1. Yezu wawaddelile eni anamafwara aye sabwa ya “ogoma wa elabo” vina nikokomezo gani navahiliye?

 MALABO mang’onovi wi Yezu akwe, anamafwara aye anayi ahimususela ahinvuza: “Munaddele nsaka ninapadduwe dhilobo eso vina ezinddiyelo enoniha . . . ogoma wa elabo?” (Mt. 24:3) Txino anamafwara aba akoseli nivuzo ntti wi aziwe mudhidhi ogatolotxiwe Jeruzalemi vina mparha. Yezu awakulaga, ottiya ologavi sabwa ya otolotxiwa wa Jeruzalemi na mparha, iyene wahiloga vina ezinddiyelo enoniha ogoma wa elabo ejino. Mwaha wa omagomo wa elabo, Yezu ohiloga dhahi: “Siku-ntho, mudhidhiyá kawo-wene onnona; anju kannona, Mwana-muthu vina kedhi; onziwa ddi Baba bahi.” Yezu wawaddele anamafwara aye mazu aba wi àkamihedhe okala txenjewa vina aviyang’anele.—Mk. 13:32-37.

2. Yakaleli nni elobo yamakamaka mwa abale akalilewo nsaka na otolotxiwa wa Jeruzalemi okala txenjewa?

² Akristu Ayuda a vyaka zana dhoroma anfwanyela okala txenjewa, sabwani eji yatapulela ovuneya wawa. Yezu wahawaddela anamafara aye wi anfwanyela oziwa vizinddiyelo dhoniha waddamela wa otolotxiwa wa Jeruzalemi. Iyene wahiloga: “Nsaka ninamonenyu Jeruzalemi arigiwaga na anyakoddo, ziwani wi otolotxiwa waye onfuna ofiya-wene.” (Lk. 21:20, 21) Abale akaleli txenjewa nikokomezo na Yezu ahivuneya mudhidhi watolotxiwa Jeruzalemi na akadda Roma.

3. Txini enasunze iyo mwari mwa nsunzo ntti?

³ Iyo ninkalawo masiku omariha a elabo ejino mudhalile dhawopiha. Ninofwanyela oviyang’anela vina okala txenjewa. Mwari mwa nsunzo ntti, ninele osunza enanikamihedhe odhowavi nunuwaga mpaddi womuyani vina nikalaga txenjewa. Ottiya ejo, ninele wona mukalelo onfwanyela iyo  oviyang’anela, vina olabihedha deretu mudhidhi ohalilewo.

4. Ninfwanyelela eni okana efunelo ya wona mapadduwo a masaka abano anakwanihedha mavuhulo a mBibiliani?

⁴ Nikana mwaha wapama wa okana efunelo ya wona, dhimpadduwa masaka abano dhinakwanihedha mavuhulo a Bibilia. Motagiha, Yezu ohinaddela dhilobo dhigapadduwile, esuwene dhiganikamihedhile oziwa wi omagomo wa elabo ejino ya Satana oli vakuvi. (Mt. 24:3-14) Murumiwi Pedro, ohinikokomeza okalela txenjewa wakwanihedheya wa mavuhulo a Mbibiliani wi nilibihe nroromelo nehu. (2 Ped. 1:19-21) Nivuru nomariha na Bibilia ninroma na mazu aba: “Munivuruni-mpu muli mazu ovuhulela, akelile Yezu Kristu wa Mulugu, wi àziwihe emeleli aye dhinfuna opadduwa ovanene.” (Ovuh. 1:1) Nihikana efunelo enddimuwa vaddiddi ya wona dhimpadduwa masaka abano vina oziwa mukalelo onakwanihedhani mavuhulo a mBibiliani. Vina nihikana efunelo ya ologa mapadduwo aba muttu na mukwaye.

5. Txini enfwanyela iyo orabela, vina txini enfwanyelihu okosa? (Koona mafoto.)

⁵ Iyo nigalogaga mwaha wa mavuhulo a mBibiliani, ninofwanyela orabela ologa dhilobo dhihinihuna ebaribari. Sabwaya? Sabwani kaninfuna ologa elobo egadhile ogawa mulogo. Motagiha, ninodhaga wawiwa anddimuwa a mwilaboni alogaga mukalelo onawodhani ogomiha koddo na odhana murenddele mwilaboni vina ofwaseya wa dhotedhene. Ottiya ologaga dhihinihuna ebaribari, mwa ologa wi dhologa dha anddimuwa aba dhinowakwanihedha nivuhulo na 1 Tesalónika 5:3, ninofwanyela wonaga miselu dhiswa dhinvuwiha nikuru nehu. Dhinlogihu dhigewananaga na dhinvuwiha nikuru na Yehova, ninele okamihedha mulogo okala wowiwanana vina ninele okana mubuwelo mmodhene.—1 Kor. 1:10; 4:6.

