1. Yoladdaniha gani ennikamihedha ononelamo wi ninofwanyela Weddihiwa na Yehova?

 KOBUWELA burimelile mukokolani. Buruguniwiwe na dhowopiha: Dhinama dha mutakwani, dhinama dhing’ono dhindaga ouraviha viredda, miri dhinna orhongozi owopiha, maleje vina malugu. Elobo egawukamihedhile okala ofwaseyene ja okana muttu wokuluveleya onziwa kakamwene dhipaddi dhinfwanyeya dhilobo dhowopiha vina mukalelo w’ovibarela! Elabo eji enkalihu enoladdanihiwa na mburho obu wowopiha. Dhihikalawo dhilobo dhinjene dhintxutxa okalawo wehu makamaka mpaddi womuyani. Mbwenyi iyo nihikana Nikamihedho nowakwana—Yehova. Iyene ononirabeliha dhowopiha eso vina ononikamihedha ofiya mburho ondowihu—egumi yamukalakala mwilaboni eswa.

2. Yehova onneddiha dhavi?

² Yehova onneddiha na mukalelo gani? Iyene onlabihedha makamaka Nzu naye Bibilia wi aneddihe. Ottiya ejo, iyene vina onowalabihedha attu wi aneddihe. Motagiha, iyene onomulabihedha “mwimeleli wororomeleya vina wa malago” wila anijihe mpaddi womuyani vina anikamihedhe okosa dhogana dha malago. (Mt. 24:45) Ottiya ejo, Yehova vina onowalabihedha attu ena ninga anameddelela milogo vina anddimuwa a mmulogoni. Awene anonivaha nipangarhazo vina malago annikamihedha ovilela makattamiho. Iyo ninotamalela venjene sabwa ya Yehova oneddiha na mukalelo wapama mwari mwa masiku aba orutxa ankalawo iyo, omagomo ohinafiya! Malago aba anonikamihedha odhowagavi nikalaga amarho a Yehova vina neddagavi mudilani ya egumi yamukalakala.

3. Dhilobo gani dhinasekeserhe iyo mwari mwa nsunzo ntti?

³ Masiki niziwaga dhetedhene esi, dila dhina ninodhaga orutxiwa  wiwelela malago a Yehova, makamaka akala malagoya ninvahiwa na attu ohakwana. Sabwaya jani? Txino malagoya kahiye abale agaziveliwihu wiwa, obe to ninodhaga wubuwela wila malagoya kannoneleyamo pama venevo baniroma wubuwela wi kandela wa Yehova. Bu mudhidhene obo onfwanyela iyo okuluvela wi Yehova ddineddiha nlogo naye vina ofwara magano aye elobo yapama enfwanyelihu okosa. Wila ninikamihedhe wunuwiha nikuluvelo nehu, mwari mwa nsunzo ntti ninele osekeserha (1) mukalelo weddihile Yehova nlogo naye masaka a mundduni, (2) mukalelo oneddiha Yehova nlogo naye masaka abano, vina (3) sabwaya enfwanyelihu odhowagavi nikuluvelaga malago a Yehova.

MUKALELO WEDDIHILE YEHOVA NLOGO NA IZRAYEL

4-5. Yehova olagihile dhavi wi wela omulabihedha Mizé wila àweddihe ana Izrayel? (Koona foto ya kapa.)

⁴ Yehova wahimuttoma Mizé wila asogorhele ana Izrayel obudduwa mw’Ejipitu. Vina Yehova wahalagiha kakamwene wila Iyene wela omulabihedha Mizé wila àweddihe. Motagiha, na mutana Yehova wanlabihedha murabo vina na mattiyu wanlabihedha motto wila àweeddihe. (Obud. 13:21) Mizé wanfwara murabo obule, ofiyedha wattukulela ana Izrayel Mwinje Wofila. Nlogo nahittiddiwa wova onddimuwa monelani wi ahirugunuwiwa na mwinje vina na anyakoddo a Faraó. Awene ahiroma wubuwela wi Mizé wahivonya vaddiddi sabwa ya wattukulela o Mwinje Wofila. Mbwenyi Mizé kavonyile. Ddi Yehova ofunile ottukulela nlogo naye wenewale, nona amulabihedha Mizé wila akose ejuwene. (Obud. 14:2) Ejo yahinvaha Yehova gari enddimuwa ya woniha owodha waye na mukalelo wowumiha milomo.—Obud. 14:​26-28.

