwanana na nivuru Plantas Bíblicas e Animais, ninloga wi “numba dhotene dhafwanyeya mmasidadi vina muttemba elabo yo Palestina mwanfuwiwa kangayiwa. Muttu-muttu vatakulu vaye wankana pombali obe gurugudha mwafuwiwa kangayiwa.”—Kaladdaniha na Izaiya 60:8.
Kangayiwa bili mugurugudhani
Veneva Yehova ohoniha okwela vina ofwewa murima sabwa ya orumela mukutto wa balame esuwene dhafwanyeya vyaka dhotene mwilaboni ya Izrayel.