6. Ninsunzavo eni na 2 Pedro 3:11-13?

⁶ Kengesa 2 Pedro 3:11-13. Murumiwi Pedro ohinikamihedha okana monelo wofwanyelela nigatanalelaga mavuhulo a Bibilia. Iyene ohinikokomeza ojedha siku ninadhe Nabuya Yehova. Sabwaya? Sabwani ennittukulela okosa ejene, kahiyo wi iyo ninfuna niziwe siku obe mudhidhi onadhena Yehova Armagedon, mbwenyi sabwaya ja wi ninfuna nilabihedhe mudhidhi wehu ohalilewo mofwanyelela wila nikale omala-nawale. (Mt. 24:36; Lk. 12:40) Na mazu mena, iyo ninfuna nikane mweddelo wapama vina nikane ebaribari wi omuttiddela wehu Yehova mabasa, onowoniha omukwela wehu. Wi neddegevi na ekalelo eji ninofwanyela oviyang’anela.

7. Ninalagihe dhavi wi ninoviyang’anela? (Luka 21:34)

⁷ Yezu wahawaddela anamafwara aye wi ottiya bahi wang’anela dhilobo dhimpadduwa mwilaboni, awene anfwanyela vina oviyang’anela. Nikokomezo ntti ninofwanyeya va Luka 21:34. (Kengesa.) Koona elogile Yezu: “Muvyang’anele.” Muttu onviyang’anela, onokala txenjewa na yowopiha egadhile ononga mandano aye na Yehova vina onorabela. Mwa dhawene, iyene onokalavi mukwelani mwa Mulugu.—Gano 22:3; Jud. 20, 21.

8. Malago gani avahile murumiwi Paulo Akristu?

 ⁸ Murumiwi Paulo ohawaddela Akristu wi aviyang’anele. Motagiha, iyene ohawaddela Akristu o Éfeso dhahi: “Tamelani wedda txenjewa. Muhikalege ninga ataduwa, mweddege na malago.” (Ef. 5:15, 16) Satana veli-veli onokosa muli mwetemwene wi anonge mandano ehu na Yehova. Bibilia ononivaha malago aba “tamelani ononelamo enufunanina Mulugu” nigakosa ejene ninele owodha opemberha dhoweha dhingumanana iyo.—Ef. 5:17.

9. Ninawodhe dhavi ononelamo ennifunana Yehova?

⁹ Bibilia kannaddela dhilobo dhotene dhabure, dhigadhile ononga mandano ehu na Yehova. Masaka menjene, iyo ninofwanyela okosa dhosakula mwa dhilobo dhihilebiwe mBibiliani. Wi nikose dhosakula dha malago, ninofwanyela ononelamo vina oziwa eninfunana Yehova. Enowodheya iyo okosa ejuwene modhela osunza Nzu na Mulugu malabo otene vina otanalela dhinengesihu. Ottiya ejo, iyo ninele ononelamo efunelo ya Yehova vina ninele okana “zelu ya Kristu,” opitta ejuwene ninele wedda “ninga athu a malago” masiki akala kanina malamulo annaddela enfwanyelihu okosa. (1 Kor. 2:14-16) Dhowopiha dhina kadhinrutxa ozinddiyela, mbwenyi dhina dhinorutxa.

10. Dhilobo gani dhabure dhinfwanyelihu orabela?

¹⁰ Dhilobo dhina dhabure dhinfwanyelihu orabela sisi; omugayela muttu ohili mamune obe mwadhiye, okwaranyiha oja na omwa, ologa mazu owawa, mafilmi anlagiha kani, mararuwo na dhilobo dholaddana. (Masal. 101:3) Mwiddani wehu Satana, onotamela marhe a ononga mandano ehu na Yehova. (1 Ped. 5:8) Akala iyo kaninkala txenjewa, Satana onele otxeya mmirimani mwehu aje, owali, widdana, otugulana na nrima. (Gal. 5:19-21) Vamaromo, ninodhaga wubuwela wi mikalelo esi dhabure kadhili dhowopiha. Mbwenyi akala iyo kaninivilibihedha wi nirabele, dhinele wunuwa badhikala ninga nddibwi, dhinitotela makattamiho.—Tia. 1:14, 15.