⁵ Mwari mwa vyaka 40 dhafwarela, Mizé wahidhowavi akuluvelaga malago a Yehova wila awodhe weddihana nlogo nttile mwiddeddereni. a Wahifiya mudhidhi ottiyile Yehova murabo vadhulu va musasa wa Mizé wila ana Izrayel otene awodhe wona. (Obud. 33:​7, 9, 10) Yehova wanloga na Mizé, alabihedhaga murabo vina Mizé wanfiyedhana nlogo malago otene amwaddela Yehova. (Masal. 99:7) Ana Izrayel annona kakamwene wi Yehova wela omulabihedha Mizé wila àweddihe.

6. Ana Izrayel arumela dhavi malago avahiwani na Yehova? (Olebeliwa 14:​2, 10, 11)

⁶ Mokubanyiha-mwene ana Izrayel enjene ahipwaza vizinddiyelo dhotedhene dhoniha wi Yehova wela ologa na awene amulabihedhaga Mizé. (Kengesa Olebeliwa 14:​2, 10, 11.) Dila dhinji awene ahikodda orumelela wila Yehova wela omulabihedha Mizé. Sabwa ya ejuwene Yehova kattiyile ziza nttile na ana Izrayel ovolowa Mwilaboni Yopikirheliwa.—Oleb. 14:30.

7. Kaloga dhotagiha dha attu eddihiwe na Yehova. (Olebeliwa 14:24) (Koona vina foto.)

⁷ Mwa mpaddi mwina, ahikalawo ana Izrayel ewelela malago a Yehova. Motagiha, Yehova ohiloga: Kaleb ohidhowavi addiwelelaga na murima waye wotene. (Kengesa Olebeliwa 14:24.) Yehova wahimuttuva Kaleb ofiyedha omvaha epaddi modha ya elabo yasakuleliye Mwilaboni Yopikirheliwa. (Jos. 14:​12-14) Ziza na ana Izrayel nidhile osogorhowa nahidhowavi niwelelaga malago a Yehova. Mukweli Mizé Josuwé wahidha okala musogorheli wa ana Izrayel, awene “aroma omuriha . . . okalawo waye wotene.” (Jos. 4:14) Sabwa ya ejuwene, Yehova waharuriha ana Izrayel vina ohattukulela elabo yapikirheliye wavaha.—Jos. 21:​43, 44.

8. Katapulela mukalelo weddihile Yehova nlogo naye nsaka na amwene. (Koona vina foto.)

⁸ Vyaka dha musogorho Yehova ohattoma  anamattonga wi eddihege nlogo naye. Vasogorhova, masaka a amwene, Yehova ohasakula anamavuhulela wila eddihe nlogo naye. Amwene ororomeleya annakela malago na anamavuhulela. Motagiha, Mwene Davidi wahirumela noviyeviha olagiwa na namavuhulela Natan. (2 Sam. 12:​7, 13; 1 Map. 17:​3, 4) Mwene Josafat wahiwelela malago a namavuhulela Jaaziyel wila aziwe yafwanyeliye okosa na nlogo, ejuwene egàttukulele awene wunuwihavi waroromela anamavuhulela a Mulugu. (2 Map. 20:​14, 15, 20) Mwene Ezekiya vasegedheyiliye wahimutamela namavuhulela Izaiya. (Iza. 37:​1-6) Dila dhotene dhatamela amwene ofwara malago a Yehova awene anrurihiwa vina nlogo nakala nobareleya. (2 Map. 20:​29, 30; 32:22) Yannoneya-wene wila Yehova wela walabihedha anamavuhulela wila eddihe nlogo naye. Mbwenyi masiki dhawene amwene enjene vamodha na nlogo na Yehova, ahikodda wawiwelela anamavuhulela a Yehova.—Jer. 35:​12-15.

