YOMARA vamodha na abalaye—Marcelo na Hiver—ankala kwatti eng’no ya Guatemala. Yomara ddiromile omusunza Bibilia na Anamoona a Yehova, vasogorhova abalaye ahivitaganyiha na iyene baroma osunza vamodha. Mbwenyi awene ahikana makattamiho. Azombwe aba araru kanona, vina kawodha wengesa na braile. Mbwenyi, namasunziha wawa wa Bibilia wanawengesela ddima dha nsunzona vina versu dha Bibilia.

Wona matugumano mmulogoni ali makattamiho mena. Awene kawodha okosa oleddo wa mitala 40 wi òne matugumano o Numbani ya Omwene. Mbwenyi abali a mmulogoni ahikosa masasanyedho owakamihedha wi awodhege wona matugumano. Azombwe aba muromelani ottomeliwa dhipaddi mmatugumanoni a vari va sumana, abali anakamihedha wi akoyege muyubuweloni dhipaddi dhawa.

Mayu wa 2019, paromile okosiwa matugumano a mmulogoni mmuruddani mwawa. Sabwa ya ejuwene atelani dhahi a pionero ahimwalela murudda obule. Yogana yawa yali yawasunziha ozombwe abale araru wengesa vina oleba na braile. Masiki atelani aba vahawodhani wengesa vina oleba na braile, awene ahidhowa o bibilioteka, basunza braile wi awodhe wasunziha azombwe abale.

Muvireli myeri dhing’novi, azombwe aba oraru ahiwodha wengesa pama braile, nanda eji ehakamihedha wunuwa mpaddi womuyani.Ovano Yomara, Marcelo, na Hiver anlaba ninga apionero a mudhidhi wotene. Marcelo mudhari wokamihedha. Sumana dhotene awene anozuzumela mabasa omuyani. Ovingela wawa mabasa a Yehova, onowattukulela ena okosa yakakene.

Azombwe aba araru anotamalela nikamihedho navahile abali a mmulogoni. Yomara ohiloga dhahi. “Dila yoroma elogilihu na Anamoona a Yehova, nihona okwela wa Akristu a txibarene.” Marcelo ohenjedha alogaga dhahi, “Iyo nihikana amarho apama mmulogoni mwehu, vina ninokosa mpaddi wa abali na arogora ali orugunuwa elabo yotene, ankwelana muttu na mukwaye.” Yomara na abalaye, anojedhela wona labo ninasadduliwe elabo bikala paraizu.—Masal. 37:10, 11; Iza. 35:5.