1. Attikitteliwi otene anadhowe wirimu mudhidhi gani?

 VYAKA dha mundduni nikuru na Yehova nanvivuza, ‘Attikitteliwi ahalilewo anadhowe wirimu mudhidhi gani?’ Wale iyo nobuwela wi attikitteliwi agahikala velaboni ya vati vina agahikalawovi mudhidhi mong’onovi Mparaizu koddo ya Armagedon egavira. Mbwenyi A Sentinela 15 de Julho de 2013, ohitapulelamo wi, koddo ya Armagedon ehinatti attikitteliwi otene owakwana 144.000, agahidhowa wirimu.—Mt. 24:31.

2. Nivuzo gani txino nindhaga iyo ovikosa vina txini enasekeserhe iyo mwari mwa nsunzo ntti?

² Mbwenyi ena mwa iyo ninodhaga ovivuza: Txini enapadduwe na mabila mena a Kristu anamulabelege Yehova nororomeleya mwilaboni mudhidhi wa “goyi enddimuwa”? (Jo. 10:16; Mt. 24:21) Ena ankosa mpaddi wa mabila mena anodhaga ozuzuma sabwa ya ohiziwa enakose awene obe sabwa ya wubuwela wi kanakane muttu onàkamihedhe vina onàzuzumele abali na arogora ali attikitteliwi agadhowa wirimu. Obe txino awene anodhaga wubuwela dhahene sabwa ya mapadduwo meeli a mBibiliani. Ndoweni none mapadduwo aba vina none sabwaya ehinfwanyelihu ozuzuma.

TXINI EHINAPADDUWE?

3-4. Mavuzo gani andhaga attu ena ovikosa nanda sabwaya jani?

³ Ena txino anodhaga ozuzuma obuwelaga wi abale ankosa mpaddi wa mabila mena anodhaga ottiya omulabela Yehova mudhidhi ohinakanani nikamihedho na attikitteliwi ali abali a Nikuru Nolamulela. Txino enàttukulele wubuwela dhawene mapadduwo mena a mBibiliani. Ndoweni none dhotagiha bili. Yoroma tti nipadduwo na Namakutta Munddimuwa Joyadá. Iyene wali mudhari wororomeleya wa Mulugu. Iyene na mwadhiye Josabat ahimbarela muzombwe wakuweliwa Jowás vina ahimukamihedha okala mwene wapama vina wororomeleya. Nsaka nikalilewo Joyadá, Jowás ohimulabela Yehova nororomeleya vina  ohikosa dhilobo dhapama. Mbwenyi mukwile Joyadá, Jowás wahiroma okosa dhilobo dhabure. Iyene ohivuruwana malago amoso abure vina ohittiya omulabela Yehova.—2 Map. 24:​2, 15-19.

⁴ Yotagiha yinagu ja Akristu oroma akalilewo mmalile arumiwi okwa. Murumiwi Joau ddi murumiwi womariha okwa, mudhidhi waliye mento ohakamihedha Akristu enjene okalavi ororomeleya. (3 Jo. 4) Dhahene ninga mwakosile arumiwi ena a Yezu, Joau ohikosa muli mwetemwene wi abarele milogo mwa miselu dhottambi dhavavihiwa na asadduweli nsaka nttile. (1 Jo. 2:18; 2 Tes. 2:7) Mudhidhi okweli Joau, miselu dhottambi dha asadduweli dhahidha winjiva vaddiddi dhahene ninga empadduwa na motto onddumeya takwa. Vina vyaka dha musogorho, asadduweli aba ansunziha miselu dhottambi vina anrumeliha dhilobo dhabure opadduwa mmilogoni dhotene.