YEHOVA WAWEDDIHILE DHAVI AKRISTU OROMA

9. Yehova omulabihedhile ani wi àweddihie Akristu a sekulu yoroma? (Koona vina foto.)

⁹ Yehova witile mulogo wa Okristu va Pentekoste, yaka ya 33 E.C. Iyene waweddihile dhavi Akristu oroma? Yehova ohimuttoma Yezu ninga musorho wa mulogo. (Ef. 5:23) Mbwenyi Yezu kaloga kove na kove na muttu mmodha-mmodha amwaddelaga yafwanyeliye okosa. Ottiya ejo iyene ohalabihedha arumiwi na anddimuwa a mmulogoni o Jeruzalemi wila àweddihe Akristu oroma. (Mer. 15:​1, 2) Ottiya arumiwi bahi, iyene vina ohattoma anddimuwa a mulogo wila eddihe milogo.—1 Tes. 5:12; Tito 1:5.

10. (a) Akristu oroma àrumelile dhavi malago akelilani? (Merelo 15:​30, 31) (b) Masaka a wale attu ena akoddelani wakuluvela attu àlabihedha Yehova wi eddihe nlogo naye? (Kang’ana kasha “ Attu Ena Ankoddelani Orumela wi Yehova Onowalabihedha Attu wi Eddihe Nlogo Naye.”)

¹⁰ Koddi Akristu oroma ankuluvela mukalelo weddiha Yehova nlogo naye? Ndde, enjiya anakela malagoya nowagalala. Vina awene anagalala na nipangarhazo navahiwani. (Kengesa Merelo 15:​30, 31.) Kito masaka abano, Yehova oneddiha dhavi nlogo naye?

YEHOVA ONNEDDIHA DHAVI MASAKA ABANO

11. Kavaha yotagiha enoniha mukalelo oneddiha Yehova nlogo naye masaka abano.

¹¹ Yehova onodhowavi eddihaga nlogo naye masaka abano. Iyene onkosa ejuwene alabihedhaga  Nzu naye Bibilia vina amulabihedhaga Mwanaye Yezu odduwene oli musorho wa mulogo. Koddi iyo ninowona vizinddiyelo dhinnikuluveliha wi Yehova onowalabihedhavi attu wila eddihe nlogo naye? Ndde. Koona, motagiha epadduwile yaka ya 1870. Charles Taze Russell na akwaye abuwene amusunza Bibilia ahiroma ononelamo wi yaka ya 1914 egali yaka yamakamaka vaddiddi yewanana na wimetxiwa wa Omwene wa Mulugu. (Dan. 4:​25, 26) Wila awodhe ononelamo muselu obu, awene ahisunza venjene mavuhulo a mBibiliani. Koddi Yehova wela weddiha dhopepesa dhakosa awene? Kaninaganyedha. Epadduwile orugunuwa elabo yotene yaka ya 1914 ezinddiyelo enoniha kakamwe wi txibarene Omwene wa Mulugu wahiroma olamulela. Ji yakene ejo eromile Koddo Yoroma Erabiwe Elabo Yotene, oromana venevo dhilobo dhinji dhihiroma ottabwa, ninga winjiva wa maredda, ottekenyeya wa elabo vina dala. (Lk. 21:​10, 11) Kaninaganyedha, Yehova ohalabihedha alobwana abale ororomeleya wila akamihedhe nlogo naye.

12-13. Elobo gani ekosiwe mwari mwa Koddo Yanawili Erabiwe Elabo Yotene wila enjedhedhe mabasa a olaleya?

