ANAMALEBA ena a Bibilia ahiyelela mazu akene, nzu-nzu. Katanalela dhotagiha ttaru dhinoniha ejuwene:

Mudhidhi olebiwani. Nsaka na ana Izrayel, attu enjene kanna koopiya ya Malamulo wi alabihedhe. Dila dhinji, nsaka nakanani gari ya ovuruwana Malamulo a Mulugu yali mudhidhi watugumana nlogo osogorho wa mparha. (Olib. 31:​10-12) Txino midhidhi esi kiyarutxa attuya ozuzuma na elobo-elobovi, oku bemele avuruwanaga Malamulo mawora menjene vina vari va muttitti wa attu enjene. (Neh. 8:​2, 3, 7) Nona, wi nlogo niwodhe wubuwela yengesiwa vina awodhe ovirihamo malagoya mwigumini mwawa yanfuneya wiyelela mazu amakamakaya. Wiyelela mazu mang’onovi yali yamakamaka wi nlogo nubuwele deretu miselu dhalogiwa munlamuloni navahiwani na Mulugu.—Onam. 18:​4-22; Olib. 5:1.

Mukalelo olebiwani. Dhipaddi dhina dha mBibiliani dhilebiwe ninga jibo—motagiha, nivuru na Masalmo, Jibo ya Aliba Okwelana vina Enthothobelana. Jibo dhina dhihikana ogalamuwa dhinna mazu aniyeleliwa, nanda eji enottukulela vadhulu mutoma wa jiboya, dhahene àkamihedhaga anamewa a jiboya wubuwela mazuya. Motagiha, koona mazu anfwanyeya va Masalmo 115:​9-11: “Nlogo na Izrayel ninomuroromela Nabuya, vowi iyene ddinnakaliha, ddinnawamelela. Nihimo na Aroni ninomuroromela Nabuya, vowi iyene ddinnakaliha, ddinnawamelela. Animuriha Nabuya, anomuroromela, vowi iyene, ddinnakaliha, ddinnawamelela.” Onowodha ozinddiyela mukalelo ogakamihedheyile anameba okoya mazu a jibo mmurimani sabwa ya mazuya wiyeleliwa dila dhinjene?

Elebeliwani. Anamaleba a Bibilia dila dhina anleba mazu amakamaka dila dhowinjiva. Motagiha, vawaddelile Yehova ana Izrayel wi anfwanyela otadha nikami, Yehova wahimuruma Mizé wila alebe dila dhinji mwahaya yafwanyelani otadha. Yehova afuna anonihedhemo pama wila nikami entonyihedha egumi. (Onam. 17:​11, 14) Mudhidhi mung’onovi musogorhomwa, valebile arumiwi na anddimuwa a mmulogoni w’o Jeruzalemi dhilobo dhafwanyela Akristu orabela wi anamunyimule Mulugu, wili awene ahiloga dila yanawili ofuneya wa otadha nikami.—Mer. 15:​20, 29.

Ebaribari wi mBibiliani muhikala mazu menji eyeleliwe, mbwenyi eji kintapulela wi Yehova onnifunana wila nikalelege wiyelela mazu-ene abo. Motagiha, Yezu ohiloga: “Mugalobelaga kamwiyelelege mazu akakene.” (Mt. 6:7) Iyene ologa makani anfwanyelihu oromolaga mmalobeloni mwehu aniwanana na efunelo ya Mulugu. (Mt. 6:​9-13) Nona masiki iyo nirabelaga wiyelela mazu akene mmalobeloni mwehu, enowodheya iyo oromolaga makani akene mmalobeloni mwehu.—Mt. 7:​7-11.

Dhihikalawo mwaha dhapama dhinttukulela wiyeleliwa mazu mena a mBibiliani. Obu mukalelo mmodha mwari mwa mikalelo dhinji dhinlabihedha Yehova, Namasunziha wehu Munddimuwa wila anisunzihena dhilobo dhinanikamihedhe.—Iza. 48:​17, 18.