5. Mowiwanana na mapadduwo aba meeli dhilobo gani dhihinfwanyelihu wubuwela wi dhinele opadduwa?

⁵ Mapadduwo aba omeeli anfuna atapulele wi jakene enapadduwele mabila mena a Kristu mudhidhi onadhowe attikitteliwi wirimu? Akristu ororomeleya anakale velaboni ya vati anele oroma okosa dhilobo dhabure dhahene ninga Jowás, obe anele okala asadduweli dhahene ninga ekosile enjene mmaleli arumiwi okwa? Nne, ejo kinapadduwe! Iyo nihikana nikuluvelo wi mudhidhi onadhowe attikitteliwi wirimu mabila mena anele odhowavi amulabelaga Yehova na mukalelo wapama vina iyene onele odhowavi àzuzumelaga. Ninkanelani ebaribari eji?

WEBEDHA WEBARIBARI TXIPO KUNAGOME

6. Midhidhi gani miraru dhinfunehu osekeserha?

⁶ Iyo ninfwanyelela nni okana ebaribari wi webedha webaribari kunagome masiki na makattamiho anagumanihuna? Sabwani Bibilia onotapulelamo wi iyo ninkalawo masaka ottiyana vaddiddi na masaka a ana Izrayel vina nsaka nifwarele mmaleli arumiwi okwa. Nona, ninele ononelamo pama dhipadduwile mmidhidhini esi miraru: (1) Nsaka na ana Izrayel awale, (2) nsaka nifwarele mmaleli arumiwi okwa, vina (3) nsaka nehu, nsaka ninavenyihedhiwe dhilobo dhotedhene.—Mer. 3:21.

7. Nroromelo na ana Izrayel a wale nakoddelani odeba masiki vawonani amwene na ena akosaga dhabure?

⁷ Nsaka na ana Izrayel awale. Ahalagawo malabo mang’ovi Mizé ahinakwa, iyene wahawaddela ana Izrayel: “Ddiziwa pama: Miyo ddigakwa, nyuwo munosadduwa mukale anamavuta, munothiya dila ya Nabuya [eutonyihedhileni] miyo.” (Olib. 31:29) Mizé vina wahawaddela ana Izrayel wi kukoodda wiwelela, awene agahitxedhiwa. (Olib. 28:​35, 36) Koddi mazu aba ahidha wakwanihedheya? Ndde. Mwari mwa vyaka dhinjene, amwene enji ahigana ohimwiwelela Yehova vina ahittukulela nlogo okosa webedha wottambi. Sabwa ya ejuwene Yehova wahinyanyala nlogo naye novuta vina kattiyile nne ngafuna mwene mmodha wa ana Izrayel osogorhela nlogo ntti. (Ezek. 21:​25-27) Mbwenyi monile ana Izrayel ena wakwanihedheya wa mazu a Yehova, awene ahilibiha efunelo yawa ya amulabelavi Yehova n’ororomeleya.—Iza. 55:​10, 11.

8. Koddi iyo ninofwanyela otikina sabwa ya oziwa wi mumalile arumiwi okwa, Akristu ahittiya weedda na ebaribari? Katapulela.

⁸ Nsaka nifwarele mmaleli arumiwi okwa. Koddi ninotikina sabwa ya oziwa wi mulogo wa Akristu a sekulu yanawili ogahikala wa asadduweli? Nne. Sabwani Yezu wahimala ovuhulela wi ejo egahipadduwa. (Mt. 7:​21-23; 13:​24-30, 36-43) Murumiwi Paulo, Pedro vina Joau ahiloga wila nivuhulo ntti na Yezu nahiroma wakwanihedheya nsaka nawa,  sekulu yoroma nsaka na Kristu. (2 Tes. 2:​3, 7; 2 Ped. 2:1; 1 Jo. 2:18) Mudhidhi mung’onovi mmaleli murumiwi womariha okwa, Akristu ali asadduweli ahidha okosa mpaddi wa Babilónia Munddimuwa oli marelijiau otene ottambi. Wili, ejile yalogile Yezu yahidha wakwanihedheya.