11. Yowopiha gani yopipiriheya enfwanyela iyo orabela, vina sabwaya jani?

¹¹ Yowopiha gani yopipiriheya enfwanyela iyo orabela mandano abure. Katanalela yotagiha eji. Weyo onolaba na muttu ohili Munamoona wa Yehova. Weyo onofuna wi mukwawo w’omabasani arihege Anamoona a Yehova, nona weyo onomukosela oderetu vina onomukamihedha. Masaka mena onorumela oja elobo na iyene, movira wa mudhidhi nyuwo munodhowavi mujaga vamodha. Muttuya baroma ologa dhilobo dhonyakuwa. Vamaromo weyo txino kunziveliwana makaniya vina kunakulela. Mbwenyi movira wa mudhidhi weyo onolemela vina kunsilidhiwa na makani ninga aba. Labo nimodha mukwawo womabasani bawukonvidari wi mumwe vamodha omamalelo wa mabasa, weyo orumela. Venevo, onoroma wubuwela ninga mukwawo womabasani. Mwa dhahene, kunattukule mudhidhi mwinjene wi orome okosa dhilobo ninga iyene. Mwebaribari, iyo ninfuna nikale attu apama vina anariha attu otene, mbwenyi ninofwanyela wubuwela wi ninele opattiwa venjene na abale anasakulihu wi aredhe na iyo. (1 Kor. 15:33) Iyo nigaviyang’anela dhahene ninga munaddeleli Yezu wi nikose, ninele orabela wandana na attu ahinedda na magano a Yehova. (2 Kor. 6:15) Ninele wona yowopihaya vina ninele orabela.

12. Txini yawaddelile Yezu anamafwara aye okosa oku ajedhelaga ogoma wa elabo?

¹² Yezu wanfuna wi anamafwara aye akane yokosa, oku ajedhelaga ogoma wa elabo. Nona bavaha mabasa okosa. Yezu wahawaddela wi awene anfwanyela olaleya miselu dhpama “Mu Jeruzalemi, mu Judeya, mu Samariya, mwilaboni mwetemwene ofiyedha okomoniwá.” (Mer. 1:6-8) Aba mabasa manddimuwa akelile anamafwara a Yezu! Awene agahilabihedha deretu mudhidhi wawa mwa okosa mabasa aba olaleya.

13. Ninfwanyelelani olabihedha deretu mudhidhi wehu? (Kolosi 4:5)

¹³ Kengesa Kolosi 4:5. Wi niwodhe oviyang’anela, ninofwanyela wubuwela deretu mukalelo onlabihedhihu mudhidhi wehu. Dhopadduwa “dhohijedheleya” dhinowapatta attu otene. (Koh. 9:11) Mohijedheleya iyo ninodhaga oyelela egumi yehu.

14-15. Ninawodhe dhavi olabihedha deretu mudhidhi wehu? (Ahebreu 6:11, 12) (Koona foto.)

¹⁴ Iyo ninele olabihedha deretu mudhidhi wehu modhela okosa efunelo ya Yehova vina olibiha mandano ehu na iyene. (Jo. 14:21) Ninofwanyela okala ovikomene, ohigulugudheya  vina nittangaramelaga mabasa a Nabuya. (1 Kor. 15:58) Nona, nigayelela egumi yehu—obe ogoma wa elabo ejino ogafiya—kaninatxinuwe sabwa yokosa yosakula eji.—Mt. 24:13; Rom. 14:8.

¹⁵ Masaka abano, Yezu onodhowavi asogorhelaga anamafwara aye, mmabasani a olaleya mwaha wa Omwene wa Mulugu mwilaboni mwetemwene. Iyene onokosa epaddi yaye. Mmatugumanoni vina mmapublikasauni mwehu, Yezu ononisunziha mukalelo wolaleya miselu dhapama vina ohinivaha dhipano dhinfunihu wi niwodhe okosa mabasa aba. (Mt. 28:18-20) Ninele okosa epaddi yehu, modhela ovilibihedha mmabasani a olaleya na wasunziha attu vina okala txenjewa oku nimujedhelaga Yehova ogomiha elabo ejino ya Satana. Nigavirihamo nlago ninfwanyeya va Ahebreu 6:11, 12, njedhelo nehu ninele okala noliba-nene mpaka omagomo.—Kengesa.

16. Txini enfwanyelihu okosa?

¹⁶ Yehova onoziwa labona vina mudhidhiya onfuniye ogomiha elabo ejino ya Satana. Labo ntto nigafiya Yehova onele wakwaniha mavuhulo otene anfwanyeya mBibiliani. Mbwenyi, masaka mena iyo ninodhaga wubuwela wi ogoma wa elabo onogonela ofiya. Masiki dhawene, labo na Yehova kaninagonele. (Hab. 2:3) Nona ninofwanyela omujedhela Yehova vina nimukuluvele Mulugu mvulumutxi wehu.—Mik. 7:7.