Kakana Wagalala Oku Omujedhelaga Yehova N’ovilela
WEYO onojedhela venjene nsaka ninagomihe Yehova obure wetene mwilaboni vina nsaka ninakosiye dhilobo dhotene okala dhiswa? (Ovuh. 21:1-5) Kaninaganyedha, weyo onojedhela venjene nsaka ninapadduwe esidha! Mbwenyi dila dhina enokalaga yorutxa omujedhela n’ovilela Yehova wakwanihedha mapikirhelo aye, makamaka akala ninogumanana makattamiho. Nigajedhela venjene elobo ehinatti opadduwa, ninodhaga okumuwa vaddiddi.—Gano 13:12.
Masiki dhawene Yehova onfuna wi iyo nijedhelegevi n’ovilela nsaka naye nofwanyelela ofiya. Iyene onjedhelani ejene mwa iyo? Vina elobo gani enanikamihedhe okana wagalala oku nimujedhelaga?
YEHOVA ONFUNELA NNI WI IYO NIJEDHELEGE?
Bibilia onloga dhahi: N’esi dhetedhene Yehova onojedhela n’ovilela wila auleveleleni, vina aukaneleni ttagaraga. Sabwani Yehova, Mulugu woligana. Agari babale otene animujedhela. (Iza. 30:18) Mazu aba a namavuhulela Izaiya omaromo-wene alebeliwe Ayuda akodda wiwelela. (Iza. 30:1) Mbwenyi mwari mwa Ayuda abale, ahikalamo attu ena ororomeleya nona mazu aba annavaha njedhelo attu-ene abale. Alabeli a Yehova a masaka abano anofwanyela okana njedhelo nakene agengesaga mazu a Izaiya.
Iyo ninofwanyela ojedha n’ovilela sabwani Yehova vina onojedha n’ovilela. Iyene omala ogana nsaka ninatolotxiye elabo eji yabure. Iyene onojedhela siku vina mudhidhiya ofiya. (Mt. 24:36) Sikuna ntto nigafiya, enele woneya wi mazu alogile Satana ammagedhagana Yehova vina alabeli aye b’ottambi. Venevo Yehova onele omutolotxa Satana na akamihedhi aye otene, mbwenyi Yehova onele onikanela ttagaraga.
Nijedhelaga siku ntto ofiya, txino Yehova kanagomihe makattamiho ehu, mbwenyi iyene onikuluveliha wi wagalala oku nijedhelaga. Dhahene ninga elogile Izaiya, enowodheya wagalala oku nijedhelaga elobo yapama opadduwa. (Iza. 30:18) a Mbwenyi enwodheya dhavi? Ndoweni none dhilobo nayi dhinanikamihedhe.
NINAWODHE DHAVI WAGALALA OKU NIJEDHELAGA
Ozuzumeletxe dhilobo dhinlibiha. Mwigumini mwaye Mwene Davidi wahona obure mwinji. (Masal. 37:35) Masiki dhawene, iyene ohileba: “Omuroromele Nabuya, [omujedhele na nikuluvelo]; kwawañgane na nrima athu ansogorha mudila mwawa, aneddana dhopela malago.” (Masal. 37:7) Davidi wahifwara malago aba vina bafwaseyela wubuwela njedhelo na ovuniwa nanvahile Yehova. Iyene vina wannimutamalela Yehova mwaha wa dhilobo dhotene dhapama dhamukoseliye. (Masal. 40:5) Iyo vina nigobuwelaga dhilobo dhapama dhinipadduweli, ottiya ozuzumeletxa wubuwela dhilobo dhokubanyiha, kinanirutxe omujedhela Yehova.
Olabihedhegevi mudhidhi wawo wila omuttittimihe Yehova. Namaleba wa Masalmo 71, txino Davidi, ologa dhahi na Yehova: Vano miyo, ddinele oujedhelaganivi; ddinelege outtittimihaganivi. (Masal. 71:14) Davidi agamuttittimihile dhavi Yehova? Iyene agahiloga na attu ena mwaha wa Yehova vina amwibelaga jibo. (Masal. 71:16, 23) Dhahene ninga Davidi, enowodheya iyo vina wagalala oku nimujedhelaga Yehova. Iyo ninomuttittimiha Yehova modhela olaleya, ologa mwaha wa Yehova na anamudhi ehu, akwehu vina modhela wiba jibo dha mu nikuruni mwehu. Ononamo dhavi dila yina enavuruwane weyo jibo yehu ofwaseyele otanalela makaniya wila wone mukalelo onaddiginyani murima wawo!
Karumela olibihiwa na abali. Nsaka nagumanilena Davidi makattamiho, iyene wahimwaddela dhahi Yehova: Vari va adhari enyu ororomeleya, ddinele ojedhela nzina nenyu. (Masal. 52:9) Eji empadduwa nigakala mumodhani na abalihu, nigabudduwa mmalaleyoni vamodha vina nigatamelaga mudhidhi wa okala na awene ottiya mmatugumanoni bahi.—Rom. 1:11, 12.
Olibihe njedhelo nawo. Masalmo 62:5 onologa: Ddinomujedhela Mulugu waga n’ofwasa, sabwani mwa iyene punda njedhelo naga. Jamakamaka vaddiddi olibihagavi njedhelo nehu, makamamaka akala ninojedhela otolotxiwa wa elabo eji mwari mwa mudhidhi mwinjene. Ninofwanyela okuluvela wi mapikirhelo otene a Yehova anele wakwanihedheya, kintanala mudhidhi onajedhele iyo. Enowodheya wunuwiha njedhelo nehu modhela osunza Nzu na Mulugu—mavuhulo, wiwanana wa dhipaddi dhottiyana-ttiyana dha mBibiliani vina miselu dhiniziwihile Yehova mwaha wa mikalelo dhaye. (Masal. 1:2, 3) Iyo vina ninofwanyelela olobela nikumbirhaga muya wokoddela wila niwodhegevi okana mandano oliba na Yehova oku nimujedhelaga wakwaniha mapikirhelo a egumi yohimala.—Jud. 20, 21.
Dhahene ninga Mwene Davidi, kakana nikuluvelo nawi Yehova onele waweddiha, wabarela vina watonyihedha okwela woweddeyana abale otene animujedhela. (Masal. 33:18, 22) Nona kadhowagavi omujedhelaga Yehova n’ovilela modhela ozuzumela wubuwela dhilobo dhapama dhinupadduwela, omuttittimihaga, orumelaga olibihiwa na abali, arogora vina owaralihagavi njedhelo nawo.
a Nzu ntti “ojedhela” na elogelo yoroma, enodhaga otapuleliwa ninga “ofuna vaddiddi wila elobo epadduwe,” eji etonyihedhaga wila kahiyo yabure ofuna wila Yehova agomihe makattamiho ehu.