9. Nsaka nehu nittiyanile dhavi na nsaka na ana Izrayel a wale vina na mulogo w’Okristu wa sekulu yanawili?

⁹ Nsaka ninavenyihedhiwe dhilobo dhotedhene. Nsaka nehu nihittiyana na nsaka na ana Izrayel a wale vina na nsaka nisadduwile Akristu oroma bakala asadduweli. Kito nsaka ntti ninkuweliwa dhavi? Iyo ninkuwela nsaka ntti dhahi: “Masaka omariha” a elabo eji yabure. (2 Tim. 3:1) Mbwenyi Bibilia ononiha wi nsaka nakene niromile masiku omariha, nihiroma vina nsaka namakamaka vaddiddi nigagonelile mudhidhi mwinjene. Nsaka ntti ninele odhowavi mpaka Omwene oli mmadani mwa Yezu ottukulela nlogo na attu okala oligana vina otxinja elabo ekale paraizu. Nsaka ntti, ninkuweliwa nsaka ninavenyihedhiwe dhilobo dhotedhene. (Mer. 3:21) Nsaka ntti niromile yaka ya 1914. Mbwenyi txini evenyihedhiwe? Yezu ohittomiwa ninga Mwene wirimu. Eji enowoniha wi Yehova wahikana wili Mwene, agamuhabile mpaddo Mwene Davidi. Mbwenyi Yehova kavenyihedhile omwene obu bahi. Mudhidhi mung’onovi mmaleliye ovenyihedha Omwene obu, webedha webaribari wahiroma ovenyihedhiwa! (Iza. 2:​2-4; Ezek. 11:​17-20) Kito webedha webaribari onele otximihiwa wili?

10. (a) Txini yavuhulele Bibilia mwaha wa webedha webaribari masaka aba ehu? (Izaiya 54:17) (b) Mavuhulo aba annagalaliha dhavi?

¹⁰ Kengesa Izaiya 54:17. Kobuwela nivuhulo ntti: “Kaiwo epano enawodhe ounonga”! Mazu aba ovudheleliwa anowakwanihedheya masaka abano. Ottiya ejo, mazu a Izaiya 54:​13, 14 anowakwanihedheya masaka abano vina anonidhelana nipangarhazo ninddimuwa vaddiddi: Anawo otene anasunzihiwe na Yehova vina anele okana murenddele munddimuwa vaddiddi. Weyo onele wimetxiwa pwi muliganani. . . . Kunawovege elo vina kunakanege mwaha wa ogurumela sabwani wova kunawuwaddamelege. Masiki Satana mulugu wa elabo ejino, kanwodha otximiha mabasa a wasunziha attu mwaha wa Yehova. (2 Kor. 4:4) Webedha webaribari ohivenyihedhiwa, kunaravihiwe vina na marelijiau ottambi. Webedha webaribari onelege odhowavi okala-n’okala-wene. Kahiwo epano enawodhe otolotxa nlogo na Yehova!

 TXINI ENAPADDUWE?

11. Ninziwa dhavi wi muttitti munddimuwa kunanyanyaliwe attikitteliwi agadhowa wirimu?

¹¹ Txini enapadduwe attikitteliwi agadhowa wirimu? Kudduwale wi Yezu ddi Mukumbuzi wehu. Iyene musorho wa mulogo w’Okristu. Yezu wahoniha ebaribari ya mazu aba valogiliye dhahi: “Musogorheli wenyu ddi mmodha bahi, Kristu.” (Mt. 23:10) Mwene wehu ohiroma olamulela, iyene vina txipo kanavonye wakwanihedha mabasa attomeliwiye. Vowi Kristu ddinnisogorhela, iyo kaninfwanyela wova elobwene velaboni ya vati. Ebaribari wi iyo kaninziwa mukalelo oneddihe Yezu nlogo naye mudhidhiya ogafiya. Nona ndowe none dhotagiha dha mBibiliani dhindaga onifwasiha.