¹² Kobuwela vina mwaha wa Koddo Yanawili Erabiwe Elabo Yotene. Mmalelani otanalela nlebo na Ovuhulela 17:​8, abali a kwatti enddimuwa ahinonelamo wi koddo ejile kigatotile Armagedon, ottiya ejo egàttukulela okana mudhidhi mung’onovi wa murenddele obuwene ogàvahile gari wila enjedhedhe mabasa awa. Awene ahikosa yogana yoneya ninga kigattiddile mpirha, ahita Eskola ya Gileade de Tore de Vigia wila àshagihe amisionario wila awodhe okosa mabasa a olaleya vina osunziha mwari mwa dhipaddi dhottiyana-ttiyana dha elabo. Amisionario enjene ahittomiwa masiki mudhidhi obule wa koddo, ottiya ejo mudhari wororomeleya wa malago wahita kursu ya Ministério Teocratico b wila abaliya akale anamalaleya vina akale anamasunziha a ttotto. Na mukalelo obu, nlogo na Yehova nela oshagihiwa wila niwodhe ottidda mabasa manddimuwa vaddiddi agadhile musogorho.

¹³ Nigatanalela dhipadduwile masaka a mundduni, ninowona kakamwene wi Yehova wela weddiha nlogo naye mwari mwa mudhidhi obule worutxa. Oromana Koddo Yanawili Erabiwe Elabo Yotene, nlogo na Yehova ninolaleya na ofuru mwari mwa dhilabo dhottiyana-ttiyana. Mwebaribari mabasa aba a olaleya anowunuwavi orugunuwa elabo yotene.

14. Ninfwanyelela nni okuluvela malago andela munikuruni na Yehova vina wa anddimuwa a mmulogoni? (Ovuhulela 2:1) (Koona vina foto.)

 ¹⁴ Masaka abano, abali a Nikuru Nolamulela anodhowavi afwaraga malago a Yezu. Awene anokosa ejuwene modhela okosa dhogana dhiniwanana na efunelo ya Yezu. Ottiya ejo, anameddelela milogo vina anddimuwa a mmulogoni anolabihedhiwa wila àfiyedhena malago awa abali a mmilogoni. c Anddimuwa a mmulogoni ali attikitteliwi ali “mmadani noja” na Yezu. (Kengesa Ovuhulela 2:1.) Ebaribari wi anddimuwa otene a mmulogoni attu ohakwana vina anovonya. Mizé, Josuwé ahivonya dila dhinji, arumiwi vina ahivonya. (Oleb. 20:12; Jos. 9:​14, 15; Rom. 3:23) Masiki dhawene, iyo ninowodha wona kakamwene wi Yezu onodhowavi amulabihedhaga mudhari wororomeleya vina anddimuwa a mmulogoni, iyene onele odhowavi alabihedhaga alobwana aba “masiku otene ofiyedha omagomelo wa elabo.” (Mt. 28:20) Nona iyo nihikana mwaha dhinjene dha okuluvela malago annivaha Yezu àlabihedhaga alobwana aba ororomeleya.

EKALELENI YAPAMA WAKULUVELA ABALI ANALABIHEDHA YEHOVA WILA EDDIHE NLOGO NAYE

15-16. Elobo gani ensunziwe na dhotagiha dha attu afwarile malago a Yehova?

