Abali Eli Aswa Ankosa Epaddi ya Nikuru Nolamulela
TXITTATTU, labo 18 ya Janero wa 2023, wahivuwihiwa mu saiti jw.org muselu wowagalaliha waloga wi Mbali Gage Fleegle na Jeffrey Winder ahittomiwa wila akose epaddi ya abali a Nikuru Nolamulela na Anamoona a Yehova. Oheli ahidha amulabelaga Yehova n’ororomeleya mwari mwa vyaka dhinji.
Gage Fleegle na mwadhiye, Nadia
Mbali Fleegle wakala na amambali aye ali Anamoona a Yehova, epaddi ya oeste ya Pensilvânia, o Amerika. Valiye muzombwe amudhaye ahimwalela sidadi yina ya muttemba wenewo wajombeliwetxa anamalaleya. Mwari mwa mudhidhi mung’onovi iyene wahibatiziwa, nali labo 20 wa Novembro, yaka ya 1988.
Amambali a mbali Fleegle annimulibiha wila avolowe mmabasani a mudhidhi wotene. Dila dhinjene awene anattambirha anameddelela milogo vina a Betelita vanivawa. Mbali Fleegle wanwodha wona mukalelo wagalala abali na arogora aba. Mudhidhi mung’onovi mmaliliye obatiziwa iyene wahiroma olaba ninga pionero wa mudhidhi wotene—nali siku 1 na Setembro, yaka ya 1989. Vyaka bili musogorho iyene wahiwodha wakwanihedha yogana yaniyena oromana nsaka naniye vyaka 12—olaba o Beteli. Iyene oromile olaba o Beteli y’o Brooklyn mweri wa Otuburu wa 1991.
O Beteli, Mbali Fleegle olaba Mparha Onsasanyedha Manivuru Opidiwa mwari mwa vyaka 8, vasogorhova wahittomeliwa olaba Mparha wa Mabasa. Mwari mwa nsakanene nttile iyene wahitugumana vyaka ngasi mmulogoni waloga elogelo y’o Rússia. Yaka ya 2006 iyene omutela Nadia. Iyene wahirumeliwa wila akamihedhe vina o Beteli, oheli ahilaba vyaka dhinjene mmiruddani mwalogiwa Ezugu, vina ahilaba mmiruddani mwalogiwa Espanyoli okwaranya vyaka 10. Mmalelani olaba vyaka dhinjene o Mparha wa Mabasa, Mbali Fleegle ottomeliwa olaba o kambirhinya ya Mparha wa Osunziha, vasogorhova Mparha wa Mabasa. Mweri wa Marsu wa yaka ya 2022, iyene ottomeliwa ninga mukamihedhi wa Mparha wa Mabasa wa Nikuru Nolamulela.
Jeffrey Winder na mwadhiye, Angela
Mbali Winder oleliwe o Murrieta, California, o Amerika. Iyene osunzile ebaribari na amambali aye vina obatiziwe labo 29 ya Marsu, yaka ya 1986. Mvireli mweri mmodha, iyene olaba ninga pionero wokamihedha. Iyene wahiziveliwa vaddiddi nona wanfuna odhowagavi alabaga. Mvirele myeri dhinji alabaga ninga pionero wokamihedha, wahidha oroma olaba ninga pionero wa mudhidhi wotene oromana labo 1 na Otuburu wa 1986.
Valiye muzombwe Mbali Winder wahidhowa wawona abalaye eli anddimuwaya alaba o Beteli. Oleddo obule wakosiliye wahinvaha efunelo ya olaba o Beteli. Mweri wa Mayu wa 1990, iyene wahikonvidariwa wila alabe o Beteli y’o Wallkill.
O Beteli, Mbali Winder olaba miparha dhottiyana-ttiyana, ninga Okuputta, Fazenda, vina o Kambirhinya y’o Beteli. Yaka ya 1997, iyene omutela Angela, awene anolabavi o Beteli napanovi. Yaka ya 2014, awene amwalihedhiwa o Beteli y’o Warwick, wenewo okamihedhile Mbali Winder mabasa a omagiwa wa kwatti enddimuwa. Yaka ya 2016, awene amwalela o Centro Educacional da Torre de Vigia y’o Patterson, wenewo walaba Mbali Winder Mabasa a Audiyu/Vidiyu. Mvirele vyaka nayi awene ahiyelela o Warwick, wenewo ottomeliwe Mbali Winder olaba o Kambirhinya ya Mparha Onawang’anela Abali o Beteli. Mweri wa Marsu wa 2022, iyene ottomiwa ninga mukamihedhi wa Mparha Onawang’anela Abali o Beteli wa Nikuru Nolamulela.
Iyo ninolobela wila Yehova adhowegevi àrurihaga alobwana aba wila awene adhowegevi alabaga na nttokoso wila akamihedhe Omwene.—Ef. 4:8.