12. Yehova weddihile dhavi nlogo naye (a) mukweli Mizé? (b) muttomeliwe Eliya mabasa maswa? (Koona vina foto.)

¹² Mizé okwile ana Izrayel ahinavolowa Mwilaboni Yopikirheliwa. Kito txini epadduwile na awene? Vowi kanna nikamihedho na Mizé kagaziwile yokosa? Nne. Mudhidhi wakalani oweddeyana na Yehova iyene wannaweddiha. Mizé ahinakwa, Yehova wahimwaddela wi wanfwanyela omuttoma Josuwé wi akale musogorheli wa nlogo. Mizé ohimushagiha Josuwé mwari mwa vyaka dhinji. (Obud. 33:11; Olib. 34:9) Ottiya ejo ahikalawo alobwana enji ali omala-nawale wila asogorhele nlogo nttile—asogorheli a matxikwi-matxikwi, mazana-mazana, makumatanu-makumatanu vina a attu kumi-kumi. (Olib. 1:15) Nlogo na Mulugu nanneddihiwa pama-wene. Yotagiha yina ja Eliya. Mwari mwa vyaka dhinji iyene ohikamihedha nlogo na Izrayel odhowanavi webedha wawa webaribari. Mbwenyi nahifiya nsaka namuttomeli Yehova Eliya mabasa maswa epaddi y’ogusuni y’o Juda. (2 Amwe. 2:1; 2 Map. 21:12) Koddi na matxinjo aba ana Izrayel a mahimo kumi ahinyanyaliwa? Nne. Eliya ohimushagiha Elizeu mwari mwa vyaka dhinji. Ottiya ejo ahikalawo vina ana a anamavuhulela, abuwene ali makuru-makuru vina akelile mashagiho. (2 Amwe. 2:7) Kuloga, ahikalawo alobwana enji ororomeleya ali omala-nawale wi eddihe nlogo na Yehova. Yehova wahidhowavi akwanihedhaga yogana yaye vina ohaweddiha pamene adhari aye.

13. Txini ennipikirhela Yehova va Ahebreu 13:5b? (Koona vina foto.)

¹³ Mmaleli weyo wona dhotagiha esi, elobo gani enubuweliwe wi enele opadduwa muttikitteliwi womariha agadhowa wirimu? Kili yofuneya wubuwela vaddiddi. Mbibiliani ninofwanya ebaribari ehinrutxa ononelamowa vina  ennittukulela okala ofwaseyene: Yehova txipo kananyanyale nlogo naye velaboni ya vati. (Kengesa Ahebreu 13:5b.) Masaka abano nihikalawo nikuru ning’ono na Akristu ali attikitteliwi aneddiha nlogo na Mulugu, Nikuru Nolamulela. Dhahene ninga Mizé na Eliya awene anowashagiha abali ankosa mpaddi wa mabila mena wila akamihedhe weddiha nikuru na Yehova. Motagiha, Nikuru Nolamulela ninosasanyedha dhiskola wi àshagihiwe anddimuwa a mmulogoni, anameddelela milogo, abali ansogorhela Filiali, asogorheli o Beteli na abali ena. Awene vina anovilibihedha washagiha abali a miparha dhottiyana-ttiyana dha Nikuru Nolamulela. Akamihedhi aba ahikana muttorho munddimuwa oromana ovanene vina awene ali omala-nawale wi adhowegenavi mabasa a weddiha mabila a Kristu.

14. Mwari mwa nsunzo ntti elobo gani enonelemo iyo pama?

¹⁴ Mpaka veneva nihona elobo enapadduwe mudhidhi onattukuliwe wirimu muttikitteliwi womariha: Omamalelo wa goyi enddimuwa adhari a Yehova anelege odhowavi amulabelaga Yehova. Sabwa ya osogorheliwa na Yezu Kristu, iyo kaninattiye omwebedha Yehova. Ebaribari wi mwari mwa mudhidhi obo iyo ninele olupeliwa na Gog wa Magog—wiwanana wa malogo. (Ezek. 38:​18-20) Mbwenyi olupeliwa oku kunagonele vina onele ovonya; olupeliwa oku kunattabwetxe mpaka onittukulela iyo ottiya omwebedha Yehova. Kaninaganyedha wi Yehova onele onivuna! Muwonihiwani, Joau ohona “muthithi munddimuwa” wa mabila mena a Kristu. Joau vina wahidha wona wi “muthithi munddimuwa” onàtonya abale agaviluwile mu goyini enddimuwa. (Ovuh. 7:​9, 14) Ndde, kaninaganyedha wi Yehova onele onivuna!