¹⁵ Iyo nigafwara malago a Yehova, ninowodha ozinddiyela kakamwene marelihoya. Ninga motagiha, Andy na mwadhiye Robyn afwara malago a mudhari wororomeleya wa malago anloga mwaha wa ovevutxa egumi. (Koona Ahebreu 13:5.) Sabwa ya okosa ejuwene, awene ahikamihedha mabasa a omaga Nyumba dha Omwene na dhina. Robyn onologa: “Dila dhina iyo nihifiyedha okala nyumba eng’ono, yahana kuzinya. Miyo vina ddahidha oguliha dhipano dhaga dhottiyana-ttiyana ninga makina a opidana foto, abuwene ali mabasa addizivela vaddiddi. Miyo ddafiyedha wunla mudhidhi ogulihile miyo makina aga a opidana foto. Dhahene ninga Sara mwadhi Abrahamu miyo ddahigana ohiyelela mundduni.” (Aheb. 11:15) Mbwenyi Andy na mwadhiye Robyn anubuwela eni mwaha wa dhotedhene esi dhigumanilena awene? Robyn onologavi: “Iyo nahikana wagalala onddimuwa mwaha wa oziwa wi ninokosa muli mwetemwene wila nimulabele Yehova mpaka vanwodhelihu. Nigalabaga na nikuru na Yehova, ninowodha ozinddiyela mukalelo onagalale iyo mwilaboni eswa.” Mamune Andy vina ologa: “Iyo ninowagalala sabwa ya oziwa wi ninolabihedha mudhidhi  na guru dhehu dhotedhene wila nimulabele Yehova.

¹⁶ Koona yotagiha yina enlagiha ekalelani yapama wiwelela malago a Yehova. Mmalele Marcia ogomiha masunzo aye, iyene wahigana ofwara malago okala pionera. (Mt. 6:33; Rom. 12:11) Iyene onologa: “Miyo ddahivahiwa ofuru wa okosa masunzo manddimuwa mwari mwa vyaka nayi ddihipitxaga elo vina ddivahiwaga nikamihedho. Mbwenyi miyo ddanfuna omukosela mabasa menjene Yehova. Nona ddahigana okosa kursu yohigonela vina osunza ottidda mabasa ovevuwa agaddikamihedhile ovisapela ninga pionera. Eji yogana yamakamaka vaddiddi ekosile miyo mwari mwa egumi yaga. Ovano ddinokamihedha ninga pionera wa mudhidhi wotene, masiki ddittiddaga mabasa mena ddinokana mudhidhi wokamihedha o Beteli vina omuttiddela Yehova mabasa ottiyana-ttiyana.”

17. Dhopurelamo gani dhina dhinakela iyo sabwa ya ofwara malago a Yehova? (Izaiya 48:​17, 18)

¹⁷ Dila dhina, iyo ninowakela malago munikuruni na Yehova annibarela, ninga motagiha iyo ninowaddeliwa mwaha wa ngovi ya ozuzumeletxa dhorela vina ya okosa dhilobo dhiganittukulele olupa malamulo a Mulugu. Nigewelelaga malamulo ninga aba ninele okana wagalala onda mwa wiwelela magano a Yehova. Enowodheya iyo okana mobuwelo wotxena vina orabela makattamiho menji. (1 Tim. 6:​9, 10) Nigakosa ejene ninele owodha omulabela Yehova na murima wehu wotene. Mwilaboni kamuli elobo enwodha onivaha wagalala, ofwasa vina ottugareya.—Kengesa Izaiya 48:​17, 18.

18. Weyo oganele nni odhowavi ofwaraga malago a Yehova?

¹⁸ Kaninaganyedha, Yehova onele odhowavi àlabihedhaga attu wila aneddihe mudhidhi wa goyi enddimuwa vina mwari mwa Vyaka Txikwi Dhinalamulele Yezu elabo ya vati. (Masal. 45:16) Koddi iyo ninele wiwelela malagoya aba masiki nikanaga efunelo ya okosa dhilobo dhina? Elobo enanikamihedhe wiwelela malago a Yehova nsaka ntto ja wiwelela malago anakela iyo masaka abano. Eji enowiwanana na orumela malago otene annivaha iyene àlabihedhaga attu attomiliye wila aneddihe. (Iza. 32:​1, 2; Aheb. 13:17) Ninfware Nameddiha wehu, Yehova, na nikuluvelo nawi iyene onele onibarela mwa dhowopiha vina onele oneddiha okalawo wehu wotene mpaka—mwilaboni eswa.