15-16. Mowiwanana na Ovuhulela 17:​14, mabasa gani anakose attikitteliwi mwari mwa koddo ya Armagedon, nanda ejo ennilibiha dhavi?

¹⁵ Masiki dhawene txino ena anowubuwela: ‘Txini enàpadduwele attikitteliwi? Mabasa gani anattiddani wirimu?’ Bibilia onowakula se opipiriha mavuzo aba. Bibilia onotapulelamo wi alamuleli a elabo ejino anere oraba koddo na “Mwana-Nibila.” Mbwenyi awene  kanapemberhe. Bibilia onloga wi “Mwana-Nibila onere [opemberha].” Kito bani onamukamihedhe Yezu? Versu yakene enowakula. “Abale ethaniwe,” “asakuliwe na Mulugu” vina “aniwananeyana na iyene.” (Kengesa Ovuhulela 17:14.) Aboya bani? Ba attikitteliwi anavenyihiwe mukwani! Nona muttikitteliwi womariha anadhowe wirimu omagomo wa goyi enddimuwa, mabasa oroma anakeliye ba owana. Aba anele okala mabasa manddimuwa vaddiddi! Attikitteliwi ena ahinakala Anamoona a Yehova ahimala olemela owana na attu ena, enagu ali anyakoddo. Mbwenyi mukalilani Akristu ahidha oziwa dila ya murenddele. (Gal. 5:22; 2 Tes. 3:16) Awene ahittiya okamihedha koddo. Mbwenyi agamala ottukuleliwa wirimu, awene anele okala na Yezu, na anju aye okoddela vina anere oraba koddo yomariha na amwiddani a Mulugu.

¹⁶ Kobuwela dhahi! Masaka abano velaboni ya vati, attikitteliwi ena anakalaba vaddiddi vina kana guru. Mbwenyi agavenyihiwa wila akale wirimu, anele okala dhottanddiwa dhomuyani dhihinkwa, dha ewodhelo vina anele owana mumodhani na Mwene wa Anyakoddo, Yezu Kristu. Koddo ya Armagedon egamala awene anele olaba mumodhani na Yezu Kristu wila àkamihedhe attu ofiyedha okala oligana. Kaninaganyedha, mabasa anàkosele attikitteliwi aba abalawa na arogora okweleya a velaboni ya vati anopitta mabasa àkosele awene valani velaboni ya vati na maningo ohakwana!

17. Ninziwa dhavi wi adhari otene a Yehova anele okala obareleyene mwari mwa koddo ya Armagedon?

¹⁷ Weyo onokosa epaddi ya mabila mena? Kito txini enfwanyela weyo okosa koddo ya Armagedon ejuwene enakale koddo ehinoneyaga velaboni ya vati egaroma? Kirutxile: Omukuluvele Yehova vina ofware malago aye. Eji entapulela eni? Bibilia onotapulelamo va Izaiya 26:20: “Volowani mba mwenyu, fugani misuwodhá, kalaní mwenemo; vitalani mudhidhi muñgonovi mpaka vanagome osilidheya wa Nabuya.” Kuloga, adhari otene ororomeleya a Yehova Mulugu masiki ali wirimu vina a velaboni ya vati anele okala obareleyene mwari mwa koddo ya Armagedon. Dhahene ninga mulebile murumiwi Paulo, iyo ninofwanyela okuluvela wi nne “[mulamuleli], nne dh’ovano, nne dh’osogorho . . . [kadhinawodhe-wene] onimwalaniha n’okwela wa Mulugu.” (Rom. 8:​38, 39) Kudduwale: Yehova onowukwela vaddiddi vina txipo kanawunyanyale!